Ero yinhîrî tak anarî xa hara ween̂akn̂e ancu karitî xa.

Kah yai nîhcekn̂e.

Kaapu smun ke tponoye xakn̂e.

Kukawa xakn̂e arokorî me.

Eepatarî xakn̂e kaamo wara oco.

Wehto me cehsom wara tak xakn̂e yîhrepu oco,

mapata warai me rma.

2 Noro yemyaw xakn̂e karita,

wahrai.

Armomhokaxapu rma mîn xakn̂e armomixapunhîrî.

Tuuna imo napikyakn̂e noro karita ke cemyawnoyem.

Eeco me mak napikyakn̂e kaari ke.

Eeco ke roowo napikyakn̂e hara.

Ero wa xakn̂e ancu owero ro.

3 On wara tak xakn̂e noro,

n̂emtarakekn̂e xa.

Karpe kekn̂e reaw mayanatawno wara ro mak oko.

Ero wa emtarakache rma tak tarai kekn̂e hara.

Emapona kekn̂e.

Tooto mtapotarî me rma nîmtapowakn̂e tarai.

7 ro nîmtapowakn̂e.

4 Yîmtapotarî yentache owya karita mewretopo tak wahsîyakn̂e tarai mtapotarî mewretopo.

Kah yawno mtapotarî tko wencekn̂e hara.

Mewrera esko 7 ro tarai mtapotachonho,

kekn̂e.

Ero ke mewrera wîxakn̂e.

Ero wa wîxakn̂e.

5 Ero yinhîrî tak ancu napockanwakn̂e.

Tuuna imo napikyakn̂e,

roowo marha napikyakn̂e noro rma.

Kaapu wece tak napockanwakn̂e.

6 On wara kekn̂e,

Yaaro xa tan wîîkes awya so,

Kaanî mtapotarî rma tan wekatîmyas awya so.

Waipînî ro xa Mîk Kaan,

kaapu yakîhton̂enho Mîk,

kah yawno komo yakîhton̂enho marha,

roowo yakîhton̂enho marha,

roowo pono komo yakîhton̂enho marha,

tuuna imo yakîhton̂enho marha,

ero kwawno komo yakîhton̂enho marha Mîkî Kaan,

Noro yipu mtapotarî tan wekatîmyas awya so.

Oroto tak ciino n̂iitîkesî Kaan tîmtapotachonhîrî yaw roro.

Ecmamra ro mak tak nasî ero yaw roro ciitîkacho poko.

7 Amn̂e tak 7-nhîrî tak tîratîn n̂eceyas hara ancu.

Ero yimaw tîn̂ekatîmthîrî yaw roro tak ciino n̂iitîkesî Kaan.

Pahxa rma tî n̂ekatîmyakn̂e tanton pen komo ya,

weronomano rin̂e pen komo ya.

Camkî thakwa mak n̂encetken̂e ero yipu.

Ero yaw roro rma tak ciino n̂iitîkesî Kaan ecmamra ro mak,

kekn̂e.

Ero wa kekn̂e noro,

ancu ha.

8 Ero yinhîrî kah yawno mtapotarî wencekn̂e xa hara.

Noro rma kekn̂e xa hara.

On wara kekn̂e hara owya,

Ancu yaka tak etoko tuuna napikyasî,

roowo marha napikyasî,

noro yaka.

Karita nasî noro yemyaw armomhokaxapu,

noro yaka etoko.

Karita tak ahsîko emyawnonhîrî,

kekn̂e owya.

9 Ero ke ancu yaka tak kîwcekn̂e.

Ek ha tî karitaci awemyawno,

wîîkekn̂e yîwya.

Ehe,

on ha.

Ahko tak ha,

kekn̂e owya.

Apuche awya tîkpore ka nas amtaw.

Weenu wa makî ka nas okre.

Ermomche tak awya cîmîkî tak nasî aropotaw hara,

kekn̂e owya.

10 Ero ke karitaci tak wahsîyakn̂e ancu yemyawnonho.

Ero yipu tak wahyakn̂e.

Tîkpore ka xakn̂e okre omtaw weenu wa.

Ermomche tak owya cîmîkî ro mak tak xakn̂e owetho yaw.

11 Ero yinhîrî tak kah yawno mtapotarî wencekn̂e xa hara.

On wara kekn̂e hara owya,

Amn̂e tak omtapotarî mekatîmyasî xa hara tooto komo ya.

Anarî yana komo ya mekatîmyasî,

mîk hak rowon pono komo ya ha,

anarmerpan yaro tîmtapotaxmu komo ya marha,

mîk hak kayaritomon komo ya marha.

Ero warai komo ya mekatîmyas amn̂e omtapotarî.

Ero wa men tî mat amn̂e,

kesî Kaan awya so,

mîîkesî yîwya so,

kekn̂e owya.

Ero wa kekn̂e owya.