Marĩ iwasédé za 're ihâimana za'ra mono zé, Wanhib'apito Zezusi apâ wei morĩ wana ré hã
2
Ĩsisãnawã norĩ, ãhã na hã Wanhib'apito Zezu Cristu apâ we imorĩzé wasu'u na duré za wa te wasiwi isõpẽtẽzém na hã, wa za ãma aiwi waptẽrẽ za'ra wa'aba ni, ãne: 2 Õne haré aiwi 're robzei'õ za'ra wa'aba mono tõ. Duré tãma 're a'rãmi za'ra wa'aba mono tõ, ni'wa hã Wanhib'apito za we imorĩzé bâdâ oto iwa iwaptã'ã na te te aima wasu'u za'ra wa'aba wamhã, 'Re ihâimana u'âsi mono Pẽ'ẽzani hawi wa te irowasu'u za'ra zarina newa, duré niwamhã wamreme zarina newa duré niwamhã wa te ãma irob'ui'éré za'ra zarina newa. 3 Ma'ãpé 're asi'madâ'â pese za'ra wa'aba mono, ãne na ni'wa hã te te aima rob'rãmi za'ra wa'aba tõ da. E marĩ wa. Ta hã bâdâ wisi wana ré hã 'Re ihâimana u'âsi mono zada idasimasabzé te za tô tihâiba. 'Re ihâimana u'âsi mono zada Iwasété Uptabi hã te za duré sihâi'ré, ropipa u morĩ da, 'Re ihâimana u'âsi mono te te sô ipisutu siromo hã. 4 Ta hã te za 'Re ihâimana u'âsi mono upana uburé marĩ, ãma 're idawata za'ra mono norĩ da hã 're hâimana, duré uburé marĩ 'Re ihâimana u'âsi mono hawi dama 're ihâimana za'ra mono da zama. Uburé ta norĩ nhipai u pire na duré simiroti nhiptete na te za 're sisimizusi. 'Re ihâimana u'âsi mono nhorõwa 'ri 'rãihâ u te za duré ãzé, tame sãmra da. Tawamhã te za duré dama 're siwasu'u, tô 'Re ihâimana u'âsi mono na!5 E ãne na ãma aipo're pu'u za'ra wa'aba ãna, tame ai'rata ĩnhamra aba ré, te ãma aima irowasu'u za'ra wa'aba na hã. 6 Duré aima waihu'u pese za'ra wa'aba di, ãne hã awa'awi romhâimana tõ da, marĩ te te itété na hã, Iwasété Uptabi te bâdâ iwa waptã'ã wapsi, za isihâi'ré da hã. 7 Sãmri ãna Siptete na Iwasété Uptabi 're ihâimana mono hã te oto tô romhu ãhã na hã. Tane nherẽ, ãne na za iromhâimana da hã, ãhã na romhâimana tõ da, itété'wa hã da te sa'réi wapsi, te za tô tiromhâiba za. 8 Tawapsi Iwasété Uptabi hã te za sihâi'ré. Tawamhã Wanhib'apito Zezusi wei morĩ wamhã, te za tiwĩ, tizadawa wa'u'u na si. Te za duré uprosi, waihu'u pese uptabi na ite rowa'a isa'ẽtẽ ré 're ihâimana mono zém na. 9 Iwasété Uptabi hã Satanasihi waihu'u pese zéb ré te za sihâi'ré. Tawamhã marĩ dama i'manharĩ waihu'u'õ senai'õ hã te za te te 're ab'manharĩ, te te ãma dama 're i'arob'rãmi mono da hã. 10 Marĩ iwasédé hã te za imono bâ te te 're ab'manharĩ, te te ãma 're i'arob'rãmi mono da hã, ni'wam norĩ hã isi'utõrĩzéb u 're inomro mono norĩ ma, ta norĩ hã tô sena Cristuhu wasu'uwẽ zawi hã te te siwi 're wẽ'õ za'ra mono wa, ta hã te te aré sõ'reptu za'ra da nherẽ. 11 Ãne wa, 'Re ihâimana u'âsi mono hã te za we satõ, marĩ isiptede ta norĩ ma rob'rãmi'wa da hã, iwa 're hâimana za'ra mono da, taha zarina dazadawa nhipe hã te te 're saze za'ra mono da. 12 Ãne wa, tô sena Cristuhu wasu'u te te 're isaze za'ra mono õ norĩ, marĩ iwasété si te te 're i'manharĩ za'ra mono na te te ãma sima 're irowẽ za'ra mono hã ta norĩ ma, te za 'Re ihâimana u'âsi mono ropipa hã sô apisutu siro.
'Re ihâimana u'âsi mono te te sima 're i'apisutu mono, za te te 're i'anho'reptui mono zé
13 Wasisãnawã norĩ, Wanhib'apito te te 're i'asawi pese za'ra wa'aba mono hã, 'Re ihâimana u'âsi mono ãma wa za tô 're wawata u'âsi za'ra ai'ãma za'ra wa'aba, romna'rata hawim haré 'Re ihâimana u'âsi mono hã te te sima aipisutu za'ra wa'aba wa, asõ'reptuzé hã asima waibui wa'aba da, wẽ uptabi na Ipẽ'ẽzani te te 're iromhuri mono zéb zarina duré tô sena Rowasu'uwẽ hã asina 're i'umnhasi za'ra wa'aba mono zéb zarina. 14 Taha da, 'Re ihâimana u'âsi mono hã ma tô aipisutu za'ra wa'wa, Rowasu'uwẽ wa te 're i'mahârâ za'ra mono u'âbâmhã, Wanhib'apito Zezu Cristu rowa'a isa'ẽtẽ ré 're isãmra mono zé hã waibui wa'aba da, isiré 're aihâimana za'ra wa'aba mono da. 15 Tahawa, wasisãnawã norĩ, ma'ãpé asiptete sina 're aihâimana za'ra wa'aba mono. Duré wamreme na wanhimi'ui'éré na zama wa te aima ãma irowahutu za'ra wa'aba zé hã 're sazei utõrĩ za'ra wa'aba mono tõ.
16 Wanhib'apito Zezusi duré Wamama 'Re ihâimana u'âsi mono te te 're iwa'azawi pese mono hã duré te te 're iwa'apẽ'ẽ nhiptete u'âsi mono hã duré tinhimizawizém na wasiwawãi ãna 're iwahâimana za'ra mono zé te te wama 're i'anhomri mono hã, 17 aipẽ'ẽ 're robzei u'â hã te te aima 're i'anhomri zahuré wa'aba mono da si, duré te te 're i'asiptete u'âsi za'ra wa'aba mono da si, marĩ iwẽ si 're 'manharĩ u'âsi za'ra wa'aba mono da, aihâimanazém na duré aimreme na zama.