Ero yinhîrî tak kah yawno mtapotarî wencekn̂e xa hara,

Kaan mîn yawno mtapotarî.

Kar̂pe xa kekn̂e.

On wara kekn̂e 7 ancu komo ya,

Etocoko tak awemyawno komo yukmamso,

tutum yawno.

Roowo pona arkacoko,

kekn̂e.

Kaanî rwonî rma mîn xakn̂e tutum yawno.

Ero poko,

Yukmamcoko,

kekn̂e.

2 Ero ke yihcirî tak cekn̂e ancu.

Cemyawno tak nukmamyakn̂e roowo pona,

xoo.

Yukmamche nonku tak xakn̂e tooto komo poko oko.

Kicicitho ro mak mîn xakn̂e nonku,

cerewrem ro mak oko.

On warai komo xatken̂e nonku ken̂e,

kamara warai kuknon ke mewrexapu komo,

yukuknonthîrî me ciixapu mamaka tutupentaxmu komo marha.

Noro yipu komo poko xakn̂e nonku oko.

3 Ero yinhîrî 2-nhîrî tak cekn̂e hara ancu.

Tututumru yawno tak nukmamyakn̂e hara tuuna imo kwaka.

Yukmamche kamxuk me tak n̂etakîcekn̂e tuuna imo.

Tooto kamxukutho wara ro mak xakn̂e kica,

waixaputho kamxukutho wara.

Ero ke tuuna imo kwawnonho tak waihtîketken̂e ahnoro okwe ootî pen komo,

mîk hak pen komo okwe.

Ero wa xatken̂e okwe.

4 Ero yinhîrî 3-nhîrî tak cekn̂e hara ancu.

Tututumru yawno nukmamyakn̂e hara eepu kwaka tak,

tuuna pîtho kwaka marha.

Ero ke eronhîrî tak n̂etakîcekn̂e kamxuk me hara.

5 Ero yimaw ancu mtapotarî wencekn̂e xa hara,

anarî mtapotarî hara.

Tuuna yenîn̂e mîk xakn̂e,

ancu ha.

On wara kekn̂e,

Yaaro kepeman̂e ro xa Amoro ham Apa.

Pahxanî ro Amoro.

Cehsom ro rma Amoro oroto,

miya rorono me cehsom marha,

kekn̂e.

Yaaro rma tooto komo memetanmekyasî.

Kicicme ehtoponhîrî komo yaw roro rma memetanmekyasî,

kekn̂e.

6 Anakir̂wamathîrî pen komo kamxukutho yen̂epen̂enho mîkyam,

weronomano rin̂e pen komo kamxukutho yen̂epen̂enho marha.

Ero ke kamxukutho xa marha tak merpesî yîwya so hara.

Yaaro xa mepeme ham,

kekn̂e.

Ero wa kekn̂e Kaan ya.

7 Ero yinhîrî anarî mtapotarî wencekn̂e hara,

kotoporem yakn̂itopo yawno mtapotarî hara.

On wara kekn̂e,

Yaaro kesî noro Apa apoko.

Amna porin Amoro,

karitî ro xa.

Ponaro amna yehtopo ro Amoro,

kekn̂e.

Tooto komo yehtoponho yaw roro rma epemano rin̂e ham Amoro,

kekn̂e.

Ero wa kekn̂e Kaan ya noro hara.

8 Ero yinhîrî tak 4-nhîrî cekn̂e hara ancu.

Tututumru yawno tak nukmamyakn̂e kaamo pona hara.

Yukmamche ocoro xa tak n̂ehtîkekn̂e kaamo.

Tooto pen komo n̂ipikekn̂e wehto ke oco.

9 Yupuno tak n̂iir̂akn̂e kaamo oco.

Ero ke kicicme ro mak nîmtapowatken̂e tooto komo kica Kaan yosotî poko.

Tîwîrîman̂e me exirî ke nîmtapowatken̂e.

Kicicme ro mak tat ham kica,

kahra tî xatken̂e okwe.

Kir̂wan̂he nasî Kaan,

kahra marha tî xatken̂e okwe.

Ero wa xatken̂e okwe.

10 Ero yinhîrî 5-nhîrî tak cekn̂e hara ancu.

Tututumru yawno tak nukmamyakn̂e kamara warai yapon pona hara.

Yukmamche nawarpanwatken̂e tak noro maywen komo miyan komo rma ahnoro.

N̂erewatken̂e rma awarpan chew.

N̂etun̂uyesketken̂e tak cerewîmrî ke so oko.

11 Ero poyero kicicme ro makî tî nîmtapowatken̂e Kaan poko,

kah yawno poko.

Cerewîmrî komo poyero ero wa nîmtapowatken̂e,

nonku yaw cexirî komo poyero ha.

Cehtoponhîrî komo poxunkara rma tko xatken̂e okwe.

Ero wa tî xatken̂e.

12 Ero yinhîrî 6-nhîrî tak cekn̂e hara ancu cemyawno yukmamso.

Tuuna yepu kwaka tak nukukmamyakn̂e.

Porin xa mîn tuuna yepu,

Ewpratesî osotî.

Ero kwaka yukmamche napaiyakn̂e ro mak porinînhîrî peni rma.

Yarinho me tak xakn̂e.

Ero wa Kaan napainokekn̂e kayaritomo komo yesamarî me,

resce n̂ixan komo yesamarî me ha.

13 Ero yimaw tak worokyam ween̂akn̂e,

3.

Kicicitho mîkyam worokyam kica.

Pororî wara xatken̂e.

Anarî n̂epatakekn̂e watwa imo mtai.

Anarî n̂epatakekn̂e hara kamara mtai hara.

Anarî xa hara n̂epatakekn̂e tohnawno poko weronomano rin̂e mtai hara.

14 Worokyamu rma mîkyam kica,

Satanas maywen.

Cirihnî ciin̂e me naxe kopi.

Noro yipu komo tak cexe roowo poko hakno kayaritomon komo yan̂ihso.

Etar̂maxi amohcoko ha,

kaxi cexe.

Ero ke an̂ihxapu komo tak n̂esenmekyaxe etar̂machome Kaan kamon po,

Karitî ro kamon po ha.

Keserepokacho me n̂enmayasî Kaan kamon,

ero po n̂etar̂mexe.

15 Ero ke on wara kesî Xesus kîwya so,

Oponaro men ehcoko.

Kmokyas hara men wa ha amn̂e.

Cen̂epan̂em mokyatawno wara rma kmokyasî.

Kir̂wan̂he maxe oponaro awexitaw so,

tponoyem wara awexitaw so marha.

Ahce wa matu ponomnî wara awetar̂ataw so tooto komo wero ro kica?

kesî.

16 Ero yinhîrî kayaritomo komo tak n̂enmekyatken̂e pororî warai komo.

Woskara pona n̂enmekyatken̂e Amaketon pona.

Ero wa Ebrew komo n̂etahcaxe iitono,

woskara.

Iina enmekno n̂iir̂atken̂e.

17 Taa,

ero yinhîrî 7-nhîrî xa hara cekn̂e ancu.

Tututumru yawno tak nukmamyakn̂e kaw rma ocowo narîrî me mak.

Yukmamche Kaan mîn yawno mtapotarî wencekn̂e xa hara,

Kayaritomo yapon pono mtapotarî tak ha.

Kar̂pe ro mak nîmtapowakn̂e.

On wara kekn̂e,

N̂eexi tak ha,

yîwîrîmano ritopo tak nîtîhka ha,

kekn̂e.

18 Ero wa kacho yentache owya pepe kekn̂e tak emapona.

Tarai marha kekn̂e.

Ahce na marha nîyorwakn̂e.

Roowo pen marha n̂esewsîyakn̂e kar̂pe ro mak.

Pahxa rma re n̂esewsîyakn̂e roowo amn̂e xa so.

Roowo po tooto yakîhtotoponho n̂ixa ro n̂esewsîyakn̂e ha re.

Ero yipu yopono ro xa tak mîn xakn̂e roowo yesewsîtopo kopi.

19 Ero wa esewsîyataw ewto imo tak n̂etîraconkekn̂e.

3 me tak xakn̂e ewto imo raconho.

Anarî mko marha n̂emacakekn̂e ewto pen,

mîk hak rowon pono pen.

Ero yimaw Babiron̂a ponaro xa tak xakn̂e Kaan,

epemacho ponaro.

Ero ke ero pono pen komo tak wokpekn̂e tîrwon ke xa tak.

Wok warai rma mîn Kaanî rwon cerewrem warai.

Ero yipu ke Babiron̂a pono pen komo wokpekn̂e.

20 Ero yimaw marha tak ciwya pen n̂ehcamnoyakn̂e ahnoro kopi.

Emahcixapu wara mak xakn̂e.

Îh pen marha tak esenpora xakn̂e.

21 Saraipa marha tak mokyakn̂e.

Porin me so mokyakn̂e oko.

40 kiru wicakî so mokyakn̂e.

Ero warai n̂epîrkekn̂e tooto pona.

Tooto pen n̂emetanmekyakn̂e ro mak oko saraipa.

Ero yimaw xa hara tooto komo nîmtapowatken̂e Kaan poko.

Kicicme so nîmtapowatken̂e Noro poko saraipa mokrî ke.

Ero wa xatken̂e okwe.