Taa, oyakro tîtosom yantoman̂e komo tan wetahcasî. Tîyanan komo yantoman̂e me so tî xatken̂e. Babiron̂a poi tî cetken̂e oyakro kayaritomo me exitaw Ahtaxexe.

2 Osotî komo tan wetahcasî. Xehson, Pin̂eias yepamtho yantoman̂e mîk ha, Taniew, Itama yepamtho yantoman̂e mîk ha, Atus, Tapi yepamtho yantoman̂e mîk ha.

3 Sekanias yepamtho yantoman̂e marha xakn̂e, Paros yepamtho yantoman̂e mak. Sakarias tî mîk xakn̂e n̂examro yantoman̂e. 150 kîrkomo tî xatken̂e noro yakrono komo.

4 Paace-Moabe pononho komo yantoman̂e mîk xakn̂e Erioenai, Seraias mumuru ha. 200 kîrkomo tî xatken̂e noro yakrono komo.

5 Ben-Xeasiew, Sekanias yepamtho yantoman̂e mîk ha. 300 kîrkomo tî xatken̂e noro yakrono komo.

6 Ebece, Acin yepamtho yantoman̂e mîk ha. Xonatas mumuru tî mîk xakn̂e Ebece. 50 kîrkomo tî xatken̂e noro yakrono komo.

7 Xesaias, Eraw yepamtho yantoman̂e mîk ha. Atarias mumuru tî mîk xakn̂e Xesaias. 70 kîrkomo tî xatken̂e noro yakrono komo.

8 Sebacias, Sepaciasî yepamtho yantoman̂e mîk. Noro yepamtho rma mîk xakn̂e Sebacias. Mikaew mumuru mîk xakn̂e. 80 kîrkomo tî xatken̂e noro yakrono komo.

9 Obacias, Xoabe yepamtho yantoman̂e mîk ha. Xeiew mumuru tî mîk xakn̂e Obacias. 218 kîrkomo tî xatken̂e noro yakrono komo.

10 Xosapias mumuru, Seromice yepamtho yantoman̂e mîk ha. 160 kîrkomo tî xatken̂e noro yakrono komo.

11 Sakarias, Bebai yepamtho yantoman̂e mîk ha. Bebai mumuru rma tî mîk xakn̂e Sakarias. 28 kîrkomo tî xatken̂e noro yakrono komo.

12 Xoanan, Askace yepamtho yantoman̂e. Akatan mumuru tî mîk xakn̂e Xoanan. 110 kîrkomo tî xatken̂e noro yakrono komo.

13 Osorwaw tî xatken̂e Atonisaw yepamtho yantoman̂e, Eriperece, Xeew, Semaias, ero wara. Takno komo mahyaka ewruxapu komo tî mîkyam xatken̂e. 60 kîrkomo tî xatken̂e n̂examro yakrono komo.

14 Asakî tî xatken̂e Bikpai yepamtho narîrî, Utai, Sabuce, ero wara. 70 kîrkomo tî n̂examro yakrono komo xatken̂e. Ero wa xatken̂e oyakro tîtosom komo.

15 Taa, n̂examro wan̂ikyakn̂e, tuuna yecihtaka, Aapa wece tîhtosom yecihtaka. Iito amna xakn̂e roona yaw mak. 3 kaamo amna n̂enmayakn̂e iito. Ero yimaw oyakro tîtosom komo chere ketar̂akn̂e. Tîmsom pokono komo chere marha. Exihra tko ween̂akn̂e Repi yepamtho komo okwe yîchew so.

16 Ero ke anarî komo tak wan̂ikyakn̂e hara. Eriese, Ariew, Semaias, Ewnatan, Xaribe, Ewnatan, Natan, Sakarias, Mesuraw, ero wara wan̂ikyakn̂e. Aano rin̂e komo tî mîkyam xatken̂e. Xoiaribe, Ewnatan, n̂examro marha wan̂ikyakn̂e. Yuhnari yîhtînon̂e komo tî mîkyam xatken̂e.

17 Ito yaka tak n̂examro wen̂epekn̂e, Kasipia pono komo yantoman̂e yaka. On wara wîîkekn̂e yîwya so, Iito naxe Ito komo, iyanan komo marha, Kaan mîn yawno pokono komo mîkyam. On wara kasko yîwya so Kaan mîn yawno pokono me cehsom xe men nas amna, Xerusaren pono yawno pokono me cehsom ha, kacoko, wîîkekn̂e yîwya so.

18 Ero ke ero wa kaxi cetken̂e. N̂examro nakronomekn̂e ham Kaan okre. Ero ke iitononho n̂ekyatken̂e amna yakro tîtosom, Serebias tî osotî. Mari yepamtho tî mîk xakn̂e, Repi pen mumutho yepamtho, Ixaw pen parînho yepamtho. Yuhnari yîhtînon̂e mîk xakn̂e. Noro mumuru komo marha n̂ekyatken̂e, akno komo marha. 18 tî mîkyam xatken̂e kîrkomo yukuknomacho.

19 Asabias marha n̂ekyatken̂e, Xesaias marha. Merari pen yepamtho mîkyam xatken̂e. Yumumuru komo marha n̂ekyatken̂e, akno komo marha. 20 tî mîkyam xatken̂e kîrkomo yukuknomacho.

20 Kaan mîn yawno pokono komo tî n̂ekyatken̂e. Tapi komo n̂iritho mîkyam xatken̂e Repita komo yanton me. 220 tî mîkyam mokyatken̂e Kaan mîn pokono me cehsom komo. Tmewreso wa xakn̂e n̂examro yosotî ahnoro karita yaka.

21 Ero yinhîrî tak on wara wîîkekn̂e ohyaka mohxapu komo ya, Aapa yepu yecihtaw rma ka amna exitaw wîîkekn̂e, Oyakno komo, eseresmara ka cehcerî. Ero wara kar̂pen me cecicerî Kaan n̂enîrî me, ponaro kehtopo n̂enîrî me ha. On wara tîtkacerî yîwya, Apa, kir̂wan̂he cma re amna maar̂asî esama yaw. Amna yukurunpeko, amna xîkrî komo marha, amna yemyawno marha, tîtkacerî yîwya Kaan ya, wîîkekn̂e yîwya so.

22 On wara ka xera wîxakn̂e kayaritomo ya, Sowtatu komo cma re men̂epesî amna kurun komo, kawaru mkaw tîtosom komo marha. Amna waparî komo na natu esama yaw. Ero ke tukurunpen̂e xe cma re nas amna, ka xera wîxakn̂e. Kîhyapamyakn̂e mak ero wara ka xera. On wara kan̂enho ow yîwya, On wara nasî Kaan, ponaro amna yehtopo, cepon̂e komo yakronoman̂e Mîk noro. Ero warahra reha nasî Noro tahsîpînkan̂e komo poko reha, Noro yipu komo poko nîrwonasî ro mak oko, wîîkekn̂e yîwya. Ero ke amna kurun komo yaponkura xakn̂e amna.

23 Ero ke eseresmara ka amna xakn̂e. Tukurunpetopo poko amna nîmtapowakn̂e Kaan yakro. Amna mtapotarî n̂encekn̂e ham okre Noro. Ero wara amna xakn̂e.

24 Ero yinhîrî tak 12 wan̂ikyakn̂e tîmsom pokono me cehsom. Serebias, Asabias, n̂examro yanan, 10 ha. Ero wara wan̂ikyakn̂e.

25 N̂examro yemyaka wîmyakn̂e prata, ooru, ahce na mko Kaan ya tîmxapu mko, yîmîn yaka ciisomu mko ha. Kayaritomo nîmîtho mîn xakn̂e, noro yesentayem komo nîmîtho marha, kayaritomo komo nîmîtho marha yîxawyakan komo nîmîtho. Ixaw Yana komo nîmîtho marha mîn xakn̂e esenmexapu komo nîmîtho ha. Ero warai wîmyakn̂e n̂examro yemyaka. Awsîn marha wukuknomekn̂e tîmrî me.

26 Puranta marha wîmyakn̂e emyaka so prata mak, 650 tarentu wicak ha. Ahce na me ciixapu marha wîmyakn̂e yîwya so prata ciixapu, 100 tarentu wicakî. Ooru marha wîmyakn̂e emyaka so 100 tarentu wicakî.

27 Basia marha wîmyakn̂e yîwya so ooru ciixapu, 20. 8,5 kiru wicakî so xakn̂e ero mko yawsîn ahnoro. Ahce na yen marha wîmyakn̂e yîwya so bronse ciixapu, tpepeyure ciixapu. Cepethîkemu tko mîn xakn̂e bronse, ooru warai rma ha re.

28 On wara wîîkekn̂e yîwya so ero yahsîn̂e komo ya, Kaan mîn yawno pokono ro amyamro. Ero ke Kaan mîn yawno ro on wîmyas anarîrî komo me. Kporin komo ya tîmxapu on puranta, prata, ooru marha. Ponaro kporin pen komo yehtopo ya tîmxapu on.

29 Ero ke on ponaro men ehcoko, cemyapore aacoko. Xerusaren pona kepatakache so Kaan mîn yaka tak aacoko. Repita komo wero ro tak awsîn yukuknomacoko Kaan mîn yamtakpon yaka ermonotome yîwya so. Ixaw Yana yantoman̂e komo wero ro marha, wîîkekn̂e yîwya so.

30 Ero ke prata tak nahsîyatken̂e tîmsom pokono komo, Repita komo marha. Ooru marha nahsîyatken̂e, ahce na yen marha. Awsîn yukuknomache nahsîyatken̂e. Xerusaren pona tînarîrî komo me nahsîyatken̂e, Kaan mîn yaka roro tînarîrî komo me ha. Ero wara nahsîyatken̂e.

31 Ero yinhîrî tak amna cekn̂e Aapa yepu yecihtai. Yihcirî nuun̂i po amna cekn̂e, 12-nhîrî kaamo po. Esama yaw amna cetaw amna nakronomekn̂e Kporin komo. Amna nukurunpekn̂e, amna waparî mokuhra ro mak xatken̂e. Esama yakumyaw eseyamxapu komo exihra marha xakn̂e amna waparî kom ha.

32 Ero ke Xerusaren pona roro amna cekn̂e. Iito ka amna xakn̂e 3 kaamo.

33 4-nhîrî kaamo po tak Kaan mîn yaw nukuknometken̂e prata, ooru marha, ahce na me ciixapu mko marha. Awsîn nukuknometken̂e. Merimoce xa nukuknomekn̂e, Urias mumuru, tîmsom pokono mumuru ha. Noro yakro marha nukuknomekn̂e Ereasa, Pin̂eias mumuru mîk ha. Repita komo marha n̂examro nakronometken̂e, Xosabace, Xesua mumuru mîk ha, Noacias, Binui mumuru mîk ha. Ero wa xatken̂e yukuknoman̂e komo.

34 Ahnoro ehxapu komo tî nukuknometken̂e. Iyakenon nukuknometken̂e, awsîn marha. Ero tak mewretken̂e karita yaka yukuknomache so rma.

35 Ero yimaw marha on wara xatken̂e Ixaw yana komo waapa narîthonho yepamtho komo, en̂exa mohxapu kom hara, tokuthîrî pun nakn̂iyatken̂e Kaan ya tîmsom me, ponaro Ixaw Yana komo yehtopo ya tîmsom me ha. Bui pun nakn̂iyatken̂e 12, kahn̂eru pun 96, oper̂a xîkrî pun 75. Boce pun marha nakn̂iyatken̂e 12, kicicme Ixaw Yana komo yehtoponho yahrutopo me. Ahnoro rma nakn̂iyatken̂e takn̂itîkaxi ro Kporin komo ya tîmsom me.

36 Ero yinhîrî kayaritomo karitan nîmyatken̂e kopenato komo ya, tuuna yepu xehxan komo yenîn̂e komo ya. Ero ke Ixaw Yana komo nakronometken̂e n̂examro, n̂emyawnometken̂e marha. Tîmsom pokono komo marha nakronometken̂e. Ero wa xatken̂e.