130
Waano On, Xerusaren Pona Tîtosom Komo Narîrî Kicicme Kehtoponhîrî Komo Yîhcamnon̂e Mîkî Kporin Komo
1 Apa kah yawno, on wara wîîkes awya, weyuntawno wara ro mak was okwe. En̂exan wara rma kîmtapotai awakro, cerewre xa wîîkai awya.
2 Omtapotarî cma re mences Apa. Opînîn yaw xa awexi xe wasî, kacho ponaro cma re masî.
3 Kicicme kehtoponhîrî yîcamnopîra ro mak awexitaw onoke ma re nai amîtwono ro me?
4 Kicicme kehtoponhîrî yîhcamnon̂e tko Amoro. Ero wa masî twerî xa amna yehtome apoko.
5 Kporin komo ya oyakronomacho ka momokyasî. Cerepore momokyasî. Yîmtapotachonhîrî ponaro rma wasî, Kir̂wan̂he kiir̂axe so amn̂e, kachonho ponaro.
6 Kporin komo ya oyakronomacho momokyasî cerepore. Waapa yekahton̂e komo naxe yohno enmapu xe noro yipu komo yopo was ow Kporin komo yenî xe. Enmapu xe cehsom komo yopo ro mak Kporin komo yenî xe wasî.
7 Ixaw Yana komo, on wara wîîkes awya so, Kporin komo ya awakir̂wamacho komo ponaro mak ehcoko. Kakronoman̂e ro Mîkî, kicicitho yai kown̂e ro marha. Noro yipu Mîk Kporin komo.
8 Noro rma Ixaw Yana komo nowyasî kicicme ehtoponhîrî komo yewetîn̂enho. Ero wa nowyasî.