Cha Pita re Cha Jon kere nopi kere ropi ine yei kaunsil
4
Taim Cha Pita re Cha Jon baunke inia kereropi yah inia ava keyirai poiy aro bombiam, yah kope yei aro pris awei kepten yei polisman vo tempela yah ovu yei Sadyusi kekape piꞌiy riyempin. 2 Keyara veꞌen veka, Cha Pita re Cha Jon skul-a kerepoiy aro bombiam veka, Jisas-a karai yah kope God-a karao kavariko varu. Yah aro voro kebilip tah keviri ero, yei minia va God-a narao nevereko varu. Awirai vemo keyirai tah korao ovakereiroꞌro roiy aro riyempin-e. 3 Yah kiavei Cha Pita re Cha Jon yah kepao kot-a nepeipao. Toh kope vo bova yah kobaribariri tah kepereiyki kerekepi kalabus konoi kuri naiy. 4 Toh kope yei aro bombiam prumo awirai vemo kerivo veꞌen emo, kebilip pova Jisas. Yah namba yei aro biam kebilip kokoi nake veka 5,000.Kekape piꞌiy kaunsil yah kot-a kepeipao Cha Pita re Cha Jon
5 Kope uri, aro biꞌiy yei Juda, awei hetman yah yei aro saveman vo lo kekape kiopokeu minia mataimon pako Jerusalem.b 6 Aro vemona minia kekape kiopokeke piꞌiy. Cha Anas ya hetpris vo tempel, Cha Kaiafas, Cha Jon, Cha Aleksander yah awei aro noo ya hetpris vo tempel. 7 Yah keko yei Cha Pita re Cha Jon kerekape kereropi ine yei tah ketere poiy veka, “Toh mopu kupuana korupuko rope tah ao vemo korupupao? Toh ao emo korupupao po awoꞌo ya bia nape?”
8 Kope Cha Pita rovakare ro Holi Spirit yah kairai roiy veka, “Mopu aro hetman, awepu aro biꞌiy yei aro bombiam vo Israel, 9 mare kopao noputere popi po ao vemona kepipao poa bia kom taipo raꞌa kaneman varu emo. Era kopao noputere popi veka, bia kom taipo vemo kaneman varu veka rope? 10 Boh norao veka, mopu aro biꞌiy awepu aro bombiam koka vo Israel, awirai vemona nopurivo. Awoꞌo re kupuana ya Jisas Krais vo Nasaret unake, bia vemo mare karoi ine mopu ve kaneman varu. Mopu Jisas-a kopututari naka kruse yah karai, kope God-a karao kavariko varu. 11 Jisas,
ya kave akairi vo oꞌro noavo noroi kupuana, toh mopu aro vo oꞌro koparepare kopitoro veka akairi emo kotaipo tah kwonipu pova. Toh kope mare akairi emo koneman poaka vora oꞌro noavo noroi kupuana.c
12 Bia raꞌa beya kuiniari nako memi varu vai, baun poaka. Awoꞌo ya Jisas unake tah memi aro bombiam vo meꞌri vemona kuiniari nekimi revo torotora. Ya unake God-a kamompe ya va nako memi varu.”
13 Aro biꞌiy vemo keyara veꞌen veka Cha Pita re Cha Jon yei aro kanapo aka, boh beya skul-a kerepao vai. Toh keyarai kereropi kupuana yah awirai-a keyirai tah beya kereriri vai, korao veka tah aro biꞌiy keririko toro. Yah keyara veka, titja kerekepi piya minia Jisas. 14 Yah kepirikeiya bia vemo kom ya koneman varu emo, karoi riꞌiy minia. Yake, rova kobaunki reiy tah beya kuiniari awirai-a raꞌa niyrai poiy varu vai. 15 Yah kope kaunsil-a chirai poiy aro 3-pla vemona kepepeu oꞌro kaunsil yah kenopi upuoꞌo, tah yei kaunsil pon kekepi yah awirai-a chiriraiꞌvo. 16 Kekepi yah veku keteretere veka, “Memi va arape nemao moiy aro riyempin vemona? Aro bombiam koka kekepi Jerusalem keyara veꞌen mirakol vemo kerepao. Yah beya kuiniari nemirai veka ao vemona kerepao emo, beya awaka vai. 17 Memi beya kemeremo awirai vemona nonoi rorore boko prumo yah aro bombiam-a nerivo vai. Korao veka tah memi va awirai kupuana nemirai moiy bia riyempin vora beya awirai niyrai po awoꞌo vemona tah aro bombiam-a nerivo vai.”
18 Yah kope keipiy Cha Pita re Cha Jon kerenopi piꞌiy are yah awirai kupuana chirai poiy veka, “Mopu bia riyempin vemona, mare beya kuiniari awirai-a norupirai o skul-a nopao poiy aro bombiam ovu ro awoꞌo ya Jisas vova vai. Baun poaka.” 19 Kope Cha Pita re Cha Jon keyiraikipe poiy veka, “Mopu va ova nopukinaki revo wo, era va noneman riya ine ya God, taim pa nepipikeu awirai mopu o pa nepipikeu awirai ya God? 20 Toh mepi beya kuiniari rova nepipikim po awirai vemo vai. Mepi va ava nepiriraiꞌvo rore ao koka kepiyarare tah kepirivo ero.”
21 Yah kope kaunsil-a awirai kupuana ovu vova chirai poiy vora beya ao vemona nerepao vova vai. Yah kerokoperiyki kerenopi. Ku vo korao veka, keriri poiy aro bombiam. Aro bombiam koka ovakekina po ao vemona God-a kararerare veꞌen emo, tah awoꞌo ya chavoko nake. 22 Bia vemona mirakol-a kerepao tah kaneman varu emo, ainini ya kotawo veꞌen 40.
Aro kebilip beten-a kepao
23 Yah kope kerokoperiyki Cha Pita re Cha Jon yah kerenopi piꞌiy varu aro yei. Yah kope keyirai poiy aro yei rore ao koka hetpris awei hetman-a chirai poiy ero. 24 Taim aro yei awirai vemona kerivo, yah romoꞌo ketiti moikera tah beten-a kepao poa God. Beten-a kepao veka, “Biapako, mema uteno kamao, meꞌri, nao awere ao koka kerinia emo kamaremare minia. 25 Titja kamao Holi Spirit-a ava kwirai roo ya apo memi Cha Devit, bia ya boꞌo mema karao. Kairai veka,
‘Aro bombiam voro beya kiave Juda, ovakereiroꞌro revo ro arape?
Korao veka rope, tah aro bombiam-a inia awirai-a ketiti minia tah akai vo kobaun reu?
26 King prumo vo meꞌri vemona, kekepi ova pon kekina va roma nepao.
Tah yei aro hetman keopokeu minia yah awirai chirai minia veka va roma nepao warapoa Biapako re Krais, bia voro God-a veku kamompe va nako yei varu aro bombiam ya.’d
27 Awirai vemona awaka korao naꞌao. Cha Herot re Cha Pontius Pailat awei aro voro beya kiave Juda tah yei Israel kekape keopokeu minia mataimon vemona, yah awirai-a ketiti moike raꞌa vora Jisas-a nepao poa toro, bia emo ya bia holi wokman mema. Bia emo mema veku kama mompe vora boꞌo mema narao. 28 Taim ao vemo kepao, pava kepekeo kupuana re ruru mema kameremo va norao naꞌao vekaemo. Kupuana mema, titja veku kamairai veꞌen veka ao vemona va norao naꞌao. 29 Biapako, mare va ova nama kina more awirai vemo mare chirai emo, kepao vora nemiriri moiy. Yah mema va namailpim memi aro wokboi mema vora awirai mema nemiriraiꞌvo nao kupuana mema yah beya kuiniari nemiriri moiy vai. 30 Yah kope eno mema nameretaiy aro au-a korai ero vora neneman varu. Yah mema va mirakol maramaraꞌa namaremare ro awoꞌo ya Jisas, bia holi wokman mema.”
31 Kope taim beten-a kepao veꞌen, yah oꞌro vemona kekepi emo kwerere yah ro kepe Holi Spirit tah kupuana koroiy. Yah awirai ya God-a inia chiriraiꞌvo tah beya keriri vai.
Aro bombiam kebilip ao yei kevani
32 Aro bombiam kebilip pova Jisas yei kekepi romoꞌo moike re ruru moike raꞌa kanapo. Bia raꞌa beya kuiniari nairai veka ao ya ero, ero ao ya unake vai. Baun poaka. Ao voro kerinia riya disaipel moike raꞌa ero, ero ao yei olgeta minia. 33 Holi Spirit-a kupuana koroiy aposel, yah awirai kupuana chiriraiꞌvo veka Jisas Biapako karai yah kope kavariko varu. Yah God-a karao roiy revo aro bombiam koka kebilip pova Jisas. 34 Korao veka tah raꞌa yei beya ava kobaun reiya vai. Ku vo karao veka, aro vemona ao yei ovu veka meꞌri, oꞌro yah ao ovu vova kepiꞌiy aro ovu kebaim yah kope mani inia keko kekape poiy varu aposel, 35 yah aposel-a kevani konoi roiy aro bombiam voro ava kere baun reiy ero.
36 Bia raꞌa awoꞌo ya Cha Josep, ya raꞌa yei Livai, bia emo ya ailan Saiprus. Aposel-a inia kepinaka Cha Barnabas. Awoꞌo vemo Barnabas, korao veka, bia ya ao neman-a kararerare yah awirai neman-a kairai vora inia kupuana noroiy aro ovu.e 37 Meꞌri koraꞌa kasalim bio raꞌa kabaim, yah mani vemo kako emo, kako kakai karoiy aposel.