Taa, iito rma tko tî xatken̂e Xuta yepamtho xatî pîn komo, Benxamin yepamtho xatî pîn komo marha. On wara kacho takî tî n̂encetken̂e n̂examro, Waapa narîtho yepamtho komo takî tî mîîmo n̂iir̂at hara kica. Tporin komo mînî rma tî n̂iir̂atu, ponaro Ixaw Yana komo yehtopo mîn ha, kacho tî n̂encetken̂e.

2 Ero ke Sorobabew yaka takî tî mokyatken̂e, noro re yantoman̂e komo yaka marha. On wara tî ketken̂e yîwya so, Ai, oyakno komo, on wara kes amna awya so, Kporin komo mîn miir̂at ham okre. Ero ke ero poko cma re amna nasî awakro so. Kaan ponarono xa marha amna, ponaro awehtopo komo ponarono ha. Pahxa amna n̂ekyakn̂e xiya Esar-Aton, Asiriu komo kayaritomon pen. Noro yehtoponho n̂ixa ro rma amna nakn̂iyasî tokuthîrî pun Kaan ya tîmsom me, ketken̂e tî yîwya so.

3 On wara tko tî ketken̂e Sorobabew, Xesua komo, antomano rin̂e komo ahnoro, Pîra oyakno komo, amna yakronoman̂e pîn me thakwa maxe amyamro. Amna makî reha on n̂iir̂asî Kaan mîn, ponaro amna yehtopo mîn. Noro mîn ciitatko, kekn̂e Siru amna ya. Pehsia komo kayaritomon mîk kekn̂e. Ero ke amna mak n̂iir̂asî, ketken̂e tî yîwya so.

4 Ero yinhîrî takî tî Xuta yepamtho komo takî tî nahwokamexpetken̂e hara kica iitono ro komo. N̂ewrucpetken̂e Kaan mîn cirirî poko exitaw so okwe.

5 Kicicme tîmtapotaxmu komo tî nantometken̂e epethîrî pona. Kaan mîn ciin̂e komo yehn̂anmecho poko nantometken̂e. Emapona roro tî n̂en̂epetken̂e kica kayaritomo me Siru yehtopo yecenarî, kayaritomo me Tar̂u yehtopo pona roro. Ero wa tî xatken̂e Kaan mîn ciin̂e komo poko okwe.

6 Ero yinhîrî takî tî Asueru xakn̂e kayaritomo me hara. Kayaritomo me eciriche rma takî tî yîhyakan mewretken̂e karita Xuta xatî pîn komo. Kicicitho mîkyam kica Xerusaren pono komo, Xuta pono komo ahnoro, kacho tî mîn mewretken̂e.

7 Ero yinhîrî takî tî Ahtaxexe takî tî xakn̂e Pehsia komo kayaritomon me hara. Noro yakan tî mewretken̂e xa hara karita Xuta pono komo pokono. On wara tî xakn̂e mewren̂e komo yosotî, Bisiraw, Mitîretace, Tabeew, n̂examro yakrono komo marha, ero wa tî xatken̂e mewren̂e komo. Siriu mtapotarî yaro tî mewretken̂e.

8 Heun tî mewrepekn̂e Sinsai yakro. Karita mewren̂e ro tî mîk xakn̂e Sinsai. Xerusaren pono komo yîwîrîyakacho tî mîn mewretken̂e.

9 On wara kacho tî mewretken̂e, Heun ow ha sowtatu yantoman̂e. Sinsai marha ow karita mewren̂e ro. Amna yakrono komo marha naxe tan karita mewrepon̂e. Mîk hak yana komo yanme rma amna mewresî. Cina pono komo, Apahsaka pono komo, Tahperu pono komo, Pehsia komo, Ereke pono komo, Babiron̂a pono komo, Susan pono komo, Teapi pono komo, Eraw pono komo. Ero warai komo yanme marha on mewres amna ahyakan.

10 Tantono komo yanme marha amna mewresî, mîk hak rowon pononho komo yanme. Mîk hak rowon pono komo tî nahsîyakn̂e apapa pen Asnapa pen ha. Ewpratesî mehxan komo tî mîkyam nahsîyakn̂e. N̂examro takî tî n̂ekyakn̂e oona Samaria pono komo yewtontho pona so. N̂examro yanme marha on amna mewresî karita ahyakan, kacho tî mewretken̂e.

11 On wara tî mewretken̂e kayaritomo yakan, Apa, Ahtaxexe amoro, kayaritomo ha. Awanton komo amna, Ewpratesî yeco pono kom ha.

12 Taa, on wara kes amna awya, Xutew komo yehtopo amna n̂ekatîmyas awya. Ahyawnonhîrî komo mîkyam mokyatken̂e amna yaka, Xerusaren pona. Kicicithonhîrî mîkyam xatken̂e Xerusaren pononho pen komo, kayaritomo yanwekn̂enho roro mîkyam xatken̂e kica. Oroto tak cewton komo n̂iir̂axe hara kica. Ewto wacan n̂iitîkexe, waaca yapon marha nakir̂wamexe hara.

13 On wara xa men yîhtînoko apa, on ewto ciitîketaw yîwya so, wacancetîketaw marha kayaritomo purantan tîmîhra ro mak tak naxe amn̂e okwe. Ero ke apurantanthîrî wahra mak tak n̂ehtîkes okwe.

14 Amna yecehton̂e roro amoro okre. Ero ke ahwora nas amna awanwekn̂e komo kar̂pe ehtîketaw. Ero ke on narpes amna ahyaka moxam yehtopo yekatîmtopo.

15 Amoro rma na mepor̂a karita mko, aporin pen komo yehtoponho mewrexapu. Iito tak meen̂asî moxam porin pen yehtoponho. Kayaritomo yanwekn̂e ro me n̂examro pen yehtoponho meen̂asî, arowon raconho pono komo yîwîrîman̂e me ehtoponhîrî komo marha meen̂asî. Kayaritomo kr̂a men tanwecerî, kan̂enhîrî men kica tantononhîrî komo. Ero wa karî ke tî on ewtotho nakn̂iyakn̂e anarî kayaritomo.

16 Ero ke on wara kes amna awya apa, on ewto ciitîketaw, wacancetîketaw marha, n̂etowtîkexe tak men okwe amaywenînhîrî komo, tuuna yepu xehxan komo ahnoro ha, kacho tî mewretken̂e. Ero wa kacho tî mîn narpetken̂e Ahtaxexe yaka.

17 Taa, ero yinhîrî takî tî n̂examro yeyuhtopo n̂ekpekn̂e hara kayaritomo, karita ha. On wara kacho tî n̂ekpekn̂e, Ai, Heun amoro, sowtatu yantoman̂e. Sinsai amoro hara, karita mewren̂e ro. Awakrono komo n̂enîrî marha tan okaritan, Samaria pono komo n̂enîrî. Ahnoro tuuna yepu mehxan komo n̂enîrî tan mewres ow. Esemetanmekîn me awexi xe so mak wasî.

18 Akaritan komo nîmtapotarekn̂e omaywen on̂entarî me. Amtapotachonhîrî komo wentatîkai.

19 Ero ke omaywen komo wantomekn̂e karita yepotopo poko. Yaaro mîîket ham. Kayaritomo komo yai cetowsom ro komo n̂examro xatken̂e iitononhîrî pen komo. Kayaritomo yanwetopo poko marha tî wakpamnono n̂iir̂atken̂e kica.

20 Yukurumîknonhîrî tî anarî komo xatken̂e Xerusaren pono, kayaritomon pen komo. Tuuna yepu xehxan komo meero tî nahsîyatken̂e tmaywen me so. Puranta tî nîmyatken̂e roro yîwya so tantono komo iitono komo kayaritomon ya.

21 Ero ke on wara men kacoko Xutew komo ya, On wara kesî kayaritomo, Yîtîhkacoko tak ha. On ewto ciitîkara ehcoko. Amn̂e na wîîke awya so, Taa, n̂iitîkacowpe tak ha, wîîke ha na. Ero wa kahra ka oyexitaw ciitîkara ka ehcoko, kacoko yîwya so.

22 Ero wa men kacoko yîwya so yîhcamnopîra. Ahce kacho kayaritomo komo yîwîrîman̂e komo kar̂pe n̂ehtîket ha? kacho tî mîn n̂ekpekn̂e kayaritomo Samaria pono komo yaka. Ero warai tî n̂ekpekn̂e.

23 Ero ke kayaritomo karitan takî tî n̂een̂atken̂e Heun, Sinsai, karita mewren̂e ha, n̂examro yakrono komo, ero warai komo. Enîche Xerusaren pona takî tî cetken̂e kar̂pe Xutew komo yîtîhkamexposo. Ai, Xutew komo yîtîhkacoko ha, ketken̂e tî yîwya so. Kacipara ke tî n̂examro n̂eraspetken̂e, rah ke marha.

24 Ero ke thakwa tî nîtîhketken̂e Xutew komo okwe. Kaan mîn ciitîkara xatken̂e okwe. Pahkî tî xatken̂e okwe ero pokohra kayaritomo me Tar̂u yehtopo pona roro. Pehsia komo kayaritomon tî mîk xakn̂e Tar̂u. Asakî cimn̂ipu exitaw tak kayaritomo me noro yehtoponho ero yimaw mak takî tî Kaan mîn poko xatken̂e hara. Ero wa tî xatken̂e.