Awirai bokis ya bosboi taipo
16
Jisas-a kairai roiy disaipel ya veka,
“Bia raꞌa mani kere prumo riya tah bosboi ya rava kakei riya minia.
Yah bosboi emo aro ovu kevitikeiya veka ao prumo ya bos,
katara kere nori kanapo.
2 Yah kope bos vemona,
kairia bosboi ya kakai riya yah katere roa veka,
‘Toh emo awirai arape vemona kanarivo noꞌo pasin mema ve?
Nanomi yah ripot rere ao koka nena kamaore mamire ero nameꞌe.
Ku vo koraka,
mema beya kuiniari nakemi veka bosboi nena vova vai.’
3 “Yah kope bosboi-a veku kairai varu veka,
‘Mare va arape nanao?
Ku vo koraka bos nena karirikenaki veꞌen roꞌo boꞌo vemo kanao vemo.
Kupuana nena kobauni,
beya kuiniari bova nanao noa bio raꞌa yah meri va naun vai.
Nena reka koyona roꞌo ava inia nana teretere noiy beyo.
4 Toh kope mare,
kana yara veni arape va nanao,
aro dinau kepao piya bos nena va neko nena nanoni oꞌro yei.’
5 “Yake kope kairiy aro ava kedinau piya bos ya ero kekape.
Yah katere roa bia kakai cha,
‘Toh mema dinau veka rope kamao miya bos nena?’
6 “Yah bia emo kairai roa veka,
‘800 galen wel dram,
emo dinau nena.’
Yah bosboi kairai roa veka,
‘Pepa voro dinau mema kepeꞌe ero,
namako yah nakemome bereren yah nameꞌe pon veka dinau mema 400 galen kanapo.’a
7 “Yah kope bosboi-a katere roa bia raꞌa vova,
‘Dinau mema koraka rope?’
Kope bia emo kairai veka,
‘Dinau nena konoi kuiniari veka 1,000-pla wit beg.’b
Yah bosboi-a kairai roa,
‘Mema pepa voro dinau mema kepeꞌe ve,
namako yah nameꞌe pon veka 800 kanapo.’
8 “Bosboi taipo vemo,
bos ya karirikeiyaki veꞌen ro boꞌo,
yah awoꞌo ya pon bos-a kavoko nake.
Ku vo koraka,
bosboi emo ruru awaka kwinia riya tah ya veku kaore rariya.
Beyo inia pava kepikeo ao vo meri vemo,
rara memeꞌme vo boꞌo yei nepao ero,
kesave rere revo vora neropopei yah ruru nepei rovoru aro ovu.
Yah rara vemo boꞌo yei inia kepao vemo,
kotawo save yei aro inia pava kepikeo ao vo lait.
9 Kanairai nopu,
ao mani vo meꞌri vemona,
va nopaiy beyo va niave kura mopu.
Yah kope taim ao vo meꞌri vemona,
nere baunki,
va oꞌto noteꞌeiy ropu taim nokepi oꞌro rere kerinia toratora.c
10 “Boh bio raꞌa ao memeꞌme kaore rarire revo,
kuiniari ao ipipo minia va naore rarire revo.
Kope boh bia ya pasin taipo karao,
taim ao memeꞌme inia kaore rarire,
kuiniari pasin taipo narao minia taim ao ipipo naore rarire.
11 Boh mopu beya kuiniari ao mani vo meꞌri vemona nopore papire,
nape va ao neman neman aka naropu vora nopore papire?
12 Boh mopu beya kuiniari ao yei aro ovu nopore papire revo,
nape va ao mopu veku naropu?”
13 “Wokboi moike raꞌa beya kuiniari bova narao roiy bos riyempin vai.
Va narererova revo bos moikeraꞌa pon,
toh kope raꞌa beya kuiniari narererova revo vai.
Awirai-a va narivo roa pon moike raꞌa,
kope raꞌa va oreva naoroa.
Koraka tah beya kuiniari bova nopao poa God re ao mani vai.”d
Jisas-a kairai rore awirai rere lo re awirai vo kingdom ya God
14 Aro Farisi,
aro emo yei mani kepere poꞌo revo.
Yah taim awirai ya Jisas-a kerivo,
tah uvo kevati vati naka.
15 Yah Jisas-a kairai roiy,
“Mopu kopao vora aro bombiam-a nepitoro veka mopu aro pasin awaka kopao.
Toh kope God,
ya kayarare veni ao arape kerinia rokire romoꞌo kuro mopu.
Ao voro beyo keyarare kere neman neman revo ero,
kope ya God kayarare kereraka ao taipere aka ri ine ya.
Jisas-a kairai roꞌo lo re kingdom ya God
16 “Awirai vo lo re awirai yei profet,
inia chirirai kokai kuiniari taim ya Cha Jon.e
Toh kope,
ri taim ya Cha Jon kokai kuiniari mare,
awirai neman vo kingdom ya God kokai vatiroꞌon.
Yah aro bombiam prumo inia kepere poꞌo revo,
vora nenopi kingdom vemona.
17 Uteno re meꞌri kuiniari nere nopi nere bauni,
toh kope vo awirai korama ya God,
beya kuiniari nobaunki vai.”
Jisas-a kairai ro pasin vo marit noavetari
(Matyu 5.31-32; 19.9; Mak 10.11-12)
18 Jisas-a kairai vova veka,
“Bia nape om ya narereoki,
yah kope om raꞌa tirin nako vova,
bia emo pasin pamuk-a karao.
Yah bia nape kako vo bia bom am vo karokoreriki emo,
bia ero minia pasin pamuk-a karao.”
Awirai ya bio ava kere prumo riya re Cha Lasarus
19 Jisas-a kairai vova veka,
“Titja,
bia raꞌa mani kere prumo riya kakei.
Yah umumoka noreka ine neman re noh biriri awaka karikoko.
Bia emo umumoka akorom awaka pon inia kara.
20-21 Kope kakuke ri reiy kamo vo oꞌro ya,
aro ovu bia mereraka rava kiavia kekape keperia kakei.f
Bia mereraka vemona awoꞌo ya Cha Lasarus.
Reka ya emo,
auka kakirari,
yah naki kekape tah auka inia kepiaplepu.
Tah Cha Lasarus karere roꞌo revo akorom kora kora kerinia rokore tebol ya bia vemona ava kere prumo riya emo,
vora nara.
22 “Kope taim Cha Lasarus karai,
ensel-a kereko ya kere kore kakei riya Cha Abraham.g
Yah kope bia vemona ava kere prumo riya kope karai minia yah kepere.
23 Yah kanoi kakei helh tah reka ya koakaka poaka.
Yah ine kaoreko yah kapirikeiya Cha Abraham kakei reiya rarapa,
yah Cha Lasarus kakei riya.
24 Yah kairia Cha Abraham yah kairai roa veka,
‘Mah Taita Abraham,
nama oukoko mona,
yah namairai moa Cha Lasarus nanoi kainieto peꞌe tapo ya nakero pi yah nere nareretavo pialutu,
vora nerena marimariri.
Ku vo koraka,
kakeni aikera vemona,
tah nai pako aka kanako.’
25 “Kope Abraham kairai roa veka,
‘Bia mentan,
Mema ova namakina veka,
taim kakemi tare,
ao neman-a kamuna.
Toh kope ya Cha Lasarus,
ya ao taipere pon karuna.
Kope mare,
kakei romoꞌo ya koneman,
kope mema kakemi nai pako aka kamako.
26 Ao raꞌa minia korao veka,
God-a bo paripari anayaka raꞌa karao kwinia romomi.
Koraka tah beyo kekepi imi paraꞌa vemona yah kope kepao nenopi ipu paraꞌa voronaro,
beya kuiniari nenopi vai.
Yah yei beyo kekepi paraꞌa minia,
beya kuiniari bo i paripari vemona niarikaka vora nekape imi paraꞌa vai.
27 “Kope kairai roa Cha Abraham veka,
‘Boh norao vekaro,
Mah taita,
kana tere noma,
namairai moa Cha Lasarus vora nanoi varu oꞌro ya aka nena.
28 Raꞌai 5-pla nena kekepi.
Nanoi va awirai kupuana nairai roiy,
vora beya kuiniari nekape bo vo nai pako yah tava noakai vai.’
29 “Cha Abraham kope kairai roa veka,
‘Aro raꞌai mema,
awirai yei profet re awirai ya Cha Mosesi kwinia riꞌiy.
Yah kuiniari awirai vemo va nerivo.’
30 “Kope kairai roa Cha Abraham veka,
‘Bauni!
Mah Taita Abraham,
boh bio raꞌa karai veꞌen,
kope navariko varu yah nanoi riꞌiy,
emo kuiniari romoꞌo nerovoru.’
31 “Kope Cha Abraham kairai roa veka,
‘Boh awirai ya Cha Moses awei profet beya nerivo poiy,
emo minia,
boh bia raꞌa yei aro keviri veꞌen kope navariko varu yah nanoi riꞌiy,
beya kuiniari nebilip vai.’ ”