Beten va nemao yah nemitere moa God vora nalpim yei aro bombiam
2
Ao vemona kanereno revo va namao wo,
namairai moiy aro bombiam koka beten nepao poa God.
Yah oꞌti nepoa yah netere poa vora nalpim yei aro bombiam koka.
2 Beten va nepao yah netere poa vora nalpim yei king awei gavman.
Vora kuiniari olgeta riꞌi mariri nemiko yah nekemi revo.
Yah kuiniari pa nemekeu pasin neman ri ine yei aro bombiam tah ya God minia.
3 Beten veka koneman riya ine ya God bia ya nako memi varu,
tah korao riꞌi neman kako tah ova korova revo.
4 Karao nako yei varu aro bombiam koka vora kuiniari neyara revo ku vo awirai awaka.
5 Emo korao veka,
memi God moikera pon kakei tah bia rora moikera pon inia karoi romomi aro bombiam tah ya God.
Bia emo ya Krais Jisas.
6 Taim ya God-a veku kamompe,
Jisas-a laip ya veku karomi vora nako memi varu aro bombiam koka.
Yah pasin vemona God-a kariritami veka karao nako memi aro bombiam koka.
7 Ku vo vemona pon tah,
God-a kamompe nena vora nakeni veka aposel vora awirai ya nanairiraiꞌvo.
Awirai vemona ero awaka,
beya kana roponepu vai.
Boꞌo karona va skul-a nanoiy aro bombiam beya kiave Juda vora kuiniari nebilip pova Krais yah awirai awaka vemona nesave revo.
8 Korao veka tah,
kanereno veka aro biam vo boko koka va eno nepuko nake yah beten-a nepao.
Kanereno revo veka laip yei va nepoa God yah nekepi neholi yah pasin vo tovetove tah awirai niopakeu nepepeuki.
Yah pasin vemona pon pa nepekeu yah prea nepao.
Pasin vo boꞌo neman nemao, ero bilas awaka rere aro bom
9 Kanereno minia veka aro bom beya bilas rere nererikoko ine noraoki revo riy aro bombiam koka vai.
Tah beya chapeꞌe na reka rere bilas ine neman neman neyoro veka gol,
tah ao maramaraꞌa veka manemane tah noreka yah aimino keresave kerebaim mani pako ero.
10 Toh boꞌo neman va nererao vora noriritao veka kererao pa nererekeu revo awirai ya God.
Boꞌo vemona nererao va norao veka bilas awaka rere.
11 Va nere daunim rere veku yah nerekeri toropo yah awirai ya God-a nereko.
12 Nena kanairai aro bom beya nerenori roiy aro biam cha tah skul-a nereroiy ro awirai ya God vai.
Bauni.
Va nere daunim rere yah awirai pon nererivo.
13 Ero korao veka,
God-a karao naka Cha Adam wo,
yah kope karanao Kwa Iv.
14 Satan-a ruru karurovoru Kwa Iv yah karopore sin-a korao.
Kope Cha Adam,
Satan beya ruru keyarovoru tah karoporeya vai.
15 Toh rere aro bom kuiniari meva nereru.
Boh nerebilip rova revo Krais yah pasin neman nererao yah nererereroi aro ovu yah nerekeri nereholi,
God-a va nako rere varu.