Wamama 'Re ihâimana u'âsi mono duré Wanhib'apito Cristu Zezusihi zama, isimizawi zahuré zé duré da'ãma 're isiba zahuré mono zé duré ite rowẽ u'âsi zahuré hã, ai'ãma 're ihâimana u'âsi za'ra mono da si, iwẽ hã.

3 Wa ãma aiwi waptẽ, tô a'â aihâimana Éfézu ãma hã. Masédonia na danhipti'a nho'õmo nhisi u ĩmorĩ wa, te a'â ai'ãma iropti ne, wa ai'ãma ropti. Tame 'ri nho'õmo 'remhã, ni'wam norĩ hã te te dama 're roti za'ra, roti aimawi senai'õ na. Ta norĩ ma, ma'ãpé aimreme tãma pẽtẽ za'ra na, te te sahâri za'ra da. 4 Tãma nharĩ za'ra na, ta norĩ ma, dahi'rata hawi rob'rãzarõtõ na si 're 'rãza'õtõ za'ra mono tõ da, duré dahi'rata norĩ nhisi ahâ uptabi na 're ihâimana za'ra mono na zama 're rĩtĩ nho'õmo za'ra mono tõ da. E marĩ wa. Taha zarina taré ãma 're dasisada'âbâ za'ra mono wa. Ta norĩ hã 'Re ihâimana u'âsi mono te te 're irowa'õtõ mono zarinai õ di. Te te 're i'arowa'õtõ mono zé hã, da te dasina 're i'umnhasi za'ra mono zarina si te za da te 're waihu'u za'ra. 5 Ãne, wa ãma aima roti, da te 're waihu'u za'ra mono da, ã hã: Ni'wai ma ipẽ'ẽ 're duré isimirosa'rata 'remhã marĩ iwasédé tãma 're hâimana mono õ wamhã, duré sena na 'Re ihâimana u'âsi mono te te sina 're umnhasi mono wamhã, taha zarina te za te te 're da'azawi pese, ta hã. 6 Ni'wam norĩ hã, ãne nhiti ma tô sina tipahâ za'ra, marĩ dai õ na si 're sisada'âbâ za'ra mono da. 7 Ta norĩ hã te te sima 're wẽ pese za'ra, 'Re ihâimana u'âsi mono nhimiroti zahi na dama rowahutu'wa na 're hâimana za'ra mono da. Tane nherẽ, 're sisadaihu'u za'ra mono õ di 'râwimhã, te te 're irowahutu za'ra mono zém na, duré sima hã sena newa te te 're irowahutu za'ra mono zéb zama, siwawãi ãna.

8 Wa waihu'u za'ra ni, 'Re ihâimana u'âsi mono nhimiroti zahi iwẽ uptabi na hã, i'uwaibaba na ãma 're dahâimana za'ra mono wamhã. 9 Wa duré waihu'u za'ra ni, i'uwaibaba na 're ihâimana za'ra mono norĩ ma rotizéb da, 're ihâimana mono õ na hã. Tazahã, 'Re ihâimana u'âsi mono nhimiroti te te 're iwẽ'õ za'ra mono norĩ ma si rotizéb da, te 're hâimana, duré dama ipire norĩ te te 're iwazéb za'ra mono õ norĩ ma duré 'Re ihâimana u'âsi mono zazei'õ'wa norĩ ma duré tiwasété si te te 're i'manharĩ za'ra mono norĩ ma duré 'Re ihâimana u'âsi mono wazéb õ 'wa norĩ ma, duré marĩ te te 're i'manharĩ wasété za'ra mono 'Re ihâimana u'âsi mono wazéb ãna, duré timama tina zama te te 're isimroi mono norĩ ma, duré te te 're idanhimroi mono norĩ ma zama. 10 Duré siséb ãna dasina dahâimana na 're ihâimana za'ra mono norĩ ma rotizéb da hã duré aibâ si'uiwa sina 're ihâimana za'ra mono pi'õ si'uiwa zama, duré dawada'uri zarina dama romhuri'wa da, te te dama 're idawede za'ra mono norĩ ma, duré isadawa nhipese norĩ ma duré da'ãma rowairébézéb ãma da'ãma rowairébé'wai ma senai'õ nherẽ, te te 're idawasu'u wasété zahi za'ra mono norĩ ma duré siwa'ru marĩ te te 're i'manharĩ za'ra mono norĩ ma rotizéb da hã, tô sena 'Re ihâimana u'âsi mono nhimiroti zada. 11 Ã hã roti, 'Re ihâimana u'âsi mono te te ĩma isõmri te dama 're 'mahârâ mono da, ta hã Rowasu'uwẽ 'Re ihâimana u'âsi mono iwẽ uptabi hawimhã.

12 Wanhib'apito Cristu Zezusihi ãma wa ĩwata, ĩnhiptede te te ĩma 're isõmri mono zém na, ĩnhimiromhuri te 're i'manharĩ mono da hã. Tãma ĩ'umnhasi na te te 're ĩ'madâ'â mono wa, wa duré ãma ĩwata, duré te te sima ĩpisutu wa, te tãma 're romhuri mono da hã. 13 Ãne hã ma tô Õ hã 'manha, duréihã te ãma 're wasété mono nherẽ, duré i'u'âbâ isazei'wa norĩ ma, te 're arob'manharĩ wasété mono nherẽ, duré ĩzahi na sada 're ĩhâimana za'ra mono nherẽ. Tane nherẽ, 'Re ihâimana u'âsi mono hã ma tô ĩ'ãma aiwamri, te ĩsina 're i'umnhasi mono zé hã ĩma 're hâimana mono õ wa aré. Tahawa ĩsisãmri ãna wa tô marĩ te 're ab'manharĩ, i'uwaibaba newa. 14 Wanhib'apito nhimizawizé hã sa'ẽtẽ uptabi na ma tô ĩ'ãma tihâiba. Duré isimizawizép siré ma tô oto ĩ'ãma tihâiba, te ĩsina 're i'umnhasi mono zé hã duré ĩnhimizawizé Cristu Zezusihi ãma 're ihâimana mono hã. 15 Ã hã iwasu'u hã tô sena uptabi. Duré tô sena na te 're hâimana, da te 're isaze za'ra mono da hã, ã hã: Cristu Zezusi hã ti'ai u ma tô wei mo, wasété na 're inomro mono norĩ hã te te 're anho'reptui mono da. Wa hã, wasété na 're ihâimana za'ra mono norĩ nhipai u, wa 're ĩhâimana, ĩwasété uptabi na. 16 Tane nherẽ, ãne zarina ma tô 'Re ihâimana u'âsi mono hã ĩ'ãma aiwamri, Cristu Zezusi hã da'ãma wa'a su'u ãna 're ihâimana mono zé hã te te ĩ'ãma hâi'ré da. Tahawa te za ã hã 're hâimana, romhutu'õ te te 're isaze za'ra mono norĩ, Cristu hã da'ãma iwa'a su'u õ na te te ãma 're iwaihu'u za'ra mono zéb da hã, ĩ'ãma iwa'a su'u õ ne, dahâimanazé isi'utõrĩ'õ za te te sina 're i'uwaimrami za'ra mono norĩ hã. 17 Tahawa Apito isi'utõrĩ waihu'u'õ ãma duré idâ'â waihu'u'õ ãma duré 'madâ'â waihu'u ãna 're ihâimana mono ãma, misi pese 'Re ihâimana u'âsi mono 're ihâimana mono ãma, wa za ãma 're wawata za'ra, pire uptabi wa duré wẽ uptabi wa, õne u'âsi! Tane tô!

18 Timotiu, ĩ'ra uptabi ne ĩma 're i'aihâimana mono, ã hã ĩnhimiroti wa aima tisõ. Ã hã 'Re ihâimana u'âsi mono Pẽ'ẽzani hawi, da te ai'ãma iwaihu'u siromo zéb zarina, duréihã. Ã hã aimapazéb da, aima 're ihâimana mono da si, ãma 're ai'wapéi wẽ mono da! 19 Ma'ãpé 'Re ihâimana u'âsi mono asina 're i'umnhasi mono zé hã asima 're 'madâ'â pese mono. Duré asimirosa'rata 'remhã marĩ iwasédé te te aiwi 're ro'wa'ré mono tõ, 're i'aimorĩ wẽ zéb zarina. Ni'wam norĩ hã isimirosa'rata 're marĩ te te tiwi 're ro'wa'ré za'ra mono nherẽ, te te 're wapari za'ra mono õ di. Tihâimanazém na te ta norĩ hã te te ãma 're uzusi za'ra. Tahawa te tiwi 're si'utõrĩ za'ra, 'Re ihâimana u'âsi mono te te sina 're i'umnhasi za'ra mono zé hã. 20 Isiré za'ra hã te tihâimana zahuré Imeneu norĩ hã Alesãdrihi me, Satanasihi ma, te ihâiba nhomri zahuré hã te te waihu'u zahuré da, 'Re ihâimana u'âsi mono ãma te te oto 're wasété zahuré mono tõ da.