Ero wa so tî xatken̂e Ixaw Yana komo, cewtonthîrî po so tî xatken̂e. Ero yinhîrî takî tî, 7-nhîrî nuun̂i po Xerusaren pona n̂esenmekyatken̂e hara. Iito re makî tî nîhtînoyatken̂e iina tîtotopo komo.

2 Cesenmekîche so takî tî Kaan ya tîmsom yakn̂itopo nakîhcetken̂e. Ero pona Kaan ya tîmsom yakn̂ipu xe xatken̂e Moises pen nmewretho yaw roro rma, Kaan yakrono ro nmewretho yaw roro ha. On wara tî xatken̂e akîhton̂e komo, Xesua, Xosatake mumutho mîk ha, noro yakno komo marha tîmsom pokono kom ha. Sorobabew marha xakn̂e akîhtorî poko Seawciew mumutho ha, noro yakno komo marha. Ero wa tî xatken̂e Kaan ya tîmsom yakn̂itopo yakîhton̂e komo.

3 N̂eraswatken̂e rma re Ixaw Yana komo anarî rowon pono komo pona. Wara rma tî Kaan ya tîmsom yakn̂itopo tî nakîhcetken̂e rma aponî ro pona. Akîhtoche ero pona takî tî nakn̂iyatken̂e roro Kporin komo ya tîmsom. Pahxaxa ro tîmsom, kokon̂i tîmsom, ero warai tî nakn̂iyatken̂e roro ero pona.

4 Kuum Yarî Warai Yaw Kenmatopo me exitaw marha tî nahwowatken̂e. Kaan Karitan yaw roro rma tî ero wara nahwowatken̂e. Takn̂itîkaxmu marha tî nakn̂iyatken̂e, Ero kaamo po ero wicakî akn̂icoko, kachonho yaw roro rma.

5 Ero yinhîrî takî tî tîmsom nakn̂iyatken̂e roro ero pona, takn̂itîkaxmu ha. Nuun̂i yepatakache roro marha tî nakn̂iyatken̂e. Mîn hak me ahwotatopo yimaw so tîmsom marha tî n̂akn̂iyatken̂e, Kaanî mtapotarî yaw roro tahwotatopo yimawno ha. Anarimaw so tanme ro makî tî tookuthîrî nîmyatken̂e hara Kporin komo ya. Ero yipu marha tî nakn̂iyatken̂e.

6 7-nhîrî nuun̂i po tî n̂ihciyatken̂e, yihcirî kaamo po ha. Ero po tî Kaan ya tîmsom yakn̂itopo n̂ihciyatken̂e. Kporin komo mîn yaponî tko ka cirihra xatken̂e.

7 Puranta tî nîmyatken̂e toopu ciin̂e komo ya, sahsamaxapu pokono komo ya marha. Erewsî marha tî narpetken̂e miya Siton pono komo yaka, Ciru pono komo yaka marha. Wooku marha tî narpetken̂e yîhyaka so, katî marha. N̂examro tî nantometken̂e setru yepu yenmekrî poko. Ribanu po tî ka ero yipu nametken̂e. Ero yinhîrî takî tî eemîtî n̂ekyatken̂e tuuna imo kwari Xope pona. Ero wa tî antomano n̂iir̂atken̂e Siru mtapotachonho yaw roro, Pehsia komo kayaritomonî mtapotachonho yaw roro ha.

8 Taa, 2 cimn̂ipu takî tî xakn̂e Kanan pona mohtoponhîrî komo, Kaan mîn ciiso mohtoponhîrî komo Xerusaren pona. 2-înhîrî nuun̂i po takî tî Kaan mîn n̂ihciyatken̂e. On warai komo tî xatken̂e ero poko, Sorobabew, Seawciew mumuru ha, Xesua, Xosatake mumuru ha, n̂examro yanan komo marha, tîmsom pokono komo, Repita komo, ahnoro mak waapa narîthonho mohxapu komo mîkyam xatken̂e, Xerusaren pona mohxapu komo. Ero yimaw takî tî Repita komo n̂iir̂atken̂e Kporin komo mîn ciin̂e komo yenîn̂e me. 20 cimn̂ipu ehxapu komo tî ero warai me n̂iir̂atken̂e, ero yopono komo marha.

9 On wara xatken̂e Kaan mîn ciin̂e yenîn̂e komo, Xesua, yumumuru komo marha, iyanan komo marha, Kacmiew, yumumuru komo marha, Xuta mumuru komo, Enatace mumuru komo. N̂examro mumuru komo xa hara, iyanan komo marha Repita komo re, ero wa tî xatken̂e Kaan mîn ciin̂e yenîn̂e komo. Iito re yîhtînon̂e me tî xatken̂e ero ciitopo poko.

10 Ero ke Kaan mîn yapon taki tî n̂iir̂atken̂e. Ero ciriche iina n̂esenmekyatken̂e tîmsom pokono komo. Kaan mîn yaka tîtotopo komo yaw tî xatken̂e poono yaw. Cemyarke marha tî xatken̂e raatî ke, cecesom ke. Iito marha tî n̂ececetken̂e Repita komo, Asape yepamtho xa. Car̂ar̂a kan̂e ke cemyarke tî xatken̂e n̂examro reha. Kporin komo poko tî n̂ewanometken̂e Tapi mtapotachonho yaw roro, Ixaw Yana kayaritomon penî mtapotachonho yaw roro.

11 Ehcakumyaka so tî n̂ewanometken̂e. Kporin komo poko tî nahwowatken̂e. On wara tî ketken̂e waano me, Kir̂wan̂he xa nai ham okre Kporin komo. Eroromero Ixaw Yana komo yakronoman̂e xa Mîk ha, ketken̂e tî. Ero yinhîrî Kporin komo poko ahwotache n̂emtaraketken̂e takî tî Ixaw Yana komo ahnoro. Tahwore tî xatken̂e Kporin komo mîn yapon cirirî ke tak. Ero ke tî n̂emtaraketken̂e.

12 Iito rma tko tî xatken̂e anarî kom hara. Tîmsom pokono komo, Repita komo, tîyanan yantoman̂e komo, ero warai komo tî xatken̂e iito. Poritomo komo tî mîkyam xatken̂e. Yihcithîrî yenîn̂enho komo tî mîkyam xatken̂e, Kaan mîntho yenîn̂enho. N̂examro tî n̂een̂atken̂e Kaan mîn yapon ciixapu. Ero ke tî nîwracetken̂e kar̂pe. Anarî komo reha tî n̂emtaraketken̂e kar̂pe tahwotarî me so hara.

13 Ero ke camkî tî xatken̂e iitono komo wara hak kacho poko. Kar̂pe so tî n̂emtaraketken̂e tahwotaxmu komo, kar̂pe so marha tî nîwracetken̂e anarî kom hara. Kar̂pe so xa tî n̂emtaraketken̂e iina esenmexapu komo. Miya ro makî tî n̂esencekn̂e wara hak kacho n̂examro ya. Ero wara tî xatken̂e.