Taha bâtâ 'remhã, Zeruzalẽ 'remhã 'Re ihâimana u'âsi mono zazei'wa norĩ ma, ma tô oto da te tãma 're irob'manharĩ wasété za'ra mono zé hã te te 're sépata na'rata za'ra. Tawamhã uburé isazei'wa norĩ hã ma tô ropé, Zudéa na danhipti'a nho'õmo nhisi u duré Samaria u zama. Zezusihi siré 're inomro mono norĩ si te te ropéi õ di. 2 Tawamhã nima norĩ 'Re ihâimana u'âsi mono nhimiroti 'madâ'â pese 'wa norĩ hã ma tô Estevãhã ãma ti'a za'ra. Idâ'âzém na ma tô duré sa'ẽtẽ na aiwa'õ za'ra. 3 Tawamhã Saulu hã sa'ẽtẽ te 're hâimana, Zezusihi zazei'wa norĩ hã te te uprosi za'ra da. 'Ri baba te sô 're zasi za'ra. Ta hawi rob u te te 're azani. Te te ãma 're arobâdâ. Dazazéb 're te te 're a'maza, aibâ norĩ duré pi'õ norĩ zama.

4 Tawamhã daro mono bâ, isazei'wa norĩ hã te te iropéi mono, ma tô te te dama rowasu'u za'ra, Rowasu'uwẽ na hã, nimomo 're isihutu mono zéb u. 5 Filipi^a hã ma tô mo, Samaria 're, 'ri wa'õno dama i'rãnho'õmo u. Tame ma tô Cristu hã dama wasu'u. 6 Tawamhã da'ahâ uptabi na Filipi hã da te wapari za'ra wamhã, duré marĩ dama i'manharĩ waihu'u'õ te te i'ab'manharĩ hã da te 'madâ'â za'ra wamhã, ma tô wapari prédub za'ra ni, isimirowasu'u hã. 7 Wa'uburé norĩ hã sadari sina ma tô da'ahâ na dahawi wairé. Imorĩ'õ norĩ duré ihi'ré norĩ zama ma tô tipese za'ra. 8 Ãne wa, datoi uptabi za'ra di, taha 'ri nho'õmo 're, 're idahâimana za'ra mono norĩ hã.

9 Tamemhã te 're hâimana, Simau na aibâ nhisi hã. Wahub ahâ na ma tô simi'â na te te da'ãma 're romhuri. Taha 'ri nho'õmo 'remhã, ma tô uburé a'uwẽ norĩ hã ãma 're tob'uzu za'ra. Dama pire na 're ihâimana mono na ma tô 're si'madâ'â. 10 Uburé ma tô da te 're wapari prédub za'ra, dama iwapu norĩ hã duré isimarĩ pese norĩ zama. Ãne ma tô da te tãma 're nharĩ za'ra:

— Ã hã aibâ hã 'Re ihâimana u'âsi mono waihu'u pe. Isisi hã “Iwaihu'u pe Isa'ẽne”!

11 Tawamhã uburé ma tô da te 're wapari prédub za'ra, isimiromhõsi na 're datob'uzu za'ra mono wa, wahub ahâ na hã. 12 Tane nherẽ, ma tô saze za'ra ni Filipi te te irowahutuzé hã, Rowasu'uwẽ 'Re ihâimana u'âsi mono da'ãma 're isib'a'uwẽ mono zé wasu'u na hã, Zezu Cristuhu wasu'u na zama. Â dawabzuri ma tô 'manharĩ za'ra ni, aibâ norĩ pi'õ norĩ zama. 13 Simahã zama ma tô saze. Â dawabzuri hã ma tô duré dame 'manha. Tahawa Filipihi siré si te oto 're mo. Te nasi ãma titob'uzu, dama i'manharĩ waihu'u'õ hã duré iwẽ uptabi hã Filipi te te 're i'ab'manharĩ mono hã te te oto 're ab'madâ'â mono wa.

14 Tawamhã Zezusihi zadawa wasu'u'wa norĩ hã Zeruzalẽ ãma ihâimana za'ra hã ma tô wapari za'ra Samaria 're, 're ihâimana za'ra mono norĩ hã 'Re ihâimana u'âsi mono zadawa wasu'u te te isaze za'ra na hã. Tahawa, Pedru norĩ Zuwãhã me ma tô siwi satõrĩ zahuré, tamomo neb da. 15 Ta norĩ hã simasisi zahuré wamhã, ma tô da'ãma rowaptẽrẽ zahuré, 'Re ihâimana u'âsi mono Pẽ'ẽzani, da te waibu da, 16 'Re ihâimana u'âsi mono Pẽ'ẽzani hã zahadu ni'wai u hã tamomo te te si'rai õ wa, Wanhib'apito Zezusihi nhisi na si â dawabzuri hã te te 'manharĩ za'ra wa. 17 Tawamhã Pedru norĩ Zuwãhã me ma tô tinhib'rada hã ãma aza'ra zahuré. Tahawa ma tô 'Re ihâimana u'âsi mono Pẽ'ẽzani hã waibu oto.

18 'Re ihâimana u'âsi mono Tipẽ'ẽzani te te dama i'anhomri na, Zezusihi zadawa wasu'u'wa norĩ, tinhib'rada te te da'ãma aza'ra zahuré wa, Simau hã te te 'madâ'â wamhã, rob'uiprazém na ma tô tãma ropisutu zahuré. 19 Ãne te tãma nharĩ zahuré:

— Wa ĩsima wẽ, ĩma zama sõmri aba da, Iwaihu'u pe hã duré wa hã ĩnhib'rada te da'ãma 're aza'ra mono wamhã, da te 're waibui mono da, 'Re ihâimana u'âsi mono Pẽ'ẽzani hã.

20 Tawamhã Pedru hã ma ãma sada'â, ãne:

— 'Re ihâimana u'âsi mono, ropipa u te te i'asatõrĩ aba da si iwẽ hã, ate rob'uiprazé me! E 'Re ihâimana u'âsi mono nhoprubzé iwẽ uptabi hã rob'uiprazém na uipra waihu'u bâ, te ãne irosa'ra. 21 Wasiré romhuri i'manharĩ za'ra da, i'aihâimana da hã waihu'u õ di. E marĩ wa. Aipẽ'ẽ 'remhã awa'awi aihâimana õ di, 'Re ihâimana u'âsi mono nho'remhã. 22 Aiwasété na asisãmri wa, asiwẽ'õ na. Taha parimhã Uburé Danhib'apito wi rowaptẽrẽ. Tawamhã ãté te te ai'ãma 'madâ'â õ di za, aipẽ'ẽ 're irosa'ratazé hã. 23 Wa ai'madâ, marĩ na i'asiminho'ru za'ẽtẽ na duré aiwasédé te te i'atété wi hã aiwatobro waihu'u õ di.

24 Tawamhã Simau hã ma ãma sada'â, ãne:

— Ma'ãpé ĩ'ãma rowaptẽrẽ aba Uburé Danhib'apito wi, marĩ ĩ'ãma hâimana tõ da, ĩma inharĩ aba zéb zarina.

25 Tawamhã Pedru norĩ Zuwã me, Wanhib'apito wasu'uwẽ na te te dama rowahutu zahuré parimhã, ma tô apâ tineb zahuré, Zeruzalẽ u. Neb zahuré wamhã, te sipa zahuré Samaria 're, 'ri wa'õtõ mono bâ, Rowasu'uwẽ hã te te dama wasu'u zahuré mono da.

26 Uburé Danhib'apito ma hâiwa hawi romhuri'wa hã ma tô Filipihi ma tinha, ãne:

— Aimorĩ hâiwa nhimi'e niwĩ, rop si 're irosa'wari mono na bâdâdi inomro na Zeruzalẽ hawi, Gaza na 'ri nho'õmo nhisi u. (Taha bâdâdi na hã da'umro na te ãma 're danomro.)

27 Tawamhã Filipi hã ma tô wahudu. Ma tô mo. Morĩ wamhã, bâdâdi na ma tô sõpẽtẽ, Etiopia ãma danhib'ihâ'a hã. Ta hã dama ipire rob'uiprazé 'madâ'â'wa, Cãdasi na pi'õ siroti'wai ma, Etiopia 're dama ipire ma hã. Ta hã aibâ hã 'Re ihâimana u'âsi mono ãma wata da, ma tô mo, Zeruzalẽ u. 28 Apâ morĩ wamhã tirob u, awaru na wedewara zapore 're, te nhamra. Morĩ sina te te sõré, 'Re ihâimana u'âsi mono zadawa 'mahârâ'wa Izaiasihi nhimi'ui'éré hã.

29 Tawamhã 'Re ihâimana u'âsi mono Pẽ'ẽzani ma tô Filipihi ma tinha:

— Itẽme asina rotété awaru na wedewara zapore u. Isababa aimorĩ.

30 Tawamhã Filipi hã wedewara zapore u ma tô wara. Ma tô wapa, danhib'ihâ'a hã te te sõré mono ré, 'Re ihâimana u'âsi mono zadawa 'mahârâ'wa Izaiasihi nhimi'ui'éré hã. Tawamhã ma tô 'mahâ, ãne:

— E aima sadaihu'u pese di, isõré mono hã.

31 Tawamhã danhib'ihâ'a hã ma sada'â, ãne:

— E niha wa za sadaihu'u, ni'wa hã te te ãma ĩma rowasu'u õ nherẽ.

Ãne wa, danhib'ihâ'a hã Filipihi zô ma tô hâ, itẽme sébré da, wedewara zapore na isababa sãmra da. 32 Tawamhã danhib'ihâ'a hã, Ibaihâ Iwazé pese na te te isõré mono hã, ã hã:

34 Tawamhã danhib'ihâ'a hã te Filipi ãma sadanha, ãne:

— Ma'ãpé ĩma waihu'u! 'Re ihâimana u'âsi mono zadawa 'mahârâ'wa hã, e 'wa hã te wasu'u. E niwamhã 'râwi te siwasu'u. E aimawi hã.

35 Tawamhã Filipi hã rob'ui'éré te te isõré mono zém na ma tô tãma rowasu'u na'rata. Zezusihi wasu'uwẽ itém na ma tô tãma rowasu'u.

36 Bâdâdi na sisamroi ré hã ma tô aimasisi zahuré, â 're ihâimana mono u. Tawamhã danhib'ihâ'a hã ma tô Filipihi ma tinha, ãne:

— Ma'ãpé 'madâ'â, õhõta â iré hã. E marĩ te te ĩwi ro'wa'rutu da bâ, â dawabzuri te i'manharĩ da hã.

37 Tahawa, Filipi hã ma ãma sada'â, ãne:

— Aipẽ'ẽ na sazei pese wamhã, te za tô i'manha.

Tawamhã danhib'ihâ'a hã ma ãma sada'â, ãne:

— Ĩhe, tô sena wa saze, Zezu Cristu hã, 'Re ihâimana u'âsi mono 'ra na.

38 Tahawa, danhib'ihâ'a hã ma tô ti'ru, wedewara zapore simizazâri da. Tawamhã Filipi duré danhib'ihâ'a me âi ba ma tô si'ra zahuré. Tame Filipi hã â dawabzuri ma tô tãma 'manha. 39 Â hawi pusi wamhã, Uburé Danhib'apito pẽ'ẽzani hã ma tô ti'â Filipi nimomo. Danhib'ihâ'a hã te te oto 'madâ'â õ di. Tãma rowẽ uptabi sina, ma tô timorĩ na tite bâdâdi na ãma uzusi. 40 Tawamhã Filipi hã ma tô duré sihâi'ré, Azotu na 'ri nho'õmo nhisi ãma. Ta hawi ma tô mo, Cézaréia u. Uburé 'ri nho'õmo na te te iro'rahâri mono zém na hã, ma tô Rowasu'uwẽ hã te te dama wasu'u.