à norĩ na ãma dama 're rowahutu mono. Duré dama 're a'rui mono, ãma 're dahâimana za'ra mono da. 3 Ni'wa hã, nimahã marĩ aimawi na te te 're rowahutu mono wamhã, duré Wanhib'apito Zezu Cristuhu nhimiroti tô sena uptabi 're ihâimana mono zarina, te te 're irowahutu mono hã te te azâri õ wamhã, duré 'Re ihâimana u'âsi mono te te sima 're iwẽ mono zéb zarina 're dahâimana za'ra mono da, wa te 're irowahutu za'ra mono zé hã te te azâri õ wamhã, 4 ta hã te 'râwi 're si'madâ'â ze. Duré marĩ tãma waihu'u õ uptabi di. 'Re ihâimana u'âsi mono nhimiroti zahi na rob'ui'éré u'âbâ dasiwasu hã duré damreme na dasi'ahâri hã, ta hã aiwa dahâzé da'ãma 're ihâimana za'ra mono ne. Ta hawi te 're wairébé, marĩ na danho'ru hã duré dasi'ahâri hã duré da'ãma iwasédé hã duré dasi'umnhasi õ iwasété uptabi hã 5 duré dasiwasu i'rãsutu waihu'u õ zama, ni'wam norĩ hã simirosa'rata siwamnarĩ na oto 're ihâimana za'ra mono, te te 're i'manharĩ za'ra mono norĩ ne, duré ta norĩ ãma tô sena 'Re ihâimana u'âsi mono nhimiroti oto ãma 're ihâimana za'ra mono õ norĩ ne. Ta norĩ hã te te 're rosa'rata za'ra, 'Re ihâimana u'âsi mono ma romhuri hã 're isisibro pese za'ra mono zéb da si 're hâimana mono newa. 6 Tô sena tô, ni'wa hã 'Re ihâimana u'âsi mono ma, te te 're romhuri mono wamhã, ta hã te za tô tipẽ'ẽ na tinhibro pese, toi uptabi na 're hâimana mono wamhã, marĩ tãma 're ihâimana za'ra mono na, taha nhipai u marĩ zô te te sima 're rob'ruiwapari mono õ wamhã. 7 E marĩ wa. 'Re wapoto za'ra mono wamhã, marĩ, wa te wasiré 're ãwisi za'ra mono õ di, ãwa ti'ai u hã. Tane duré ti'ai hawimhã, marĩ, wa te wasiré 'wasari waihu'u õ di za. 8 Tahawa, wasa duré wa'uza wama 're hâimana za'ra mono wamhã, taha na wa te wasima 're rowẽ za'ra mono. 9 Tanei õ di, sibro pese da, te te sima 're iwẽ za'ra mono norĩ hã. Ta norĩ hã ipibuzé tãma 're hâimana za'ra mono wamhã, te tiwasété u 're rere'e. Te duré 're hâimana za'ra, 'rã nhimiza'rese ãna duré simimnhasi na marĩ, 'râwi te te sima 're iwẽ za'ra mono zé nhimimramizéb 're, ta hã iwasété u te te 're i'a'ãwisi mono, duré 'râwi dahâimanazé, da te dasiwi 're i'uprosi za'ra mono zéb u zama. 10 E marĩ wa. Rob'uiprazéb zawi hã, marĩ iwasédé sipu'u pese na 're ihâimana za'ra mono nhana'rada, te 're hâimana. Ni'wam norĩ hã, rob'uiprazé sa'ẽtẽ na tãma 're hâimana za'ra mono da, te te sima 're wẽ za'ra mono wa, ma tô apa za'ra, Wanhib'apito te te sina 're i'umnhasi za'ra mono zém nhiti. Ma tô duré sima poto za'ra, ihâimanazéb 're robzépata si oto tãma 're hâimana za'ra mono da.

11 Tazahã, a hã 'Re ihâimana u'âsi mono nhib'a'uwẽ, uburé ã norĩ nhiti 're ai'réi mono. Dahâimanazé i'uwaibaba na si 're aihâimana mono, 'Re ihâimana u'âsi mono ma si duré asina 're i'umnhasi mono na si duré asimizawi na si duré 'Re ihâimana u'âsi mono asina 're i'umnhasi mono zém na ãma 're i'uzusi u'âsi mono na si duré 're ida'awazé pese mono na si. 12 Danhib'rata na dasi'wapé ne, dasi'wapé iwẽ na ãma 're ai'wapéi mono, 'Re ihâimana u'âsi mono asina 're i'umnhasi mono zém na hã. Duré dahâimanazé isi'utõrĩ'õ hã asima tété tete. E marĩ wa. Ã hã dahâimanazém na 're aihâimana mono da, ma tô 'Re ihâimana u'âsi mono hã aipisutu, Cristu isazezém na asiwasu'u iwẽ uptabi hã 'manharĩ wamhã, da'ahâ na da te dasiwi i'ai'madâ'â norĩ nho'a. 13 Ãhã na hã 'Re ihâimana u'âsi mono, uburé marĩ 're ihâimana za'ra mono ma, ipẽ'ẽzani te te tãma 're i'anhomri mono nho'a, duré Cristu Zezusi, Põsiu Pilatuhu nho're isiwasu'u wẽ uptabi nho'a, wa za aima ti'ru, ãne: 14 Ma'ãpé ate romhuri 'Re ihâimana u'âsi mono te te aima ipisutu na ãma 're uwaimrami u'âsi mono sena na, ni'wa hã aiwasédé te te ai'ãma hiri tõ da. Ma'ãpé ãne na ãma 're uzusi u'âsi mono bâdâ iwisizéb u, Wanhib'apito Zezu Cristu we isihâi'rézéb da hã. 15 Taha da, 'Re ihâimana u'âsi mono te te sima ipisutuzéb zarina, bâdâ iwa waptã'ã wamhã, te za tô dama hâi'ré. Ta hã wẽ uptabi di. Duré Õhõ si misire Apito hã, ti'ai ãma uburé apito norĩ nhipai u. Duré Uburé Danhib'apito, ti'ai ãma danhib'apito norĩ nhipai u. 16 Õhõ si misire Idâ'â õ hã. Õ hã te rowa'a u'âsi ãma 're sãmra, rowa'a ni'wa 'râwi itẽme iwisi waihu'u õ ãma. Ta hã niwa ni'wa hã te te 'madâ'â õ di. Duré da te tô 'madâ'â waihu'u õ di. Õhõ ãma si wa za ãma 're wawata u'âsi za'ra, wazé pese wa, duré waihu'u pese uptabi na 're hâimana mono wa. Tane tô.

17 Ti'ai ãma sibrob ahâ na 're ihâimana za'ra mono norĩ ma, roti zahi za'ra na, 're si'madâ'â ze za'ra mono tõ da, duré tinhimarĩ hã te te 're umnhasi za'ra mono tõ da, ta hã dama 're hâimana u'âsi za'ra mono õ wa. Iwẽ hã, 'Re ihâimana u'âsi mono si te te 're i'umnhasi za'ra mono da hã, uburé marĩ sa'ẽtẽ na te te wama 're anhomri mono wa, wa te ãma wasima 're irowẽ za'ra mono zéb da hã. 18 Duré tãma 'ru zahi za'ra na, iwẽ si te te 're 'manharĩ u'âsi za'ra mono da, duré marĩ iwẽ te te 're i'manharĩ za'ra mono na si 're sisibrob pese za'ra mono da, duré sõprum na dama 're hâimana za'ra mono da, duré simiza'rese sina 're hâimana u'âsi za'ra mono da, tinhibro te te dama 're ipo'o za'ra mono da hã. 19 Ãne wamhã, marĩ iwa'âbâ za'ẽtẽ uptabi hã te za te te sima 're ubumro za'ra, romhutu'õ 'ri na'rata nhana'rata ne tãma 're ihâimana za'ra mono zéb da hã. Ãne wapsi, te za te te 're waibu, dahâimanazé tô sena hã.

20 Timotiu, ma'ãpé 're 'madâ'â pese mono, 'Re ihâimana u'âsi mono te te aima ipisudu hã. Robzanhamri iwasété wi 're asi'madâ'â pese mono duré damreme iwasété wi duré rosa'rada i'uptabi'õ upa nherẽ, rowaihu iwẽ na da te 're isisi za'ra mono wi. 21 Ni'wam norĩ ma, te ã hã rowaihu iwẽ newa tãma 're hâimana za'ra. Tahawa te 're sipa za'ra, Cristu te te sina 're i'umnhasi za'ra mono zém nhiti.

'Re ihâimana u'âsi mono nhimizawizé, ai'ãma 're ihâimana u'âsi za'ra wa'aba mono da si, iwẽ hã!