1-5 Taa, Estras yehtoponho tan wekatîmyas hara awya so. Ahtaxexe takî tî xakn̂e kayaritomo me hara. Ero yimaw iito rma tî ka xakn̂e Estras Babiron̂a po. Seraias mumuru tî mîk xakn̂e Estras, Asarias mumutho tî mîk xakn̂e hara, Iwkias mumutho tî mîk xakn̂e hara, Sarun mumutho tî mîk xakn̂e hara, Satoke mumutho tî mîk xakn̂e hara, Aitube mumutho tî mîk xakn̂e hara, Amarias mumutho tî mîk xakn̂e hara, Asarias mumutho tî mîk xakn̂e hara, Meraioce mumutho tî mîk xakn̂e hara, Serakias mumutho tî mîk xakn̂e hara, Usi mumutho tî mîk xakn̂e hara, Buki mumutho tî mîk xakn̂e hara, Abisua mumutho tî mîk xakn̂e hara, Pin̂eias mumutho tî mîk xakn̂e hara, Ereasa mumutho tî mîk xakn̂e hara, Araw mumutho tî mîk xakn̂e hara. Kaan yaka cewomsom pen tî mîk xakn̂e Araw pen.

6 Ero yinhîrî tak Estras mokyakn̂e Xerusaren pona Babiron̂a poi. Moises ya kapanatanmetopo poko ehcamhokatîkaxapu tî mîk xakn̂e Estras. Kporin komo Kaanî mtapotachonho rma tî mîn Moises ya kpanatanmetopo, ponaro Ixaw Yana komo yehtopo mtapotachonho ha. Taa, en̂exa noro mokrî me yiixe ehtopo tî nîmyakn̂e kayaritomo yîwya, nîmtîkekn̂e amenmekîra ro mak. Ero wa tî nîmyakn̂e Estras ya noro yakronomarî ke Kporin komo ya, ponaro noro yehtopo ya akronomarî ke ha.

7 Estras yakro mokyatken̂e Ixaw Yana komo, tîmsom pokono komo, Repita komo, waano yaan̂e komo, metata yenîn̂e komo, Repita yanton komo, ero wa tî mokyatken̂e. 7 cimn̂ipu tî xakn̂e kayaritomo me Ahtaxexe yehtoponho ero po mokyatken̂e.

8 5-nhîrî nuun̂i po n̂epataketken̂e Estras komo Xerusaren pona. 7-nhîrî rma mîn xakn̂e cimn̂ipu kayaritomo me Ahtaxexe yehtoponho.

9 Babiron̂a poi tî ka mokyatken̂e 1-înhîrî nuun̂i po, 1-înhîrî kaamo po ha. Ero yinhîrî 5-nhîrî nuun̂i po tak n̂epataketken̂e Xerusaren pona, 1-înhîrî kaamo po ha. Estras nakronomekn̂e Kporin komo. Ero ke kir̂wan̂he n̂epatakekn̂e Xerusaren pona.

10 On wara kekn̂e Estras tîropotaw pahxa rma, Kporin komo ya kpanatanmetopo poko oyehcamhokatîka xe was okre, ewetî xe marha wasî, ero poko marha Ixaw Yana komo panatanmekî xe wasî, kekn̂e tî pahxa rma. Ero ke wa noro nakronomekn̂e Kporin komo.

11 Tîmsom pokono tî mîk xakn̂e Estras, kpanatanmetopo mewren̂e ro marha. Yaana me tî xakn̂e Kporin komo ya kpanatanmetopo poko, Ixaw Yana komo panatanmetopo poko. Noro yipu ya tîkaritan nîmyakn̂e Ahtaxexe, kayaritomo ha.

12 On wara kacho mîn xakn̂e yînmîthîrî karita, Ahtaxexe ow ha. Kayaritomo xa ow, kayaritomo komo kayaritomon ha. Estras amoro tîmsom pokono, Kaan ya kpanatanmetopo mewren̂e marha, kah yawno ya kpanatametopo mewren̂e. Noro yipu amoro Estras. Esemetanmekîn me ro mak awexi xe wasî.

13 On wara wîîkes awya Ixaw Yana komo poko, orowon pono komo poko, tîto xe so na natu anarî komo Xerusaren pona. Tîmsom pokono komo marha na tîto xe so natu, Repita komo marha. Noro yipu komo tocowpe awakro tîto xe cexitaw so.

14 Owî rma wa ken̂epesî, kayaritomo ow ha, 7 marha naxe oyesentayem komo, n̂examro marha awen̂epesî. Kaan ya kpanatanmetopo maarasî iina Xerusaren pona. Xuta pono komo yehtopo enko, Xerusaren pono komo yehtopo marha. Ponaro awehtopo ya kpanatanmetopo yaw roro ehtopo komo enko.

15 Prata aacoko awakro so, ooru marha. Kayaritomo nîmîtho mîn aacoko, oyesentayem komo nîmîtho marha. Tanme ro mak nîmyas amna Kaan ya, ponaro Ixaw Yana komo yehtopo ya. Xerusaren po cekenkem Mîk ha Noro ya amna nîmyasî.

16 Babiron̂a rowon pono komo marha na nîmyatu awya prata, ooru marha. Ixaw Yana komo marha na nîmyatu awya, tîmsom pokono komo marha na. Tanme ro mak na nîmyat awya Kaan mîn me ciisom yepetho me, Xerusaren po ciisom yepetho me ha.

17 Ero ke yînmîthîrî komo pona men ahsîcoko bui, kahn̂eru komo, oper̂a xîkrî komo, puruma yatho marha wooto yakro takn̂isom, uupa yukun marha ero yakro takn̂isom. Ero yipu men ahsîcoko Kaan ya tîmsom anakn̂irî kom ha. Xerusaren pono pona akn̂icoko, Kaan ya tîmsom yakn̂itopo pona.

18 Ero yinhîrî tak awanme ro so mak ciicoko prata yakwenho, ooru yakwenho marha. Ayanan komo yakro rma esentacoko ero ciitopo poko. Kaan yanme mak ciicoko, ponaro awehtopo komo yanme mak.

19 Kaan mîn yawnonho mko marha wîmyas awya anarîrî komo. Ponaro awehtopo komo ya tîmsom me ehtome aacoko. Ero mko men aatîkacoko Kaan yaka, Xerusaren pono yaka.

20 Iito awexitaw Kaan mîn yaw ahce na xe na mat hara amn̂e. Ero wa yîhtînoyataw awya so ahsîcoko. Kayaritomo purantan poi rma epemacoko.

21 Ahtaxexe ow ha, kayaritomo ha. On wara wîîkesî kayaritomo purantan yenîn̂e komo ya, tuuna yepu mehxan komo ya, iina men cesî Estras, tîmsom pokono, kah yawno ya tîmsom ha. Noro ya kpanatanmetopo mewren̂e so marha mîkî. Ero ke, Ero xe cma re wasî, ketaw noro, yîwya men tîmcoko ha.

22 Prata tîmcoko yîwya 100 tarentu wicakî rma yiixe exitaw, puruma marha tîmcoko yîwya 22 kirorituru wicak ha na, uupa yukun marha tîmcoko yîwya 2,2 kiroritru wicakî. Yîmîtî marha tîmcoko yîwya yukunomara ro mak.

23 Kaanî mtapotarî yencetaw awya so ahce na awantomacho komo, Ero xe men natu tîmsom pokono komo, kah yawno mîn yenîn̂e kom ha, kacho yencetaw awya so ero men tîmcoko yîwya so takîhso. Tîmîhra awexitaw so Noro rma na nîrwona kayaritomo maywen komo poko kopi, kayaritomo mumuru komo poko marha kopi.

24 On wara marha wîîkes awya so, On wara kahra ehcoko yîwya so, Ai, kayaritomo purantan men tîmcoko, kahra ro mak men ehcoko yîwya so. Ero wa kahra ro mak ehcoko tîmsom pokono komo ya, Repita komo ya, waano yaan̂e komo ya, Kaan mîn metatan yenîn̂e komo ya, Repita yanton komo ya, ahce na poko cetapickaxmu komo ya, Kaan mîn yawno poko cetapickaxmu ya, noro yipu komo ya men ero wa kahra ehcoko. Ero wa wîîkes awya so, tuuna yepu mehxan komo ya.

25 Taa, Estras, on wara wîîkesî xa hara awya, takîhsom xa amoro Kaan nakîhretho ham. Ero ke enîno rin̂e komo cirko amoro, en̂ekano rin̂e komo marha. Tuuna yepu mehxan komo yenîn̂e me n̂examro cirko. Ponaro awehtopo ya kpanatanmetopo ponarono komo mak cirko. Ero yentan̂e pîn komo panatanmekn̂e me n̂ehcowpe. Ero pokono komo cirko.

26 Iito na nai Kaan ya kapanatanmetopo yewetî xatî pîn, kayaritomo mtapotacho yewetî xatî pîn marha. Noro yipu exitaw yohno noro en̂ekacoko. Ahce wa na marha panarecoko kicicme ehtoponhîrî yepetho me rma, mîwaiketu na anarimaw, iyanan komo yai na men̂epetu anarimaw, emyawnonhîrî na mowyatu, mahruyatu na anarimaw. Ero wa men ciicoko Kaan ya kpanatanmetopo yewetîn̂e pîn komo, kacho tî mîn mewrekn̂e. Ero wa kacho tî nîmyakn̂e Estras ya tîkaritan ha. Ero wa tî mewrekn̂e kayaritomo.

27 Ero yenîche on wara takî tî kekn̂e Estras, Kir̂wan̂he ro mak nai Kporin kom ham okre, ponaro kporin pen komo yehtopo. Noro rma ero wa kacho n̂iirakn̂e ham kayaritomo ropotaka. Noro rma n̂iirakn̂e ham Kporin komo mîn yakirwama xatî me, Xerusaren pono yakir̂wama xatî me ha.

28 Noro rma kayaritomo n̂iirakn̂e oponarono me. Esentayem komo, kayaritomo maywen komo, yukurumîkno komo, noro yipu komo n̂iirakn̂e ham oponaro. Ero ke tahwore tak wîxakn̂e Kporin komo ya oyakronomarî ke. Ero ke Ixaw Yana komo wan̂ikyakn̂e Xerusaren pona totohme so oyakro, aano rin̂e me cehsom komo mîkyam wan̂ikyakn̂e. Ero wara wîxakn̂e.