Pas vemona konoi romu bia bom vemona. Momu bia bom^a God-a kamompe momu veka bia ya veku awei aro me koka momu. Memi olgeta awirai awaka ya God-a kemisave veꞌen. Yah ku vo vemona pon tah kanerenopu revo. Yah kanao nanairai nopu veka, beya nena unake inia kanerenopu revo vai. Aro koka awirai awaka ya God-a kesave ero, keperepopu revo. 2 Ku vo kemeremopu revo ero, em korao veka, awirai awaka ya God-a kwinia rimi veꞌen kupuana tah va nakei rimi toratora.

3 Cha Kan Pako re Jisas Krais, Ma Biam ya Cha Kan Pako, va neyokoku yah neremarimari pomi revo yah riꞌi mariri nerepomi. Ero korao veka, ao ve va inia nemiko kokai riya Cha Kan Pako re Ma Biam ya taim awirai awaka ya God tah pasin vo nemeremoiy revo aro ovu nuiniarokire laip memi.

4 Ao vo korao oꞌto pako kotena emo, em korao veka, kanayara veka ovu yei mevova momu ero pa kepekeu awirai awaka veka Cha Kan lo karomi va pa nemekeu ero. 5 Bia bom biꞌiy, pas vemona mare kaneꞌe nomu emo, awirai-a kwinia rina kanao va pa nopeke. Nena beya kanairai no lo tare tirin vai. Baun poaka! Emo awirai vo lo kemiko veꞌen ato ero. Yah kanatere nopu va nemeremoiy revo aro ovu. 6 Pasin vo nemeremoiy revo aro ovu, korao veka, va nekemi revo rimoꞌo moike tah pa nemekere revo lo ya God. Lo ya emo kopuko veꞌen atoke, yah pa va nopekeu pasin vo noperepoiy revo aro ovu.

7 Prumo yei aro tore mare kekepi veꞌen tah inia ketova charara meꞌri vemona. Aro vemona beya kuiniari niriraiꞌvo veka Jisas Krais-a kararo meꞌri nao reka veka bio aka. Aro tore vemona, kesave kekepi veka birua awaka ya Krais. 8 Korao veka tah mopu va ovanopukina revo. Awenari awirai ya Krais-a nopepeu, tah ao neman vemona inia kemirevapana mo emo, va norerepu. Mopu va noropi kupuana vora kuiniari ao neman koka vemona God-a va naropu ero nopuko. 9 Boh bio awirai ya Krais-a narereu tah napuki nanoi rore awirai keremara reu awirai ya Krais, God-a beya boko kako tah kakeiroki laip ya bio vemona vai. Toh boh bio awirai ya Krais-a nawo kupuana, Cha Kan re Ma boko kereko yah kerekepiroki laip ya bio vemona. 10 Korao veka tah, boh bio raꞌa nakai ripu tah skul-a naropu ro awirai ya God, tah awirai veka vemo beya nako nakai, beya ovanokokore napu tah umonai neman-a nopao poa yah raꞌa vo minia, beya nopuko ya nanoi ropu oꞌro mopu vai. 11 Bio umonai neman-a narao roa tah narave kura ya bio veka ve tah pasin neman-a narao roa, kakeirokire boꞌo taipere ya bia vemona.

12 Awirai prumo kerinia rina va nanairai nopu. Toh beya kanao awirai vemona naneꞌe nuiniarovo pas vemona vai. Kanakinakina veka va nakane nanayarapu tah nekemi minia yah ava nemirai pon ro mo ao vemona. Yah ao emo va norao olgeta oꞌto notemi revo. 13 Aro me vo rou momu biabom voro God-a kamompe vo kokei veka bia ya veku ero, umonai neman-a kesalim pomu.