Ero yinhîrî on wara tak wîxakn̂e hara,

ancu tak mokyakn̂e ohyaka.

Tuuwa warai tak nîmyakn̂e owya,

ahce na yukuknomacho.

Tîmîche on wara kekn̂e owya,

Kaan mîn yukuknomata on ke.

Aapo marha yukuknomakî kotoporem yakn̂itopo.

Ero yipu mko yukonomakî,

Ero wicakno mîn ha,

kachome awya.

Tooto komo marha yukuknomakî,

iito Kaan poko tahwotaxmu komo,

Ero wicakî natu iyakenon,

kachome awya.

2 Kaan mîn roronî reha yukuknomara esko.

N̂expe mak.

Xenciu komo yesenmetopo reha mîn.

Iina mokyaxe amn̂e n̂examro reha.

Kaan yewton marha tak nahsîyaxe cewton komo me.

Ero pono komo tak n̂emetanmekyaxe apikn̂e komo wara ro mak okwe.

42 nuun̂i n̂emetanmekyaxe okwe.

Ero wa iitono komo n̂emetanmekyaxe Xenciu komo.

3 Iito tak naxe amn̂e opoko weronomano rin̂e komo,

2 kom ha.

Omtapotarî n̂ekatîmyaxe n̂examro 1.260 kaamo.

Kumixitho mak nasî ponon komo me.

4 N̂examro kuknonî rma mîn oripera asak hakno.

N̂examro kuknon marha mîn weeyu mko,

asak hakno xa marha.

Ponaro roowo pono komo yehtopo yeepataw cececetosom komo mîkyam.

5 On wara naxe n̂examro,

wehto n̂en̂epexe tîmtai so rma oco.

Ero yipu ke rma tîîxatî pîn komo nakn̂iyaxe.

Ero wa cemetanmekî xatînhîrî pen komo waihkexe.

6 On wara marha naxe,

Kaanî mtapotarî yekatîmyataw,

anarimaw kaapu nahruyaxe tuuna mokuhra ro mak tak ehtome.

Anarimaw marha tuuna n̂iir̂atu kamxuku me.

Mîn hakî ke roowo pono komo n̂emetanmekyaxe anarimaw so hara.

Tanme ro so mak ero wa ciino ritopo nîhtînoyatu,

emapona roro nîhtînoyatu.

7 Ero yinhîrî tak Kaanî mtapotarî yekatîmtopo yenatîche kamara warai tak n̂epatakesî ewtarî imo yai.

N̂examro waparî me mokyasî.

Iyopono me so tak nasî,

ero ke waihkesî thakwa okwe.

8 Waipuche so iito rma nasî okoputhîrî komo ewto imo roron po rma.

On wara kacho me rma nasî iitono ewto imo,

Sotomatho,

kacho me,

Exitutho,

kacho me marha.

Ero wa so n̂esetacasî kicicme iitono komo yehtopo poyero.

Kporin komo yamowotoponho marha mîn ewto imo.

Ero wa nasî ewto imo.

9 N̂examro pen waipuche tak okoputhîrî komo yenso tak mokyaxe tooto komo mer̂pono pîn.

Anarî yana komo mokyaxe,

ahnoro tribun komo marha,

anarmerpan yaro tîmtapotaxmu komo marha,

mîk hak rowon pono komo marha,

ero warai komo mokyaxe amn̂e n̂examro pen yokoputho yenso.

3 kaamo mokyaxe enso,

anarî kaamo po marha kamarakataka mak.

Okoputhîrî yahrura naxe okwe entîkachome tooto komo ya.

10 Nahwowaxe tak roowo pono komo n̂examro yokoputho yenîrî ke.

N̂etwakrexe marha tahwotacho me so.

Waihcow kra tak kemetanmekn̂enhîrî kom okre,

kexe weronomano rin̂enho pen komo poko okwe.

Ero wa naxe n̂examro pen waipuche.

11 3 kaamo mak xatken̂e twaihso.

Enmapuche xa hara twaihso rma ka naxe kamarakataka cehso ro mak.

Ero yinhîrî Kaan yapepen tak n̂ewomyakn̂e okoputhîrî yaka.

Ero yanme tak piiri nawomyatken̂e waixapunhîrî rma.

Ero wa exirî ke so n̂eraswatken̂e ro mak tak enîn̂e komo.

12 Ero yinhîrî kah yawno mtapotarî tak n̂encetken̂e pakaxapu komo.

Oona tak amok ha,

kekn̂e yîwya so ha.

Kar̂pe xa kekn̂e yîwya so.

Ero ke sai sai sai,

miya tak n̂etanîmyatken̂e kah yaka roro.

Kaapu smun cheka n̂etanîmyatken̂e tîîxatî pîn komo wero ro.

Ero wa xatken̂e.

13 N̂examro yetanîmîche rma tak roowo pen n̂esewsîyakn̂e.

Kar̂pe ro mak n̂esewsîyakn̂e mîîmo pen tmacakaxi ro tak.

1 cisimu wicakî n̂emacakekn̂e.

Tooto pen marha waihyatken̂e roowo yesewsîrî ke.

7.000 waihyatken̂e okwe.

Waipîn komo rma n̂eraswatken̂e ro mak tak.

Kar̂pe xa Kaan nai ham kopi,

kah yawno ha,

ketken̂e tak waipîn komo.

Ero wa n̂examro yehtoponho ancu n̂ekatîmyakn̂e owya.

14 Taa,

okwe okwe,

kacho tak n̂enahcakn̂e hara 2-nhîrî tak.

Pahnoke xa tko nasî anarî xa hara,

okwe,

kacho xa hara,

3-inhîrî tak hara.

15 Ero yinhîrî anarî tak n̂eceyakn̂e tîratîn hara ancu hara,

7-nhîrî tak.

Eceche tak kah yawno komo mtapotarî wencekn̂e.

Kar̂pe xa nîmtapowatken̂e.

On wara ketken̂e,

Roowo pono komo kayaritomonînho tak naxe kayaritomo mera.

Kporin komo tak nasî kayaritomo me ekenhîrî komo yaka hara.

Kristu marha tak nasî kayaritomo me Kporin komo yanme ha.

Miya roro tak nasî Noro kayaritomo me etowîn me ro mak,

ketken̂e.

Ero wa ketken̂e kah yawno komo.

16 Ero yimaw iito rma xatken̂e 24 poritomo komo,

Kaan yeepataw ceremaxmu.

Ero wa kacho yentache yîwya so nutupenwatken̂e tak cesewnaposo ro.

Kaan poko nahwowatken̂e.

17 On wara ketken̂e,

Kir̂wan̂he xa mai ham apa,

kes amna apoko.

Amna porin amoro,

ponaro amna yehtopo ro.

Karitî ro xa amoro,

pahxanî ro mak Amoro.

Oroto masî,

mîxakn̂e pahxa,

ero wara rma mas amn̂e miya roro.

Karitî me xa tak mesenpoi tooto komo ya,

kayaritomo me xa tak okre,

ketken̂e tak Kaan ya.

18 Nîrwonatken̂e ka mîk hak rowon pono komo.

Oroto tak nasî arwonîmtopo me hara Apa.

Waixapu pen komo yen̂ekacho me tak nasî oroto awya.

Awanton pen komo yepemacho me marha nasî,

weronomano rin̂e pen komo,

anakir̂wamathîri komo,

awosotî ponarono komo marha,

ero yipu komo yepemacho me tak nasî.

Yîxawyakan me cehsom komo mepemesî,

iyopono me cehsom komo marha.

Roowo pono komo yemetanmekn̂enho komo marha mepemesî.

N̂examro pen tak memetanmekyas hara epethîrî me ha.

Ero ke amna nahwowasî apoko,

ketken̂e marha.

Ero wa ketken̂e poritomo komo Kaan ya.

19 Ero yinhîrî tak Kaan mîn metatan tak nahrunketken̂e kah yawno komo.

Kaan mîn yawno tak n̂esenpekn̂e Kaan yamatan,

yîmtapotachonhîrî yen ha.

Ero yimaw marha tak pepe kekn̂e hara.

Mer̂pono pîn komo mtapotarî marha tak n̂esencekn̂e,

tarai marha kekn̂e,

roowo marha n̂esewsîyakn̂e.

Saraipa marha mokyakn̂e mer̂pono pîn.

Ero wa tak xakn̂e.