Aro kesave kenopi cha boꞌo vo sios-a kepao ero va pa nepekeu pasin neman
3
Awirai vemona va nanairai nopu ve,
emo awirai awaka.
Boh bio narerero revo va boꞌo nako veka wasman vo sios,
boꞌo vemona koneman revo va narao.
2 Bio karao naraka wasman va panarekeu pon pasin niniu,
vora bio beya kuiniari rong raꞌa neyara piya vai.
Yah om moikera pon nako tah raꞌa vo minia va nakei toropo yah ava naoreroro revo wo,
yah kope narao.
Yah naorerari ya veku yah pa narekere pon pasin neman yah va beyo kuiniari awoꞌo ya niawoko.
Ao raꞌa minia,
va pasin neman narao roiy aro kesave kekape oꞌro ya,
yah nasave vo revo rara vo skul-a naroiy aro bombiam.
3 Beya naspak vai.
Beya ova neyaroro bereren tah roma narao riy aro ovu vai.
Va namariro roiy.
Yah beya mani narerero revo vai.
4 Yah va naraorari revo om tah me ya,
yah narao me ya nesave revo awirai ya tah pa nepekeu.
5 Bia nape beya kuiniari naorerari revo om awei mevova ya veku,
beya kuiniari boꞌo vo naorerari sios ya God nako vai.
6 Kristen tare beya kuiniari boꞌo wasman vo sios-a nako vai.
Boh boꞌo vemona narao,
ruru taipo kuiniari nokamap riya yah awoꞌo ya veku nawoko tah pianoreriaka yah God-a kuiniari kot-a neyarao minia veka kot-a keyarao Satan ero.
7 Bio karao boꞌo vo sios-a nako yah nanoi roiy cha,
va awoꞌo neman nako.
Aro voro beya kekepi sios are minia va awoꞌo ya niawoko yah nirai veka bia emo kaneman.
Yah bia vemona kuiniari boꞌo vo sios-a nawo yah nanoi cha.
Toh boh bio awoꞌo taipo nako,
bia vemona va awirai maramara nirai nebagarapim ya tah Satan va nawia naroroa veka trep ame koawere.
Aro boꞌo vo sios-a kepao va pa nepekere pasin neman
8 Korao pon veka tah,
aro wokman ovu kemompe va boꞌo nepao sios are,
yei minia va awoꞌo neman nuinia riy yah va nerispetktim yei.
Yei beya nespak yah raꞌa vo minia,
beya ava neperepore tah rara maramara neorenanare vora aokakana nepao poiy mani yei aro ovu vai.
9 Yei veku va neyara veka beya ketotopo piya ine ya God vai.
Yei va awirai awaka God-a karomi aro kemisave kemibilip mova ero,
va niawo kunpuana.
10 Mopu va nopuyarai revo wo,
boh aro voro beya nai-a neparepare,
yah kuiniari boꞌo vo sios-a nopoiy.
11 Aro bom yei minia,
va pasin neman nererao yah awoꞌo neman nereko ri ine yei aro ovu.
Beya pianererari o awirai nerewitikei aro ovu vai.
Rere va nerekontrolim rere veku yah neredaunim rere veku yah nerekeri revo yah boꞌo ve kepore emo nererao revo.
12 Wokman vo sios va om moikera pon nako yah va naorerariy revo aro mewova ya tah aro koka inia kekepi piya oꞌro ya ero.
13 Boh aro wokman vo sios boꞌo yei nepao revo,
va aro koka awoꞌo yei niawoko revo yah kuiniari neropi kupuana yah wokman vo sios beya kuiniari neriri vai,
yah nirai veka bilip yei kwinia rova Krais Jisas.
Ku vo pasin vo bilip memi
14 Mare kanao nakane nana pirikema,
toh ova kanakinako veka va awirai vemona naneꞌe noma wo.
15 Boh beya nakane bereren,
mema kuiniari nama pirikere awirai kerinia rowore pas vemona va noriritama pasin neman voro memi aro ya God va pa nemekeu ero.
Memi aro ya God kekemi veka sios ya God laip-a kwinia riya toratora.
Yah sios ve korao veka para kupuana tah akairi pako kopoi nao awirai awaka ya God.
16 Memi olgeta awirai aka kemisave veka,
beyo va pasin neman nepao revo ri ine ya God ero,
emo ao pako aka.
God kariritami veka,
Kakai veka bia awaka
yah aro bombiam kepirikeiya ine yei,
yah Holi Spirit koriritao veka pasin ya koniniu revo,
yah rere ensel minia kerepirikeiya ine rere.
Aro voro awirai ya keko ero
tah chiriraiꞌvo boko koka vo meꞌri vemona,
yah aro bombiam vo meꞌri vemona
kerivo tah kebilip pova,
yah God-a kako ya kakoi nake
yah kakei boꞌo vo lait pako aka.