3 Tawamhã te te robzépata za'ẽtẽ parimhã, Zezusi hã ma tô sihâi'ré hâiba uptabi na, tizadawa wasu'u'wa norĩ ma. Ahâ na ma tô tãma sihâi'ré za'ra, sena na hâiba ré ihâimana na, te te waihu'u za'ra da. 40 na bâdâ isi'utõrĩ 'remhã, ma tô nasi tãma sihâi'ré za'ra. 'Re ihâimana u'âsi mono da'ãma 're isib'a'uwẽ mono zém na te nasi tãma rowasu'u za'ra. 4 Tawamhã nimahã bâtâ na hã isiré sa za'ra ré, te tãma roti pese za'ra, ãne:

— Aiwairébé aba tõ, Zeruzalẽ hawimhã. A'â sapari za'ra wa'aba, Ĩmama te te ãma iropisutuzé, te aima iwasu'u za'ra wa'wa hã. 5 Zuwã Batista hã â na si, ma tô â dawabzuri hã te te dama 're ab'manharĩ. Tazahã, a norĩ wa'wa hã bâtâ umro na te za oto 'Re ihâimana u'âsi mono hã Tipẽ'ẽzani na aihâiba ubu za'ra wa'wa.

6 Tawamhã isadawa wasu'u'wa norĩ isiré isi'ubumro hã te siwi sadanha, ãne:

— Wanhib'apito, e ãhã na Izaraéu nhihudu norĩ te te 're ida'madâ'â za'ra mono zé hã te za apâ para na isã.

7 Tawamhã Zezusi hã ma ãma sada'âbâ za'ra, ãne:

— A norĩ wa'wa hã sadai õ di, 're iwaihu'u za'ra wa'aba mono da hã, bâtâ za'ratazé duré wahu hã marĩ da, Ĩmama te te sima 're i'apisutu mono hã tizadawa para. 8 Tane nherẽ, te za asimiroti nhiptede hã iwaibui wa'wa, 'Re ihâimana u'âsi mono Pẽ'ẽzani we atẽme te te si'ra za'ra wa'aba wamhã. Tawapsi, te za ĩzadawa wasu'u'wa na ĩma 're aihâimana za'ra wa'aba mo, Zeruzalẽ 'remhã, ropâ Zudéa ãma duré Samaria ãmab zama. Uburé ti'ai mono bâ te za duré dama ĩzadawa wasu'u za'ra wa'aba mo.

9 Tawamhã ãne te te tãma rowasu'u za'ra pari, Zezusi hã ma tô Imama tiwi âri za'ra, isõ'a za'ra. Te te siwi 'madâ'â mono ré, ma tô hâiwa'a hã tiwi rob'upsibi za'ra. Tahawa te te oto siwi 'madâ'â waihu'u õ di. 10 Tawamhã Zezusi hã hâiwa u morĩ ré, hâimo te te siwi 'madâ'â pese mono ré, ma tô rosa'rese õ ré, aibâ norĩ maparane i'uza ihâirã zahuré hã aima'wa, isababab za'ra. 11 Ta norĩ hã te ãne tãma nharĩ za'ra:

— Galiléia ãma 're i'aihâimana za'ra wa'aba mono norĩ, e marĩ wa, te hâimo irob'madâ'â za'ra wa'wa. Tô ã hã Zezusi hã 'Re ihâimana u'âsi mono, hâiwa u te te aihawi i'âri za'ra wa'wa hã te za we apâ mo, hâiwa u morĩ ré asiwi i'madâ'â aba ne.

12 Tawamhã Zezusihi zadawa wasu'u'wa norĩ hã, Olivera na ẽtẽ 'rãihâ nhisi hawi te te si'ra za'ra wamhã, ma tô apâ ai'aba'ré, Zeruzalẽ u. Ta hawimhã, Zeruzalẽ u hã misi quilometru na ti'ai pibuzé hã. 13 Zeruzalẽ u sihutu wamhã, 're idanhimi'wara mono zéb u te hâimo sai'uri za'ra, tinhimi'warazéb u. Isadawa wasu'u'wa norĩ hã ãne isisi za'ra hã: Pedru, Zuwã, Tiagu, Ãdré, Filipi, Tome, Bartolomeu, Mateus, duré Afeuhu 'ra Tiagu na isisi, Simau, zeloti norĩ niwĩ 're ihâimana mono, duré Zudasi, Tiaguhu 'ra. 14 Tawamhã te 're si'rã'õtõ u'âsi uburé siré, te te nasi rowaptẽrẽ za'ra da, pi'õ norĩ zama, Maria Zezusihi na duré ino norĩ zama.

15 Taha bâtâ 'remhã, Pedru hã ma tô hâiwi za, isazei'wa norĩ wa'wa, 120 na isazei'wa norĩ hâiba hã. Ãne te tãma rowasu'u za'ra:

16 — Ĩsisãnawã norĩ, i'ru zahi tô te te sina i'uwaimrami da hã duréihã 'Re ihâimana u'âsi mono Pẽ'ẽzani hã Davihi zadawa na Ibaihâ Iwazé pese na ãma rob'ui'éré siro, Zudasihi ãma te te iwaihu'uzé hã, dama rowasu'u'wa na ihâimanazém na hã, Zezusi te te siwi âri da, sô isi'aba'ré norĩ ma hã. 17 Zudasi hã wasiré za'ra aré, wanhimiromhuri hã wasiré te te 're i'manharĩ mono. 18 (Rob'uiprazé tiwasété wa'â te te i'âri na, ma tô ti'a hã 'mai'uipra, Zudasi hã. Tame ti'ai u ma tô waptãrã. Ma nomohaipo'o. Isai'rada hã ma tô ropé. 19 Uburé Zeruzalẽ 'remhã ma tô waihu'u za'ra ni, te te sima irob'manharĩzé hã. Tahawa ti'a hã ma tô dasiwi sisi ni “Aceldama” na. Imreme za'ra na hã te wasu'u “Ro dawaprui ré hã”.) 20 Tawamhã Pedru hã ma ãma uzusi, ãne:

— Ãne Salmu ãma, ãma rob'ui'éré hã:

— Ãne duré rob'ui'éré hã:

21-22 — Tahawa, wa za ni'wa aibâ hã wasiwi pisutu ni, wasiré za'ra 're hâimana mono da, Wanhib'apito Zezusi siré 're iwahâimana za'ra mono siré, Zuwã Batista, â dawabzuri te te tãma i'manharĩzém hawi, hâiwa u imorĩzéb u, wasiré wa te 're wasu'u za'ra mono da, ihâiwa'utuzém na hã.

23 Tawamhã maparane aibâ norĩ isisi na ma tô pisutu zahuré ni, Zuzé, Barsaba na da te 're isisi mono, Zustu na isisi amo hã. Duré Matias. 24 Taha pari, ma tô rowaptẽrẽ za'ra, 'Re ihâimana u'âsi mono wi, ãne:

— Wanhib'apito, uburé aima dawaihu'u pese di, dapẽ'ẽ 'remhã. Tahawa, ma'ãpé wama hâi'ré za'ra na. E 'wa hã ma ipisu, ã hã maparane ihâimana zahuré hã, 25 wasiré te te 're iromhuri mono da hã, Zezusihi zadawa wasu'u'wa na, Zudasi te te irẽmezé hã. Ta hã tô i'uwaibaba na ma tô mo, timorĩzéb u.

26 Taha pari ma tô marĩ hã sima me za'ra, te te siwi waihu'u da. Tawamhã ma tô waptãrã, Matiasihi nhisi u. Taha zarina, ta hã ma tô 12 na Zezusihi zadawa wasu'u'wa norĩ u oto ãzé.