Taa,

ero yinhîrî 5-nhîrî tak n̂eceyakn̂e tîratîn ancu hara.

Eceche xir̂ko tak n̂epîrkekn̂e roowo pona owero ro.

Yîwya tak nîmyatken̂e ewtarî imo yewkacho.

2 Ero ke ewtarî imo tak nahrunkekn̂e.

Ahrunkache tak yîsîn n̂epatakekn̂e mer̂pora ro mak.

Nîsînakn̂e ro mak mararî yecakyatawno wa mak okyo.

Miya ro mak tak n̂etakpayakn̂e yîsîn.

Kaamo pen tak n̂ewxîrîyakn̂e.

Kaapu ahnoro n̂ewxîrîyakn̂e okwe.

3 Yîsîn chei tak mokyakn̂e makaka warai komo mer̂pono pîn roowo pona.

Cerewre keskan̂e ro mak mîkyam xatken̂e cikiri warai oco.

4 Noro yipu komo ya on wara kekn̂e Kaan,

Cuupu apupra ro mak ehcoko,

naatî marha apupra ehcoko,

weewe yarî marha apupra ehcoko.

Ero yipu pokohra ro mak ehcoko.

Tooto poko mak xa ehcoko.

Pewo so Kaan yosotî ke mewren komo mak eskacoko.

5 Waihkara makî tko ehcoko ha.

Eskacoko mak,

cerewre ro mak oco.

5 nuun̂i ero wa tooto komo eskacoko,

kekn̂e.

Ero ke tak eskano tak n̂iir̂atken̂e oco.

Cikiri ya keskacho wa n̂erewakn̂e oco.

6 Ero wa Kaan n̂iir̂asî roowo pono pen komo amn̂e.

Ero yimaw cetwaika xe tak naxe tooto komo tanme ro so rma.

Twaipu xe ro mak naxe.

N̂ehn̂exe makî tko cetwaikacho komo poko.

Waipîra rma naxe.

Ero wa naxe.

7 On warai mîkyam xatken̂e makaka warai komo,

kawaru warai mîkyam xatken̂e.

Kawaru porokucetu waapa me tîtosom komo ero wa tporokye xatken̂e,

arokorî komo xakn̂e ooru ciixapu warai.

Ero yipu ke tarokoi xatken̂e.

Tooto yeepatake marha xatken̂e kopi.

8 Yîhpoci xakn̂e wooxam poci wara.

Iyorî xakn̂e reaw yorî wara.

9 Tîrapîpîtîke marha xatken̂e.

Kuripara ciixapu wa mîn xakn̂e yîrapîpîthîrî.

Cetaw so tak nîyorwakn̂e ro mak aporî komo mer̂pora exirî ke.

Tarara naar̂asî kawaru waapa me cetaw osom komo.

Mer̂pono pîn exitaw nîyorwasî,

ero wara ro mak nîyorwakn̂e makaka warai pen yaporî kopi.

10 Cikiri matkîke so marha xatken̂e.

Tmatkîrî komo ke eskano n̂iir̂atken̂e oco.

5 nuun̂i tooto yeskarî poko cehsom me tî xatken̂e.

11 Kayaritomo marha xakn̂e makaka warai yaan̂e.

Ancunhîrî rma mîk xakn̂e kayaritomon komo.

Ewtarî imo yawno komo yaan̂e mîk xakn̂e.

Abaton mîk xakn̂e kayaritomon komo yosotî Ebrew mtapotarî yaro ha.

Apor̂onî rma mîk noro yosot hara Kreku komo mtapotarî yarono hara.

Ero wa xakn̂e makaka warai yaan̂e.

12 Taa,

n̂eexi tak ha yihcithîrî,

okwe okwe okwe kacho.

Asakî rma tko nas hara,

okwe okwe kacho xa hara.

Ero wa nas okwe.

13 Taa,

ero yinhîrî anarî tak tîratîn n̂eceyakn̂e hara ancu hara,

6-nhîrî tak hara.

Eceche takî kotoporem yakn̂itopo pono mtapotarî wencekn̂e.

Kaan mîtwono mîn kotoporem yakn̂itopo,

ooru ciixapu.

Ero po nai 4 paaka meretîtho warai.

Ero yipu yotawno mtapotarî wencekn̂e.

14 On wara kekn̂e 6-înhîrî ya,

raatî yecen̂e ya,

Ai,

ancu komo tak yîmhokata 4-nhîrî kom ha.

Tuuna yepu yecihtaw cimiso naxe.

Porin mîn tuuna yepu,

Ewpratesî osoti,

iito naxe cimiso,

kekn̂e tî yîwya.

15 Ero ke n̂examro tak nîmhokekn̂e.

Kaan nukuknomatho po xa nîmhokekn̂e.

Cimn̂ipu nukuknomekn̂e,

nuun̂i marha,

kaamo marha.

Ero yimaw yîmhokacho me nas amn̂e,

kekn̂e.

Tan exitaw kaamo yîmhokacho me nasî,

kekn̂e marha.

Ero ke yuknomaxapu po xa tak n̂examro nîmhokekn̂e waihkano ritohme.

Yîmhokache so tooto waihkaxi tak cetken̂e,

1 tehsa wicakî waihkax ha.

16 Ero yinhîrî tak waapa komo ween̂akn̂e kawaru mkaw tîtosom komo.

Mer̂pono pînî ro mak mîkyam xatken̂e kopi.

200 miir̂oi wicakî.

Yukuknomacho komo wencekn̂e ero wicakno.

17 On wara ween̂akn̂e kawaru,

owosoto.

Yîmkawno komo xatken̂e cewankuriparai so xatken̂e.

Ponon me so rma xakn̂e ewankuriparan komo.

Cucure so xakn̂e ponon komo wehto wara oco.

Tîswaye marha xakn̂e sapira wara,

tîxeweke marha xakn̂e enxopre wara.

Ero wa xatken̂e kawaru mkawno komo.

On wara xakn̂e kawaru hara,

yîhtîpîrî xakn̂e reaw tîpîrî wa.

Yîmtai so n̂epatakekn̂e wehto oco,

yîsîn marha n̂epatakekn̂e,

enxopre marha.

Ero wa so xatken̂e.

18 N̂examro tak cetken̂e tooto waihkaxi.

Osorwaw xakn̂e waihkano ritopo.

Wehto ke waihkano n̂iir̂atken̂e,

yîsîn ke marha,

enxopre ke marha.

Mer̂pono pîn tak waihyatken̂e n̂examro nakn̂iputho komo.

1 tehsa wicakno mîkyam waihyatken̂e okwe.

19 Ero yipu ke waihkano n̂iir̂akn̂e kawaru komo rma.

Tîmtaino ke rma waihkano n̂iir̂akn̂e,

tmatkîrî ke so marha.

Okoyi wa so matkîrî xakn̂e kopi,

tîhtîpîke xakn̂e okoyi wa.

Ero yipu ke rma tooto n̂eskekn̂e oko.

Ero wa xatken̂e kawaru komo oko.

20 Anarî komo reha waipîra xatken̂e noro yipu komo ke.

Kicicme cehtoponhîrî komo poxunkara rma tko tî xatken̂e okwe.

Worokyam poko rma xatken̂e kica.

Mîk hak warai me ciixaputho mamaka nutupenwatken̂e rma kica.

Ooru ciixapu mak mîn xakn̂e mamakan me yutupentacho komo.

Prata ciixapu marha mîn xakn̂e,

kobre ciixapu marha,

toopu yenporixapu marha,

weewe yenporixapu marha.

Ero waraitho mamaka rma nutupenwatken̂e.

Kenîn̂e pînî ro mak mîn ero yiputho okwe,

kentan̂e pîn marha okwe.

Tohnî thakwa marha mîn.

Ero yipu ponaro rma xatken̂e kica.

21 Waihkano rin̂e me rma tî xatken̂e,

eremkano rin̂e me marha,

cipici pîn pokono me marha tî xatken̂e,

ciin̂o pîn pokono me marha tî xatken̂e wooxam kom hara.

Cen̂epan̂em me marha tî xatken̂e okwe.

Ero wara rma tî xatken̂e.

Kicicme cehtoponhîrî komo poxunkara ro mak xatken̂e okwe.

Ero wa xatken̂e tooto komo waipîn komo rma ha ka.