Awirai bokis vo sipsip-a korei rokire
(Matyu 18.12-14)
15
Yah aro yei takis-a keko emo awei aro yei sin keparepare kekape keoroka papiya Jisas vora awirai-a nerivo poa.
2 Yah yei Farisi awei saveman vo lo,
aomumu keture yah kirai veka,
“Bio vemona inia kura kaveiy aro yei sin-a kepare pare,
yah kakei akorom-a kara riꞌiy minia.”
3 Yah kope Jisas-a awirai bokis-a kairai roiy veka,
4 “Boh bia raꞌa mopu 100 sipsip-a namamare,
tah kope raꞌa rere 100 sipsip vemo nonoi noreirokire.
Kope aka rere sipsip vemona va arape narao?
Va sipsip ovu narin nerekeri akorom-a nerera,
yah naorenana nanoi nuiniari revo nayara.
5 Yah kope taim nako vo veꞌen,
va ova norova poaka tah sipsip vemona va narereta tom ya yah napoiy.
6 Taim nakai oꞌro,
va nairai roiy aro kura ya awei aro boko ya nekape piya yah nairai roiy veka,
‘Mopu ova noropu pina minia,
sipsip nena ve koreroki,
kanaore nana yah kope kanawo varu.’ ”
7 Yah Jisas kairai veka,
“Kanairai nopu,
oꞌto veka vemo va nokamap heven.
Awaka,
oꞌto inia koteiy roiy beyo 99 voro keniniu veꞌen ri ine ya God tah riva kerovoru ero.
Boh bia raꞌa vo sin-a inia karao vemo kope riva narovoru,
va ova noroiy rova pakoki vova ke.”
Awirai bokis vo mani korei rokire
8 Yah Jisas-a kairai roiy vova veka,
“Boh bia bom raꞌa silva mani 10-plaa koawo yah kope moike raꞌa korei rokire.
Bia bom emo lam-a noruri yah amo va noriririka oꞌro yah inia nore nana nonoi yah kope noko varu.
9 Yah kope taim mani vemona korei rokire emo koko veꞌen,
yah kope va noirire aro kura vo awere aro boko vo nerekare riu tah nuirai rore veka,
‘Move ova norove rini,
mani neni korei rokire,
yah kope kenko veni.’
10 Kanairai nopu,
rere ensel ya God minia oꞌto veka emo va notere,
taim bia raꞌa riva narovoru yah sin-a narereuki.”
Awirai bokis ya ma biam raꞌa kareirokire
11 Kope Jisas-a kairai vova veka,
“Bia raꞌa me biam riyempin kerekepi piya.
The Prodigal Son (Luk 15:11-32)
12 Kope raꞌai mentanaka kairai roa aka veka,
‘Mah Taita,
ao mema va nama vani mopi raꞌai nena,
yah ao nena namina.’
Yah aka yei ava kavani konoi roiy me biam riyempin.
13 “Kovevenki,
yah raꞌai mentanaka vemo,
ao koka ya kairiri,
yah kaute kanoi kantri raꞌa kwiniaki rarapa.
Yah boko verenare,
mani ya kavere vere rore pasin taipere vo meꞌri.
14 Yah kope ao koka ya ve kerebaunki naꞌao,
yah kantri vere minia taim vo akorom-a kobaun reiy poaka korereka riꞌiy,
tah ava kobaun reiya poaka.
Akorom ya kobaun reya poaka.
15 Kora veka tah kanoi kayaraka bia raꞌa vo boko vere yah katere roa vora bova narao riya.
Tah bia vemona kairai roa kanoi reiy vora akorom-a narore rao.
16 Yah kope koraiyova poaka,
toh bio raꞌa beya akorom korama karoa vai.
Kora veka yah taim kayarare rao banono taꞌa kerera tah karerero revo banono taꞌa va nara rire rao.
17 “Yah kope ruru awaka kako,
yah ova kakinako rova varu aka ya,
tah kairai veka,
‘Wokboi prumo kekepi piya aka nena,
yah akorom-a kere prumo revo,
tah inia kepa.
Toh kope vo boko vemona akorom-a kobaun poaka,
tah riꞌi raiyo inia koyena yah kanao naran.
18 Va nana variko yah nanaute nanon niya varu aka nena,
yah va nanairai noa veka,
“Mah Taita,
nena sin-a kanao nima repu God.
19 Mare nena beya kana neman kuiniari naminana veka ma mema vova vai.
Mema va namao nakeni veka wokboi mema.” ’
20 Tah kavariko yah kaute kanoi riya aka ya.
“Kaute kanoi yah baunke karoi rarapa,
kope aka ya kapirikeiya tah riva keyaperuki rova revo ma ya.
Yah kaparara kanoi riya ma tah kaivia karoroa yah iri keiyakiri.
21 “Yah kope ma biam kairai roa veka,
‘Mah Taita,
nena sin-a kanao konoi riya God tah mema minia.
Nena beya kana neman kuiniari naminana veka ma mema vova vai.’
22 “Toh kope aka ya kairai roiy wokboi ya veka,
‘Noreka namba wan nena nopuko nokape bereren yah nepiapikoko.
Yah ring-ab rava nepiapikoko eno peꞌe ya tah sendel-a minia nepiapikoko kom ya.
23 Nonopi bulmakau ma purupuru koroiy ero nopawo nokape yah nopie norai.
Memi va nema tah oꞌto notemi minia.
24 Ku vo koraka ma biam nena vemo,
karai veni yah kope mare kakei tare,
kareirokire veni,
yah kope mare kemi yaraka varu.’
Tah akorom pako vemona kepao yah oꞌto koteiy minia.
25 “Taim akorom-a inia kepa tah oꞌto va koteiy,
kope ya ma biam anai kanoi veꞌen kakei erora.
Yah kope taim kaute kakai kakuke ri oꞌro ya aka,
yah musik-a karivo tah aro bombiam-a inia kom-a keniepa.
26 Yah kairia wokboi raꞌa ya aka ya kakai riya tah katere roa,
‘toh arape kepao?’
27 Yah wokboi ya aka ya,
kairai roa veka,
‘Raꞌai mentan mema kakai varu,
yah aka mema bulmakau ma purupuru kokei ero kaiye,
ku vo koraka,
raꞌai mentan mema kanoi,
yah kope kakai varu,
beya kabagarap vai.’
28 “Ma biam anai awirai emo karivo yah ova keyaroro poaka,
tah koinia beya kuiniari nanoi oꞌro are vai.
Kope aka ya kakai upuoꞌo yah ava inia kairai naka vora nanoi oꞌro are.
29 Toh kope ma biam emo kairai roa aka ya veka,
‘Nama yara!
Ainini prumo nena boꞌo ipipo kanare nare tah kakeni veka wokboi mema,
yah awirai mema kamairai mona ero,
beya ava kanapana nema vai.
Tah mema beya ao mentanaka veka meme ma rava kamona vai,
vora nanao awei kura nena oꞌto notemi.
30 Toh kope,
ya ma biam mema ero,
kanoi ao koka mema kavere vereki kerenori rore aro bom pamuk,
yah kope kakai varu oꞌro,
tah mema bulmakau ma purupuru kokei ero kamie moa.’