Waano On, Xerusaren Pona Tîtosom Komo Narîrî

1 Apa kah yawno, on wara cma re wîîkes awya, Tapi yesemetanmetoponho yîhcamnopîra cma re masî.

2 On wara marha xakn̂e noro, Kporin komo yakro tî nîmtapowakn̂e yaaro xa, towîhnî me ro mak. Karitî ro tî n̂etahcakn̂e towîhnî me ro mak ehtome tîmtapotarî. Ponaro Xako yehtopo Mîk n̂etahcakn̂e.

3 On wara tî kekn̂e, Omîn yaka ewomra ro makî ka wasî, okuywan pona etakrira marha ka wasî.

4 Yîwînkîra ro makî ka wasî, eewînkîra meero ha ka.

5 Kporin komo yeken ka ween̂asî, yîmîn marha ka wiir̂asî, Karitî ro mîn, ponaro Xako yehtopo mîn ha. Ero yinhîrî mak tak omîn yaka kîwcesî yîwînso, kekn̂e tî. Ero wa tî kekn̂e Tapi.

6 On wara amna n̂encekn̂e, Meye nasî Kporin komo yamatan Eprata po. Ero rma tak amna n̂een̂akn̂e meye comota po mak.

7 Ero ke on wara wîîkes awya so, Noro yeken pona kaikatko. Yîhtarî yapon mîtkoso rma kaikatko Noro mamakan me yutupentaxi.

8 On wara wîîkes awya hara Apa, Awomko tak ha, awepokaretopo pona tak amoko. Amoro amoko, ayamatan marha mokope, kar̂pe awehtopo kuknon ha.

9 Awya tîmsom pokono komo n̂ehcowpe kir̂wan me cehtopo yaw, poono yawno wara. Anakir̂wamathîrî komo n̂ewanomacowpe tahwore xa cexirî ke so.

10 Tapi ponaro cma re mas Apa, awanton ponaro. Anîhkapethîrî ahsîpînkara esko.

11 Taa, pahxa n̂he Tapi yakro tî nîmtapowakn̂e Kporin komo. Yaaro xa kekn̂e yîwya towîhnî me ro makî. On wara tî kekn̂e yîwya, Awepamthîrî wiir̂asî kayaritomo me amn̂e ahretawno me hara.

12 Anarimaw amumuru komo na n̂ewehcatu omtapotarî, Kakronomexe so oyewehcataw awya so, kachonho. N̂examro wîhcamhokesî owya panatanmetopo komo poko. Ero yipu rma na n̂ewehcatu. Ero yewehcataw yumumuru komo makîrha tak naxe kayaritomo me awekenhîrî yaka. Eroromero naxe yumumuru komo kayaritomo me, kekn̂e tî. Ero wa tî kekn̂e Kporin komo Tapi ya.

13 On wara xakn̂e Kporin komo Siaw poko, ewto poko, ero men̂ekekn̂e cewton me. Ero xe tî xakn̂e ceken me.

14 On wara kesî Noro Siaw poko, Oyepokaretopo on miya rorono. Tanî wasî cekenke, oyeken mexan me exirî ke on okre.

15 Siaw pono komo wakres amn̂e ahce xe so na ehtopo komo ke. Yupurantamnî komo wînahmesî yîromamra ehtome so. Ero wa wakresî iitono komo amn̂e.

16 On wara wîîr̂asî iitono komo, kicicitho yai kowtopo yamrupon̂e wara mak wasî yînîmrî pokono komo ya, poono yamrupon̂e wara. Akir̂wamaxapu komo n̂ewanomexe miya roro tahwore cexirî ke so. Ero wa iitono komo wiir̂asî.

17 Tan Siaw po Tapi meretîrî warai por̂mamnoyasî. Onîhkapetho weyuru warai marha Ow potuhcesî tan.

18 Yiixatî pîn komo ya tko yîhyapamtopo komo wamrupesî, poono yamrupon̂e wara. Tapi kanahtaw reha nasî kayaritomo yarokorî. Cenpore xa n̂ehtîkes okre ero, noro yarokorî ha. Ero wa nasî.