Jisas-a kanoi kakei oꞌro ya Farisi raꞌa
14
Umo Sabat raꞌa,
Jisas-a kanoi kakei akorom-a kara oꞌro ya bia ya kanoi roiy Farisi cha.
Taim kakei oꞌro vemonamo,
yei Farisi inia ine keore papiya revo.
2 Yah taim vemona,
bia raꞌa reka keria putuputu,
yah kakai kakei ine cha ya Jisas.
3 Yah kope Jisas-a katere roiy Farisi awei aro saveman vo lo veka,
“Era de vo Sabat kuiniari aro ahva koraiy-e,
nemaiy neneman o bauni?”
4 Toh beya ava raꞌa chirai poa vai.
Yah kope Jisas-a kaivia bia vemona reka ya keria putuputu ve,
yah karaka kaneman yah kairai roa kanoi.
5 Yah kope katere roiy veka,
“Boh raꞌa mopu ve,
ma biam ya,
o bulmakau ya raꞌa narei rovore pimare,
tah emo de vo Sabat,
era va nopiꞌin nakei rovore pimare o va nopu bereren vora nopaviakope nake?”
6 Yah awirai-a kobaunkire reiy,
yah beya kuiniari ava raꞌa nirai vai.
Beya awoꞌo mema veku namawoko nake vai
7 Taim Jisas-a kayarai beyo kekape va akorom-a nepa emo,
kenopi kekepitata sia yei aro ipipo,
yah awirai bokis vemona kairai roiy.
8 “Boh bia raꞌa nairima nanom akorom pako ya bia raꞌa om-a nako,
mema beya nanomi yah nakemita sia yei aro ipipo vai.
Ku vo korao veka,
sia voronaro,
ero sia yei aro voro awoꞌo ketawoma ero.
9 Kope boh biaemo kairima emo,
nakai nairai roma veka,
‘Sia mema va namoa bia vemona.’
Kope va reka va noyoma poaka yah nanomi nakemi revo pa aka.
10 Taim bio rava nairima nanomi akorom pako veka emo,
mema nanomi nakemi revo pa aka,
yah kope taim aka vo akorom pako ve nakai,
va nairai roma veka,
‘Kura,
mema nakame nakemo bo neman vemona.’
Yake mema va awoꞌo pako namako miꞌiy ine yei beyo kekepi akorom pako vemona.
11 Beyo prumo awoꞌo yei veku niavokope nake,
God va awoꞌo yei narereo pika.
Toh beyo awoꞌo yei veku nepereope pika,
God-a va awoꞌo yei nawokore nake.”
Memi va nemao moiy revo aro voro beya kuiniari ava nepimi varu ero vai
12 Yah Jisas-a kairai roa bia emo kairia kanoi rova oꞌro ya ve veka,
“Akorom pako rava namao,
beya kura mema naimiꞌiy nekape vai,
o aro raꞌai mema o aro noo mema ovu o aro awei kakemi minia mani koprumo riꞌiy revo.
Boh mema namao veka emo,
taim yei kope akorom-a nepao,
yei minia va akorom yei kope nepoma varu.
13 Boh taim akorom pako namao,
naimiꞌiy aro ava kobaunrei ero,
aro kom re eno kere taipeiy ero tah yei aro kom-a kereiy viri awei aro yei ine va koraiy ero nekape.
14 Aro vemona beya kuiniari akorom-a nepao yah kope neipima vai.
Yah mema kuiniari oꞌto va notema,
ku vo koraka kope pa God-a va naroma varu,
taim aro voro keniniu piya ine ya God neverekope varu.”
Awirai bokis vo akorom pako
(Matyu 22.1-10)
15 Kope moike yei aro vemona kekepi akorom-a kepa piya Jisas,
karivo awirai vemona Jisas-a kairai emo,
yah kope kairai kire roa Jisas veka,
“Aro bombiam va nekepi na akorom-a nepa kingdom ya God,
kuiniari oꞌto noteꞌeiy,
ku vo koraka,
God-a karao roiy revo.”
16 Toh Jisas-a kairai roa veka,
“Bia raꞌa karao akorom pako narao,
yah nairai roiy aro prumo nekape akorom vemona.
17 Taim voronaro kamakim va akorom pako vemona narao ve,
va nairai roa wokboi ya nairiy aro voro ava kairai roiy veꞌen titja ero.
Yah wokboi ya va naꞌai veka,
‘Mopu nokape akorom-a kemao veni.’
18 “Yah kope aro koka kairiy emo,
kirai veka beya kuiniari nekape akorom-a nema vai.
Yah bio raꞌa kairai veka,
‘Nena va nanoni meꞌri koraꞌa mare aka kana baim nanayara.
Tah kana oukoku noꞌo revo beya kuiniari nakane vai.’
19 “Kope ya bia raꞌa vova kairai veka,
‘Nena bulmakau 10-pla vo bova nererao kana baim tah nena va nanoni boꞌo rere kererao nana yara.
Tah nena kana oukoku revo beya kuiniari nakane vai.’
20 “Kope bia raꞌa minia kairai veka,
‘Beya kuiniari nakane vai,
mareaka oma kanako.’
21 “Yah kope wokboi ya kakai varu yah awirai vemona kairai roa biabiꞌiy ya.
Biabiꞌiy vemona ova keyaroro poaka yah kairai roa wokboi ya veka,
‘Mareaka nanom momore rara mememe na rara ipipo vo mataimon vemona emo yah naimiy aro voro ao kobaun reiy ero,
na yei aro voro kom re eno yei kere taipere ero,
yah yei aro voro kom yei kere viri ero na yei aro ine koraiy ero.
Yah namako yei nekape oꞌro are nena.’
22 “Yah kope wokboi emo kairai roa veka,
‘Biabiꞌiy,
awirai voro kamairai ero,
nena kanao veni,
toh oꞌro mema baunke beya rova kore vai.’
23 “Yah biabiꞌiy ya kairai roa veka,
‘Mema va mataimon-a namemeo yah nanomi momore rara ipipo yah namaute moh reiy ika vo erora.
Taim aro bombiam-a nama vakakeꞌeiy,
namairai naꞌai vora nekape oꞌro nena.
Kanereno revo oꞌro nena rova noreo.
24 Kanairai nopu,
ku vo koraka,
beyo prumo titja kainiy ero,
beya kuiniari akorom koraꞌa nena nepa vai.’ ”
Arape va nokai rima taim pava namekeya Jisas
(Matyu 10.37-38)
25 Aro bombiam prumo kiute kenopi pova Jisas yah karovoruka yah kairai roiy veka,
26 “Boh bio nakai rina,
tah beya ine kare trotroru aka re moꞌo ya,
om awei me ya,
tah yei raꞌai awere rou ya,
yah laip ya veku,
beya kuiniari nakei veka disaipel nena vai.
27 Boh bio beya kruse ya napoiy tah pava narekena,
bia voro minia ya beya kuiniari nakei disaipel nena vai.a
28 “Boh bia raꞌa mopu karao oꞌro turoro raꞌa narira.
Titja vo,
bia emo va nakei tah naoreroro mani veka rope kuiniari ao olgeta vo oꞌro naruna,
vora oꞌro kuiniari naraoki naꞌao.
29 Toh boh oꞌro narira tah beya kainiari oꞌro vemona naraoki naꞌao vai,
aro prumo va nepirikeo oꞌro vemona,
yah pia nepari poa.
30 Yah nirai veka,
‘Bio vere oꞌro karira ere,
beya kainiari oꞌro naraoki naꞌao vai.’
31 “Boh king raꞌa awirai narivo veka king raꞌa karao roma narao riya,
va nakei naoreroro rara vekarope kuiniari awei 10 tausen soldia ya nenopi roma nepao piya king raꞌa awei 20 tausen soldia ya.
32 Boh nayara veka beya kainiari vai,
kope va nairai roiy aro ovu nenopi piya king raꞌa ve,
taim baunke kakei rarapa vora awirai-a nirai nomoike yah beya kuiniari roma nepao vai.
33 Korao veka tah,
boh mopu beya kuiniari oreva nopore ao prumo mopu ero,
ero beya kuiniari nokepi veka disaipel nena vai.”
Jisas-a awirai bokis-a kairai ro sol-a kotaipo
(Matyu 5.13; Mak 9.50)
34 Yah Jisas-a kairai vova veka,
“Sol,
ao ero koneman,
toh boh kope rarawo vo nobaunki,
va arape kope nemaomo vora rarawo vo nokai varu?
35 Sol veka vemo beya koneman ro meꞌri vai o beya koneman vora nerovoru naꞌao aꞌa rere bulmakau vai,
korao veka tah kevere verekipe.
Bio teve neyainia va awirai vemona narivo.”