Taa,

ero yinhîrî tak anarî ween̂akn̂e hara ancu yukurumîkno xa.

Kah yai nîhcekn̂e.

Tîroromutwem mîk xakn̂e oco.

Roowo katparekn̂e ro mak miyanî rma tîroromutwe xa cexirî ke.

2 On wara kekn̂e noro on̂entarî me,

N̂emacakatîka ro mak tak ewto imo pen okwe,

Babiron̂a pen ha.

Tooto yewton mera tak nasî oroto,

ewtotho me mak ha.

Worokyam yewton me mak tak nasî.

Kicicitho ro komo yekatî yewton me marha nasî kica.

Iina marha tak n̂esenmekyasî tarin̂em komo,

korîn yahn̂e komo ahnoro.

3 On wara xatken̂e mîk hak rowon pono komo,

n̂epohketken̂e Babiron̂a pono komo poko wooxam poko epohketawno wa.

Kawaxiyem yeen̂e wa mak xatken̂e kicicitho poko,

Kaan yîrwonmetopo poko ha.

Ero wa xa marha xatken̂e roowo pono komo kayaritomon komo meero.

Kicicitho poko n̂epohketken̂e ro mak wooxam pokono wara rma.

Twarawantaxmu komo marha nahsîyatken̂e iitono komo yemyawno.

Mer̂pono pînî ro mak nahsîyatken̂e iitono komo yakro twarawantarî ke.

Cepethîkemînhîrî xa mîn xakn̂e n̂examro yemyawno pen,

kekn̂e.

Ero wa kekn̂e ancu.

Kar̂pe ro mak kekn̂e.

4 Ero yinhîrî kah yawno mtapotarî wencekn̂e xa hara,

anarî mtapotarî hara.

On wara kekn̂e on̂entarî me,

Okopuci komo,

on wara wîîkes awya so oyanan komo ya mak,

ero poi tak men amohcoko.

Kicicme iitono komo yehtopo poko men mepohkexe kica.

N̂examro yakro marha na mesemetanmekyatu okwe.

5 Kicicitho pokono ro mak mîkyam Babiron̂a pono komo.

Tukuhkawno wara ro mak nasî kicicme ehtopo komo kah yaka rorono wa.

Ero ke kicicme ehtopo komo yîhcamnopîra ro mak nasî Kaan.

6 Yîwîrîmano rin̂enho ero pono komo okwe.

Ero ke ero wa xa marha tak n̂examro pen tak yîwîrîmacoko hara.

Cerewre ro mak n̂examro yîwîrîmacoko yîwya so yîwîrîmano ritoponho yopo ro mak tak ha.

Wokpano rin̂e wa xatken̂e cerewrem ke oko.

Ero ke ero warai ke xa marha tak n̂examro wokpacoko hara asakî ro ha tko.

Ero wa wokpacoko cerewrem ke.

7 On wara naxe iitono komo,

tpoko so rma nahwowaxe.

Cesewakomaxmu me marha naxe kica.

Ero poko mak naxe kica.

Ero ke iitono pen komo tak ahwokamexpoko ahwotachonhîrî komo yecenarî xa marha.

Emetanmeko marha ero wicakî xa marha.

On wara kan̂e mîkyam n̂examro tîropotaw so,

Kayaritomo pici warai mak kîwyam ahwokan komo ro mak ha.

Ecin̂onkaxapu komo warai pîn kîwyam,

kahwokacho komo yenîn̂e pîn mak okre,

kan̂e komo mîkyam.

8 Ero ke ero kaamo po rma tak n̂examro pen n̂epor̂asî waihtopo komo,

yîwratarî komo,

rooma poko exirî komo marha.

Ewtonthîrî komo marha tak n̂ecahtîkes okwe.

Ero wa n̂examro n̂emetanmekyasî Kaan kicicme ehtoponhîrî komo yepetho me.

Karitî xa Mîk n̂examro yen̂ekan̂e,

Kporin komo xa Mîk Kaan ha,

kekn̂e.

9 On wara marha kekn̂e,

Babiron̂a pen yecakyataw yîsîn tak n̂een̂axe kayaritomo komo mer̂pono pîn.

Nîwracexe thakwa okwe yîpînîn yaw.

Kicicitho poko xatken̂e iitono komo yakro,

n̂esewakometken̂e marha n̂examro yakro.

Ero ke thakwa yîpînîn yaw so nîwracexe okwe.

10 Mooxe ro mak tak n̂ecececexe ecakîra cehtome so.

En̂exa tak n̂een̂axe ewto yecakrî.

Iito tak cewru naar̂axe.

On wara kexe,

Okwe okwe okwe,

porinî ro mak mîn n̂ecakyas okwe ewto imo,

Babiron̂a pen.

Yukurumîknonhîrî komo mîkyam iitononhîrî pen komo okwe.

Yohno ro mak xakn̂e ecahtopo okwe cewn̂e ora mak,

kexe tak amn̂e.

Ero wa kexe kayaritomo komo.

11 Twarawantaxmu komo marha nîwracexe,

roowo poko hakno komo.

Okwe,

okwe,

kexe.

Babiron̂a pen yecakrî ke n̂examro yemyawno yahsîra ro mak tak naxe okwe tooto komo,

kexe.

12 On wara xakn̂e n̂examro yemyawno warawa me tîmsomu cma tî re,

ooru,

prata,

toopuci enporixapu,

perora,

kir̂wan poono riin̂u kahxapu,

camnarexapu marha,

cenporem xa poono,

cucurem marha,

kotoporem marha weewe,

mahpin ciixapu,

kobre akîhtoxapu,

pehu akîhtoxapu,

toopu enporixapu mko marha,

13 knahrî poxuretopo,

takn̂isom kotoporem,

katî marha kotoporem,

wooku marha kawaxiyem,

katî marha knahrî chekan ha,

puruma marha aposokaxapu.

Puruma yatho marha xakn̂e,

paaka marha,

oper̂a,

kawaru,

tarara,

ero warai komo xakn̂e n̂examro yemyawno pen.

Tooto pun poko marha warawanwatken̂e okwe,

yîropotarî komo poko marha okwe.

Ero wara cma re xakn̂e n̂examro warawantacho komo.

Ero yipu yahsîra tak naxe okwe tooto komo Babiron̂a pen yecakrî ke,

kekn̂e tak kah yawno on̂entarî me.

14 On wara tak kesî Kaan ero yimaw,

Babiron̂a pononho pen komo ya tak kesî,

Anatîrî komo yeperîtho exihra tak nas okwe.

Tpoxwem ka xakn̂e anahrî komo,

awakon komo me xakn̂e.

Yiixe awehtoponhîrî komo takî tko n̂ehcamnoi okwe cepethîkemînhîrî pen.

Ero yipu yenîhra ro mak tak maxe amn̂e okwe,

kesî.

Ero wa kesî Kaan yîwya so.

15 Ero ke men nîwracexe twarawantaxmunhîrî komo.

Babiron̂a pono ke cma re n̂epurantanmetken̂e.

Ewto imo yecakrî yeen̂ataw mooxe tak n̂ecececexe.

N̂eraswaxe ro mak ecakrî ke.

Iito tak nîwracexe.

Cewru komo naar̂axe okwe.

16 On wara kexe,

Okwe okwe okwe,

kir̂wanînhîrî mîn okwe ewto imo.

Tpononporemînhîrî xa mîkyam iitononhîrî pen komo,

riin̂u yaw so xatken̂e.

Tîswayem yaw so xatken̂e kayaritomo ponon warai yaw so.

Cucurem yaw so marha xatken̂e anarimaw so.

Ceporenomaxi so marha xatken̂e ooru ke,

toopuci enporixapu mko ke marha,

perora ke marha.

Ero wa xatken̂e okwe.

17 Ahce kacho noro yipu komo yemyawnonho tak n̂ehcamnotîka yohno ro mak okwe,

cewn̂e ora mak xakn̂e ecahtopo?

kexe marha.

Ero wa kexe kanawa yosom komo,

kanawa yaw tîtosom komo marha,

kanawa imo yaan̂e kom ha,

Mooxe mak n̂ecececexe.

18 Nîwracexe ro mak okwe,

ecakrî yenîrî ke.

Ero wara naxe ewto imo yecakrî yîsîn yeen̂ataw,

On wara marha kexe,

Anarî exihra ro mak nasî ewto imo okwe onînhîrî warai,

kexe.

19 Roowo marha tak pahyaxe tîhtîpîrî pona so tîwratarî me so.

Cewru komo naaraxe ro mak.

On wara kexe,

Iina cetken̂e kanawa yosom komo tupurantan komo yahsîso mer̂pora.

Cemyawnoyem komo mîkyam xatken̂e iitononhîrî pen komo.

Ahce kacho yohno ro mak tak n̂ecahtîkacow hara okwe,

cewn̂e ora mak xakn̂e ecahtopo okwe?

kexe.

Ero wa kexe noro yipu komo,

kekn̂e.

Ero wa kekn̂e kah yawno.

20 On wara marha kekn̂e,

Ahwotacoko,

wîîkes awya so kah yawno komo.

Amyamro marha ahwotacoko Kaan nakir̂wamatho komo,

Xesus nantomatho kom ha,

weronomano rin̂e komo marha.

Ero wa ehcoko Babiron̂a pen yecakrî ke,

wîîkes awya so.

Awepancow so tak Kaan ero wa akn̂irî ke,

wîîkes awya so,

kekn̂e.

Ero wa kekn̂e kah yawno owya.

21 Ero yinhîrî anarî tak ween̂akn̂e hara ancu.

Toopu nanîmyakn̂e porin,

puruma yakihtopo warai.

Tuuna imo kwaka tak nar̂mekn̂e,

pom kopow.

Ar̂mache tak on wara kekn̂e,

Ero wa Kaan nar̂mes amn̂e Babiron̂a pen,

ewto imo pen ha.

Yohno ro mak nar̂mesî.

Exihnî me ro mak tak nasî.

Ero wa tak nasî Babiron̂a pen,

ewto imo pen ha.

22 Raatî esentara ro mak tak nasî iito ahyaw so.

Tîyorkaxmu komo yesentara,

cecesom komo marha esentara,

cewanomaxmu komo marha esentara.

Kahn̂e komo exihra ro mak tak nas ahyaw,

ahce na yakîhton̂e komo marha exihra nasî.

Puruma yahxikrî marha esentara tak nas ahyaw so.

23 Weipono rin̂e marha exihra tak nasî ramha iito.

Cipitaxmu komo mtapotarî marha esentara nasî iito ahyaw so,

ciin̂ontaxmu komo mtapotarî marha esentara nasî.

Cemyawnoyem me xa xatken̂e ahyawno komo,

twarawantaxmu komo.

N̂examro ponaro xatken̂e roowo poko hakno komo.

Yaskomo me xatken̂e ahyawno komo,

ceremkem kom ha.

Aweremru komo ke rma ahnoro kayaritomo maywen komo mewkukmetken̂e kica,

kekn̂e.

Ero wa kekn̂e ancu,

toopu yar̂man̂enho.

24 On wara marha kekn̂e noro,

Weronomano rin̂e pen komo kamxukutho marha xakn̂e okwe iito Babirona pono komo yaw.

Kaan nakir̂wamatho komo kamxukutho marha xakn̂e yîhyaw so okwe.

Miyan pen komo kamxukutho rma xakn̂e iito,

ahnoro roowo po waihkaxapu komo kamxukutho.

Ero yipu poyero tak Babiron̂a pen nakn̂ipu Kaan,

kekn̂e tak.

Ero wa kekn̂e ancu on̂entarî me.