Bio bilip-a nobaun reiya va laip ya norei rokire
13
Taim vemona,
beyo ovu kekape kekepi yah kirai poa Jisas po aro ovu yei Galili,
kekepi ofa kepao poa God tah Pailat kayeiy keviri yah noo yei kotarata ofa yei veku.
2 Yah Jisas katere roiy veka,
“Mopu kopitoro veka,
aro Galili vemona keviri emo,
sin pako aka kepao kotavoiy aro koka vo Galili tah nai vemona keko,
era vai?
3 Baun poaka!
Kanairai nopu,
boh mopu beya riva nopu rovoru,
mopu olgeta minia va nopu viri veka yei keviri emo.
4 Kope yei beyo 18-pla voro titja oꞌro ririva kwinia mataimon Siloam kopururutaiy tah keviri ero,
era mopu kopitoro veka sin yei kotavore sin yei aro ovu kekepi mataimon Jerusalem vai?
5 Kanairai nopu,
va nobaun poaka.
Boh mopu minia beya riva nopu rovoru,
mopu olgeta minia va nopu viri veka yei.”
Awirai bokis vo aꞌai beya aka koave vai
6 Yah awirai bokis raꞌa kairai roiy veka,
“Bio raꞌa aꞌai fik raꞌa kaura koroi erora wain ya,
yah kanoi vora aka vo naru,
toh aꞌai fik vemona beya aka koave vai.
7 Yake kairai roa bia vemona inia erora wain-a kaorerari vemo veka,
‘Mare ainini 3-pla yah kope kakane vora aꞌai fik vemona aka vo nanu,
toh vo aꞌai fik vemona beya aka raꞌa koave vai.
Korao veka emo,
yah konoi nao toh beya aka koave vai,
namairo norei.
Koroi gris-a koko kanapo reu meꞌri.’
8 “Kope bia vemona erora kaore rariꞌi ve,
kairai roa aka vo erora veka,
‘Biabiꞌiy,
aꞌai fik vemona va nuiniaki ainini raꞌa vova wo.
Nena va meꞌri naun nana vovo nari ku vo yah aꞌa rere kau va nanati norarotao ku vo.
9 Boh aka noave ainini raꞌa,
emo koneman.
Boh nobaun,
kuiniari namairo norei pika.’ ”
Taim vo Sabat Jisas-a karao biabom raꞌa koneman varu
10 Sabata raꞌa,
Jisas kanoi skul-a karoiy aro bombiam kekepi oꞌro lotu are yei Juda.
11 Yah biabom raꞌa kokei riꞌiy minia,
spirit taipo kokei riu.
Spirit taipo vemona inia kokei riu konoi kuiniari ainini 18-pla.
Yah inia kokoru pon,
beya kuiniari notopanko vai.
12 Taim Jisas kapirike,
ya kairi kokai riya yah kairai ro veka,
“Bia bom,
sik momu yake kana ririkeki veꞌen.”
13 Yah Jisas eno karereta vo biabom vemona yah bererenki oreva vo koneman varu,
yah kope koroi topan yah awoꞌo ya God koavoko nake.
14 Kope ya hetman vo oꞌro lotu ova keyaroro poaka rova Jisas.
Jisas-a karao bia bom vemona koneman varu riu taim vo Sabat.
Yah kairai roiy aro bombiam veka,
“Umo 6-pla memi va bova nemao.
Boh kopao bio narapu nopu neman varu,
koneman kuiniari nokape de vo boꞌo inia kemao ero.
Beya nokape de vo Sabat vai.”
15 Yah kope Biapako kairaikire roa veka,
“Mopu aro vo atore kopirai!
De vo Sabat,
mopu aro emo inia konopi oꞌro rere bulmakau awere donki tah tiva kopu rarito pore yah kopuko rere kerenori vora piva nereton.
16 Kope vo biabom vemona,
vo ma ya Cha Abraham.
Yah Satan-a kavo kokei sik-a korao konoi kuiniari ainini 18-pla.
Toh era taim vo Sabat,
beya kuiniari nanao sik vemona norereuki vai?”
17 Taim awirai vemona kairai,
yah aro birua ya vemo,
reka koyoiy.
Kope yei aro bombiam koka vemo,
ova koroiy rore ao prumo neman neman vemona kare rare ve.
Awirai bokis vo yis re aꞌai mastet iri
(Matyu 13.31-32; Mak 4.30-32)
18 Yah kope Jisas-a katere roiy veka,
“Kingdom ya God,
koraka rope?
Arape korao veka Kingdom ya God?
19 Kingdom ya God,
korao riu minia aꞌai mastet iri,b
bia raꞌa kako tah kaora koroi rovore erora ya.
Yah kope mastet iri vemona kokoi kapako yah ruꞌu va kerepupu kerekare yah u rere kereraota u vo aꞌai vemona.”
Awirai vo yis
(Matyu 13.33)
20 Kope Jisas-a tare vova katere roiy veka,
“Ao arape korao riu minia kingdom ya God?
21 Kingdom ya God,
korao veka yis.
Bia bom raꞌa yis vemona koko tah korovoru naꞌao plaua kwinia rovore dram pako raꞌac yah kope plaua koputu kokoi nake.”
Kamo mentanaka
(Matyu 7.13-14; 7.21-23)
22 Taim Jisas inia kaute kanoi roꞌo rara konoi mataimon Jerusalem,
yah inia kanoi rore mataimon awere boko mememe,
yah skul-a inia karoiy aro bombiam.
23 Yah kope bia raꞌa katere roa veka,
“Biapako,
era God-a va aro moimoi pon va nako yei varu vai?”
Yah kope Jisas-a kairai roiy veka,
24 “Mopu bova rika nopu kupuana poaka,
vora nonopi kamo mentanaka.
Kanairai nopu,
beyo prumo kepao nenopi kamo mentanaka vemona,
toh beya kuiniari nenopi are vai.
25 Kope taim aka vo oꞌro vemona navariko yah kamo natire,
mopu va nokape noropi upuoꞌo yah kamo inia nopu kirikiri yah nopirai veka,
‘Biapako,
kamo namuriki momi.’
Kope ya va nairai ropu veka,
‘Nena kana rovinapu,
bo kokape boko rope.’
26 “Tah mopu va nopirai poa veka,
‘Memi akorom-a kema yah piva kemiton mima,
yah karomi moho rara memi inia skul-a kamao momi.’
27 “Kope ya va nairai ropu veka,
‘Nena kana ruvinapu,
bo kokape boko rope.
Nonopi pena vere,
mopu aro koka vo pasin taipere aka kopare.’
28 “Mopu va nopu pirikeiya Cha Abraham,
Cha Aisak,
Cha Jekopd awei profet koka kekepi kingdom ya God.
Kope mopu,
va neririkepu nonopi upuoꞌo.
Yah nopuro tah eva nopuiya.
29 Yah beyo va nekape paraꞌa umo kakoi ye,
re paraꞌa vo umo kararo,
na paraꞌa not re saut.
Yah nekape nekepi rovope akorom pako kwinia kingdom ya God.
30 Nopu rivo,
beyo ovu mare kekepi revo pa aka,
kope va nekepi cha.
Kope yei beyo ovu mare kekepi cha,
kope va nekepi revo pa aka.”
Jisas kaokoku ro mataimon Jerusalem
(Matyu 23.37-39)
31 Taim vemona emo,
yei Farisi ovu kekape piya Jisas yah kirai poa veka,
“Mema va boko vemona namemeo yah nanom boko raꞌa,
ku vo koraka King Herot karao nayema naram.”
32 Kope Jisas-a kairai roiy veka,
“Nonopi yah nopirai poa naki uka veka,
‘Nena va spirit taipeiy nana ririkeiki yah beyo ahva koraiy-e,
va nanaiy neneman umo mare na uri.
Kope umo namba 3,
boꞌo nena va nanaokine naꞌao.’
33 Mare ve,
uri yah kope uri raꞌa vova,
nena va nanaute nanon.
Ku vo korao veka,
profet-a beya kuiniari nepieya narai boko raꞌa vai,
va nepieya narai pon mataimon Jerusalem.
34 “O Jerusalem!
Jerusalem!
Momu inia komieiy profet-a keviri yah akairi inia komprum moiy beyo God-a kasalim yei kekape pimu tah koyeiy keviri.
Taim prumo,
nena kanao eno nena nana tarara nariꞌiy mevova momu vora nekepi minia veka ruꞌu kokomoꞌo inia kwore rarire me vo,
tah kere kerirokore aota wo.
Toh momu beya komeremo revo vai!
35 Nopu yara!
Mare va oꞌro mopu nobagarap yah nuinia kanapo.
Kanairai nopu,
mopu beya kuiniari nopu yarana vai,
nonoi nuiniari taim va nopirai veka,
‘God-a va naneman roa bio voro kakai riya roꞌo awoꞌo ya Biapako.’ ” e