Paulu hã, Tesalonita ãma isazei'wa norĩ, ãma 're mreme zusi mono da, te te iwaptẽrẽzé
3
Wasisãnawã norĩ, i'rãsutu ãma hã oto, ma'ãpé wa'ãma 're rowaptẽrẽ za'ra wa'aba mono, Wanhib'apito wasu'u hã waptu na te te tô 're ropéi u'âsi mono da, duré da te 're wazé pese za'ra mono da zama, asine za'ra wa'aba. 2 Duré wa'ãma 're rowaptẽrẽ za'ra wa'aba mono, 'Re ihâimana u'âsi mono hã iwasété uptabi norĩ wi te te 're wanho'reptu za'ra mono da, uburé da te dasina 're umnhasi za'ra mono õ wa, Wanhib'apito hã.3 Tane nherẽ, Wanhib'apito Zezusihi si umnhasi uptabi di. Ta hã te za te te 're asiptete za'ra wa'wa. Te za duré te te 're ai'madâ'â pese za'ra wa'wa, Iwasété Uptabia wi hã. 4 Duré Wanhib'apito hã ma tô 'manha, wa te ai'umnhasi za'ra wa'aba da hã. Ãne wa, ai'ãma za'ra wa'aba hã wasiwawã za'ra õ di, tô ãhã na i'manharĩ za'ra wa'aba na hã duré tô za ãma i'uzusi za'ra wa'aba na zama, wa te aima iroti za'ra wa'aba zéb zarina.
5 Wanhib'apito hã te te i'aipawaptob za'ra wa'aba da si, 'Re ihâimana u'âsi mono nhimizawizé hã waihu'u wẽ za'ra wa'aba da, duré Cristu ti'ab ré danhib'rata te te robzépata nherẽ, simi'ẽ na 're ihâimana mono zéb zama.
Isazei'wa norĩ te te 're iromhuri za'ra mono zé, duré iwẽ te te 're i'manharĩ za'ra mono zé
6 Wasisãnawã norĩ, Wanhib'apito Zezu Cristuhu nhisi na, wa za ãma aima roti za'ra wa'aba ni, ãne: Ma'ãpé tiwi asa'o hâ za'ra wa'aba, wasisãnawã norĩ romhuri ãna 're ihâimana za'ra mono norĩ wi hã duré wa te aima iroti za'ra wa'aba zéb zarina 're ihâimana za'ra mono õ norĩ wi hã. 7 Aima waihu'u pese za'ra wa'aba di, ãma aima iwasisanho za'ra wa'aba zéb zarina wanhirã na za tô 're i'aihâimana za'ra wa'aba mono da hã. E marĩ wa. Ai'rata wahâimana za'ra wa'aba ré hã, romhuri ãna wahâimana za'ra õ wa. 8 Wasa hã wa'âbâ ãna wa te nasi huri õ di. Tazahã, wa romhuri pese za'ra ni, pire na, wa te ãma iwazere pese za'ra zéb u. Bâtâ na duré mara na zama, wa nasi romhuri za'ra ni, ropire hã wa te aima 'maihiri aba tõ da, wasina. 9 Wama i'ru zahi nherẽ, wapawaptobzé wa te iwaibu da hã, tane nherẽ, marĩ hã wa te waptẽrẽ za'ra õ di, ãma aima wasisanho za'ra wa'aba da, wanhirã zarina 're 'manharĩ za'ra wa'aba mono da. 10 Ai'rata wahâimana za'ra wa'aba ré hã, ãne wa tô aima roti za'ra wa'aba ni: “Ni'wa hã te te romhuri õ wamhã, tô 're sai mono tõ.”
11 Wa wapari za'ra ni, ni'wam norĩ wasu'u asiré za'ra wa'aba hã, marĩ te te 're 'manharĩ za'ra mono ãna wa'a na 're ihâimana za'ra mono na hã, duré taré te te dawi 're iro'wa'rutu za'ra mono na hã. Tahawa, wa tô ãne hã aima wasu'u za'ra wa'aba ni. 12 Wanhib'apito Zezu Cristuhu nhisi na wa tãma roti pese za'ra ni, duré wa pawaptob za'ra ni, i'uwaibaba na si 're hâimana za'ra mono da, duré te te tô 're romhuri za'ra mono da, tisi'uparizéb da. 13 Tazahã, a norĩ wa'wa wasisãnawã norĩ, 're aiwa'a za'ra wa'aba mono tõ, marĩ iwẽ 're i'manharĩ za'ra wa'aba mono da hã.
14 Ni'wa hã ã hã, wa te ãma irob'ui'éré za'ra zém na wanhimiroti te te 'madâ'â pese õ wamhã, 'madâ'â pese za'ra wa'aba, ni'wa hã zô. Taha parimhã, isiré aihâimana za'ra wa'aba tõ, siséb da. 15 Tane nherẽ, asitob'ru na hã 'madâ'â aba tõ. Taré tãma roti wa'aba, dasisãnawã da te 're ipawaptob za'ra mono ne.
Rob'ui'éré 'rãsudu
16 Wanhib'apito rowẽ nhomri'wa hã rowẽ u'â te te aima 're isõmri za'ra wa'aba mono da si, imono bâ! Duré Wanhib'apito asiré 're ihâimana u'âsi za'ra wa'aba mono da si, iwẽ hã!
17 Wa hã Paulu, wa ãma asawi za'ra wa'wa. Ĩsi'uihâ na wa ãma rob'ui'éré, ĩnhib'rata na. Ã hã ãma iwaihu'uzé ĩnhimi'ui'éré mono na hã. Ãne, wa te te 're rob'ui'éré tô.
18 Wanhib'apito Zezu Cristuhu nhimizawizé ai'ãma 're ihâimana u'âsi za'ra wa'aba mono da si, iwẽ hã.