Ero yinhîrî Oper̂a Xîkrî tak ween̂akn̂e hara.

Siaw Yîpîn po xakn̂e.

Noro yakro tak ween̂akn̂e tooto kom hara mer̂pono pîn,

144.000.

Perî poko so Oper̂a Xîkrî yosotî xakn̂e tmewreso,

Noro Yîîm yosotî marha.

Ero wa xatken̂e n̂examro tmewreso so perî komo poko.

2 Ero yimaw tak wencekn̂e kah yawno mtapotarî.

Kar̂pe ro mak kekn̂e kahxi imo wara ro mak,

tarai wara marha oko.

Ero warai wencekn̂e.

Raatî iyorkacho marha wencekn̂e.

Yakeno wara wencekn̂e iyorkan̂e komo.

Ahpa mko xakn̂e yîratîn komo.

3 Waano marha wencekn̂e.

Kayaritomo yeepatai xatken̂e cewanomaxmu komo.

Mîk hak warai komo yeepatai marha xatken̂e,

4 komo yeepatai.

24 poritomo komo yeepatai marha xatken̂e,

Ero wa xatken̂e cewanomaxmu komo.

Entanînhîrî naar̂atken̂e waano,

yaxan ha.

N̂examro mak ero warai naar̂atken̂e 144.000 komo mak.

Camkî thakwa xatken̂e anarî komo ero poko.

Epethîrî pona ahsîxapu komo mîkyam xatken̂e cewanomaxmu komo,

roowo pono chewnonho komo.

4 Wooxam poko yikicicintanî ro mak mîkyam xatken̂e.

Wooxam pokono pînî ro mak mîkyam.

Oper̂a Xîkrî yakro tîtosom komo mîkyam.

Ahna na cetaw Noro n̂examro marha cexe akro.

Epethîrî pona ahsîxapu mîkyam,

tooto komo poyinonho.

Yihcirî me epetaxapu nîmyaxe tooto komo Kaan ya tînatîrî yeperîrî,

ero wa xa marha Kaan ya tîmxapu mîkyam hara,

Oper̂a Xîkrî ya tîmxapu marha.

5 Cemarontanî ro mak mîkyam xatken̂e,

kir̂wan komo ro mak,

Kicicitho mîkyam kica,

kacho pînî komo ro mak.

Noro yipu komo mîkyam xatken̂e 144.000 komo.

6 Taa,

ero yinhîrî anarî tak ween̂akn̂e hara ancu kaikokoro tîtosom.

Kir̂wanî ro me Kaan yehtopo yekatîmn̂e mîk xakn̂e.

Pahxa entaxapunhîrî rma mîn xakn̂e yîn̂ekatîmrî.

Miya roro yîtîtmamnî me ro mak cekatîmsom marha mîn.

Ero yipu yekatîmn̂e mîk xakn̂e.

Roowo pono komo ya n̂ekatîmyakn̂e miyan komo ya rma.

Mîk hak rowon pono komo ya n̂ekatîmyakn̂e,

mîk hak tribun komo ya marha,

mîn hak yaro tîmtapotaxmu komo ya marha,

ahnoro anarî yana komo ya marha.

Noro yipu komo ya n̂ekatîmyakn̂e.

7 On wara kekn̂e noro yîwya so,

Yukurumîkno me xa Kaan encoko.

Kir̂wanî ro Amoro Apa,

kacoko yîwya.

Kaapu yakîhton̂enho Mîk ha,

roowo yakîhton̂enho marha,

tuuna imo yakîhton̂enho marha,

tuuna pîtho yakîhton̂enho marha.

Noro yipu poko ahwotacoko,

Oporin Amoro,

kacoko yîwya.

Kicicitho komo yen̂ekacho me tak nasî Kaan ya oroto.

Ero ke kir̂wan̂he Noro poko ahwotacoko,

kekn̂e.

Ero wa kekn̂e ancu,

kar̂pe kekn̂e.

8 Ero yimaw rma anarî tak cekn̂e hara ancu yihcirî me tîtosom wenari rma.

On wara kekn̂e noro hara,

Cecahso tak nasî ewto imo pen okwe,

Babiron̂a pen.

Cecahtîkaxi ro mak tak nasî exihra cehso ro.

Kicicme ro mak xatken̂e iitono pen komo.

Wooxam pokononho mak mîkyam xatken̂e kica.

Ero warai me marha n̂iiratken̂e Mîk hak rowon pono komo.

Kawaxiyem yerpon̂e wara xatken̂e,

Kaanî rwon nasî kawaxiyem wara.

Ero ke Babiron̂a nakn̂iyakn̂e Kaan,

kekn̂e noro.

Ero wa kekn̂e ancu.

9 Ero yinhîrî anarî cekn̂e ancu xa hara.

Poturme tîtosom komo wenari xa marha cekn̂e noro hara.

On wara kekn̂e tîcetaw,

On warai komo men n̂etwîrîmexe ro mak okwe,

kamara warai poko tahwotaxmu komo,

noro kuknon me ciixapu poko tahwotaxmu komo,

tperî komo poko noro yosotî mewrepon̂e komo,

tamorî komo poko na anarimaw.

10 Ero wa exitaw so Kaan men nîrwonasî poko so.

Wooku wara nasî Kaanî rwon kawaxiyem wara,

yîhsanî ro wara oko.

Tparakwen yaka ero yipu yarkan̂e wara nasî Noro.

On wara naxe noro yipu komo,

n̂esemetanmekyaxe ro mak okwe.

Wehto imo chew xa naxe oco,

enxopre ken̂arî chew.

Ero yipu chew n̂erewaxe oco.

Ancu komo n̂enîrî me rma ero wa naxe,

Kaan mîtwono ro komo n̂enîrî me.

Oper̂a Xîkrî n̂enîrî me marha naxe.

11 Miya roro nîsînasî wehto oco yîchew ehtopo komo.

Miya roro eseikan me ro mak nasî.

Epokarera ro mak naxe katpanaw,

kosope marha.

Ero wa men naxe oco kamara warai poko tahwotaxmu komo,

yukuknon me ciixapu poko tahwotaxmu komo marha,

tperî komo poko noro yosotî mewrepon̂e komo marha,

kekn̂e.

Ero wa kekn̂e ancu,

mapitaw tîtosom ha.

12 Ero ke on wara tak wîîkes awya so,

Kaan mak cewetîcerî kîwyam Kaan nakir̂wamatho komo.

Miya roro cewetîcerî,

N̂eexi tak ewetîtopo,

kan̂e pîn me ro mak.

Xesus ponarono xa ow ha,

tîtkacerî miya roro kwaparî komo ya rma.

Ero wa cehcerî kîwyam Kaan xîkrî komo.

13 Taa,

on wara wîxakn̂e hara,

kah yawno mtapotarî wencekn̂e xa hara.

On wara kekn̂e owya,

On wara kacho mewreko,

Tahwore tak naxe amn̂e twaihsom komo Aporin komo yakrono ro me cehsom kom ha,

kacho.

Ero wa kacho mewreko,

kekn̂e kah yawno owya.

Ero wa xa marha kesî Kaan Yekat hara kîwya so.

On wara kesî,

Yaaro,

tahwore tak naxe noro yipu komo amn̂e.

N̂epokarexe tak okre ekaritoxapunhîrî.

Kir̂wan̂he ehtoponhîrî komo ponaro rma naxe twenatîwono komo rma,

kesî Kaan Yekatî kîwya so.

Ero wa kesî.

14 Ero yinhîrî tak kaapu smun ween̂akn̂e tumutwem.

Ero po xakn̂e Tooto Me Ewruxapu warai ceremaxi.

Noro xakn̂e aroko yaw,

ooru ciixapu yaw.

Emyaw xakn̂e kacipara,

puruma yepu yîhkototopo.

Tîyokem mîn xakn̂e oko.

15 Ero yimaw tak anarî ween̂akn̂e hara ancu.

Noro n̂epatakekn̂e Kaan mîn yai.

Kaapu smunu mkaw ceremaxmu ya tak kekn̂e on wara,

Tumutwe tak nasî puruma yeperîrî,

takîhso tak ha.

Enmetopo me tak nasî oroto.

Ero ke akaciparan ke tak yîhkotoko enmetome tak awya,

kekn̂e yîwya.

16 Ero ke cur̂ai cur̂ai kekn̂e tak tîkaciparan ke.

Roowo pono komo tak nîhkocekn̂e puruma yeperîrî yîhkocetawno wara.

Miyan komo rma nîhkocekn̂e roowo poko hakno komo.

Ero wa nîhkocekn̂e.

17 Ero yinhîrî anarî tak ween̂akn̂e hara ancu.

Kaan mîn yai xa marha n̂epatakekn̂e kah yawno yai.

Noro yemyaw marha xakn̂e kacipara hara tîyokem xa marha oko.

18 Ero yinhîrî anarî xa hara ween̂akn̂e ancu.

Kaan ya tîmsom yakn̂itopo yai mokyakn̂e.

Wehto yenîn̂e me cehsom mîk xakn̂e.

On wara kekn̂e kacipara ke cemyarkem ya,

Tupurme tak nasî uupa warai me cehsom komo,

roowo pono komo.

Ero ke cur̂ai cur̂ai kasko tak akaciparan ke.

Uupa yeperîrî warai tak towko,

kekn̂e yîwya.

Kar̂pe kekn̂e.

19 Ero ke cur̂ai cur̂ai kekn̂e tak noro kacipara ke.

Uupa yeperîrî tak nowyakn̂e.

Towxapu yenmekîche tak uupa yewkukacho imo yaka tak nar̂mekn̂e.

Kaan n̂iritho mîn xakn̂e ewkukacho,

tîrwon yewkukacho me.

20 Ero yinhîrî uupa yeperîrî tak n̂esewkukekn̂e ewto imo mkai.

Kamxuk me xakn̂e ewkuthîrî.

Mer̂pora ro mak tak xakn̂e kamxuku.

Nukmekn̂e ro mak weyun me cehso ro.

Kawaru yohyari rma tak xakn̂e kamxuku yukmaxapu.

Miya rma tak xakn̂e kamxuku 300 kirometru wicakî moxenon.

Ero wicakî kamxuku nukmekn̂e.

Ero wa xakn̂e.