Cha Judas ova korova va Jisas-a naroiy eno peꞌe yei va nepieya narai
(Matyu 26.1-5; 26.14-16; Mak 14.1-2,10-11; Jon 11.45-53)
22
Taim vemona,
emo taim vo Akorom Pako vo Bret-a Yis-a Kobaun reu,a
kepina Pasova,
yah inia kokai kakuke.
2 Aro bikpris awei aro saveman vo lo,
rara inia keore nana vora nepieya Jisas-a narai,
toh keriri poiy aro bombiam.
3 Kope Satan-a karikorova Cha Judas,
awoꞌo ya raꞌa Cha Iskariot.
Cha Judas-e,
bia emo ya raꞌa yei 12-pla disaipel.
4 Yah Cha Judas kanoi riꞌiy bikpris awei aro kepten vo tempel-a keore papiꞌi,
yah awirai-a kiriraivoꞌo po rara veka rope va Jisas-a narokoreriaki roiy eno peꞌe yei.
5 Aro bikpris awei aro kepten vo tempel ova koroꞌoiy poaka tah awirai-a kirai minia veka,
va mani nepoa Cha Judas.
6 Cha Judas ova korova roꞌo awirai yei yah rara inia kaore nana vora Jisas-a nareriakire roiy eno peꞌe yei,
taim aro bombiam koka beya kekape kekepi piya Jisas vai.
Disaipel riyempin-a akorom-a kerepao
(Matyu 26.17-25; Mak 14.12-21; Jon 13.21-30)
7 Kope De vo Bret-a Yis-a Kobaun yake kokai.
Taim vemona va sipsip ma rava nepieya narai vora ofa nepao yah nepa.
8 Yah Jisas-a kairai roa Cha Pita re Cha Jon kere nopi,
yah kairai roiy veka,
“Norupu paro yah akorom vo Pasova norupu pao kekemi.”
9 Yah kope kere tere poa veka,
“Mema kamere mopi va nepi nopi boꞌo voro nepipao rope?”
10 Kope Jisas-a kairai roiy veka,
“Norupu rivo,
taim norupu nopi mataimon pako,
bia raꞌa pi piako kavo va navakakepu.
Yah pava nopekeiya norupu nopi oꞌro are voro kaute kanoi ero.
11 “Yah norupirai poa aka vo oꞌro vemona veka,
‘Tikse katere roma veka,
“Rum rope va nena awei disaipel nena kuiniari nekemi yah akorom vo Pasova nema?” ’
12 Yah aka vo oꞌro ve,
va rum pako raꞌa kwinia nake va nariritapu.
Rum emo,
tebol yah ao ovu minia kerinia.
Akorom-a norupupao kekemi rum voronaro.”
13 Yah kereparo yah ao ve Jisas-a kairai rore,
kere yarare naꞌao.
Yake akorom vo Pasova kerepao.
Jisas-a bret-a re wain-a karoiy aposel
(Matyu 26.26-30; Mak 14.22-26; 1 Korin 11.23-25)
14 Kope taim vo akorom Pasova yake kokai,
Jisas-a awei aposel ya kekepi tebol vora akorom-a nepa.
15 Yah Jisas-a kairai roiy veka,
“Kanere noꞌo revo akorom-a nana nipu Pasova,
yah kope pa,
nena va nai-a nanapoi.
16 Kanairai nopu,
beya kuiniari akorom ve Pasova nana vova vaib nonoi nuiniari ao vemona awaka norao naꞌao ri kingdom ya God.”
17 Yah kap wain-a kako yah oꞌti karoa God,
tah kairai veka,
“Mopu ao vemona nopuko yah nopu vani nonoi romopu.
18 Kanairai nopu,
nena beya kuiniari wain-a nanaton vova vai,
nonoi nuiniari taim kingdom God nokai.”
19 Yah bret-a rava kako yah oꞌti karoa God,
tah kakoreri,
yah kavani roiy yah kairai roiy vova veka,
“Emo reka nena,
kanopu vora noalpim mopu.
Tah mopu va nopao veka vora ova nopu kina pona.”
20 Yah taim bret-a kepaki naꞌao,
yah kap wain-a kako yah ao veka karao ro bret-e tare karao yah kairai veka,
“Kap emo kontrak tarec vo noo nena,
kovere vora noalpim mopu.
21 Toh nopu rivo!
Bio nape va nako nena,
yah naroiy eno peꞌe yei aro birua,
mare kakei rina tebol.
22 Ma Biam ya Bio va naote roꞌo rara vemo God-a kairai ro ero.
Toh,
mereraka revo,
bia voro kako ya tah kareriaki roiy eno peꞌe yei aro birua ero.”
23 Aposel-a awirai emo kerivo yah inia ketere tere poiy yei veku,
“Bio nape va ao ero narao?”
Aposel-a inia ketovetove po bio nape va nanoi roiy cha
24 Kope disaipel-a inia ketove tove po bio nape va nakei biapako yei.
25 Yah Jisas-a kairai roiy veka,
“King yei aro voro beya keave Juda,
kekupuana revo yah aro yei veku kiore papiꞌiy.
Yah aro kepeikepi roko,
kepinai king veka aro yei pasin neman-a kepao poiy.
26 Toh mopu beya ao veka emo nopao vai.
Bio karao naraka biabiꞌiy mopu,
va nakei veka bio mentanaka.
Kope bia karao nakei hetman mopu,
va nakei veka wokboi mopu.
27 Bia nape kave bia pako?
Era bia ya kakeita tebol,
o bia ya akorom-a kaive?d
Bia vemo kakeita tebol emo ya bia biꞌiy.
Toh kope nena,
kakeni romopu veka bia vo boꞌo nanao nopu.
28 Taim rere ava kerekare nere traim nena,
mopu inia koropi pina,
yah beya kopu turepi pena vai.
29 Aka nena kingdom-a karona,
korao veka emo,
tah nena minia kingdom vemona kanopu.
30 Tah mopu va nokepita pina tebol nena kwinia kingdom nena,
yah akorom-a nopa yah piva noputon.
Yah mopu va nokepita sia awaka yah kot-a nopu rivo poiy 12-pla lain yei Israel.”
Jisas-a kairai veka Cha Pita va natereriya
(Matyu 26.31-35; Mak 14.27-31; Jon 13.36-38)
31 Yah Jisas-a kairai roa Cha Pita veka,
“Mah Saimon,
Mah Saimon,
nama rivo!
Satan-a ao tere karao vora natraim bilip mopu,
veka beyo wit-a inia kerovorue vora amo rere nere pupupuki.
32 Toh nena kana beten noma veni,
vora bilip mema beya kuiniari norei vai.
Yah kope taim kama rovoruka varu,
mema va kupuana namoiy aro raꞌai mema.”
33 Kope Cha Pita kairaikire roa veka,
“Biapako,
nena kakeni nima pon ke,
va nanoni noma kalabus yah narani nima minia.”
34 Yah Jisas-a kairai roa veka,
“Mah Pita,
kanairai noma,
mare roro rukoko baunke beya kaororo,
mema va namairai 3-pla taim veka,
mema beya kama save nena vai.”
Jisas-a kairai aposel va ekoko re bainat yah mani minia niavere
35 Yah Jisas-a katere roiy disaipel veka,
“Taim kanairai nopu konopi boꞌo nena kopao ero,
mopu beya ao veka mani,
ekoko re sendel-a kopavere vai.
Yah taim voronaro,
era mopu ava kobaun repu poaka vai?”
Yah kope kirai poa veka,
“Bauni!”
36 Yah Jisas-a kairai roiy vova veka,
“Toh kope mare,
boh paus mani rava nuinia rima,
namako yah ekoko minia rava namako.
Kope boh bainat-a nobaun rema,
aimino mema nama salim rere vora mani namako yah bainat-a rava nama baim.
37 Awirai-a kepeꞌe kwinia buk ya God kwirai veka,
‘Aro bombiam kepitoro veka bia vemona beya pava inia karikeu lo vai.’
Kanairai nopu aro bombiam-a va pasin vemona nepao pona.
Ku vo koraka,
awirai koka kepepeꞌe pona,
kwinia buk ya God,
va awaka norao naꞌao.” f
38 Kope aposel-a kirai poa veka,
“Biapako,
nama pirikeu,
memi bainat riyempin-a kemawo.”
Kope Jisas-a kairai roiy veka,
“Ero,
kuiniari ke.”
Jisas-a kabeten tou Oliv
(Matyu 26.36-46; Mak 14.32-42)
39 Jisas-a mataimon vemona karereu yah kakoi tou Oliv,
veka inia kararao ero.
Tah disaipel ya pava kepekeiya.
40 Yah kakoi karoi boko ve inia beten-a karao vemo,
yah kairai roiy veka,
“Beten-a va nopao vora beya norepi rovope sin vai.”
41 Yah karereiki yah kanoikire mentan mentanki,
korarapaki veka mak vo akairi raꞌa bio kapruriki tah konoi koreiyo.
Yake ouku katureriki yah beten-a karao.
42 Yah beten-a karao tah kairai veka,
“Mah Kan,
boh nameremoꞌo,
kuiniari kapg vemona nama kokime mena.
Toh mema beya namemo mina vai.
Bauni.
Mema ava namao veka mema veku kameremoꞌo ero.”
43 Ensel raꞌa vo heven koraro riya yah kupuana koroa.
44 Rimoꞌo ya Jisas,
konai poaka tah tare beten-a inia kaowawoki vova.
Yah bene keiya tirotiro koraro meꞌri veka noo.
45 Yah taim beten-a karao veꞌen,
kavariko yah kanoi varu riꞌiy disaipel ya,
tah kayarai kevovo keraikipe veꞌen.
Ku vo koraka,
riꞌi yei konai poaka.
46 Yah katere roiy veka,
“Korao vekarope tah kopuvovo?
Nopu vereko yah nopu beten vora ao taipere beya kuiniari nere traim bilip mopu vai.”
Aro taipo keko ya Jisas
(Matyu 26.47-56; Mak 14.43-50; Jon 18.3-11)
47 Baunke Jisas-a karoiy ava kairai riꞌiy disaipel ya,
yah moike raꞌa yei 12-pla disaipel ya,
awoꞌo ya Cha Judas,
yah kakai roiy aro biam prumo cha.
Cha Judas kakai kakuke riya Jisas yake karao iri neiyakiri.
48 Yah Jisas-a katere roa veka,
“Mah Judas,
kamao iri nemiakiri Ma Biam ya Bio,
yah rara vemonamo,
mema kameriakime moiy eno peꞌe yei aro taipo,
era vai?”
49 Yah taim disaipel-a kepirikere ao vemona kererao nere kamap emo,
yah kirai poa Jisas-a veka,
“Biapako,
era bainat memi nemiey neviri vai?”
50 Yah raꞌa yei disaipel-a bainat-a kayeiya wokboi ya hetpris vo tempel.
Tah bainat-a teve paraꞌa awaka keriaoro kopakum.
51 Kope Jisas-a kapirike yah kairai veka,
“Yake!
Beya ao ero nopao vova vai!”
Yah eno keyareretaki teve yah teve ya keria neman varu.
52 Yah kope Jisas-a kairai roiy bikpris awei kepten vo tempel-a keore papiꞌi na yei aro biꞌiy kekape neko ya vemo,
“Mopu bainat re titi vo roma kopuna kokape nao pina,
kopao korao veka,
nena bia vo ao kakana kanao,
era vai?
53 Umumoka,
nena inia kakeni nipu tempel are,
toh mopu beya ava rava kopao pona vai.
Mare,
kupuana vo bo roroke bova karao pako,
tah emo koraka taim mopu.”
Cha Pita kairai karovinaka Jisas
(Matyu 26.69-75; Mak 14.66-72; Jon 18.25-27)
54 Yah kope keavia Jisas yah keko ya kenopi oꞌro ya hetpris vo tempel.
Yah Cha Pita inia kaute pava inia karikeiy kakai rarapaki mentan mentan.
55 Yah aikera kepere kwera rei are kuro vo oꞌro vemona,
yah kekepi iri keoroka papiꞌi aikera tah ya Cha Pita kakei riꞌiy minia.
56 Kope taim aikera kobiririko,
wokmeri raꞌa koyaraka Cha Pita kakei ri aikera.
Bia bom emo,
inia kopirikeiya yah kwirai veka,
“Bia emo,
ya minia kakei riya Jisas.”
57 Kope ya Cha Pita awirai vo bia bom vemona katereri yah kairai veka,
“Bia bom,
bia ero,
nena kana rovinaka ke.”
58 Kovevenki bia raꞌa vova kapirikeiya yah kairai roa veka,
“Mema minia,
bia raꞌa yei.”
Kope Cha Pita kairaikire roa veka,
“Nena bauni.”
59 Kope konoi korao veka aua moike raꞌa konoiki veꞌen,
yah bio raꞌa vova ava kairai kakupuana revo veka,
“Awaka revo,
bia emo,
ya inia kakei riya minia.
Bia vemo ya kakai distrik Galili.”
60 Kope Cha Pita kairaikire roa veka,
“Nena awirai voro kamairai ero,
kana rovinao poaka.”
Cha Pita baunke ava inia kairai,
yah rukoko kaororo rokorapo.
61 Biapako karovoruka yah kapirikeiyaka Cha Pita.
Yah kope Cha Pita ova kakina ro awirai ya Biapako titja kairai roa vemo,
“Taim rukoko baunke beya kaororo,
mema va namairai 3-pla taim veka mema kama ruvinana poaka.”
62 Yake Cha Pita kanoi upuoꞌo yah aro koka karo.
Pia kepari poa Jisas yah kepieya
(Matyu 26.67,68; Mak 14.65; Jon 18.22,23)
63 Aro vemona keavia Jisas-e,
piava kepari poa yah kepieya.
64 Aimino to koraꞌa ineva kepiatroro papiꞌi yah kirai poa veka,
“Boh mema profet,
namairai,
bia nape kayema?”
65 Yah awirai prumo taipere maramaraꞌa kirai poa minia.
Kot-a kepia pao Jisas riꞌiy ine yei kaunsil
(Matyu 26.59-66; Mak 14.55-64; Jon 18.19-24)
66 Kope uri roronai,
hetman yei aro bombiam kekape.
Aro vemona emo yei bikpris,
awei aro saveman vo lo kekape yah keopokeke yah Jisas-a keko ya kakai karoi ine yei.
67 Yah kirai poa,
“Era mema Krais,
namairai momi revo.”
Kope Jisas-a kairaikire roiy veka,
“Boh nanairai nopu,
beya kuiniari nopu bilip vai.
68 Toh kope boh atere raꞌa nana tere nopu,
beya kuiniari kope ava raꞌa nopirai kape pona varu vai.
69 Toh kope mare,
yah taim inia kere kare pa,
Ma Biam ya Bio va nakei eno paraꞌa awaka ya God kupuana pako kwinia riya.”h
70 Yah aro koka ketere poa veka,
“Era mema veku mema Ma ya God vai?”
Kope kairaikire roiy veka,
“Awirai yake voro mopu veku kopirai ero.”
71 Yah chirai veka,
“Beya nemirai moiy aro ovu vova nekape vora awirai ya ovu nirai pomi vova vai,
ya veku yah awirai vemona kairai romi veꞌen ke.”