Ero yinhîrî tak ancu ween̂akn̂e anarî hara.

Kah yai nîhcekn̂e owero ro.

Noro yemyaw xakn̂e ewtarî imo yewkacho.

Kanawa mici warai marha xakn̂e emyaw,

kuripara.

Porinî ro mak mîn xakn̂e kanawa mici warai.

Noro yipu nîhcekn̂e kah yai.

2 Ero yinhîrî tak watwa imo warai tak nahsîyakn̂e.

Pahxa okoyi me n̂esenpekn̂e,

noro.

Ciabu,

noro yosotî,

Satanas,

noro yosot hara,

noro rma nahsîyakn̂e.

Ahsîche tak napomiyakn̂e kr̂a tak kanawa mici warai ke.

Pahkîno me tî napomiyakn̂e 1.000 cimn̂ipu me ha tî.

3 Apomiche tak ewtarî imo yaka kr̂a tak nar̂mekn̂e.

Iina ar̂mache ewtarî imo nahruyakn̂e,

n̂ewkekn̂e marha.

Ahruru marha nahkoromekn̂e.

Ero wa n̂iir̂akn̂e ahrunkan me ro mak takî.

Ero ke iito thakwa xakn̂e Satanas pen 1.000 cimn̂ipu.

Ero wa nahruyakn̂e ewkukmano cirihra ro mak tak ehtome.

1.000 cimn̂ipu exiche tak amn̂e n̂etahrunkes hara.

Tooto chere tak n̂etar̂as hara ka yohno makî tko.

Ero wa ancu ween̂akn̂e,

kah yai tîhtosom ha.

4 Ero yinhîrî kayaritomo yapon tak ween̂akn̂e yaake.

Ero pona ceremaxmu komo marha ween̂akn̂e.

En̂ekano rîn̂e me xatken̂e n̂examro.

Kaan yanme makî tî xatken̂e ero pokono me.

On warai komo marha ween̂akn̂e,

yîpîmkotoxapunhîrî kom ha.

Roowo po ka cexitaw so tî Xesus yakrono me n̂esekatîmyatken̂e.

Kaanî mtapotarî marha n̂ekatîmyatken̂e.

Kamara warai mamaka yutupentara ro makî tî xatken̂e,

yukuknon me ciixaputho mamaka yutupentara marha tî xatken̂e.

Noro yosotî kuknon mewrepora marha tî xatken̂e tperî poko so,

tamorî poko so marha.

Ero ke n̂examro pen nîpîmkocetken̂e tak kamara warai maywen komo.

Paketken̂e hara tko,

kar̂pe so tî xatken̂e hara.

Noro yipu komo rma tak kayaritomo me so tak xatken̂e Kristu yakrono me.

1.000 cimn̂ipu tî xatken̂e kayaritomo me Noro yakro.

Ero wa xatken̂e yîpîmkotoxapunhîrî komo owero ro ha.

Yihcirî me kpakacho mîn ero yimawno.

5 Anarî komo reha pakahra ka xatken̂e waixapunhîrî komo.

1.000 cimn̂ipu exiche tak pakexe n̂examro hara.

6 Tawake xa taxe yihcirî me tpakaxmu komo yakro ro kpaketaw so.

Cewn̂e ro mak twaihsom komo kîwyam reha.

Anarî komo reha asakî ro twaihsom me naxe okwe.

Pîra reha taxe kîwyam.

Twaihsom me xa hara exihra ro mak taxe.

Waipîn me xa matko taxe.

Kaan ya tîmsom pokono me taxe,

Kristu ya tîmsom pokono me marha.

Kayaritomo me marha taxe ero yimaw.

1.000 cimn̂ipu taxe kayaritomo me Kristu yakro.

Ero wa taxe yihcirî me tpakaxmu komo reha.

7 Amn̂e tak 1.000 cimn̂ipu yenatîche tak Satanas n̂etahrunkes hara ewtarî imo yawnonho.

8 Cepatakache tak mik hak rowon pono komo yewkukmaxi tak ces hara.

Miyan komo yewkukmaxi cesî roowo yakwerî poko hakno kom ha.

Waapa me mohtome so nîmtapowasî cemaro me kica.

Koke pono komo n̂ewkukmesî,

Makoke pono komo marha.

Ero wa cemaro me mak nan̂ikyasî tooto komo.

Ero ke mer̂pono pîn komo tak mokyaxe yîhyaka.

Axawa pupun wa mak naxe okyo mer̂pono pînî ro mak.

9 On wara ehtopo komo tak ween̂akn̂e,

mooxe cetken̂e roowo yakwerî pore rma.

Ixaw Yana komo rowon po tak n̂esenmekyatken̂e.

En̂exa tak Kaan nakir̂wamatho komo yetarî wamtoso cetken̂e.

Ewto imo pen marha wamcetken̂e okwe,

yiixe xa Kaan yehtopo.

Wamtoche tak wehto nîhcekn̂e kah yai,

Kaan nar̂matho.

Ero ke tak waapa me mohxapu komo n̂ecahtîketken̂e oco.

Ero wa ehtopo komo ween̂akn̂e.

10 Ciabu pen yar̂macho marha tak ween̂akn̂e hara.

On wara tak xakn̂e,

noro pen tak nahsîyatken̂e ancu komo,

waapa me mohxapu komo yewkukman̂enho pen ha.

Wehto imo cheka tak nar̂metken̂e oco.

N̂ikitho warai mîn,

wehto ke cetahsîsom ha tko.

Enxopre kenarî mîn wehto oco.

Ero yipu chew naxe kamara warai pen,

tohnawno poko weronomano rin̂enho pen marha.

Iito thakwa naxe eroromero.

Katpanaw n̂erewaxe,

kosope marha.

Ero wa thakwa n̂erewaxe miya roro eserewkan me ro mak oco.

Ero wa naxe.

11 Ero yinhîrî tak kayaritomo yapon tak ween̂akn̂e hara.

Porinî ro mîn ween̂akn̂e,

tumutwem.

Ero po ceremaxmu marha ween̂akn̂e.

Noro yewru yenîche tak yîhyai ro cemahcisom wa tak xakn̂e roowo,

kaapu kom ha.

Eseyamtopo komo tko exihra xakn̂e.

12 Ero yimaw tak waixapunhîrî pen komo ween̂akn̂e Kaan yeepatai cececetoso.

Ahnoro waixapu pen xatken̂e iito,

emyawnomnî pen komo,

cemyawnoyem pen komo marha.

Iito marha ween̂akn̂e karita yaake.

Ero yipu mko ween̂akn̂e.

Anarî marha ween̂akn̂e hara karita,

Waipîn Me Ciixapu Komo Yosotî Tan,

kacho tak hara.

Iito ececetoxapu komo tak Kaan n̂en̂ekekn̂e.

Karita yaw so tmewreso xakn̂e ahce wa so na ehtoponhîrî komo.

Ero yaw roro rma n̂examro pen n̂en̂ekekn̂e Kaan.

13 Ero yimaw miyan komo rma paketken̂e waihxapunhîrî pen komo.

Tuuna imo kwaka enorixapunhîrî komo paketken̂e,

wehto imo chewnonhîrî komo meero paketken̂e.

N̂examro pen n̂en̂ekekn̂e Kaan ahce wa so na ehtoponhîrî komo poko.

14 Ero wa en̂ekatîkache so tak n̂examro pen nar̂mapekn̂e wehto imo cheka.

N̂ikitho warai rma mîn,

wehto ke cetahsîsom ha tko.

Kwaihtopo xa hara mîn ero yipu cheka ketar̂macho.

Ero wa xatken̂e en̂ekaxapunhîrî komo.

15 Anarî marha tak Kaan n̂een̂akn̂e karita,

Waipîn Me Ciixapu komo Yosotî Tan,

kacho.

Ero yipu yaka mewren komo tak nar̂mapekn̂e wehto imo cheka.

Ero wa ar̂mapono n̂iir̂akn̂e Kaan.