Satan-a katraim ya Jisas
(Matyu 4.1-11; Mak 1.12-13)
4
Jisas-a rova kare ro Holi Spirit,
yah raka Jodan-a karereu,
yah Holi Spirit-a koko ya kanoi bo yin kanapo beyo kebaun.
2 Tah kakei boko vere konoi kuiniari 40-pla umo,
tah kope Satan-a katraim ya.
Umo ve kerenori venke,
beya akorom-a koraꞌa kara vai,
tah koraiyova poaka.
3 Tah kope Satan-a kairai roa veka,
“Boh mema Ma ya God,
namairai mo akairi vemona noroworuki veka bret yah nama.”
4 Yah Jisas-a kairai roa varu veka,
“Awirai kwinia buk ya God kwirai veka,
‘Beyo beya kuiniari nekepi tare po akorom unake vai.’ ”a
5 Yah kope Satan-a kako ya kakoi nake,
tah bererenki kingdom prumo vo bo meꞌri kariritaka.
6 Yah kairai roa Jisas veka,
“Nena va kupuana nanoma vora kingdom maomao vemona namaore mamire,
tah awoꞌo pako va namako minia.
Kingdom maomao vemona God-a karona,
tah nena va nanoa bia nape kanerenova.
7 Ao prumo va namako,
boh ouku nama tumeriki yah lotu namao mona.”
8 Yah Jisas-a kairai kire roa Satanb veka,
“Awirai kwinia Buk ya God kwirai veka,
‘Mema lotu namao moa Biapako,
God mema,
yah boꞌo ya unake pon namao.’ ”c
9 Satan kako ya Jisas kanoi mataimon pako Jerusalem tah kareria kakeitaki revo tempel nake,
yah kairai roa veka,
“Boh mema Ma ya God,
namapuki namaro pika.
10 Veka awirai kwinia Buk ya God-e,
kwirai veka,
‘God va nairai rore ensel ya neyore rarima yah nererao rarima revo.
11 Rere va neriavema eno rere,
tah akairi raꞌa beya kuiniari nere marirako kom vai.’ ”d
12 Yah Jisas-a kairai roa Satan veka,
“Awirai kwinia Buk ya God kwirai veka,
‘Beya namatraim ya Biapako vai,
God mema.’ ”e
13 Satan-a katraim ya Jisas rore ao prumo maramaraꞌa veꞌen,
yah kope karereiya yah kanoi kakei keiya roraꞌa vova.
Aro vo mataimon Nasaret beya kepere pova Jisas vai
(Matyu 4.12-17; Mak 1.14-15)
14 Yah Jisas kanoi varu distrik ya Galili,
roꞌo kupuana vo Holi Spirit.
Yah aro bombiam prumo vo boko vemona,
awirai-a kerivo veka Jisas-a kope kakai kakei veni Galili.
15 Kanoi rorore oꞌro lotu yei aro Juda,f
tah skul-a karao roiy aro bombiam.
Tah aro bombiam koka awoꞌo ya keavoko revo nake,
ku vo keyara veka ya kave tikse awaka.
Nasaret-a ova kereiroro rova Jisas
(Matyu 13.53-58; Mak 6.1-6)
16 Jisas-a kanoi varu mataimon Nasaret,
boko voro kaipo kapako ero.
Yah de vo Sabatg kokai yah kanoi oꞌro lotu yei Juda,h
veka inia kararao ero.
Tah kavariko yah karoi vora awirai kwinia buk ya God naritim.
17 Yah buk ve awirai ya profet Aisaia kwinia kepoa.
Buk-a kawoki konoi yah kayara awirai raꞌa kwirai veka,
18 “Spirit ya Biapako kokei rina,
emo korao veka,
kamakim nena veꞌen vora awirai neman ya God-a nanako nanoni noiy beyo ava kere baun reiy.
Kasalim nena vora awirai nanautim noiy beyo kekepi kalabus vora kalabus-a nepepeo yah nenopi upuoꞌo,
yah beyo ine koraiy ero,
kuiniari ava neyarare varu.
Kasalim nena vora naniꞌin beyo voro nai pako yei aro ovu kepoiy ero,
kuiniari nenopi kanapo.
19 Tah kasalim nena vora awirai neman nanairai noiy beyo veka de kokai veꞌen tah Biapako va naelpim yei aro ya.”i
20 Jisas-a buk-a karitim veꞌen yah kope karoroka yah karoa bia vemona buk-a kaore rariꞌi ve,j
yah kanoi kakeiyo.
Tah aro bombiam kekepi oꞌro lotu are,
ine yei konoi rova ya unake pon.
21 Yah kope kairai roiy veka,
“Mare aka,
awirai kwinia Buk ya God awaka korao naꞌao revo ri teve mopu.”
22 Aro koka vemona awoꞌo ya keavoko nake yah ova kekinakina pako pore awirai neman neman kairai roiy emo.
Tah yei veku ketere veka,
“Bia emo,
ya ma ya Cha Josep.
Toh koraka rope tah awirai vemo kairai?”
23 Yah Jisas-a kairai roiy veka,
“Kana yara veꞌen veka,
awirai bokis vemona va nopirai pona,
‘Mah Dokta,
reka mema veku va namao noneman varu.
Awirai rere ava kamareꞌmare mataimon Kaperneam kemi rivo,
yah mare va namao minia boko mema veku.’ ”k
24 Yah kairai veka,
“Awaka kanairai nopu,
bio beya kuiniari awirai ya profet raꞌa nerivo poa vai,
taim awirai-a ya inia kairai karaꞌra boko ya veku.
25 Awaka kanairai nopu veka,
taim ya profet Elaija aro bom prumo am-a keviri pere veꞌen,
kere keri Israel.
Taim vemona,
God-a beya kariꞌin aꞌ koaita meꞌri vai,
konoi kuiniari ainini 3-pla re ura 6-pla.
Yah taim vemona akorom-a minia kobaun reiy yah boko koka koraiyoi poaka.
26 Toh God-a beya kasalim ya profet Elaija kanoi rire aro bom prumo am-a keviri pere ero vai.
Kasalim ya kanoi ri pon bia bom raꞌal kokei boko Sarefat kakuke ri mataimon Saidon,
am vo karai veni.
Yah profet Elaija kaelpim vo bia bom vemona pon.
27 Yah taim ya profet Elisa,
aro lepro prumo kekepi Israel,
toh beya kaelpim yei vai,
vora neneman varu.
Kaelpim ya pon bia moike raꞌa vo kantri Siria tah reka ya koniniu varu,
awoꞌo ya Cha Naman.”
28 Taim aro koka kekepi oꞌro lotu awirai vemona kerivo,
yah ova kereiroro poaka.
29 Tah kevereko yah kerainiaka Jisas kanoi mataimon upuoꞌo.
Mataimon yei ve kwiniata tou,
yah keko ya kenopi naka tou ika iparipari vora neturakaki nareiy nararo.
30 Toh kope kaute kanoi romoi aro prumo yah kanoi kabaunki poaka.
Jisas-a karirikeiyaki spirit taipo
(Mak 1.21-28)
31 Yah kope Jisas-a kararo mataimon Kaperneam kwinia distrik Galili,
yah de Sabat skul-a inia karoiy aro bombiam.
32 Keririko toro poꞌo awirai ya,
emo kora veka,
awirai kairai roiy emo kupuana kwinia riu.
33 Bio raꞌa spirit taipo kakei riya,
ya minia kakei oꞌro lotu are yei Juda.
Yah kaꞌeiy pako yah karo yah kairai veka,
34 “Ei!
Jisas vo mataimon Nasaret,
toh memi arape kemao moma?
Era mema kakame vora nama bagarapim memi,
vai?
Kana yarama veꞌen,
mema Bia Holi ya God.”
35 Jisas-a katove spirit taipo yah kairai ro veka,
“Ro nompikim!
Yah nomemeiya!”
Yah kope spirit taipo bia emo koavia koraraiyo kareiy romoiy yah korereiya,
tah beya ao taipo rava karao roa vai.
36 Aro bombiam koka keririko toro yah yei veku chiriraiꞌvo veka,
“Bokokou,
emo awirai arape?
Namba re kupuana kwinia riya,
yah ava kairai rore spirit taipo tah awirai ya kere rivo roa yah kere rereiya bio vemo.”
37 Yah awirai rere ao vemona Jisas-a karare rare kere nori rorore boko maomao vo bo vemona.
Jisas-a aro prumo karaiy keneman
(Matyu 8.14-15; Mak 1.29-31)
38 Yah Jisas-a kavariko yah oꞌro lotu yei Juda ve karereo,
tah kanoi oꞌro ya Cha Saimon.
Moꞌo vo om ya Cha Saimon ah korao tah reka vo kwiꞌim pako.
Tah kenopi ketere poa Jisas vora naelpim vo.
39 Yah kanoi karoi ri bia bom vemona kakuke tah katove ah reka iꞌim vemo,
yah reka iꞌim vemona korereo.
Yah kope bia bom-e koneman varu tah kovariko bereren konoi akorom-a korao roiy yah koroiy kepa.
Jisas-a karao aro bombiam prumo keneman
(Matyu 8.16-17; Mak 1.32-34)
40 Kope taim umo karao nararo,
aro koka ah maramaraꞌa koraiy emo,
aro yei keko yei kekape piya Jisas.
Yah eno kareretaiy moike moike yah karaiy keneman.
41 Yah karao spirit taipe taipere kere rereiy,
yah keyeri tah keyirai veka,
“Mema Ma ya God.”
Yah kope katovere yah kairai rore beya kuiniari ava neyirai vova vai.
Ku vo koraka,
spirit taipo ve kere yara veꞌen veka ya Krais.
Jisas-a kanoi rorore mataimon ovu
(Mak 1.35-39)
42 Kope roronai aka Jisas-a kanoi boko raꞌa beyo kebaun.
Yah kope aro bombiam prumo keore naka kenopi yah kope kevaka keiya,
yah kepao nepapariya vora beya kuiniari narereiy vai.
43 Toh kope kairai roiy veka,
“Ku vo God-a kairai rona kanaro vemo,
koraka,
nena va awirai neman vo kingdom ya God-a nanairai nonoi rore mataimon ovu minia.”
44 Yah awirai-a kairirai kanoi rorore oꞌro lotu vemo kerinia boko yei Juda ve.