Nambawan pas Cha Pol kareꞌe roa
Cha Timoti
1
Nena Cha Pol,
aposel ya Krais Jisas pas vemona kaneꞌe.
Bia vemona Jisas-e,
kemisave ya revo yah inia kekemikeya va nemi pirikere ao veka kapromis va nerekamap pa ero.
God,
bia ve kako memi varu emo,
re Krais Jisas keremompe nena va nakeni veka aposel ya.
2 Mah Timoti,
mema kamasave kamabilip mova Krais Jisas yah pasin vemona pon korao kakemi veka ma awaka nena.
Nena pas vemona kaneꞌe konoi roma,
emo korao veka,
God Cha Kan Pako re Biapako memi Krais Jisas emo,
va neyokoku poma revo yah neremarimari poma yah nerepao nakemi riꞌi mariri.
Memi va pa nemekeu awirai awaka pon
3 Taim kanenema bo voronaro yah kanao nanoni provins Masedonia,
kanairai noma va baunke nakemi mataimon Efesus yah namaomariy beyo aotore vora beya aotore nirai taim skul-a nepoiy aro bombiam ro awirai ya God vai.
4 Yei va pasin vo awirai kanakanapo chirirai re awirai prumo maramara chirai po awoꞌo yei aro raiyau yei va nepepeuki.
Awirai vemona,
koroporei yah korao inia ketove tove tah roma kepao charara tah beya kuiniari noalpim yei nebilip pova God yah boꞌo vemona God-a karoi ero nepao vai.
5 Toh ku vo awirai kupuana vemona kanairai nopu emo,
korao veka,
mopu va nopere poiy revo aro bombiam ovu.
Pasin vemona kosave kokai are kuro ya nape ova kakinakina veka,
beya kuiniari pasin taipo narao vai.
Kasave pasin niniu pon karao ri ine ya God yah kabilip rova revo Jisas.
6 Aro ovu rara neman vemona kepepeu veꞌen yah mare pa kepekeu rara vo awirai tore voro ku vo kobaun ero.
7 Yei kesave keperepo revo va nekepi veka tikse vo lo voro God-a karoa Cha Moses ero.
Toh yei beya kesave rere ku vo awirai chirai po ero vai.
Kekupuana po revo awirai yei,
kepitoro veka awirai vemona kesave revo.
Toh yei veku beya kesave rere ku vo awirai inia chirai ero vai.
8 Kemisave veka boh nemin lo boꞌo ve God kamompe rou norao,
emo koneman poaka.
9 Kemisave minia veka God-a beya lo karere vora kot-a nereirao aro pa kepekeu pasin niniu vai.
Bauni.
Boꞌo vo lo emo,
va nostretim pasin yei beyo voro kesave pasin taipo kepao ero.
Aro yei inia kebikhet tah piakorerei,
yah yei aro beya kesave pa kepekeu pasin niniu ri ine ya God.
Lo emo va kot-a nereirao aro vo pasin taipere kepao,
yah yei aro inia pa kepekere ao vo meꞌri vemona pon tah beya kesave pa kepekeu pasin God-a karerero.
Lo va kot-a nereirao minia aro kepiere akamoꞌo keviri,
tah yei aro kesave kepiey beyo keviri ero.
10 Lo va kot-a nereirao aro bombiam inia pasin pamuk kepao yah yei aro biam veku inia pasin pamuk-a kepao varuvaru ero.
Yah raꞌa vo minia va lo kot-a nereirao aro inia beyo keko yei kakana yah kesalim yei poiy aro ovu yah kepao kekepi veka wokboi kanapo yei.
Tah yei aro inia aotore chirirai ero.
Tah yei aro voro kesave promis-a kepao veka va ao vemona nepao toh beya kepao vai.
Yah yei aro kesave ao ovu keparepare vora noriritao veka yei beya keperepo awirai awaka ya God veka memi inia kemirirai mo ero.
11 Awirai neman vemona,
kwirai romi veka,
God memi ve ya veku kupuana kwinia riya tah kakei revo lait pako.
Yah kamompe nena tah awirai vemona karona vora nanairiraiꞌvo.
God vemona awoꞌo kapako revo tah ya veku ku vo pasin vo oꞌto notemi.
God kaokoku rova Cha Pol tah Cha Pol oꞌti karoa
12 Nena oꞌti kanoa Krais Jisas Biapako memi,
kupuana karona yah kasave veka kuiniari naroni kupuana yah boꞌo ya nanao.
Korao veka tah kamompe nena va boꞌo vemona nanao.
13 Titja,
nena bia vo piakanari yah poko taipo kanairai noa Biapako yah aro ya minia inia kanao noiy toro.
Nena bia vo pasin taipo aka kanao yah kana bagarapim yei kanapo aro bombiam kebilip ero.
Toh ya kaokoku rona revo,
emo korao veka,
taim nena veku ao vemona kanao,
nena beya kanasave ya tah beya kanabilip nova vai.
14 Biapako memi Krais Jisas emo,
kamarimari rona revo yah karao kanabilip nova yah riꞌi nena mina kanoiy aro ovu.
15 Awirai vemona kanao nanairai nopu emo,
emo awirai awaka,
memi aro koka va nemiko yah nemibilip mo.
Krais Jisas kararo meꞌri vemona va nako yei varu aro bombiam kesave ao taipere keparepare.
Nena raꞌa yei aro ve ao taipere keparepare emo,
toh nena ao taipo kanao kanatawoiki revo.
16 Toh mema kuiniari nama pirike veka nena bia taipo aka,
yah Krais Jisas kamarimari rona revo.
Yah ao vemona va noriritaiy aro bombiam koka vora kuiniari neyara veka ova keyaroro.
Toh ororo ya beya kokai bereren taim sin-a nepao piya ine ya.
Ao vemona kuiniari neyara yah nebilip pova revo yah laip vo kwinia toratora neko.
17 Nena kanereno revo va memi aro bombiam koka va awoꞌo ya God nemawoko nake yah mare tah konoi yah toratora va awoꞌo pako nemoa.
Emo korao veka,
ya unake God.
Ya King,
tah beya kuiniari nemi pirikeya ine memi vai.
Va nakei toratora tah beya kuiniari narai vai.
Awaka revo.
Cha Timoti va narevapana revo rara vo pasin taipo natire va beya nerekamap vai
18 Ma nena Mah Timoti,
baunke ava inia kanairai nama yah kupuana kanoma vora boꞌo vemona kanoma emo va namao,
vora kuiniari ova nama kina more awirai profet chirai poma ero.
Kanao veka vora kuiniari ova namakina more awirai yei profet,
yah mema kuiniari naromi kupuana yah boꞌo namao va awirai neman ya God namairiraiꞌvo.
Yah taim beyo pianepari po awirai mema,
kuiniari va naromi kupuana mo awirai awaka vemona veka soldia kesave keropi kupuana taim vo roma.
19 Taim naromi kupuana veka emo,
va namabilip mova revo Jisas yah kuiniari namasave veka beya ao taipo kamao miya ine ya God vai.
Aro ovu kesave veka ketotopo,
toh yei beya kepin God-a kanoi roiy cha yah rara niniu nariritaiy vora kuiniari pa nepekeu.
Korao veka tah bilip yei kotaipo veka sip raꞌa korinkore tao rip tah kotaritari.
20 Riyempin yei aro ve inia kepao veka emo,
Cha Himeneus re Cha Aleksander.
Nena bia riyempin vemona kanereiki noa eno ya Satana vora kuiniari neresave veka beya poko taipo tare neyirai poa God vova vai.