Paulu hã Corĩtu ãma sãmra ré, ma tô ã ibaihâ na hã ãma rob'ui'éré. Ma tô sima rosa'rata, Roma ãma tisiré isazei'wa norĩ 're ihâimana za'ra mono te te sabu za'ra da, duré te te po're pu'u za'ra da hã morĩ da, 'Re ihâimana u'âsi mono ãma siptete sina 're nomro mono da. Morĩ õ ré hã, rob'uiprazé hã te za a'â ti'â Zeruzalẽ u, isazei'wa norĩ ma, Masédonia hawi danhoprubzé hã. Paulu hã ma tô wama waihu'u za'ra, 'Re ihâimana u'âsi mono, sa'ẽtẽ na wama 're isõpru mono zéb zarina, i'ra hã wazada dâ'â da, te te we isõmrizém na hã. Duré Paulu hã ma tô wama waihu'u za'ra, ãne: Zezusi hã da te dasina 're i'umnhasi za'ra mono zéb zarina si, te za 'Re ihâimana u'âsi mono hã te te 're da'awẽsãmri, dawasédé hã te te oto da'ãma 're i'a'madâ'â mono õ zéb zarina. Isimiroti 'rata na Mozési te te ãma irob'ui'éré hã da te 're i'madâ'â za'ra mono zéb zarina, te te 're da'awẽsãmri mono õ di.