Paulu hã Corĩtu u morĩ wamhã, ma tô 'Re ihâimana u'âsi mono mreme na dama rowasu'u. Tahawa, isa'u hã ma tô isimirowasu'u wẽ zarina isazei'wa norĩ hã dasina tahâ'â ni.

à ibaihâ na ma tô Paulu hã tãma ãma rob'ui'éré za'ra Corĩtu ãma isazei'wa norĩ ma hã, ni'wam norĩ hã wasété na 're ihâimana za'ra mono wasu'u hã te te wapari wa, duré sina 're sipo'o za'ra mono wa, siré isazei'wa nherẽ. Tahawa, ma tô tãma waihu'u za'ra, 'Re ihâimana u'âsi mono nhib'a'uwẽ norĩ hã i'uwaibaba si 're inomro mono zém na hã.

Paulu hã te te tãma rob'ui'éré za'ra wana ré hã, ma tô rob'ui'éré hã tãma me za'ra, Corĩtu norĩ hã Pauluhu ma. Taha na ma tô siwi sadanha, tinhimi'ui'éré za'ra na marĩ hã tãma 're ihâimana za'ra mono zém na, ro'wa'rudu hã. Capitulu 7 ãma hã ma tô Paulu hã asa tãma ãma rowasu'u za'ra, te te isadanharĩ za'ra zém na hã. Ma tô duré tãma waihu'u za'ra, isazei'wai mono bâ 'Re ihâimana u'âsi mono Pẽ'ẽzani hã romhuri mono bâ te te tãma 're i'apisutu mono zém na hã (capitulu 12, 14 ãma hã). Capitulu 13 ãma ma tô duré rowasu'u, 're idasisawi za'ra mono zém na hã. Capitulu 15 ãma hã te duré rowasu'u, Zezusi hã dâ'â nherẽ, sena na apâ ihâiwa'utuzém na hã, duré taha zarina, wa norĩ zama apâ 're iwahâiwa'utu za'ra mono zém na hã.