Ero ke on wara takî tî xakn̂e Tar̂u, tmaywen komo tî nantomekn̂e karita yeporîrî poko. Karita mîn tî xakn̂e Babiron̂a po. Ero yaw marha tî xakn̂e kayaritomo yemyawno, cepethîkemu mko.

2 Ero yinhîrî takî tî karita n̂een̂atken̂e, kayaritomo mîn yaw, Akmeta pono yaw. Mecia rowon pono mîn Akmeta. On wara kacho tî mîn xakn̂e karita yaw,

3 On wara xakn̂e Siru, kayaritomo ha, yihcirî cimn̂ipu po kayaritomo me cehtoponhîrî, ero po nîmtapowakn̂e Kaan mîn ciitopo poko, Xerusaren pono ciitopo poko. On wara tî kekn̂e, Pahxa Kaan ya tîmsom tî nakn̂iyatken̂e Xutew komo Kaan mîntho yaw. Ero rma tak n̂iicowpe xa hara. Takîhso n̂iicowpe ero yapon. Kaw n̂iicowpe 27 metru kawnon. Ero wicakî xa marha n̂iicowpe ehyatkaw hara, 27 metru xa marha.

4 Toh ke n̂iicowpe ero yapon, porin ke. Osorwaw yatî n̂iicowpe toopu. Cewn̂e yatî n̂iicowpe weewe hara sahsamaxapu yaxan. Ero wara men n̂iicowpe mîîmo yapon. On wara marha wîîkesî, kayaritomo purantan poi nahsîcowpe ero ciitopo yepetho.

5 Kaan mîntho yawnonho tî n̂ekyakn̂e Nabukotonoso pen, Xerusaren pononho yawnonho. Ooru ciixapu mko n̂ekyakn̂e, prata ciixapu mko marha. Ero mko naacowpe hara Xerusaren pona Kaan mîn yaka. Ekenî ro pona so n̂iicowpe Kaan mîn yaka, kacho tî mîn xakn̂e Siru pen karitan.

6 Ero ke on wara wîîkes awya so, Tatenai amoro, tuuna yepu mehxan komo kopenato ha, Seta Bosenai amoro hara, awakrono kom marha Pehsia komo, awya so wîîkes on wara, Kaan mîn yai men mooxe ehcoko ha.

7 Kaan mîn ciin̂e komo ewrucpera ro mak tak ehcoko. Xutew kopenaton, poritomon komo marha, n̂examro n̂iicowpe rma Kaan mîn pahxantho yekenho na hara.

8 On wara marha wîîkes awya so Xutew komo yakronomacho poko, Kir̂wan̂he Kaan mîn ciri xe wasî yîwya so. Ero ke kayaritomo purantan poyino tîmcoko yîwya so. Kayaritomo purantan nîmyaxe roro tuuna yepu mehxan komo ero poi tak tîmcoko Xutew komo ya Kaan mîn ciitopo yepetho. Yohno rma tîmcoko yîwya so yîtîtmamra ehtome so.

9 Ahce na marha tîmcoko yîwya so yiixe ehtopo komo. Bui komo, kar̂pamxan, kahn̂eru komo, oper̂a xîkrî komo marha, noro yipu komo tîmcoko yîwya so Kaan ya yînîmrî komo me, kah yawno ya yînîmrî komo me. Puruma yatho xe na natu, yîmîtî xe ha na, wooku xe ha na, katî xe marha na, ero yipu komo xe exitaw so Kaan ya tîmsom yakn̂in̂e komo tîmcoko yîwya so. Enmar̂atîxera ero yipu tîmcoko yîwya so. Yîhcamnopîra men ehcoko.

10 Noro yipu komo tîmcoko yîwya so Kaan ya tîmsom yakn̂itome, kah yawno ya tîmsom yakn̂itome ha. Kotoporem tîmn̂e me exi xe so wasî Kaan ya. Ero yimaw tak kayaritomo poko nîmtapowatu Kaan yakro, yumumuru komo poko marha. Waipîra amna yehtopo poko nîmtapowatu.

11 On wara marha wîîkes awya so an̂ewetîrî komo me, on omtapotachonho towyataw iitono ya, noro mîntho kr̂a men yixkacoko. Mapatanthîrî rma tak ciicoko noro pen yexewnutopo me. Ero poko tak noro penî kr̂a exewnucoko. Yukpurukpurunthîrî yar̂macho me mak ciicoko yîmînthîrî yixkaxaputho.

12 Anarimaw na kayaritomo on nowya omtapotachonho, noro maywen komo mak na nowyatu anarimaw. Anarimaw Kaan mîn yakn̂ipu xe na natu. Ero wa exitaw so n̂examro pen waihkape Kaan, Omînî ro xa mîn Xerusaren pono, oyosotî yeken xa ha, kan̂e rma Mîk noro yipu pen waihkape. Tar̂u ow ha, omtapotarî xa men tan. Ero ke on yaw roro men ciicoko takîhso, kacho tî. Ero wa kacho tî mewrekn̂e kayaritomo yîhyakan komo.

13 Ero ke ero wa kacho yaw roro thakwa takî tî xatken̂e Tatenai, tuuna yepu xehxan komo kopenaton, Seta Bosenai komo, n̂examro yakrono komo marha. Ero wa tî xatken̂e. Kayaritomo mtapotachonho tî n̂ewehcatken̂e takîhso.

14 Ero ke Xutew poritomon komo takî tî n̂iir̂atken̂e Kaan mîn, kir̂wan̂he tî n̂iir̂atken̂e ehn̂ara. Axew mtapotarî yanme tî ehn̂ara xatken̂e, Sakarias Ito mtapotarî yanme marha. Kweronoman̂e komo tî mîkyam xatken̂e n̂examro. Ero ke takî tî n̂iitîketken̂e. Kaanî mtapotachonho yaw roro rma tî n̂iitîketken̂e, ponaro Ixaw Yana komo mtapotachonho yaw roro. Pehsia komo kayaritomonî mtapotachonho yanme marha tî n̂iir̂atken̂e. Ciru, Tar̂u, Ahtaxexe, noro yipu komo mtapotachonho yanme ha. Ero wa n̂iir̂atken̂e.

15 6 cimn̂ipu takî tî xakn̂e kayaritomo me Tar̂u yehtoponho ero yimaw Kaan mîn n̂iitîketkekn̂e. Ata tî mîn xakn̂e nuun̂i yosotî. 3-înhîrî tî mîn xakn̂e kaamo hara. Ero po xa tî Kaan mîn n̂iitîketken̂e.

16 Ero yinhîrî takî tî nahwowatken̂e takî tî Ixaw Yana komo, tîmsom pokono komo, Repita komo marha. Waapa narîthonhîrî yepamtho mîkyam xatken̂e. Noro yipu komo tî nahwowatken̂e. Kaan mîn me ciixapu takî tî nîmyatken̂e Kaan ya. Ero tîmtopo yimaw tî nahwowatken̂e.

17 Ero yimaw marha tî tokuthîrî komo pun nakn̂iyatken̂e Kaan ya tîmsom me. Bui tî nakn̂iyatken̂e 100, kahn̂eru 200, oper̂a xîkrî 400. Kicicme cehtoponhîrî komo yehtoponho yahrutopo marha tî nakn̂iyatken̂e boce pun. 12 tî nîmyatken̂e kabritu ero wa takn̂isom komo. 12 naxe Ixaw yana tribun komo. Ero ke cewn̂e so tî kabritu nakn̂iyatken̂e tribu komo poko hakî so.

18 Tîmsom pokono komo tî nantometken̂e cemyawno ro poko. Repita komo marha tî nantometken̂e cemyawno ro poko hara. Ero ke Kaan mîn yawno pokono me takî tî xatken̂e n̂examro, Xerusaren pono pokono me. Moises penî nmewretho yaw roro rma tî cemyawno ro komo n̂iir̂atken̂e.

19 On wara marha tî xatken̂e aaxapunhîrî pen yepamtho komo, Kwatotoponhîrî tî nukukmetken̂e yihcirî nuun̂i po, 14-nhîrî kaamo po. Ero po tî ero yukukmacho me n̂eseresmetken̂e.

20 Pahxa n̂he rma tî ka n̂etakir̂wametken̂e tîmsom pokono komo, Repita komo marha. Ahnoro rma tî xatken̂e kir̂wan̂he. Ero ke takî tî tokuthîrî waihketken̂e n̂examro Kwatotoponhîrî yimaw tonosom ha. Waapa narîtho yepamtho komo yotî me tî waihketken̂e. Tîyanan komo yotî waihketken̂e, Kaan ya tîmn̂e komo yot ha, tootî komo marha. Ero wa so tî okno waihketken̂e.

21 Ero ke takî tî n̂eseresmetken̂e Ixaw Yana komo, waapa narîthonhîrî mohxapu komo. Anarî komo marha tî n̂eseresmetken̂e akro so. N̂examro tî ka n̂etakir̂wametken̂e. Mîk hak rowon pono komo yehtoponho yai tî n̂etowyatken̂e, kicicme ehtoponhîrî yai ha. Noro yipu komo takî tî Kporin komo n̂epor̂atken̂e, ponaro Ixaw Yana komo yehtopo ha. Ero wa so tî n̂eseresmetken̂e.

22 Ero yinhîrî takî tî Wahrututpamnî Yohtopo yimawno me marha tî nahwowatken̂e hara 7 kaamo hara. Tahwore tî xatken̂e ero yimaw. Kporin komo rma tî ahworeno n̂iir̂akn̂e. Asiriu kayaritomon komo ropotarî tî n̂iir̂akn̂e n̂examro ponaro. Ero wa tî Ixaw Yana komo nakronomekn̂e Kaan mîn ciitopo poko, ponaro Ixaw Yana komo yehtopo mîn ciitopo poko ha. Ero wa tî Asiriu kayaritomon komo ropotarî n̂iir̂akn̂e Kporin komo.