Ero yinhîrî tak ohyaka mokyatken̂e Ixaw Yana yantoman̂e komo. On wara ketken̂e owya, Ai apa, amna poyino komo yehtopo cma re n̂ekatîmyas amna awya. On wara naxe Ixaw Yana komo, tantono ro komo yai etakpara naxe okwe. Kananew komo, Etew komo, Peresew komo, Xebusew komo, Amonita komo, Moabita komo, Exipsiu komo, Amohew komo, noro yipu komo yehtopo nukukmexe kica, kicicme ro mak ehtopo komo nukukmexe. Tîmsom pokono komo rma naxe ero wara, Repita komo marha.

2 N̂examro yemsîrî komo nahsîce cipici me so okwe, tumumuru komo pici me so marha. Ero ke Kaan yananî ro komo tak naxe ceske tantono ro komo yakro. Antomano rin̂e komo xa yo naxe ero poko anarî komo yopo, kayaritomo komo marha ero wara naxe okwe, ketken̂e owya.

3 Ero yipu yentache oponon wahxaikekn̂e kawno pîn, kawno meero. Ohpoci marha ow mohkekn̂e wahra mak, oyetpoci marha mohkekn̂e wahra mak. Ero wa wîxakn̂e oyeserepokarî ke. Keremekn̂e ceserepokaxi ro mak.

4 Ero yinhîrî tak ohyaka mokyatken̂e Ixaw Yana komo mer̂pono pîn. Kaanî mtapotarî pona tatan̂em komo mîkyam mokyatken̂e ahnoro. Waapa narîthonho komo yehtoponho tî n̂encetken̂e, kicicme ehtoponhîrî komo kica. Ero ke mokyatken̂e. Iito rma tko keremekn̂e kokon̂i cehso ro, Kaan ya tîmsom yakn̂itopo me cehso ro. Keserepokekn̂e ro mak okwe.

5 Ero yimaw tak kawomyakn̂e hara Kaan ya tîmsom yakn̂itopo yimaw. Eseresmara rma kawomyakn̂e, oponon xakn̂e tahxaikaxi rma. Ero yinhîrî tak oyosokmuru po keremekn̂e hara. Kporin komo wece tak kapockanwakn̂e, ponaro oyehtopo wece.

6 On wara wîîkekn̂e yîwya, Apa kah yawno, ponaro oyehtopo xa Amoro. Kîhyapamyasî ro mak tak. Kicicitho me ro mak kesen̂asî. Kîhyapamyasî awece cewru oyexi xera. Kicicme amna yehtopo n̂epamtîkesî ro mak okwe. Amna yenorinokan̂e wara ro mak nasî. Kicicme maxe kica, kacho me men nas amna. Ero wara amna yehtopo n̂epamtîkesî kah yaka rorono wara okwe.

7 Mehxa ro rma kicicme amna xakn̂e, amna porin pen komo yehtoponho n̂ixa ro rma. Kicicme amna yexirî ke amna mar̂mapekn̂e anarî rowon pono kayaritomon komo ya. Amna kayaritomon pen komo mar̂mapekn̂e, amîn yenîn̂e pen komo marha. Anarî pen komo waihketken̂e, anarî pen komo naar̂atken̂e mokuhnî me hara. Amna yemyawnonho nahsîyatken̂e. Tîwîrîyakaxmu me amna n̂iir̂atken̂e. Ero wara rma amna n̂een̂axe oroto.

8 Kokon̂oro tak amna makronomai hara. Ero wara rma masî oroto amna poko. Amna yakwenho komo cik mukurunpesî. Amna tak mekenmesî oona awewtonî ro pona. Ponaro amna yehtopo Amoro apa. Amna yenpakan̂e wara tak mas okre, amna karihton̂e me marha waapa nahsîthonho me ehxapunhîrî rma.

9 Antonano me mak amna xakn̂e. Noro yipu rma tko amna yahsîpînkara mîxakn̂e. Amna pînîn yawno me tak miire Pehsia kayaritomon komo, amna yenpakan̂e me ha. On wara kan̂e me n̂examro miire, Kaan mîn ciitatko hara akn̂ixapunhîrî, kan̂e me. Amna wacan wara marha mas okre amna kurunpen̂e me. Amna mekye oona Xuta rowon pona, Xerusaren pona xa.

10 Oroto Apa, ahce wa thakwa re amna n̂ehyapampoke? Amtapotachonhîrî amna nîhcamnoi okwe tpanatanmetopo.

11 On wara amna mîpanatanmekyakn̂e awanton komo mtari, amna weronoman̂e komo mtari, Kicicitho mak mîn kica roowo, pona mîîcexe ero ha. Iipono komo yehtoponho ken̂e xa nasî kica, kicicitho me ro mak ehtopo komo ken̂e. Ahnoro mak nasî kicicme ehtopo komo ken̂e kica, mapitaka roro marha kica.

12 Ero ke awemsîrî komo tîmîhra ro mak men ehcoko iitono mumuru komo ya yipici me. N̂examro yemsîrî marha ahsîra ro mak ehcoko amumuru komo pici me hara. N̂examro akronomara ro mak ehcoko etar̂metaw so, ahce na ciitopo poko marha akronomara ehcoko. N̂examro yakronomara awexitaw so kar̂pe tak maxe, tînahporem me marha maxe. N̂examro yakronomara awexitaw so awekenhîrî komo tak mîmyaxe amxîkrî komo yeken me hara okre awaiyataw so. Eroromero nasî eken komo me, mîîkekn̂e amna ya.

13 N̂esemetanmekyakn̂e ro makî tko amna kicicme ro mak amna exirî ke, Kicicitho mîkyam kica, kacho me amna exirî ke. Ponaro amna yehtopo xa Amoro. Kicicme amna yehtoponho xawyaka rma tko amna mîpanarekn̂e. Ero ke tak amna nasî towso antonanonhîrî.

14 Ero ke ahce kacho amtapotachonhîrî amna nanwekya hara kica? Ahce kacho kicicitho komo yemsîrî amna nahsîya cipici me kica? Ero wara rma amna exitaw amna poko na mîrwonîmtîke oko. Amna pen na mîwaiketîke yîmton me ro mak okwe.

15 Ai Apa, ponaro Ixaw Yana komo yehtopo Amoro, kir̂wanî ro Amoro. Oroto tak amna nasî asak mak mer̂pono pîn poyinonho. Awepataino wara rma nas amna, Kicicme xa maxe kica, kacho me cehsom. Pahkî awepatawno me exihra rma thakwa nas amna kicicme xa amna yexirî ke, wîîkekn̂e. Ero wara wîîkekn̂e omtapowataw Kaan yakro.