Ero yinhîrî tak anarî pokono tak ween̂akn̂e.

Anarî menî ro mak mîn xakn̂e,

oyeserepokacho me xa.

Anarî komo tak ween̂akn̂e hara,

ancu komo,

7 ha.

N̂examro yemyaw so tak ween̂akn̂e tooto komo yîwîrîmacho xa hara oko.

Anarmerpan mîn xakn̂e tooto komo yîwîrîmacho,

7 ha.

Eromanhîrî mîn xakn̂e Kaan yîrwonîmtopo.

N̂examro yenîche keserepokekn̂e xa.

2 Ero yinhîrî iito marha ween̂akn̂e n̂ikitho imo.

Patiri warai mîn xakn̂e.

Cesesmaxi tko xakn̂e wehto yakro.

Ero wa xakn̂e.

Tooto komo marha ween̂akn̂e ero rataw,

cececetoso.

Kamara warai yopono me ehxapu komo tî mîkyam xatken̂e.

Noro kuknon mamaka yutupentan komo mîkyam xatken̂e.

Noro yosotî yukuknomacho mewrepon̂e pîn komo marha mîkyam xatken̂e okre.

Noro yipu komo mîkyam xatken̂e iito.

N̂examro yemyaw xakn̂e Kaan ratînî mko tîyorkaxmu.

3 On wara xatken̂e n̂examro,

n̂ewanometken̂e on̂entarî me.

Moises wanorî naar̂atken̂e,

Kaan yanton wanorî ha.

Oper̂a Xîkrî wanorî rma mîn ha.

On wara ketken̂e waano me,

Amna yeserepokacho xa mîn awya ciino ritopo Apa.

Amna yopo ro mak ciino rin̂e Amoro.

Karitî xa ham Amoro Apa,

anarî komo yopono ro mak.

Amna kayaritomon Amoro,

akir̂wamaxapu komo kayaritomon.

Yaaro xa epemano rin̂e ha Amoro Apa.

4 Ero ke onoke ma re nai aponarora Apa?

Kir̂wanî ro me marha awetacira ma re natu?

Amoro mak kir̂wanî ro.

Ero ke ahyaka tak mokyaxe ahnoro mîk hak rowon pono komo.

Oporin Amoro,

kexe tak awya.

Ero wa kexe awya kicicitho komo yepemacho yenîrî ke,

ketken̂e.

Ero wa kacho mîn naar̂atken̂e waano Kaan pokono ha.

5 Ero yinhîrî Kaan mîn tak ween̂akn̂e hara kah yawno.

Ero yipu yamtakpon tak nahrunketken̂e iitono komo,

mehxan,

Kaan yakro yîmtapotacho komo xa.

Ero yipu nahrunketken̂e.

6 En̂exa tak n̂epataketken̂e 7 ancu komo yîwîrîmano ritopo ke cemyarkem komo.

Kir̂wan̂he ro mak xakn̂e ponon komo,

tumutwe xakn̂e okre.

Tawrutamxe so marha xatken̂e ooru kahxapu ke.

7 Iito marha xatken̂e 4 mîk hak warai komo.

N̂examro poyino rma tak nîmyakn̂e tutumu mko ancu komo ya,

7 komo ya.

Ooru ciixapu rma mîn xakn̂e tutum.

Ero yipu yaw so xakn̂e Kaanî rwon,

miya roro waipînî ro rwon oko.

Wok me xakn̂e.

8 Ero yimaw yîsîn ken̂e xa tak xakn̂e Kaan mîn.

Kir̂wanî ro me Kaan yexirî ke ero wa nîsînakn̂e,

kariti ro me exirî ke so marha.

Ero wa nîsînakn̂e.

Ero ke Kaan mîn yaka ewomra thakwa ka xatken̂e iitono komo yîsîn yanme okwe.

Tooto yîwîrîmatîkache mak tak 7 ancu komo ya ero yimaw tak Kaan mîn yaka ewomtopo me tak xakn̂e hara.

Ero wa xakn̂e Kaan mîn.