2 Wa wa te ai'ãma 're rowaptẽrẽ u'âsi za'ra wa'wa, Wamama 'Re ihâimana u'âsi mono te rowẽ u'â hã duré Wanhib'apito Zezu Cristuhu te zama, ai'ãma 're ihâimana u'âsi za'ra wa'aba mono da si.

3 Wasisãnawã norĩ, 'Re ihâimana u'âsi mono ãma tô 're iwawata u'âsi za'ra mono da si, ai'ãma za'ra wa'aba hã, tô i'uwaibaba wa. E marĩ wa. Cristu asina 're i'umnhasi za'ra wa'aba mono zé hã sa'ẽtẽ u'âsi mono wa, duré 're i'asisawi pese za'ra wa'aba mono zé hã aima 're sa'ẽtẽ u'âsi za'ra wa'aba mono wab zama. 4 Tahawa, isazei'wa norĩ siré 're isi'rã'õtõ mono norĩ ma, wa wato sina wa te 're aiwasu'u za'ra wa'wa. Wa wa te wasima 're rowẽ za'ra ai'ãma za'ra wa'aba hã, asimi'ẽi hâ aima 're hâimana za'ra wa'aba mono wa, Cristu asina 're i'umnhasi za'ra wa'aba mono zé hã 're ihâi'ré za'ra wa'aba mono zéb zarina, da te aima 're rob'manharĩ wasété za'ra wa'aba mono nherẽ, duré 're robzépata za'ra wa'aba mono nherẽ. 5 Ã hã, sena na wa te ãma iwaihu'u za'ra zé, 'Re ihâimana u'âsi mono i'uwaibaba na si te te da'ãma 're i'arowairébé mono na hã.

Ãne zarina, te za tô sada na 're aihâimana za'ra wa'aba mo, 'Re ihâimana u'âsi mono da'ãma 're isib'a'uwẽ mono zéb ãma 're aihâimana za'ra wa'aba mono da hã, taha u'âbâ 're robzépata za'ra wa'aba mono wa, ãhã na hã. 6 'Re ihâimana u'âsi mono hã i'uwaibaba si te za tô te te 're ab'manharĩ: 'Re robzépata za'ra wa'aba mono da, te te aima 're irob'manharĩ wasété za'ra wa'aba mono norĩ ma, te za te te ãma tãma 're awa'rãmi, ta norĩ zama te te 're robzépata za'ra mono da. 7 Te za duré te te aima 're anhomri 'wa, 're aiwa'utu za'ra wa'aba mono da hã, wa te 're irobzépata za'ra mono ne, 're irobzépata za'ra wa'aba mono norĩ ma zama. Ãne hã te za 'Re ihâimana u'âsi mono hã 'manha, niwa Wanhib'apito Zezusi hã unhama ro'o wa'wa we te te hâi'ré wamhã, ite hâiwa hawi romhuri'wa norĩ waihu'u pese na 're ihâimana za'ra mono norĩ siré. 8 Tawamhã 'Re ihâimana u'âsi mono te te 're iwẽ'õ za'ra mono norĩ ma, te za tãma arob'manharĩ wasété, Wanhib'apito Zezusihi wasu'uwẽ ité te te 're i'madâ'â za'ra mono õ norĩ ma hã. 9 Ta norĩ ma, te za arob'manharĩ pipa, isiti 're hâimana u'âsi za'ra mono da, õne u'âsi. Duré Wanhib'apito nhiti te za romhâ na 're hâimana za'ra, duré wẽ uptabi na iwaihu'u pe 're ihâimana mono nhiti. 10 Ã hã za iromhâimanazé Wanhib'apito Zezusi apâ we imorĩzé bâtâ ãma hã, uburé isib'a'uwẽ norĩ, ãma iwata za'ra zéb da hã duré uburé isazei'wa norĩ ãma itob'uzu za'ra zéb ãma hã za. A norĩ wa'aba zama te za dame aihâimana za'ra wa'wa za, Rowasu'uwẽ, wa te aima iwasu'u za'ra wa'wa hã saze za'ra wa'aba wa.

11 Tahawa, wa wa te ai'ãma 're rowaptẽrẽ u'âsi za'ra wa'wa, wate za'ra 'Re ihâimana u'âsi mono dahâimanazé itéb u asô ihârâ za'ra wa'wa hã, te te aima 'manharĩ za'ra wa'aba da, aiwẽ uptabi na i'uwaibaba na sada 're aihâimana za'ra wa'aba mono da, dahâimanazé itéb da hã. Wa wa te duré tiwi 're rowaptẽrẽ za'ra, tiwaihu'u pese uptabi na te te ãma aima uwaimrami za'ra wa'aba da, uburé marĩ iwẽ 're 'manharĩ za'ra wa'aba mono da, asima 're iwẽ za'ra wa'aba mono zé hã duré romhuri 're i'manharĩ za'ra wa'aba mono zé hã, Cristu asina 're i'umnhasi za'ra wa'aba mono sina 're 'rãsutu wẽ za'ra wa'aba mono da. 12 Ãne zarina, Wanhib'apito Zezusihi nhisi hã sa'ẽtẽ uptabi na 're ihâimana mono na te za ãma 're dawata za'ra. Te za duré Õhõ zama te te 're aiwẽsãmri za'ra wa'wa, 'Re ihâimana u'âsi mono hã tinhimizawi pese zéb u'âbâ duré Wanhib'apito Zezu Cristuhu u'âbâ zama.