Jisas-a karao wokboi ya kepten yei soldia kaneman varu
(Matyu 8.5-13)
7
Taim Jisas awirai kairai roiy disaipel awei aro bombiam kerivo ven yah kope kanoi mataimon Kaperneam.
2 Kepten raꞌa yei 100 soldia kakei,
yah wokboi raꞌa kakei riya minia.
Wokboi vemona kepten-a karere rova revo,
tah mare wokboi emo ahva koraka tah karao narai.
3 Kepten-a awirai-a karivo rova Jisas,
tah kope kasalim yei hetman yei Juda nenopi netere poa Jisas nakai yah vora naraka wokboi ya naneman varu.
4 Kenopi keyaraka Jisas,
yah yei ketere kemomo naka yah kirai veka,
“Kepten vemona kaneman,
va namailpim ya,
5 emo koraka,
ya inia karere romi revo aro bombiam vo Juda yah oꞌro lotu memi karao.”
6 Tah kope Jisas-a kaute kanoi roiy.
Kanoi kakuke ri oꞌro tah kepten-a kairai roiy kura ya ovu kenopi kirai poa Jisas veka,
“Biapako,
beya boꞌo pako namao vai,
emo koraka,
nena beya kana neman kuiniari nakame oꞌro are nena vai.
7 Nena kana yara veka nena beya kana neman kuiniari nena veku nanoni nima vai.
Toh awirai pon namairai yah wokboi nena va naneman varu.
8 Nena minia keniaken roko bia ya kaore rarina.
Tah nena minia soldia kepena kepi roko.
Kanairai noa soldia raꞌa veka,
‘Nanom,’
yah kanoi.
Kope nanairai noa raꞌa veka,
‘Nakame,’
yah kakai.
Nena kanairai noa wokboi nena veka,
‘Mema ao vemo namao,’
yah ao vemona karao.”
9 Jisas awirai vemona karivo yah ova kakinakina pako,
tah kope karoworukire riꞌiy aro bombiam prumo inia pa kepekeya ve tah kairai roiy veka,
“Kanairai nopu,
kana yara bilip ya bia emo kopako revo,
beya bio raꞌa vo Israel bilip vemona kwinia riya vai.”
10 Yah aro vemona kepten-a kairai roiy kenopi piya Jisas-e,
keparo varu oꞌro yah keyaraka wokboi ya kepten vemona kope kaneman varu.
Jisas-a karao bia biam niampla raꞌa vo mataimon Nain kope kavariko varu
11 Kope Jisas-a kanoi mataimon raꞌa kepina Nain,
tah disaipel ya awei aro bombiam prumo kenopi pova.
12 Kakai kakuke ri kamo vo rei pako vo mataimon,
tah aro ovu bia rai raꞌa kepoi kenopi upuoꞌo.
Bia emo moꞌo koavia ya unake.
Aka ya minia karai veni tah moꞌo ya unake pon kokei.
Yah aro prumo vo mataimon kenopi poꞌo bia bom vemona.
13 Tah Biapako kayara bia bom vemona,
yah kaokoku roꞌo yah kairai ro veka,
“Beya nonro vai.”
14 Yah Jisas-a kanoi eno karereta boks yah aro vemona boks-a kepoi emo kerirakipe.
Yah Jisas-a kairai veka,
“Bia niampla,
kanairai noma,
nama variko!”
15 Tah bia vemona karai emo,
kavariko yah ava inia kairai.
Yah Jisas-a kareriaki kanoi ri varu moꞌo ya veku.
16 Aro koka keririkope toro ro ao vemona yah awoꞌo ya God-a keavoko.
Yah kirai veka,
“Profet pako raꞌa kararo romomi veni,”
tah “God-a kararo veni vora naelpim yei aro ya.”
17 Awirai vo ao vemo Jisas-a karao ve,
kotamo tamoro konoi rorore boko maomao vo distrik Judia awere boko maomao vemo kerinia keyoroka rariu boko vemona.
Jisas re Cha Jon Baptais
(Matyu 11.2-19)
18 Aro disaipel ya Cha Jon Baptaisa emo,
ao maomao vemona Jisas-a karare rare ero,
kirai poa Cha Jon Baptais,
yah kairiy bia riyempin ya kerekape piya.
19 Yah Cha Jon kairai roiy kere nopi piya Biapako vora nere tere poa veka,
“Era mema bia God-a kairai va namaro emo,
o memi va nekemi keiya bia raꞌa vova?”
20 Bia riyempin vemona kerenopi piya Jisas,
yah keyirai poa veka,
“Cha Jon Baptais kairai ropi kepikape nepi tere poma veka,
‘Era mema bia God-a kairai va namaro emo,
o memi va nekemi keiya bia raꞌa vova?’ ”
21 Taim vemona bia riyempin kere nonopi emo,
ya Jisas-a inia aro prumo ah maramaraꞌa koraiy awei aro spirit taipo kere bagarapim yei emo,
karaiy keneman varu.
Yah yei aro prumo ine koraiy emo,
kope karaiy ava kepirikere varu.
22 Yah kope Jisas-a kairai roiy bia riyempin ve awirai-a kereko kerekape emo,
“Norupu nopi varu yah noru pirai poa Cha Jon rore ao vemona korupu yarare ve na korupu rivo.
Ao vekaemo:
aro ine koraiy emo ava keyarare varu,
yah beyo kom yei kere viri kope kiute varu,
beyo lepro koraiy emo kope keneman varu,
yah aro teve kereiy kapura awirai-a kerivo varu,
yah beyo keviri keverekope varu,
yah yei aro mererai awirai neman ya God-a kerivo.b
23 Tah beyo keyarana yah bilip yei beya korei vai,
kuiniari ova noroiy.”
24 Taim bia riyempin vemona awirai-a kereko kere kape piya veꞌen Cha Jon-e,
yah kope kere nopi varu.
Yah Jisas-a kope kairai roiy aro bombiam prumo ro ao ya Cha Jon veka,
“Mopu konopi bo yin kanapo beyo kebaun vora arape nopu yara?
Era mopu konopi vora auma beka raꞌa puva inia koawowo,
nopu yara vai?
Bauni.
25 Mopu konopi vora arape nopu yara?
Era mopu konopi vora nopu yaraka bio aimino neman neman-a karikoko vai?
Bauni.
Beyo inia aimino neman neman kepikoko yah ao neman neman kerinia riꞌiy,
aro veka emo kekepi oꞌro yei king.
26 Toh mopu konopi vora arape nopu yara?
Era mopu konopi vora profet raꞌa nopu yaraka vai?
Aꞌho!
Kanairai nopu,
bia vemona katawoiy profet ovu.
27 Buk ya God kwirai rova bia emo veka,
‘Bio raꞌa awirai nena nako,
va nanairai noa nanoi roma cha
yah rara mema va neremaranao.’c
28 “Kanairai nopu veka,
aro maomao moꞌo yei keriaveiy emo,
raꞌa yei beya katawoka Cha Jon vai.
Toh kope bio nakei veka bia mentanaka ri kingdom ya God,
bia vemona katawoka Cha Jon.”
29 Aro bombiam prumo kekepi awei aro yei takis-a keko emo,
awirai-a kerivo veꞌen yah kirai veka,
“God-a kaniniu revo.”
Awirai emo kirai,
ku vo koraka,
baptais-a keko eno peꞌe ya Cha Jon.
30 Toh yei Farisi awei saveman vo lo oreva kepo ao ya God-a karao narao roiy emo,
tah beya kenopi piya Cha Jon baptais-a keko vai.
31 Yah Jisas-a kairai vova veka,
“Aro bombiam vo mare wo,
awirai vekarope va nanairai vora noriritaiy pasin yei?
Toh boh kepaka rope?
32 Kepaka aro mevova kekepi boꞌo vo neopokeke yah kiepi konoi kokai roiy yei veku mevova tah kirai poiy veka,
‘Memi maura kemiputu mopu vora kom-a nopu niepa
tah mopu beya kom-a kopuniepa vai,
monrai bia kuro kiemi,
toh beya kopuro vai.’
33 “Cha Jon Baptais kakai yah beya bret-a raꞌa kara yah wain-a minia beya katon vai,
yah kopirai veka,
‘Cha Jon Baptais,
spirit taipo raꞌa kokei riya.’
34 Ma Biam ya Bio kakai tah akorom-a kara yah wain-a katon,
yah kopirai veka,
‘Nopu yaraka bia vemona,
bia ya akorom-a kariro yah bia ya wain-a inia katontoꞌon.
Bia emo,
ya kura yei aro takis-a keko emo awei aro yei sin-a kepao.’
35 Mopu inia kopuirai koparara veka,
aro bombiam nape kiute poꞌo save neman ya God veka mevova ya,
kepiritami veka save neman ya ero,
emo koniniu revo.”
Bia bom vo sin-a korao sanda keriaruru Jisas
36 Farisi raꞌa kairia Jisas-a kakai vora akorom-a nara riya oꞌro ya.
Yah Jisas-a kanoi oꞌro are ya Farisi vemona yah kakeiyo vora akorom-a nara.
37 Taim vemona bia bom raꞌa inia sin-a korao kokei mataimon vemona.
Bia bom vemo korivo veka Jisas-a kakei yah akorom-a kara oꞌro ya Farisi vemo.
Yah botol ine neman rava koawo.
Botol vemona akairi keko tah kepao yah sanda ketcha kwinia kuro.
38 Kokai yah konoi koroi riya oreva ya Jisas kakuke ri kom peꞌe ya tah koro yah ine pe vo inia koveretao kom peꞌe ya Jisas-e kopitata.
Koro veꞌen yah kope chapeꞌe vo kwawo yah eiya keriato kom peꞌe ya Jisas,
yah iri keiyakiri kom peꞌe ya Jisas yah sanda ve keyaruru kom peꞌe ya.
39 Kope Farisi vemona kairia Jisas kakai oꞌro ya vemo,
ao vemona kayara tah ya veku kairai varuvaru veka,
“Boh bia emo ya profet aka kuiniari nayara nape eno koreretaka ve,
tah vo bia emo,
vo biabom vekarope.
Va nayara veka bia vo sin-a korao.”
40 Yah Jisas-a kayara veꞌen ruru ya yah kairai roa veka,
“Mah Saimon,
awirai raꞌa kwinia rina va nanairai noma.”
Yah Cha Saimon kairai veka,
“Mah Tikse,
namairai mona.”
41 Yah Jisas-a kairai roa veka,
“Bio riyempin dinau kerepao piya bia raꞌa.
Bia raꞌa dinau ya korao veka pe vo 50 fotnait kwinia riya tah kope ya raꞌa dinau ya korao veka pe vo 5-pla fotnait kwinia riya.
42 Kope yei rara vo mani nerepoa varu kobaun reiy.
Yah kope kairai roiy yake dinau yei nuinia noteke.
Bia nape yei va narererova revo?”
43 Kope Cha Saimon kairai kire roa veka,
“Nena kanitoro bia vemona dinau pako karao ve.”
Tah Jisas-a kairai veka,
“Okina mema kowuwuro.”
44 Yah karovoruki ri bia bom yah kairai roa Cha Saimon veka,
“Nama yara bia bom vemona?
Nena kakane oꞌro are mema,
tah piva beya kamona vai,
vora kompe nena pi nanini,
toh kope vo bia bom vemona ine pe vo kere naniri kompe nena yah chapeꞌe vo koawo tah eꞌei kerenato kompe nena.
45 Mema beya kama kis nena vai,
toh vo bia bom vemona,
taim kakane oꞌro mema kuiniari mare,
beya kwoni ro kompe nena nerena kis vai.
46 Mema beya wel-a kamako yah kemena muru cha nena vai,
toh vo bia bom vemona sanda va koko yah kere naruru kompe nena.
47 Kanairai noma veka,
bia bom-a korere rona revo pako,
emo koraka sin prumo vo God-a kapereuki.
Toh kope bia nape sin mentanaka pon karao tah kope God-a keyapereuki,
bia ero karere rona pon mentanaka.”
48 Yah Jisas-a kairai ro bia bom vemona,
“Sin momu kana pereki veni.”
49 Beyo kekepi yah akorom-a kepa emo veku kirai veka,
“Biaere ya bia vekarope tah sin yei beyo kapereuki?”
50 Yah Jisas-a kairai ro bia bom vemona veka,
“Bilip momu kwinia rona yah God-a kako momu varu.
Yah mare nonom naꞌao riꞌi mariri.”