Ero yimaw iito tî xatken̂e kweronoman̂e komo asakî, Axew, Sakarias, ero wara. Ito mumuru tî mîk xakn̂e Sakarias. N̂examro takî tî Kaanî mtapotarî n̂ekatîmyatken̂e Xutew komo ya, Xuta pono komo ya, Xerusaren pono komo ya marha. Kaanî mtapotarî xa tan amna n̂ekatîmyasî, ponaro kehtopo komo mtapotarî ha, ketken̂e tî.

2 Ero ke on wara takî tî xakn̂e Sorobabew, Seawciew mumuru mîk ha, Xesua marha, Xosatake mumuru mîk hara, Kaan mîn poko takî tî xatken̂e xa hara. N̂examro yakronoman̂e me tî xatken̂e weronoman̂e komo.

3 Ero yimaw takî tî Tatenai mokyakn̂e yîhyaka so. Tuuna yepu xehxan komo kopenato tî mîk xakn̂e Tatenai. Seta-Bosenai marha tî mokyakn̂e, n̂examro yakrono komo marha tî. On wara tî ketken̂e n̂examro Xutew komo ya, Onoke xa mîk awantometken̂e so on mîîmo ciitopo poko? On ewto wacan marha ciicoko, kekn̂e onoke awya so? ketken̂e tî yîwya so.

4 On wara marha tî ketken̂e Xutew komo ya, Onoke xa on ciin̂e me natu? Osotî komo ka etacicoko amna n̂entarî me, ketken̂e tî yîwya so. Ero wa tî ketken̂e yîwya so.

5 Xutew komo ponaro rma tko xakn̂e ham Kaan, n̂examro poritomon komo ponaro. Ero ke n̂ehn̂etken̂e mak mohxapu komo Xutew komo yîtîhkamexpotopo poko. Tar̂u yakan makî tî mewretken̂e karita. Noro karitan mokuhra ka exitaw yîtîhkamexpono cirihra rma tî xatken̂e.

6 On wara kacho tî mîn mewrekn̂e Tatenai, Apa Tar̂u, kayaritomo amoro. On amna karitan an̂enîrî. Kayaritomo maywen komo kopenato ow ha, tuuna yepu xehxan komo kopenato ha. Seta-Bosenai marha, noro yakrono komo marha, Pehsia kom ha. Ero warai amna on mewren̂e. Tuuna yepu xehxan komo amna.

7 On wara kacho marha tî mewretken̂e, Apa, kayaritomo xa amoro Tar̂u ha. Esemetanmekîn me ro mak awexi xe nas amna.

8 On wara kes amna awya, Xuta rowon pona cekn̂e amna. Iitono komo naxe mîîmo poko, Kaan mîn poko, kyopono ro mîn poko. Toh ke n̂iir̂axe porin ke. Weewe marha wexe ero wacan me. Takîhso n̂iir̂axe ehn̂ara ro mak.

9 Ero ke amna nîmtapowakn̂e n̂examro poritomo komo yakro. On wara kekn̂e amna yîwya so, Onoke xa awantometken̂e so on ciitopo poko, Kaan mîn ciitopo poko ha? Wacantotopo poko marha awantometken̂e so onok ha? kekn̂e amna yîwya so.

10 On wara marha kekn̂e amna yîwya so, Onoke xa amyamro? Awosotî komo ka etacicoko, kekn̂e amna yîwya so. N̂examro yantoman̂e komo yosotî mewre xe xakn̂e amna an̂enîrî me. Ero ke ero wa kekn̂e amna yîwya so.

11 Ero ke tak on wara ketken̂e n̂examro amna ya, Kaan yanton mak amna. Kaapu yecehton̂e Mîk Kaan, roowo yecehton̂e marha Mîk, Noro yanton amna. Pahxa tî xakn̂e Ixaw Yana kayaritomon. Anarî komo yopono ro tî mîk xakn̂e, kayaritomo komo yopono. Kaan mîn tî n̂iir̂akn̂e noro, n̂iitîkekn̂e.

12 Wara rma amna porin pen komo tî xatken̂e kicicme Kaan poko, kah yawno poko. Ero ke tî Noro nîrwonakn̂e n̂examro poko. Ero ke Nabukotonoso ya takî tî n̂examro pen nar̂mapekn̂e, Babiron̂a pono komo kayaritomon ya. Kawtew yepamtho tî mîk xakn̂e Nabukotonoso. Noro takî tî tantononhîrî nakn̂iyakn̂e Kaan mîntho pen. Tantononhîrî pen komo marha tî nahsîyakn̂e amna porin pen komo. Babiron̂a pona tî n̂examro pen naar̂akn̂e okwe.

13 Ero yinhîrî takî tî Siru xakn̂e kayaritomo me hara, Babiron̂a pono komo kayaritomon me. Cewn̂e cimn̂ipu makî tî ka xakn̂e kayaritomo me noro yehtoponho. Ero yimaw noro takî tî amna nantomekn̂e Kaan mîn ciitopo poko.

14 Kaan mîntho yawnonho mko marha tî Siru n̂en̂emhatakekn̂e ooru ciixapu mko, prata ciixapu mko marha. Nabukotonoso narîtho mko tî mîn xakn̂e. Xerusaren poi tî naar̂akn̂e Babiron̂a pona. Iina tî n̂iir̂akn̂e ponaro cehtopo mîn yaka hara. En̂exa takî tî Siru n̂en̂emhatakekn̂e hara. Ero yimaw marha amna poyino n̂iir̂akn̂e amna kopenaton me. Sesbasa tî mîk xakn̂e noro yosotî. Noro yemyaka tî nîmyakn̂e Kaan mîntho yawnonho mko.

15 On wara tî kekn̂e Siru yîwya, On Kaan mîntho yawnonho mko aacoko ha men Kaan mîn yeken pona, Xerusaren pona. Iina takî Kaan mîn ciicoko xa hara pahxantho yekenho pona rma, kekn̂e yîwya. Ero wa tî kekn̂e Siru Sesbasa ya.

16 Ero ke oona tak mokyakn̂e Sesbasa. Kaan mîn yapon n̂iir̂akn̂e oona Xerusaren pona. Eronhîrî ciitîkacho poko tak nas amna. Ciitîkara rma tko ka nas amna, ketken̂e amna ya. Ero wa ketken̂e Xutew komo amna ya.

17 Ero ke kir̂wan̂he exitaw awya, kayaritomo yemyawno mîn yawno n̂epocowpe amaywen komo, karita n̂epocowpe. Babiron̂a pono yawno, kayaritomo yemyawno mîn yawno, ero yawno n̂encowpe. Yaaro xa ma re ketken̂e amna ya moxam Xutew komo, Siru mtapotarî yanme mak xa on Kaan mîn amna n̂iir̂asî oona Xerusaren pona, ketken̂e amna ya yaaro xa ma re? Ero wa eporîche amtapotarî cma re mentamexpes hara amna ya on pokono Kaan mîn pokono ha, kacho tî mewretken̂e. Ero wa kacho tî mewretken̂e karita kayaritomo yakan, Tar̂u yakan.