Ero yinhîrî tak tooto komo mtapotarî makîrha tak wencekn̂e hara,

kah yawno komo mtapotarî.

Kar̂pe nîmtapowatken̂e mer̂pora cexirî ke so.

On wara ketken̂e,

Areruya.

Kukurunpen̂e Mîkî Kaan okre.

Kir̂wanî ro me cekaiporesom Mîk okre,

karitî ro marha.

Noro yipu Mîk ponaro kehtopo ro komo,

kapore nasî Noro ya okre.

2 Yaaro kepeman̂e Mîk Kaan.

Yaaro xa kicicitho wooxam pen waihkekn̂e,

kîîrî pohkan̂enho.

Roowo pono komo kiciciren̂enho mîk xakn̂e kica,

kîîrî pokono me roro cexirî ke.

Kaan yanton komo waihkan̂enho marha mîk okwe.

Ero ke n̂examro pen n̂epanîyakn̂e Kaan,

ketken̂e.

3 Ero wa kache on wara ketken̂e hara,

Areruya,

wooxam pen tak nasî wehto imo chew.

Ero ke yîsîn nawomyasî.

Miya roro nîsînasî yîtîhkan me ro mak,

ketken̂e.

4 Ero yinhîrî tak poritomo komo ween̂akn̂e xa hara,

24 kom ha.

Mîk hak warai komo marha ween̂akn̂e,

4 kom hara.

Ero yimaw tak n̂examro nutupenwatken̂e cesewnaposo ro.

Kaan poko nahwowatken̂e,

kayaritomo yapon po ceremaxmu poko ha.

On wara ketken̂e Noro poko,

Amen,

areruya!

ketken̂e.

5 Ero yinhîrî Kaan yapon pono mtapotarî wencekn̂e hara.

On wara kekn̂e,

Kporin komo poko xa ahwotacoko amyamro Kaan yanton kom ha.

Kir̂wan̂he xa mai ham Apa,

kacoko yîwya.

Ero wa ahwotacoko ahnoro Noro ponarono komo.

Emyawnomnî komo,

cemyawnoyem komo marha,

ahnoro mak ahwotacoko Noro poko,

kekn̂e.

Ero wa kacho n̂esencekn̂e Kaan yapon pono mtapotarî.

6 Ero yinhîrî mer̂pono pîn komo mtapotarî tak wencekn̂e xa hara,

Kar̂pe xa ketken̂e kahxi mer̂pono pîn wara ro mak.

Tarai wa marha ketken̂e kpanaikoton̂e me.

On wara ketken̂e,

Areruya.

Kayaritomo me xa tak nasî Kaan,

karitî ro xa okre,

ketken̂e.

Ero wa ketken̂e.

7 On wara marha ketken̂e mer̂pono pîn komo,

Tahwotacerî xa tak Kaan poko.

Kir̂wan̂he xa mai ham Apa,

tîtkacerî yîwya.

Oper̂a xîkrî pitacho me exirî ke tak tahwotapore nasî.

Yipici tak n̂etakir̂wamekn̂e.

8 Kir̂wan nîmyakn̂e Kaan yîwya poono,

yusmumnî ro mak,

tumutwem ha.

Ero yipu ke n̂epononcekn̂e.

Kir̂wan̂he Kaan xîkrî komo yehtopo kuknon mîn,

kir̂wan̂he ciino ritopo yîwya so,

ketken̂e.

Ero wa ketken̂e mer̂pono pîn komo on̂entarî me.

9 Ero yinhîrî tak Kaan yapon pono mtapotarî wencekn̂e xa hara.

On wara kekn̂e owya,

On wara kacho mewreko karita yaka,

Oper̂a Xîkrî tak n̂ipiwasî.

Ero ke erewusmano n̂iir̂axe yipitacho yimawno.

Tawake xa naxe ceseremaxmu komo me an̂ihxapu komo,

kacho mewreko,

kekn̂e.

Ero wa kacho mewrepekn̂e owya.

On wara marha tak kekn̂e hara owya,

Yaaro xa mîn wîîka awya,

Kaanî mtapotarî xa mîn ha,

kekn̂e.

Ero wa kekn̂e owya.

10 Ero yipu yentache kesewnapekn̂e ero wa kan̂e yamrinaka.

Oyahwota xe wîxakn̂e noro poko.

Pîra,

kekn̂e ha tko noro owya.

Oyamrinaka yutupentara ro mak esko.

Awarai xa marha ow ha,

Kaan yanton xa marha.

Awakno komo mak ow ha.

Etîme re mak taxe,

Xesus yehtopo yekatîmn̂e me re.

Kaan ya mak kasko,

Oporin Amoro,

kasko.

Kaan Yekatî yanme rma ero wa tîmtapowaxe Xesus poko.

Noro poko mak weronomano cicir̂asî,

kekn̂e owya.

Ero wa kekn̂e.

11 Ero yinhîrî cewtake tak ween̂akn̂e kaapu.

Tahrunkaxi xakn̂e,

metata tahrunkesî ero wa.

Ero yaro tak kawaru mokyakn̂e tumutwem.

Asakî xakn̂e yîmkawno yetacitopo.

Kemîknon̂e Pînî Ro Mak Moso,

kacho Mîk xakn̂e.

Yaaro Xa Ekatîmn̂e Moso,

kacho marha Mîk xakn̂e.

Ero wa xakn̂e Noro yetacitopo.

Kir̂wanî ro Mîk Noro,

ero ke takîhso mak en̂ekano n̂iir̂asî.

Takîhso marha ar̂mano n̂iir̂asî.

12 Tîroromutwe ro mak xakn̂e Noro yewru wehto wara ro mak oco.

Tarokoi marha xakn̂e,

yaake xakn̂e arokorî.

Noro yosotî xakn̂e tmewreso arokorî poko rma.

Ahce wa kacho na mîn osot ha.

Noro mak nîhtînoyakn̂e.

Camkî xatken̂e tooto komo reha ero poko.

13 Ahnorono yaw xakn̂e,

poono yaw.

Kamxuku kwaka yukpaxapu mîn xakn̂e ponon.

Anarî xakn̂e xa hara Noro yetacitopo hara.

Kaanî Mtapotarî Moso,

kacho marha mîn xakn̂e Noro yetacitopo xa hara.

14 Noro mapitaw tak mokyatken̂e sowtatu komo mer̂pono pîn komo,

kah yawno kom ha.

Kawaru mkaw so mokyatken̂e tumutwemu mkaw so.

Kir̂wanhe marha xakn̂e n̂examro ponon hara.

Tumutwem yaw so xatken̂e yusmumnî ro yaw so ha.

15 N̂examro yaan̂e mtai n̂epatakekn̂e kacipara wara paraxkano ritopo.

Ero yipu ke rma roowo pono kayaritomon komo paraxkesî.

Maywenînhîrî komo kayaritomon me tak nasî Noro ero yimaw.

Yukurumîkno me xa tak nasî Noro kayaritomo me xa tak ha.

Kuripara ke tamoyiye nasî kopi.

On wara marha nasî Noro,

uupa yeperîrî warai n̂ewkukesî ewkukacho imo yawno ha.

Kaanî rwonîmtopo,

kacho rma mîn ewkukacho imo Karitî ro yîrwonîmtopo,

kacho ha.

16 Anarî xakn̂e xa hara Noro yetacitopo hara.

Kayaritomo komo Kayaritomon,

Antomano Rin̂e komo Yantoman̂e ha,

kacho mîn xakn̂e etacitopo xa hara.

Ero wa kacho xakn̂e tmewreso ponon poko,

petî poko marha.

Ero wa xakn̂e.

17 Ero yinhîrî tak ancu ween̂e xa hara,

kaamo po tak n̂ecececekn̂e.

Kaikokoro cetarisom komo nan̂ikyakn̂e miyan komo rma.

On wara kekn̂e yîwya so,

Amohcoko kwacinama,

kurum komo.

Ahnoro mak amohcoko korîn yahn̂e komo.

Mer̂pora ceseresmaxmu komo yan̂ihtopo me tak nasî oroto.

Kaanî rma nan̂ikyasî.

18 Xiya amohcoko kayaritomo komo korîntho yahso,

sowtatu yantoman̂e komo korîntho yahso marha,

yukurumîkno komo korîntho yahso marha,

kawaru korîntho yahso marha,

yîmkawnonhîrî komo korîntho yahso marha.

Miyan komo korîntho yahso rma amohcoko.

Tanme ro cetapickaxmu komo korîntho marha,

tooto yanton komo korîntho marha,

emyawnomnî komo korîntho marha,

cemyawnoyem komo korîntho marha,

noro yipu komo korîntho yahso amohcoko oroto,

kekn̂e.

Kar̂pe xa kekn̂e.

Ero wa kekn̂e.

19 Ero yinhîrî kamara warai tak ween̂akn̂e hara.

Noro yakro ween̂akn̂e roowo pono komo kayaritomon komo.

Tmayweye re so xatken̂e n̂examro.

Mer̂pora ro mak xatken̂e sowtatu komo,

n̂examro maywen komo.

Tumutwemu mkawno waparî me tî re mokyatken̂e,

Noro sowtatun komo waparî me marha tî re.

20 Pîra tko xatken̂e.

Kamara warai pen xa matko nahsîyakn̂e tumutwemu mkawno.

Noro yakrononho pen marha nahsîyakn̂e,

tohnawno poko kweronoman̂enhîrî pen hara.

Cirihnî ciin̂enho mîk xakn̂e,

tohnawno poko kweronoman̂enhîrî.

Kamara warai wero ro rma wa ero yipu n̂iir̂akn̂e.

Ewkukmano ritopo mîn xakn̂e cirihnî ciitopo.

Kamara warai kuknon ke mewrexapu komo mak n̂ewkukmekn̂e,

noro kuknon me ciixaputho mamaka nutupenwatken̂e,

n̂examro mak ha.

Ero yipu ciin̂enho pen nahsîyakn̂e tumutwem mkawno.

Kamara warai pen yakro rma nahsîyakn̂e.

N̂examro pen tak nar̂mekn̂e wehto imo cheka asakno roro rma.

N̂ikitho warai mîn wehto imo,

cetahsîsom ha tko.

Enxopre ken̂arî mîn wehto oco.

Ero yipu cheka n̂examro pen nar̂mekn̂e waipînî rma oco.

21 N̂examro yakrononho pen komo tak paraxkekn̂e kawaru mkawno.

Tîmtai cepatakaxmu ke rma paraxkekn̂e kacipara imo ke.

N̂examro waipuche kwacinama komo tak nahyatken̂e korînthîrî komo,

kurum kom ha.

Tmaxmitaxi ro nahyatken̂e.

Ero wa xatken̂e n̂examro pen kom okwe.