Ero yinhîrî kamara warai tak ween̂akn̂e hara.

Tuuna imo kwai pakekn̂e.

Yaake xakn̂e yîhtîpîrî,

7.

Tmeretke so marha xakn̂e yîhtîpîrî.

10 xakn̂e meretîrî.

Tarokoi xakn̂e meretîrî mko,

10 marha xakn̂e arokorî.

Noro yosotî marha xakn̂e tmewreso yîhtîpîrî poko so.

Kicicme ro mak xakn̂e noro yosotî Kaan yîwîrîyakacho me ro mak xakn̂e kica.

2 Kamara warai rma cma re mîk xakn̂e.

Uhsu tarî wa tko xakn̂e yîhtarî.

Reaw mtarî wa xakn̂e yîmtarî hara.

Watwa imo yanme kayaritomo me xakn̂e.

Kar̂pe marha xakn̂e noro yanme.

Miyan komo n̂ewetîrî me marha xakn̂e.

Ero warai mîk xakn̂e kopi on̂enîtho.

3 On wara tko xakn̂e yîhtîpîrî anarînhîrî mak,

cewn̂e mak,

etapaxapu wa makî ka xakn̂e.

Waixaputho wa mak xakn̂e.

Ero yinhîrî n̂ecihyakan̂e hara etapachonhîrî.

Kar̂pe tak xakn̂e hara etapaxapunhîrî yîhtîpîrî hara.

Ero ke noro poko n̂eserepoketken̂e roowo pono komo ahnoro.

Kn̂ewetîrî mîk ham kamara warai okre,

ketken̂e.

Ero wa xatken̂e noro poko.

4 On wara marha xatken̂e tooto komo,

watwa imo poko nahwowatken̂e.

Kayaritomo me yin̂irithîrî poko marha nahwowatken̂e hara,

kamara warai poko.

On wara ketken̂e noro poko,

Kyopono ro xa mîk ham kamara warai.

Noro yukurunkan̂e exihra thakwa nasî kopi,

ketken̂e.

Ero wa ketken̂e noro poko.

5 On wara marha xakn̂e kamara warai,

cehcoyoponkaxmu me nîmtapowakn̂e kica.

Ayopono ro komo ow ha,

Kaan yopono marha,

kekn̂e kica.

Kaan nîwîrîyakekn̂e kica.

Ero wa so nîmtapowakn̂e kica.

Pahkî n̂he xakn̂e kayaritomo me,

42 nuun̂i.

6 Kicicme ro mak nîmtapowakn̂e Kaan poko.

Noro pîntho wara ro mak n̂etahcakn̂e,

nîwîrîyakekn̂e ro mak.

Kaan mîn marha nîwîrîyakekn̂e,

kah yawno komo marha.

7 Kaan nakir̂wamatho pen komo waparî me marha cekn̂e noro okwe porohkan me.

N̂examro pen nar̂mekn̂e okwe.

Ahnoro tribu komo kayaritomon me tak noro n̂iir̂akn̂e watwa imo warai.

Anarmerpan yaro tîmtapotaxmu komo kayaritomon me marha n̂iirakn̂e,

mîk hak rowon pono komo kayaritomon me marha.

Ero wa ciixapu me tak xakn̂e kamara warai.

8 Ero yimaw tak noro poko nahwowaxe roowo poko hakno komo.

Oporin amoro,

kexe noro poko.

Opera xîkrî karitan yaka mewren komo mak ero wara kexe.

Waipîn Me Ciixapu Komo Yosotî Tan,

kacho mîn Noro karitan.

Pahxa rma waihkaxapunhîrî Mîk Oper̂a Xîkrî,

roowo yakîhtonaw rma ha ka waihkaxapunhîrî ha.

Noro yipu karitan yaka mewren komo mak nahwowaxe kamara warai poko,

Amna porin xa amoro,

kexe yîwya.

9 Ero wa wîîkes awya so.

Omtapotarî men entacoko entan̂e me awexitaw so.

10 On wara cepethîrî komo nahsîyaxe kicicme ehxapu komo,

tooto waparî me ehxapu pen komo waihkexe tooto kom hara.

Tooto yaan̂e me naxe anarî kom hara,

ahsîpînkan me naar̂axe.

Noro yipu komo reha tak naar̂axe anarî kom hara ahsîpînkan me.

Ero ke waapa mokuche ahwokatîkara rma cehcerî kîwyam Kaan nakir̂wamatho kom ha.

Kaan pona mak cencerî ero yipu chew rma.

Ero wa cehcerî.

11 Ero yinhîrî anarî ween̂akn̂e hara opera xîkrî warai ha re.

Meretîrî rma re xakn̂e asakî,

oper̂a xîkrî wara.

Anarî me tko nîmtapowakn̂e watwa imo wara kopi.

12 Kamara warai yanme antomano n̂iir̂asî noro wero ro rma.

Noro yanme marha panatanmekno n̂iir̂asî.

On wara kesî roowo pono komo ya,

Kamara warai poko men ahwotacoko,

Oporin xa amoro,

kacoko yîwya.

Etapachonhîrî n̂ecihyakn̂e,

noro ya kacoko,

kesî.

13 On wara marha nasî,

cirihnî n̂iir̂asî tooto komo yeserepokachome.

Wehto meero nan̂ikyasî kah yai mohtome roowo pona.

Ero ke ero yipu mokyasî tooto komo weroro.

14 Ero wa nasî opera xîkrî warai,

cirihnî n̂ir̂pesî kamara warai yîwya.

Ero yipu ke roowo pono komo n̂ewkukmesî noro.

On wara kesî yîwya so,

kamara warai kuknon men ciicoko,

kacipara imo ke paraxkatoponhîrî ke waipîra xakn̂e,

noro kuknon ha,

kesî yîwya so.

15 Noro kuknon ciriche tak cesehsîsom me tak n̂iir̂asî kopi.

Tîmtapotaxmu me marha n̂iir̂asî.

Ero warai n̂iir̂asî yukuknonthîrî rma kopi.

On wara tak kesî ero wa ciixapu,

Kamara warai kuknon ow ha.

Opoko men ahwotacoko.

Opoko ahwotara awexitaw so kwaihkexe so ha men okwe,

kesî.

Ero wa kesî ciixaputho rma.

Ero ke yîmtapotarî yaw roro rma tak waihkano n̂iir̂axe noro maywen komo.

Yukuknon poko ahwotan pen komo waihkexe.

16 On wara marha kesî opera xîkrî warai tooto komo ya,

Amohcoko tak awamorî komo mewreposo.

Omaywen komo tak mewrexe kamara warai kuknon awamorî komo poko kaari n̂ixan poko.

Anarimaw aperî komo poko mewretu yiixe awexitaw so,

kesî yîwya so.

Ero wa kesî tooto komo ya miyan komo ya rma.

Emyawnomnî komo ya kesî,

cemyawnoyem komo ya marha,

tupurantayem komo ya kesî,

yupurantamnî komo ya marha,

tanme ro cetapickaxmu komo ya kekn̂e,

tooto yanton komo ya marha.

Ero warai komo ya kesî watohnî me ro mak.

17 On wara marha kesî twarawantaxmu komo ya,

Mewren komo yakro warawantara ro mak ehcoko.

Amorî komo poko tmewreso exihra exitaw yukuknon,

perî poko anarimaw,

warawantara ro mak ehcoko noro yipu komo yakro.

On warai mîn yukuknon,

noro yosotî anarimaw,

osotî kuknomacho anarimaw hara.

Ero warai ke mewren komo yakro warawantara ro mak ehcoko,

kesî okwe.

Ero wa kesî oper̂a xîkrî warai twarawantaxmu komo ya.

18 Taa,

on wara wîîkes hara awya so,

yuhnarino wîhtînomexpes awya so.

Ero yipu yîhtînon̂e komo exitaw so,

on wara n̂ehcowpe.

Kamara warai kuknomacho poko n̂ehcamhokacowpe.

Tooto komo yukuknomacho rma mîn.

666 kacho mîn yukuknomacho.

Ero wa nasî noro kuknomacho.