3 Tawamhã Saulu hã morĩ wamhã, Damascu u te te oto rosahutu wamhã, waptu na rosa'rese õ ré ma tô hâiwa hawi rowa'a za'ẽne hã imana wawi rowa'a. 4 Tahawa ma tô waptãrã, ti'ai u. Damreme ma tô wapa, te te tãma inharĩ hã ãne:

— Saulu. Saulu. E marĩ wa, te ĩma 're irob'manharĩ wasété mo.

5 Tawamhã Saulu hã te asa 'mahâ:

— Apito, e 'wa hã, a hã.

Damreme ma sada'â, ãne:

— Wa hã Zezusi, tãma 're irob'manharĩ wasété mono. 6 Aiwahutu, 'ri nho'õmo u aimorĩ da. Tame te za ni'wa hã aima waihu'u, marĩ i'manharĩ da hã.

7 Tawamhã aibâ norĩ Sauluhu siré isi'aba'ré hã ma tô ari'iwi aimasa, niha hã te te nharĩ waihu'u za'ra ãna. Damreme ma wapari za'ra. Tane nherẽ, ni'wa hã te te siwi 'madâ'â õ di. 8 Tawamhã Saulu hã ma tô wahudu. Tito ma tô 'ridawa zahuré. Tane nherẽ, te te rob'madâ'â waihu'u õ di. Tahawa, isiré isi'aba'ré norĩ hã ma tô te te siwi patété. Ma tô siwi saprõ, Damascu u. 9 Bâdâ hã si'ubdatõ ma tô ãma ne, te te rob'madâ'â waihu'u ãna hâimana ré hã, sai ãna duré te te hâ'rẽne ãna hã.

10 Tawamhã Damascu 'remhã te 're sãmra, Zezusihi nhirã zarina 're imorĩ, Anania na isisi hã. Ta hã sõtõ 'rowim ne Wanhib'apito hã ma tô 'mahâ, ãne:

— Anania.

Ãne ma sada'â:

— Ãhãta wa ĩhâiba, Ĩnhib'apito.

11 Tawamhã Wanhib'apito hã te tãma tinha, ãne:

— Aiwahutu. Aimorĩ, Zudasihi nhorõwa u, “Awa'awi na” 'ri nhi'riti nhisi ãma. Sô asinharĩ za, aibâ Tarsu hawi Saulu na isisi zô. Ta hã te ãhã na awa'awi na we ĩwi rowaptẽ. 12 Tinhotõ 'rowim ne ma tô 'madâ, aibâ Anania na isisi itẽme iwisi na hã duré tinhib'rada te te ãma ihiri na hã apâ te te rob'madâ'â da.

13 Tawamhã Anania hã ma sada'â, ãne:

— Ĩnhib'apito, wa tô te 're wapari ta hã aibâ wasu'u hã duré uburé marĩ iwasédé te te 're i'ab'manharĩ mono zé hã Zeruzalẽ 're, asazei'wa norĩ ma. 14 Ãhã na hã ma tô oto wei wi ãwa, sasedoti ipire norĩ te te tãma irowairébé za'ra ré, dazazéb 're, te te séme da, uburé asisi na te te 're i'ai'mahârâ za'ra mono norĩ hã.

15 Tane nherẽ, te Wanhib'apito hã Ananiaha ma tinha, ãne:

— Mo oto itẽme aimorĩ. Ta hã aibâ hã wa tô ĩsima pisutu, ĩma romhuri'wa da, ĩnhisi hã te te 're âri da, zudeu'õ norĩ u, apito norĩ u duré Izaraéu nhihudu norĩ u zama. 16 Wa hã wa za tãma hâi'ré, te te 're irobzépata za'ẽtẽ mono zé hã, za ĩnhisi na.

17 Tawamhã Anania hã ma tô mo. Zudaha nhorõwa u ma tô ãzé. Tinhib'rada hã ma tô ãma tihi, Sauluhu nhisiwi. Ãne te tãma tinha:

— Ĩsisãnawã Saulu, Wanhib'apito Zezusi, aima isihâi'ré bâdâdi na we aimorĩ ré, ta hã ma tô we ĩzatõ, apâ rob'madâ'â da, duré 'Re ihâimana u'âsi mono Pẽ'ẽzani 'masisi na iré aihâimana da.

18 Tawamhã awa'awi pesere marĩ pe'a hâ ne hã ma tô Sauluhu tõmo hawi rere. Tahawa ma tô apâ rob'madâ. Hâiwi ma tô za. Â dawabzuri hã ma tô duré 'manha. 19 Taha pari, sai pari ma tô apâ oto aptete.

Tawamhã Saulu hã niha bâtâ na ma tô tihâiba, Damascu ãma isazei'wa norĩ siré. 20 Tawamhã awa'awi ma tô Zudeu norĩ te rowahutuzé mono bâ, rowasu'u na sãna'rata, ãne:

— Zezusi hã 'Re ihâimana u'âsi mono 'ra.

21 Tawamhã uburé da te iwapari za'ra norĩ hã ma tô ãma tatob'uzu za'ra ni. Tahawa, te ãne tasisadanharĩ za'ra ni:

— E ã hãi ã bâ, aibâ hã te te sima 're iwẽ mono, Zeruzalẽ 'remhã Zezusihi zazei'wa norĩ te te 're a'uprosi mono da. E ã wamhã wei morĩ ã bâ bété, pawasisi na te te simroi mono da, sasedoti ipire norĩ u.

22 Tawamhã Saulu hã te siptete u'âsi mono. Zudeu norĩ ma, ma tô te te 're wasu'u hâi'ré Zezusi hã Danho'reptui'wa na, 'Re ihâimana u'âsi mono te te ipisutu na. Tawamhã Damascu 're Zudeu norĩ 're isi'ubumroi mono norĩ hã niha hã te te ãma 're sada'âbâ waihu'u za'ra mono õ di.

23 Tawamhã bâdâ ahâ na ãma si'utõrĩ parimhã, Zudeu norĩ Damascu 're, 're isi'ubumroi mono norĩ hã ma tô si'rã'õtõ. Ma tô duré sima rowairébé za'ra, te te siwi wĩrĩ da. 24 Tane nherẽ, Saulu hã ma tô sina waihu'u, te te sima irowa'õtõ za'ra zé hã. Bâtâ na mara na zama ma tô nasi sô rob'madâ'â za'ra, 'ri nho'õmo 'wawi wa'ra 'ridawa za'ẽtẽ ãma, te te siwi wĩrĩ da hã. 25 Tane nherẽ, isiré 're inomro mono norĩ hã ma tô siwi saprõ bara na. Ma tô ãma siwi si'ra si'õtõ na, 'ri nho'õmo 'wawi wa'ra zapu'u 're.

26 Tawamhã Saulu hã ma tô mo, Zeruzalẽ u. Wisi wamhã, ma tô aré sima wẽ, Zezusihi nhirã zarina 're inomro mono norĩ siré hâimana da. Tane nherẽ, uburé hã tãma pahi za'ra di. Ãma simizaze za'ra õ di, Zezusihi nhirã zarina tô sena 're imorĩ na hã. 27 Tahawa Barnabé hã ma tô saprõ, Zezusihi zadawa wasu'u'wa norĩ u. Ma tô tãma wasu'u za'ra, Saulu hã bâdâdi na Wanhib'apito te te i'madâ'âzé hã duré Wanhib'apito te te tãma inharĩzé hã duré Damascu ãma pahi ãna Zezusihi nhisi na te te dama irowahutuzéb zama. 28 Taha parimhã, Saulu hã ma tô oto isiré tihâimana za'ra. Duré sima iwẽ na te nasi ne Zeruzalẽ 'remhã. Pahi ãna te nasi dama arowahutu, Wanhib'apito nhisi na. 29 Tawamhã Zudeu norĩ, gregu mreme na 're imreme zusi mono norĩ me te nasi sima rowasu'u za'ra. Ta norĩ me, te duré nasi sisada'âbâ za'ra, marĩ na. Tane nherẽ, ta norĩ hã ma tô nasi tinhopré, te te siwi wĩrĩ da. 30 Tawamhã isisãnawã isazei'wa norĩ ãne hã te te waihu'u za'ra wamhã, ma tô siwi saprõ Cézaréia u. Ta hawi ma tô siwi satõ, Tarsu u.

31 Tawamhã taha bâtâ mono na rowẽ na ma tô 're hâimana za'ra isazei'wa norĩ hã, Zudéa ãma hã, Galiléia duré Samaria ãmab zama. Ma tô 're sisiptete za'ra. Ma tô duré 're sipawaptob za'ra, 'Re ihâimana u'âsi mono Pẽ'ẽzani na. Isazei'wa hã ma tô sina hâ'â u'âsi. Wanhib'apito wazép sina, ma tô duré 're hâimana za'ra.

32 Pedru hã daro mono bâ ma tô 're mo. Tawamhã ma tô oto mo, isazei'wa norĩ te te sabu za'ra da, Lida ãma 're isi'ubumroi mono norĩ hã. 33 Tame ma tô sõpẽtẽ, aibâ imorĩ'õ Enéia na isisi hã. 8 na ma tô ãma tiwahu, waptâp si 're isa'wari mono na hã. 34 Tawamhã Pedru hã te tãma tinha, ãne:

— Enéia, Zezu Cristu hã te za oto aipese. Aiwahutu. Asa'warizé hã sinha na, âri da oto.

Tahawa awa'awi pesere ma tô wahudu, Enéia hã. 35 Uburé Lida 're, 're idasi'ubumroi mono norĩ hã duré Sarõ na romnhisi ãma 're idahâimana za'ra mono hã da te 'madâ'â za'ra wamhã, Wanhib'apito u ma tô aipizari za'ra ni, 're idanomro mono zém hawimhã.

36 Tawamhã Zopi ãma hã te 're sãmra pi'õ, Zezusihi nhirã zarina 're imorĩ hã, Tabita na isisi hã. (Gregu mreme na hã Dorca na isisi.) Ta hã ma tô õne u'âsi iwẽ si te te 're a'manharĩ. Duré isibrob'õ norĩ hã ma tô te te 're apawapto.

37 Taha bâtâ 'remhã, Dorca hã ma tô tihâzé. Ta hã ma tô utõ. Ihâiba hâ hã ma tô dasiwi upsõ ni. Ma tô dasiwi hiri ni, 'ri 're wa'wa hâimo ãma. 38 Lida hã Zopi 'ratamhã^a. Tawamhã Zopi ãma Zezusihi nhirã zarina 're inomro mono Pedru hã Lida ãma isãmra na rowasu'u te te wapari za'ra wamhã, ma tô aibâ norĩ hã maparane itẽme satõrĩ za'ra, ãne te te tãma rowasu'u zahuré da:

— Ma'ãpé, wei watẽme aimorĩ su'u za'ra na!

39 Tawamhã Pedru hã ma tô isiré timorĩ zahuré. Wisi wamhã, ma tô siwi saprõ 'ri're wa'wa u, hâimo. Uburé pi'õi mrotõ norĩ hã ma tô siwi uirĩ. Siwa'õ za'ra sina, te nasi da'uza ihâi wahuré hã tãma hâi'ré za'ra duré da'uza ihâi wahuré, Dorca te te i'ab'manharĩ hã hâiba ré ré. 40 Tawamhã Pedru hã ma tô tãma rob'ru za'ra, uburé wairébé da, 'ri 're wa'wa hawi. Isa'u za'ra ma tô hi'rãtitõ nhamra. Ma tô duré rowaptẽ. Taha pari Dorcaha hâiba u sipi'rai wamhã, te ãne tinha:

— Tabita, aiwahutu.

Tawamhã pi'õ hã ma tô toporo. Pedru te te 'madâ'â wamhã, ma tô oto nhamra. 41 Tawamhã Pedru hã ma tô pa'â. Ma tô pawapto, hâiwi sab da. Taha pari, uburé Zezusihi zazei'wa norĩ zô ma tô hâ, duré pi'õi mrotõ norĩ zô zama. Tahawa, ma tô oto tãma wasu'u za'ra, ihâiba ré na hã.

42 Uburé 'ri wa'õno Zopi 'remhã rowasu'u ma tô wapari za'ra ni. Tahawa da'ahâ na ma tô saze za'ra ni, Wanhib'apito hã. 43 Tawamhã Pedru hã Zopi ãma ma tô nhamra, niha bâtâ na, romhâ su'u'wa Simau na isisi nhorõwa ãma.