Yaxan Tak Nakîhcesî Kaan Kaapu, Roowo Marha
21
Ero yinhîrî tak anarî ro tak ween̂akn̂e kaapu hara,
yaxan me akîhtoxapu.
Ero yipu marha ween̂akn̂e roowo hara.
Yihcirî me ehxapunhîrî pen exihra tak xakn̂e kaapunhîrî pen,
roowonhîrî pen marha.
Tuuna imo pen tak exihra xakn̂e yaxan po.
2 On marha ween̂akn̂e ow,
Xuaw ha,
ewto imo ween̂akn̂e kah yai tîhtosom.
Kir̂wanî ro mîn xakn̂e ewto,
Kaan yewtonî ro.
Yaxan Xerusaren mîn xakn̂e osot ha.
Cenporem xa mîn xakn̂e ewto okre.
Porokutoxapu wara xakn̂e,
wooxam n̂eporokucesî ciin̂o yahsîtopo po,
ero wara rma xakn̂e okre.
3 Ero yinhîrî kah yawno mtapotarî tak wencekn̂e xa hara.
Kar̂pe ro mak kekn̂e.
On wara kekn̂e,
Kaan mîn xa tak nasî tooto komo chew.
Kaan xa tak nasî yîchewno ro komo me.
Iyanan komo me tak naxe n̂examro,
Noro rma tak akronoman̂e me nasî,
ponaro ehtopo ro komo me marha nasî.
4 Tîyanan komo yewyokutho n̂icketîkesî ero yimaw exihra cehso ro.
Waihtopo komo exihra tak nasî,
ahwora ehtopo komo marha exihra nasî,
yîwratacho marha tak exihra nasî,
erewra so marha tak naxe okre.
Ero wa tîyanan komo Kaan n̂iir̂as amn̂e.
Pahxa ahce wa so na xatken̂e tooto komo ero warahra tak naxe okre,
kekn̂e.
Ero wa kekn̂e kah yawno on̂entarî me.
5 Ero yinhîrî kayaritomo yapon pono tak nîmtapowakn̂e hara.
On wara kekn̂e,
Miyanî rma tak wakîhces hara ahnoro.
Yaxan me tak wakîhcesî,
kekn̂e.
On wara marha kekn̂e owya,
Karita yaka mewreko ero wa kachonho.
Yaarono xa mîn omtapotarî,
awemîknon̂e pînî ro mak,
ero ke mewreko,
kekn̂e.
6 On wara marha kekn̂e owya,
N̂ex ha,
kacho me tak nasî.
Awpa,
kacho Ow ha,
omeka,
kacho marha Ow ha.
Apoturu komo xa Ow ha.
Amapitawno komo marha Ow ha.
Noro yipu mak Ow ha,
kekn̂e.
Awokru komo xe awexitaw kwokpexe so epethîmnî ke.
Waipîn me awitopo komo ke kwokpexe so,
tuuna pîtho kwawno ke ha.
Ero yipu ke kwokpexe so.
7 On wara naxe kicicitho yewetîn̂e pîn komo,
onakîtotho yahsîn̂e me naxe.
Ahnoro rma nahsîyaxe okre.
Ponaro n̂examro yehtopo ro me was Ow,
omxîkrî me tak naxe n̂examro hara.
Ero wa naxe amn̂e kicicitho yewetîn̂e pîn komo.
8 Ero warahra reha naxe kicicme cehsom kom okwe,
wehto imo chewno me mak naxe oco.
Ero wa naxe cerahsom komo,
Kaan pona enîn̂e pîn komo,
kicicitho pokono komo,
tooto waihkan̂e komo,
cipici pîn pokono komo,
ciin̂o pîn pokono komo marha wooxam komo,
erem pokono komo,
ciixaputho ponarono komo,
cemarontaxmu komo ahnoro rma.
Ero wa cehsom komo tak naxe wehto imo chewno me mak oco.
N̂ikitho warai rma mîn wehto imo,
wehto ke cetahsîsom ha tko.
Enxopre kenarî mîn wehto oco.
Ero yipu chew naxe oco noro yipu komo.
Tooto komo waihtopo ponanmacho mîn iito ehtopo komo,
2-înhîrî waihtopo kom ha,
kekn̂e owya.
Ero wa kekn̂e owya kayaritomo yapon pono.
Yaxan Xerusaren Nîhcesî Kah Yai
9 Ero yinhîrî ancu tak mokyakn̂e ohyaka 7 komo poyino rma.
7 tutum ke cemyarke so xatken̂e ancu komo,
7 marha xakn̂e tooto komo yîwîrîmacho yututumru komo yaw.
Eromanhîrî mîn xakn̂e tooto yîwîrîmacho,
yututumru komo yawno ha.
N̂examro poyinonho rma mîk mokyakn̂e ohyaka.
On wara kekn̂e owya,
Oyakro amok ha.
Oroto tak wenpes awya Oper̂a Xîkrî pici,
kekn̂e owya.
10 Ero ke tak îh pona oyar̂akn̂e,
kawno pona.
Ekatî me mak oyar̂akn̂e.
Iina oyarîche ewto imo n̂enpekn̂e owya,
Xerusaren.
Kir̂wanî ro mîn xakn̂e ewto,
Xerusaren.
Kah yai nîhcekn̂e Kaan yai ha.
11 Tîroromutwe ro mak xakn̂e oco.
Kaan weyuru wara rma xakn̂e tîroromutwe oco.
Toopuci yenporixapu wa mak pepeiwakn̂e oco xaspe wa.
Kristaw wa marha xakn̂e,
par̂ar̂amutwe xa.
Ero wa xakn̂e ewto.
12 Kaw xakn̂e ewto wacan,
yahcome marha.
Metata mko xakn̂e,
12.
Ero wicakî marha xakn̂e potarî yahruru mko.
Ancu komo marha xatken̂e 12 hara.
Potarî yecepu wararî cececetosom mîkyam xatken̂e.
Potarî yahruru poko so tmewreso xakn̂e.
Ixaw Yana tribun yosotî komo xakn̂e ero poko so tmewreso.
Anarî yosotî xakn̂e anarî poko,
anarî yosotî xakn̂e anarî poko hara,
ero wa xakn̂e cirihtîkaxi ro.
13 3 potarî yahruru xakn̂e resce n̂ixa ro.
3 marha xakn̂e oesce n̂ixa hara.
3 marha xakn̂e nohce n̂ixa hara.
3 marha xakn̂e suu n̂ixa hara.
Ero wa xakn̂e waaca potarî yahruru.
14 Toopu xakn̂e waaca yapon me hara.
12 xakn̂e aponî mko.
Tmewreso so marha xakn̂e aponî mko.
Oper̂a Xîkrî nantomatho komo yosotî xakn̂e tmewreso ero poko,
12 komo yosotî rma.
Ero wa ween̂akn̂e ewto wacan yapon.
15 Taa,
ancu yemyaw tak xakn̂e ewto yukuknomacho.
Potarî yukuknomacho marha mîn xakn̂e,
wacan yukuknomacho marha.
Ooru ciixapu min xakn̂e yukuknomacho.
Oyakro nîmtapowakn̂e,
noro yemyaw xakn̂e ero yipu.
16 Ewto tak nuknomekn̂e noro.
On wara xakn̂e,
Pataw ka xakn̂e ewto wacan.
Meye tak xakn̂e waaca yeknu.
Taa,
pataw xakn̂e hara.
Meye n̂he tak xakn̂e eknu xa hara.
Ero wa so xakn̂e tmamritîkaxi ro.
Etmoxe so xakn̂e waaca yeknu mko.
2.200 kirometru moxenon mîn xakn̂e anarî pona.
Wow kache ero wicakî xa marha xakn̂e 2.200 kirometru xa hara eknu pona hara.
Ero wa so xakn̂e tmamritîkaxi ro.
Kawno ro mak mîn xakn̂e waaca.
Îîpî yopono ro mak mîn xakn̂e kawno xa.
2.200 kirometru kawnon ke xa marha xakn̂e hara ehyatkawnon yecenarî xa marha.
17 Ero yinhîrî waaca tak nukuknomekn̂e hara yahcome ehtopo hara.
65 metru xakn̂e waaca yahconon hara.
Kaporî wicakn̂o mîn,
metru,
kacho.
Ero wicakî xa marha nai ancu yaporî hara.
18 On wara xakn̂e ewto wacan,
xaspe xakn̂e waaca me ciixapu.
Ooru ciixapu me xakn̂e mîîmo mko hara ewto pono.
Esmanî ro mîn xakn̂e ooru.
Patiri wara mak xakn̂e tpar̂ar̂amutwe xa okre.
19 Yaake xakn̂e waaca yaponî mko,
etîmkawreno mko.
Toopuci enporixapu ke tporokye so xakn̂e okre.
Cetahsîso xakn̂e porokru waaca yapon poko so.
Anarmerpan mîn xakn̂e porokru.
On wara xakn̂e,
xaspe xakn̂e makatawno porokru,
sapira tak xakn̂e ponan porukru hara,
kawseton̂a tak xakn̂e ponan porokru hara,
esmerawta tak xakn̂e ponan porokru hara,
20 Sahtonica tak xakn̂e ponan porokru hara,
sahcu tak xakn̂e ponan porokru hara,
krosoritu tak xakn̂e ponan porokru hara,
beriru tak xakn̂e ponan porokru hara,
topasiu tak xakn̂e ponan porokru hara,
krisoprasu tak xakn̂e ponan porokru hara,
xasintu tak xakn̂e ponan porokru hara,
amecista tak xakn̂e ponan porokru hara.
Ero warai mko ke tporokye xakn̂e waaca yaponî mko.
21 12 xakn̂e waaca metatan ewto pona kewomtopo komo.
Perora enporixapu xakn̂e ahruru me so.
Cewn̂e rma xakn̂e perora,
anarî yahruru me ciixapu ha.
Cewn̂e xa hara xakn̂e anarî yahruru me ciixapu xa hara.
Ero wa so xakn̂e potarî yahruru mko ahnoro 12 rma.
Mîîmo yotaw so tak xakn̂e esama hara.
Ooru ciixapu rma mîn xakn̂e esama.
Kir̂wan mîn xakn̂e ooru.
Patiri wara xakn̂e par̂ar̂amutwe xa okre.
Ero wa xakn̂e ewto imo kah yai yîhtoxapu.
22 Kaan poko ahwotaxi kîwtotopo yenîhra tko wîxakn̂e mîîmo.
Exihra ro mak xakn̂e iito ewto imo po.
Yîhyaka ahwotaxi kîwtopo me rma nasî Kaan.
Karitî ro Mîk,
Noro rma.
Oper̂a Xîkrî marha nasî ero warai me.
N̂examro rma naxe Kaan mîn me rma.
23 Ewto katparen̂e me exihra nasî kaamo,
nuun̂i marha katparen̂e me exihra nasî.
Katpan me rma nasî Kaan.
Ero ke Noro rma ewto katparekn̂e.
Oper̂a Xîkrî yakro rma katparetken̂e.
24 Ero wa katparexapu po tak naxe Kaan nakir̂wamatho komo amn̂e,
Mîk hak rowon pono komo.
N̂examro kayaritomon komo marha cexe iina cenporem ke tponoye so,
cemyawnoi marha cexe,
tmaywei marha,
noro yipu komo cexe iina.
Noro yipu komo moxam okre,
kacho komo cexe iina.
Ero warai komo cexe iina.
25 Etahrura ro mak nasî metata mko,
tahrunkaxi roro mak nasî,
kokmamra ro mak nasî iito,
katpape roro nasî.
Ero ke ero wa nasî metata etahrun me.
26 Mîk hak rowon pono komo marha cexe iina,
Kir̂wan mîkyam okre,
kacho komo mak,
Takîhsom mîkyam,
kacho komo marha.
Noro yipu komo iina cexe Kaan yewton pona.
27 Iina ewomra ro makî tko naxe kicicitho kom ha.
Cetwîrîmacho pokono komo,
kicicitho pokono komo marha,
cemarontaxmu komo marha,
ero warai komo ewomra thakwa naxe iina,
pîra ro mak ha.
Anarî komo yosotî nasî tmewreso Opera Xîkrî karitan yaw.
Waipîn Me Ciixapu Komo Yosotî Tan,
kacho mîn karita.
Ero yipu yaw osotî tmewresom komo mak n̂ewomyaxe iina.
Ero wa naxe.