Ero yinhîrî anarî tak mokyakn̂e hara ohyaka ancu.

7 komo poyino rma mîk xakn̂e,

tututumru yawnonho yukmamn̂enho rma.

On wara kekn̂e owya,

Amok ha oyakro.

Wooxam tak wenpes awya kicicitho ro mak.

Kîîrî pohkan̂e mîk,

noro wenpes awya.

Tuuna rataw ceremaxmu mîk mer̂pono pîn rataw.

Noro yipu wenpes awya.

2 Noro pokono wara rma xatken̂e kica roowo pono kayaritomon mer̂pono pîn komo.

Kayaritomo pîn komo meero ero wa xatken̂e,

miyan komo rma roowo poko hakno kom ha.

Noro poko exirî ke so wenîmxapu wa mak xatken̂e kica.

Kawaxiyem yeetopo wara rma xakn̂e noro poko ehtopo komo,

kekn̂e.

Ero wa kekn̂e owya ancu.

3 Ero ke tak oyar̂akn̂e miya pohnîntaka.

Ekatî me mak oyar̂akn̂e.

Iito tak ween̂akn̂e wooxam.

Kamara warai mkaw xakn̂e ceremaxi.

Cucurem mîk xakn̂e kamara warai.

Tmewreso xakn̂e yupun etacitopo mko ke.

Yaake xakn̂e etacitopo,

kicicitho re kica,

Kaan yîwîrîyakacho kica.

Ero warai mko tmewreso xakn̂e kamara warai poko kica.

Yaake marha xakn̂e yîhtîpîrî,

7.

Yaake marha xakn̂e meretîrî hara,

10 xakn̂e ha.

Ero wa xakn̂e kamara warai wooxam yaan̂e.

4 On wara xakn̂e yîmkawno hara wooxam,

tîswaye xakn̂e noro ponon,

cucure marha xakn̂e.

Mer̂pora xakn̂e noro yeporenomacho.

Ooru ciixapu,

toopuci enporixapu ciki,

perora,

ero wa xakn̂e noro yeporenomacho.

Noro yemyaw marha xakn̂e parakweci,

ooru ciixapu.

Ero yaw xakn̂e kicicitho ro mak wooku.

Yiixera ro mak Kaan yehtopo kuknon mîn xakn̂e wooku.

Cikicicintaxmu me noro yehtopo kuknon marha mîn.

Tusmuyem wara ro mak xakn̂e kica.

Ero wa wooxam yehtopo kuknon mîn xakn̂e wok ha.

5 Wooxam pewo xakn̂e tmewreso noro yetacitopo.

Entanînhîrî mîn xakn̂e etacitopo.

On wara kacho mîn ha,

Babiron̂a ow ha,

miyan komo kayaritomonî rma ow ha.

Kîrkomo pohkan̂e ro komo yon ow ha.

Kicicme ro mak tooto yehtopo yon marha ow,

kacho.

Ero wa kacho xakn̂e tmewreso noro pewo.

6 Wenakn̂e marha kica wooxam.

Kaan nakir̂wamatho pen komo kamxukutho ke mak wenakn̂e okwe,

Xesus ponarono komo kamxukutho ke marha.

Ero wa xakn̂e noro kica wooxam.

Noro yenîche owya keserepoketîkekn̂e ro mak tak.

7 Ero wa oyexitaw on wara kekn̂e ancu owya,

Ahce kacho meserepoke noro poko?

Camkî na meen̂a noro,

wooxam.

Camkî marha na meen̂a kamara warai hara,

noro yaan̂e ha.

7 nasî yîhtîpîrî,

10 nasî meretîrî hara,

noro na camkî meen̂a.

Ahce warai pokono na mîn ero yipu kopi?

mîîke na.

Ero ke wekatîmyasî tak awya.

8 On warai mîk kamara warai,

pahxanî ro mîk noro.

Oroto tak exihra nasî.

Mokyas hara tko amn̂e,

ewtarî imo yai rma n̂epatakesî.

Ero yinhîrî tak n̂ehcamnoyasî eroromero.

N̂eserepokexe tko roowo pono komo noro yenîche.

On wara kexe,

Pahxa xakn̂e moso,

ero yinhîrî tak n̂ehcamnoyakn̂e hara okwe.

Nasî rma hara tko okyo,

kexe.

Ero wa n̂eserepokexe noro poko.

Karita yaka tmewreso exihra nasî anarî komo yosotî,

noro yipu komo mak n̂eserepokexe.

Waipîn Me Ciixapu Komo Yosotî Tan,

kacho mîn karita.

Pahxa rma kosotî komo mewrekn̂e Kaan ero yaka,

roowo yakîhcetaw rma.

Ero yaka tmewreso exihra nasî anarî komo yosotî,

noro yipu komo mak n̂eserepokexe kamara warai poko.

Ero wa naxe.

9 Taa,

on wara kacho mîn kamara warai tîpîrî,

kacho tak wekatîmyas hara awya.

Takîhso entan̂e me awexitaw omtapotarî mencesî.

7 nasî yîhtîpîrî.

7 îîpî kuknon mîn yîhtîpîrî mko.

Ero yipu po eremaxapu mîk wooxam.

10 Kayaritomo komo marha naxe 7 hara.

Pahxan pen komo waihyatken̂e pahxa ha ka,

5 mak ha ka.

Anarînhîrî nasî oroto kayaritomo me hara.

Amn̂e tak nasî anarî xa hara kayaritomo me ciisom hara.

Noro tak nasî kayaritomo me yohno mak.

11 Kayaritomo marha mîk kamara warai,

pahxa ka xakn̂e,

oroto ka exihra nasî noro.

8-nhîrî me tak nasî noro kayaritomo me.

7 komo yakrononho rma tko mîk kamara warai.

Cehcamnosom mak mîk okwe,

wehto imo cheka tîtosom ha.

Noro yipu mîk kamara warai ha,

kekn̂e.

Ero wa kekn̂e ancu owya.

12 On wara marha kekn̂e noro owya,

kamara warai meretîrî menwo hara.

10 n̂eexi noro meretîrî.

Kayaritomo komo kuknonî rma mîn menwo.

Kayaritomo me exihra rma ka naxe n̂examro.

Amn̂e mak kayaritomo me naxe.

Kamara warai rma ero warai me n̂iir̂asî.

Yohno makî tko naxe kayaritomo me,

1 ora mak ha.

13 Iito re cesehtînosom komo rma mîkyam.

Kayaritomo me rma re naxe.

Kamara warai rma tko n̂ewehcaxe kica,

nakronomexe marha.

14 Ero yimaw Oper̂a Xîkrî xera tak naxe okwe.

Noro yar̂maxi tî re cetu.

Ar̂mara rma tko naxe.

Noro xa matko n̂examro pen nar̂mesî.

On warai Mîk hara Oper̂a Xîkrî,

antomano rin̂e komo yantoman̂e rma Mîk Noro.

Kayaritomo komo kayaritomon marha Mîk Noro ha.

Ero ke ar̂mano rin̂e me nasî.

Takronoi xa cesî.

On warai mîkyam Noro yakrono komo,

an̂ihxapu komo,

men̂ekaxapu komo,

kemîknon̂e pîn komo,

ero warai komo.

Ero wa ar̂mano n̂iir̂asî Opera Xîkrî,

kekn̂e.

Ero wa kekn̂e ancu owya.

15 On wara tak kekn̂e hara noro owya,

tuuna menwo,

kîîrî pohkan̂e ro marha menwo wooxam,

ero po ceremaxmu.

On warai kuknon mîn tuuna,

Anarî yana komo kuknon mîn,

mer̂pono pîn komo kuknon,

mîk hak rowon pono komo kuknon marha,

anarmerpa tîmtapotaxmu komo kuknon marha.

Noro yipu komo kuknon mîn menwo tuuna.

16 Kayaritomo komo kuknon menwo,

10 kamara warai meretîrî.

On wara tak naxe n̂examro,

wooxam tak nîîxatîmnokexe kîîrî pohkan̂e ro.

Nîwîrîmetîkexe marha.

Ponomnî me ro mak n̂iir̂axe.

Yupunthîrî yonon̂e wa marha kr̂a naxe,

nakn̂iyaxe marha tak oco exihra cehso ro.

Ero wa noro n̂iir̂axe kayaritomo komo,

kamara warai meretîrî wara cehsom kom ha.

17 Kaanî rma ero wa kayaritomo komo n̂iir̂asî,

wooxam xatîmnokan̂e me.

Noro rma iito re yîhtînon̂e me n̂iir̂asî.

Kamara warai yewetîtopo ponarono me n̂iir̂asî.

Ero ke tanme ro so rma tak noro yewetîn̂e me naxe.

Tîmtapotachonhîrî yaw roro rma ciino ritohme ero wa Kaan n̂examro n̂iir̂asî.

Ero wa naxe 10 kayaritomo komo.

18 Wooxam marha menwo kîîrî pohkan̂e ro.

Ewto imo kuknonî rma mîk wooxam,

kayaritomo yewton kuknon ha.

Kayaritomo me xa nasî iitono,

anarî kayaritomon komo yantoman̂e me.

Noro yewton kuknon mîk noro,

an̂enîthîrî,

kekn̂e.

Ero wa on̂enîtho poko ohcamhokekn̂e ancu.