Taa, on wara tî xatken̂e Babiron̂a pono komo ero yimaw, Nabukotonoso takî tî mokyakn̂e, n̂examro kayaritomon. Xeoiakin takî tî xakn̂e noro yewetîn̂e me. Ero ke on wara tî kekn̂e Nabukotonoso yîwya, Opurantan men tîmcoko roro yicimn̂ipuntaxera, kekn̂e tî yîwya, Xeoiakin ya. Ero ke puranta nîmyakn̂e roro Nabukotonoso ya. 3 cimn̂ipu po roro tî nîmyakn̂e puranta. Ero yinhîrî takî tî nanwekyakn̂e, puranta tîmîhra takî tî xakn̂e Nabukotonoso ya.

2 Ero yimaw takî tî Xuta rowon pona anarî yana komo n̂en̂epekn̂e Kporin komo, asak makî so. Kawtew komo, Siriu komo, Moabita komo, Amonita komo, ero warai komo tî n̂en̂epekn̂e Xuta komo waparî me. Awaparî komo men wen̂epesî oponarora awexitaw so, kekn̂e Noro emapona roro tanton komo ya, weronomano rin̂e komo ya ha. Ero wa kachonho yaw roro rma takî tî noro yipu komo n̂en̂epekn̂e.

3 Kporin komo mtapotarî yanme rma tî Xuta komo waparî komo mokyatken̂e. Ero wa tî n̂examro pen n̂iir̂akn̂e Noro, tîn̂enîrî mera tak ehtome so. Kicicme ro makî tî xakn̂e Manases pen, miyan poko rma tî xakn̂e, kicicitho poko. Ero ke tîn̂enîrî mera ehtome so tak Xuta pen komo n̂en̂epekn̂e anarî pona.

4 Kicicme exihnî komo rma tî waihkekn̂e Manases okwe mer̂pora ro mak. Noro yipu komo kamxukutho ke copoyem wara tî xakn̂e Xerusaren okwe. Ero ke noro pen yehtoponho yîhcamnopîra ro makî tî xakn̂e Kporin komo.

5 Taa, miya rma tî nai Xeoiakin yehtoponho. Ahnoro rma nasî tmewreso karita yaw, Xuta Kayaritomon Komo Yehtoponho, kacho yaw.

6 Ero yinhîrî takî tî tporin pen komo yakro nîwînîkyakn̂e Xeoiakin. Ero ke yumumuthîrî takî tî xakn̂e kayaritomo me yîhretawno me hara. Xoakin tî xakn̂e yumumuthîrî yosotî.

7 Ero yimaw takî tî Exitu pono komo kayaritomon mokuhra xakn̂e. Tîrowon po makî tî xakn̂e. Babiron̂a pono komo kayaritomon tî nahsîyakn̂e yîrowonthîrî. Exipsiu Yewku yecihtawno tî nahsîyakn̂e miya rorono Ewpratesî kwaka rorono. Ero wa tî Exipsiu komo kayaritomon rowontho nahsîyakn̂e Nabukotonoso hara. Ero ke tî mokuhra xakn̂e Exitu pono komo kayaritomon.

8 Taa, on wara tî xakn̂e Xoakin, 18 cimn̂ipu tî xakn̂e noro yewrutoponho kayaritomo me ecir̂ataw. 3 nuun̂i makî tî xakn̂e kayaritomo me. Xerusaren tî xakn̂e noro yewton. Neusta tî xakn̂e yînocwan yosotî. Ewnatan yemsîrî tî mîk xakn̂e Neusta, Xerusaren pono yemsîrî.

9 Kicicme marha tîxakn̂e Xoakin Kporin komo ya okwe. Tîîmînhîrî pen wara rma tî xakn̂e kica.

10 Ero yimaw takî tî mokyatken̂e Nabukotonoso sowtatun komo Xerusaren pono komo waparî me. Ewto tî mamcetken̂e epatakara ro mak ehtome so ero pono komo.

11 Ero yinhîrî takî tî Nabukotonoso rma tak mokyakn̂e iitono komo waparî me. Pahkî tî Xerusaren mamcetken̂e noro sowtatun komo.

12 Ero yinhîrî ewto poi takî tî n̂epatakekn̂e rma Xoakin Nabukotonoso yaka. Yînocwan, anton komo, maywen komo kayaritomo me cehsom kom ha tî, sowtatu yenîn̂e komo, ero warai komo tî n̂epataketken̂e Nabukotonoso yaka. 8 cimn̂ipu tî xakn̂e ero yimaw kayaritomo me Nabukotonoso yehtoponho. Epatakache noro pen takî tî nahsîyakn̂e Nabukotonoso, nahruyakn̂e marha kahrutopo yaka.

13 Ero yinhîrî takî tî Kporin komo mîn yawnonho mko naatîkekn̂e Nabukotonoso cepethîkemu mko. Kayaritomo mîn yawnonho mko marha tî naatîkekn̂e cepethîkemu mko. Ooru ciixapu mko tî nîknoyakn̂e Kporin komo mîn yawnonho, Saromaw pen n̂irpotho mko ha. Kporin komo mtapotachonho yaw roro rma tî ero wa n̂iir̂akn̂e.

14 Xerusaren pono pen komo marha tî naar̂akn̂e. Antomano rin̂enho komo, sowtatu komo marha, ero warai komo tî naar̂akn̂e. 10.000 tî naar̂akn̂e. Sahsamaxapu pokono ro komo marha tî naar̂akn̂e, kuripara ciin̂e ro komo marha. Emyawnomnî komo makî tî nînomyakn̂e Xuta rowon po rma.

15 Xoakin marha tî naar̂akn̂e Babiron̂a pona. Kayaritomo nocwan, yipici komo, antomano rin̂e komo, karitî me cehsom komo, noro yipu pen komo marha tî naar̂akn̂e Xerusaren pononho pen komo Babiron̂a pona.

16 Sowtatu pen komo marha tî naar̂akn̂e ahnoro, 7.000 ha tî. Karitî komo ahnoro tî naar̂akn̂e, sowtatu me cehsom kom ha. Sahsamaxmu pokono komo marha tî naar̂akn̂e, kuripara ciin̂e komo marha, 1.000 ha tî. Noro yipu komo tî naar̂akn̂e Nabukotonoso Babiron̂a pona.

17 Iito rma cexitaw Nabukotoso Xoakin tamru takî tî n̂iir̂akn̂e kayaritomo me Xoakin pen yekenho yaka hara. Matan̂ias tî xakn̂e noro yosotî, Xoakin tamru yosotî. Anarî me tko tî noro nosohcekn̂e hara Nabukotonoso, Setekias me tî nosohcekn̂e.

18 21 cimn̂ipu tî xakn̂e Setekias kayaritomo me ecir̂ataw. 11 cimn̂ipu tî xakn̂e kayaritomo me. Xerusaren tî xakn̂e noro yewton. Amutaw tî xakn̂e noro nocwan yosotî. Xeremias yemsîrî tî mîk xakn̂e, Ribna pono yemsîrî.

19 Noro marha tî xakn̂e kicicme Kporin komo ya. Xoakin yehtoponho yaw roro rma tî xakn̂e okwe.

20 Nîrwonakn̂e Kporin komo Xerusaren pono komo poko, Xuta komo poko ahnoro. Ero ke pahkî exiche so takî tî n̂examro pen n̂en̂epekn̂e tîhyai ro mak okwe. Ero yinhîrî takî tî on wara xakn̂e hara Setekias, Nabukotonoso takî tî nanwekyakn̂e noro hara. Ero wa tî xakn̂e noro okwe.