Tuuna Nasî Kaan Yewton Po Eepu, Waipîn Me Kiin̂e Ha
22
Ero yinhîrî oyar̂akn̂e xa hara ancu ewto imo yukuknoman̂enho.
Eepu tak n̂enpekn̂e owya tuuna,
waipîn me kiin̂e.
Tpar̂ar̂amutwe ro mak xakn̂e,
patiri wara.
Iito xakn̂e Kaan yapon.
Oper̂a Xîkrî yapon marha mîn xakn̂e.
Ero yipu makatai cepatakaxmu mîn xakn̂e tuuna.
2 Ewto imo pore rma nîhcekn̂e eepu,
esama rakataw rma.
Porin me xakn̂e esama,
ero rakatari rma nîhcekn̂e.
Tuuna yecihtaw xakn̂e weewe cepetaxmu.
On po xakn̂e,
eeco po marha xakn̂e.
Waipîn me kiin̂e mîn xakn̂e weewe.
Anarmerpa so cepetaxmu mîn xakn̂e,
nuun̂i po roro cepetaxmu ha.
12 xakn̂e eperîrî,
anarî nuun̂i po anarî me n̂eperwakn̂e hara,
anarî nuun̂i po hara anarî me xa hara n̂eperwakn̂e.
Ero wa so n̂eperwakn̂e roro.
Yaarî xakn̂e tooto komo yehcematopo me,
mîk hak rowon pono komo yehcemacho me rma.
3 Ero yimaw marha tak roowo yîwîrîmachonho exihra tak nasî.
Kir̂wan̂he mak tak nasî roowo,
roowo pono komo marha.
Iito nasî Kaan yapon kayaritomo me esenpotopo.
Oper̂a Xîkrî yaponî rma mîn Kaan yapon.
Maywen komo n̂etantomapexe yîwya so.
4 Oper̂a Xîkrî xa tak n̂een̂axe iito,
eepatarî rma n̂een̂axe.
Noro yosotî marha nasî tmewreso perî poko so.
Ero wa naxe Kaan maywen komo.
5 Kosope exihra ro mak nasî iito.
Ero ke ramha pokohra ro mak naxe n̂examro.
Kaamo ponarora mak naxe iitono komo Kporin komo Kaanî rma exirî ke katapareno r̂in̂e me.
Kayaritomo me tak naxe iitono komo miya roro yîtîhkan me ro mak.
Ero wa naxe amn̂e Kaan maywen kom ha.
6 Ero yinhîrî on wara kekn̂e owya ewto imo yenpon̂enho ha,
Yaarono xa mîn awya amna nîîke ero wa kacho.
Ancu n̂en̂epei Aporin komo Kaan.
Weronomano rin̂enho pen Porin marha Mîkî Kaan,
ponaro ehtopo ro kom ha.
Noro yipu tanton n̂en̂epekn̂e ancu.
On wara kekn̂e noro,
yîn̂en̂epethîrî,
Pahnoke men nasî anarmerpa ciino ritopo Kaan ya.
Ero ke ero yipu n̂enpesî tmaywen komo ya,
kekn̂e.
Ero wa kekn̂e Kaan n̂en̂epetho ancu awya.
Yaaro xa mîn yîmtapotarî,
kekn̂e.
Ero wa kekn̂e owya ewto yenpon̂enho.
Yohno Men Kmokyasî, Kesî Xesus
7 Taa,
on wara kesî Xesus kîwya so,
Yohno men kmokyasî iina ahyaka so.
Tahwore xa tak maxe omtapotarî ponaro awexitaw so miya roro,
on karita yaw nasî ero ponaro awexitaw so,
kesî kîwya so.
8 Taa,
ero wa xakn̂e on̂enîtho,
ero wa marha xakn̂e on̂entatho.
Xuaw rma ow ha entan̂enhîrî,
enîn̂enhîrî marha.
Ero wa oyexiche kesewnapekn̂e tak ancu yamrinaka,
ewto n̂enpekn̂e owya,
noro yamrinaka.
Kir̂wan̂he xa mai ham,
ka xe cma re wîxakn̂e yîwya.
9 Pîra,
owya kahra ro mak esko,
kekn̂e ha tko owya.
Kaan yanton xa marha ow hara awarai xa marha.
Awakno komo rma ow ha,
weronomano rin̂e marha.
On karita yawno yewetîn̂e xa marha ow.
Kaan poko mak ahwotak ha,
kekn̂e owya.
10 On wara marha kekn̂e ancu owya,
Anmewrethîrî eyamra ro mak esko,
On wara ciino n̂iir̂asî Kaan amn̂e,
kacho.
Pahnoke tak men nasî ero wa kacho yaw roro ciino ritopo.
11 N̂ex ha,
kacho me nasî yohno rma.
Ero ke on wara tak n̂ehcowpe tooto komo ero yimaw,
ahce wa so na exitaw so ero warai me rma thakwa n̂ehcowpe.
Kaanî mtapotarî yewetîn̂e pîn me exitaw so ero warai me rma thakwa n̂ehcope okwe.
Kicicitho pokono me exitaw so hara ero warai me marha thakwa n̂ehcowpe.
Kaanî mtapotarî yewetîn̂e me exitaw so tko ero warai me rma n̂ehcowpe hara.
Kaan ponarono ro me exitaw so ero warai me rma n̂ehcowpe n̂examro hara,
kekn̂e.
Ero wa kekn̂e ancu owya.
12 On wara kes hara Xesus kîwya so,
Yohno men kmokyasî ahyaka so.
Kir̂wan poko awehtoponhîrî komo yepetho tak wekyasî omokyataw.
Ero yimaw kepemexe so ahce wa so na awehtoponhîrî komo yaw roro.
13 Awpa,
kacho rma Ow ha.
Omeka kacho marha Ow ha.
Ahce wa na awehtopo komo yihcin̂e Ow ha.
N̂eexi tak ha,
kan̂e marha Ow ero wa awehtopo komo poko.
Apoturu komo xa Ow ha,
amapitawno komo marha Ow.
Noro yipu mak Ow ha,
kesî.
14 On wara marha kesî kîwya so,
Tahwore xa tak maxe amn̂e Kaanî mtapotarî yewehcataw awya so apanatanmetopo kom ha.
Weewe nasî kah yaw waipînî ro me kiin̂e,
ero yeperîrî yahn̂e me maxe.
Kaan yewton pona tak mîîcexe.
Waaca metatan yaro mewomyaxe porohkan me ro mak.
15 Waaca mkai thakwa mak naxe xapari warai komo reha okwe.
On warai mîkyam xapari warai komo,
erem pokono komo,
cipici pîn pokono komo marha,
waihkano rin̂e komo marha,
ciixaputho ponarono komo,
tpoxwe cemaro yentan̂e komo marha,
cemarontaxmu komo marha,
noro yipu komo naxe tporohkaxmu me thakwa okwe,
Kaan yewton pona tohnî ro me,
kesî.
Ero wa kesî.
16 On wara marha kes hara,
Xesus Ow ha.
Owî rma oyancun wen̂epekn̂e ahyaka ahce wa na ciino ritopo yekatîmn̂e me.
Kaan mîn yaw so n̂ekatîmyasî Kaan xîkrî komo n̂entarî me.
Tapi pen micin warai rma Ow ha.
Noro pen yepamtho marha Ow ha.
Kwakwarî warai marha Ow,
Enmaporo cesensom mîn kwakwarî,
cenporem xa.
Noro yipu Ow ha,
kesî.
Ero wa kesî Xesus kîwya so.
17 On wara kesî Kaan Yekat hara kîwya so,
Amohcoko tak ha,
kesî.
Ero wa xa marha kesî Oper̂a Xîkrî pic hara kîwya so.
Ero wa xa marha kacoko amyamro hara on yentan̂e kom hara,
Amohcoko tak ha,
kacoko.
Awokru komo xe awexitaw so amohcoko tak ha.
Amoku xatî komo amohcoko ahnoro.
Tuuna eetamcoko waipîn me awin̂e kom ha.
Epethîmnî me ro mak eecoko,
kesî Kaan Yekatî kîwya so.
Ero wa kesî kîwya so.
18 Taa,
on wara tak wîîkes ow hara,
Kaanî mtapotachonho xa on karita yaw mewrexapu.
Ero ke on wara wîîkesî on yentan̂enho komo ya,
Amtapotarî ke rma on yîhremara ro mak men ehcoko.
Yîhremache awya so Kaan men awîrîmexe so tak okwe.
Noro ya yîwîrîmano ritopo poko aweronomexe so on karita yaw mewrexapu.
Ero yipu ke rma tak Kaan awîrîmexe so hara okwe.
19 Yîhkotora marha men ehcoko on yaw mewrexapu,
Kaanî mtapotarî ha.
Ero wicakî mak nîmtapowakn̂e Kaan,
kahra men ehcoko anîhkotothîrî komo poko rma kica.
Ero wa yîhkocetaw rma awya so on wara nasî Kaan apoko so,
awosotî n̂ickesî karita yawnonho,
Waipîn komo Yosotî tan,
kacho yawnonho ha.
Awewton tan ha,
kachonho marha tak nowyas hara.
Cewton tak n̂ewyomesî.
On wara kacho nasî tmewreso on yaw Kaanî mtapotarî,
Kir̂wan̂he kiir̂axe so amn̂e,
kacho.
Ero wa kachonho yaw roro kirwanhe awirira so rma nas okwe yîhkoton̂e me awexitaw so.
Ero wa nasî Kaan apoko so okwe.
20 On wara kesî Xesus,
on karita yawno yekatîmn̂e ha,
Yohno men kmokyasî yarî ahyaka so,
Amen!
kesî.
Taa,
ero wa xa ham.
Oporin Amoro,
Xesus.
Amoko rma Apa.
21 Taa,
on wara mak tak wîîkes awya so,
Kporin komo Xesus Kristu ya awakronoma xe so wasî,
wîîkesî.
Amen.