Ero yinhîrî takî tî on wara xakn̂e Xosias, Xuta komo kayaritomon, tmaywen komo tî n̂en̂epekn̂e an̂ikno ritohme. On wara tî kekn̂e yîwya so, Poritomo komo an̂ihcoko, Xuta komo, Xerusaren pono komo marha, kekn̂e tî yîwya so. Ero ke an̂ihso tî cetken̂e. Ero ke mokyatken̂e.

2 Ero yimaw takî tî Kporin komo mîn yaka cekn̂e kayaritomo. Noro yakro tî cetken̂e kîrkomo Xuta komo ahnoro. Xerusaren pono komo marha tî cetken̂e. Tîmsom pokono komo, weronomano rin̂e komo, ahnoro Xuta komo, cemyawnoyem komo, emyawnomnî komo marha. Iina esenmekîche so Kaan Karitan takî tî nîmtapotarekn̂e kayaritomo, Ow men ewetîcoko awakronmachome so owya, kachonho ha. Yîn̂entarî me so tî nîmtapotarekn̂e ahnoro Kaan Karitan yawno, Iwkias n̂een̂akn̂e Kporin komo mîn yaw ero yawno ha.

3 Ero yinhîrî takî tî on wara xakn̂e kayaritomo, mapata wararî tî n̂ecececekn̂e. On wara tî kekn̂e esenmexapu komo n̂entarî me, On wara was ow, Kporin komo mtapotarî wewehcasî roro. Yîwya kpanatanmetopo wewehcasî, kîtwermacho marha ahnoro wewehcasî on yaw mewrexapu. Tahwore xa wewehcasî, ewetî xe ro mak wasî, kekn̂e. Ero wara kacho yentache esenmexapu komo ya on wara takî tî ketken̂e n̂examro hara, Ero wa xa marha yîmtapotachonhîrî n̂ewehcasî amna hara. Yaaro xa tan amna kesî esemîknopîn me ro mak, ketken̂e tî.

4 Ero yinhîrî takî tî on wara xakn̂e kayaritomo, Iwkias komo tî nantomekn̂e, Kaan yaka cewomsom. Kaan mîn yenîn̂e komo marha tî nantomekn̂e, Kaan mîn metatan yenîn̂e komo marha. On wara tî kekn̂e yîwya so, Kaan mîn yai tak aacoko Baaw poko ehtoponhîrî komo yanme ciixapu mko, Axera warai me ciixapu mko marha, kah yawno komo poko ehtoponhîrî yanme ciixapu mko marha, kekn̂e. Ero ke ero yipu mko takî tî naar̂atken̂e Xerusaren mkai, Ketîron yecihtaka n̂he. Iina takî tî nakn̂iyakn̂e. Ero yinhîrî takî tî wemronhonhîrî naar̂akn̂e Betew pona.

5 Ero yinhîrî takî tî kotoporem yakn̂in̂e komo takî tî n̂en̂epekn̂e yîmîn komo yaka hara, ciixaputho tawakeretoponhîrî me akn̂in̂e komo. Xuta kayaritomon komo n̂iritho mîkyam xatken̂e ero pokono me. Îh pona so kotoporem yakn̂in̂e me ehcoko Xerusaren panawno po so, ahnoro Xuta komo yewton panawno po so, ketken̂e tî yîwya so okwe. Ero pokono komo tî n̂en̂epekn̂e yîmîn komo yaka. Ero wa xa marha tî n̂en̂epekn̂e Baaw poko ehtoponhîrî me kotoporem yakn̂in̂e komo. Mîn hak pokono me tî xatken̂e. Kaamo pokono me, nuun̂i pokono me, xir̂ko pokono me, miyan komo pokono me rma, kah yawno pokono me, ero yipu mko pokono me kotoporem nakn̂iyatken̂e. Ero pokono komo tî n̂en̂epekn̂e yîmîn komo yaka hara.

6 Kporin komo mîn yaw marha tî xakn̂e Axera warai me enporixapu. Ero marha tî narpekn̂e en̂exa Ketîron yecihtaka. Iito marha tî nakn̂iyakn̂e. Yihxirothîrî takî tî naposokekn̂e pin̂ipici me cehso ro. Ero takî tî pahyakn̂e iitononhîrî pen komo yocho pore.

7 Kporin komo mîn yaw marha tî xakn̂e amtakpo mko, kîrkomo yamtakpon. Etpoko cehsom komo tî mîkyam xatken̂e kica ponaro cehtopo komo yanme. Iito marha tî wooxam komo kahyatken̂e poono Axera yamtakpon yawno me. Ero wacantho tî n̂ixkekn̂e kr̂a Xosias, amtakpo wacantho.

8 On wara marha tî xakn̂e Xosias, kotoporem yakn̂in̂e komo nan̂ikyakn̂e mîn hak ewto pono komo, ero pokono mera tak ehtome so. Îh pono mko takî tî nîwîrîmekn̂e kotoporem yakn̂itoponho ero mko pokohra tak ehtome so. Xeba n̂ixa rorono komo nîwîrîmekn̂e miya rorono komo rma Behseba pona rorono komo rma. Xerusaren po marha tî xakn̂e îh pono mko kotoporem yakn̂itopo. Xoswe Metatan mîtwo rma tî xakn̂e, ewto yenîn̂e metatan mîtwo poowa n̂ixa. Ero yipu mko tî n̂ixkapekn̂e Xosias kotoporem yakn̂itoponho mko.

9 On wara tko tî xatken̂e n̂examro, îh po so kotoporem yakn̂in̂enho komo, Kporin komo ya tîmsom yakn̂itopo yaka tohra tî xatken̂e, Xerusaren pono yaka tohra. Kaan mîn yenîn̂e komo yuru rma re nokyatken̂e wahrututpamnî, tîyanan komo yakro rma tî ero yipu nokyatken̂e.

10 Ero yinhîrî takî tî Topece nîwîrîmekn̂e, Inon pen mumutho yewkuru yecihtawno ha. Ero wa n̂iir̂akn̂e tîmxîkrî komo yakn̂ipîra tak ehtome Ixaw yana komo Moroke ya tîmsom me.

11 Ero yinhîrî takî tî kawaru warai me ciixaputho kr̂a tak nar̂mapekn̂e Kporin komo mîn metatawnonho. Xuta kayaritomon komo nîmîtho mîn xakn̂e kaamo ya. Waaca yaw tî xakn̂e Natan-Mereke yamtakpon mîtwo, kayaritomo maywen yamtakpon mîtwo. Iito marha tî xakn̂e tarara mko kaamo ya tîmxapu kica. Ero mko kr̂a nakn̂ipekn̂e. Ero wa n̂iir̂akn̂e Xosias.

12 Tîmsom yaponho mko marha tî n̂ixkekn̂e Kporin komo mîn meretwononho, Akas yamtakpon mîtwononho. Xuta kayaritomon komo n̂irpotho mko mîn xakn̂e. Kporin komo mîn roron pononho marha tî n̂ixkekn̂e tîmsom yaponho, Manases pen n̂irpotho. Asakî tî xakn̂e Kporin komo mîn roron, ero pononho ahnoro tî n̂ixkekn̂e yakenonhîrî. Yixkaxapu takî tî nahxikyakn̂e kr̂a pin̂ipici me cehso ro. Ahxixapu takî tî pahyakn̂e aporî kwaka, Ketîron kwaka.

13 Îh pono mko marha tî nîwîrîmekn̂e Xerusaren panawno komo, resce n̂ixanî mko. Iito tî xakn̂e îîpî, Kicicitho Yîpîn, kacho. Ero mîtwononho marha tî nîwîrîmekn̂e îh pononho, suu n̂ixanînho ha. Saromaw pen n̂iritho mko mîn xakn̂e, Ixaw Yana kayaritomon pen n̂iritho. Astaroce pokononho me tîmsom yakn̂itopo mîn xakn̂e anarî, Siton pono komo yekiciciretopo ha. Kemos pokononho me tîmsom yakn̂itopo marha tî xakn̂e iito. Moabita komo yekiciciretopo tî mîn xakn̂e Kemos. Miwkon pokononho me tîmsom yakn̂itopo marha tî xakn̂e iito, anarî hara. Amonita komo yekiciciretopo tî mîn xakn̂e Miwkon ha. Ero warai komo kr̂a nîwîrîmekn̂e Xosias, ero pokohra tak ehtome so iitono komo.

14 Mapata warai mko marha tî nakuhr̂apekn̂e ponaro ehtoponhîrî komo yakro yîmtapotacho me ciixapunhîrî. Mîk hak warai me ciixaputho mko marha tî namekn̂e. Ekenhîrî pona so tî nar̂mekn̂e pahxan pen komo yochotho.

15 Betew pono marha tî macakekn̂e tîmsom yakn̂itoponho. Mîîmocitho marha tî n̂ixkekn̂e iitono, Xeroboaw N̂ebace pen n̂irpotho. Ixaw Yana komo panatanmekyakn̂e kicicitho poko, noro pen n̂iritho mîn xakn̂e mîîmoci. Nakn̂iyakn̂e marha takî tî yixkaxaputho. Yihxirothîrî takî tî nahxikyakn̂e pin̂ipici me cehso ro. Axera kuknontho me enporixapu marha tî nakn̂iyakn̂e weewe, iina ciixapunhîrî.

16 Ero yinhîrî takî tî n̂etaknamekn̂e Xosias. Pahxan pen komo yocho yahrutopo mko tî n̂een̂akn̂e. Ero ke iitono takî tî nowpekn̂e iyochîrî. Ero mko takî tî nakn̂iyakn̂e tîmsom yapontho pona rma yîwîrîmachome kr̂a. Kporin komo mtapotachonho yaw roro rma tî nakn̂iyakn̂e, Kaan yakrononho penî mtapotachonho yaw roro rma.

17 Ero yinhîrî takî tî anarî pen yocho kuknon n̂een̂akn̂e xa hara Xosias, toopu ha. Onoke yocho kuknon mîn hara? kekn̂e. On wara tî n̂eyukyatken̂e iitono komo, Kaan yakrono ro pen yocho mîn. Xuta rowon poi mokyakn̂e oona, Ero wa men on n̂etwîrîmesî pahxaro, kekn̂e tîmsom yapon poko rma. Noro yocho mîn. Yîmtapotachonhîrî yaw roro rma mîwîrîma oroto, ketken̂e tî yîwya.

18 Ai ha, kekn̂e takî tî Xosias, taa, n̂expe noro pen yocho reha. Pokohra ro mak ehcoko. Ero ke noro pen yocho towhra tî xatken̂e. Samaria poi mohxapunhîrî pen yocho towhra marha tî xatken̂e weronomano rin̂enho pen yocho.

19 Ero yinhîrî takî tî Samaria pono mko pore tî cekn̂e Xosias ewto mko pore. Tîmsom yaponî mînî mko tî n̂ixkekn̂e ahnoro îh pononho. Ixaw Yana kayaritomon pen komo n̂iritho mko mîn xakn̂e, Kporin komo yîrwonmetoponho okwe. Ero yipu mko tî n̂ixkapetîkekn̂e ahnoro. Betew pononho ka n̂ixkekn̂e ero wa xa marha tî n̂ixketken̂e hara ahnoro îh pononho tîmsom yaponî mko ha.

20 Îh po so rma tî xatken̂e kotoporem yakn̂in̂e komo. N̂examro pen tî waihkekn̂e ahnoro kotoporem yakn̂itoponho pona so rma. Pahxan pen komo yocho marha tî nakn̂iyakn̂e iitono pona so. Ero wa tî ciino n̂iir̂akn̂e Xosias. Ero yinhîrî Xerusaren pona takî tî n̂etîramekn̂e hara.

21 Ero yinhîrî takî tî on wara kekn̂e Xosias Xuta komo ya, Ai oyakno komo, Kwatotoponhîrî kukmacho me tak ceseresmacerî. Kporin komo Kaan ponarono me ceseresmacerî. On yaw nasî tmewreso karita yaw, Ow men ewetîcoko awakronomachome so awya, kachonho yaw, ero wara rma ceseresmacerî.

22 Ero ke ero wa takî tî n̂eseresmetken̂e. Ero wara eseresmara ro makî tî xatken̂e n̂examro porin pen komo Ixaw Yana town̂e komo exitaw, Ixaw Yana kayaritomon pen komo exitaw, Xuta kayaritomon pen komo exitaw marha. Noro yipu komo exitaw ero wara eseresmara ro makî tî xatken̂e Kwatotoponhîrî kukmacho me.

23 18 cimn̂ipu exitaw kayaritomo me Xosias yehtoponho ero wa tî n̂eseresmetken̂e Kwatotoponhîrî kukmacho me ha. Xerusaren po tî n̂eseresmetken̂e Kporin komo yeepatai.

24 Worokyam pokono komo marha tî waihkekn̂e Xosias, yaskomo komo marha. Mîk hak warai ciixapu mko marha tî nakuhr̂apekn̂e, mîîmo kurun komo me ciixaputho kom ha. Ahnoro makî tî nar̂mekn̂e kr̂a kicicitho mko, Xuta rowon pononho mko, Xerusaren pononho mko marha. Ero wa tî xakn̂e kpanatanmetopo yewetîtîkachome. Karita tî n̂een̂akn̂e Iwkias Kporin komo mîn yaw, ero yewetîtîka xe xa tî xakn̂e okre Xosias.

25 Kporin komo wece xa takî tî n̂etakn̂amekn̂e Xosias. Moises pen ya kpanatanmetopo yaw roro xa n̂etaknamekn̂e. Tahwore xakn̂e Kaan yewetîtopo poko, n̂ekaricetîkekn̂e ero poko okre. Anarî exihra ro makî tî xakn̂e noro warai kayaritomo, noro yexihnawnonho pen komo. Noro warai exihra marha tî xakn̂e kayaritomo noro mahyawno kom hara. Noro makî tî xakn̂e ero wara okre.

26 Wara rma etîrwoxinkara rma tî xakn̂e Kporin komo. Nîrwonakn̂e rma Xuta komo poko. Manases pen tî xakn̂e yîrwonmekn̂enho me xa kicicme xa cexirî ke. Ero ke nîrwonakn̂e rma.

27 Ero ke on wara tî kekn̂e Kporin komo, Xuta pen komo wen̂epesî kr̂a miya on̂enîrî mera tak ehtome so. Ixaw Yana komo wen̂epekn̂e ero wara xa marha Xuta komo wen̂epes hara. On ewto cma re men̂ekekn̂e oyewton me, Xerusaren. On marha wahsîyakn̂e mîîmo. Oyosotî yeken me tak nas on mîîmo, Kporin komo mîn, kacho me ha, wîîkekn̂e cma re. Wara rma wahsîpînkesî kr̂a, kekn̂e takî tî. Ero wa tî kekn̂e Kporin komo.

28 Miya rma tî nai Xosias yehtoponho. Ahnoro rma nasî tmewreso karita yaw, Xuta Kayaritomon Komo Yehtoponho, kacho yaw.

29 Kayaritomo me rma ka exitaw Xosias Exitu pono komo kayaritomon takî tî cekn̂e Ewpratesî yecihtaka. Paraw N̂eko tî mîk xakn̂e noro yosotî. Asiria pono komo kayaritomon yakro etar̂maxi tî cekn̂e. Paraw yakro etar̂maxi tko tî cekn̂e Xosias. Mexito po tî n̂etar̂metken̂e. Xosias penî tko tî waihkekn̂e okwe Paraw N̂eko.

30 En̂exa takî tî Xosias pen maywenînho komo tî okoputhîrî naar̂atken̂e tarara yaw Xerusaren pona. Yîrowonî ro pona rma tî nahruyatken̂e noro yokoputho yahrutopo ro yaka. Ero wa tî xakn̂e Xosias pen okwe. Ero yinhîrî takî tî yumumuthîrî nîhkapetken̂e Xuta komo kayaritomo me. Yîîmînhîrî pen retawno me tî n̂iir̂atken̂e kayaritomo me. Xoakas tî mîk xakn̂e yumumuthîrî yosotî.

31 23 cimn̂ipu tî xakn̂e Xoakas kayaritomo me ecir̂ataw. 3 nuun̂i makî tî xakn̂e kayaritomo me. Xerusaren tî xakn̂e noro yewton. Amutaw tî xakn̂e yînocwan yosotî. Xeremias yemsîrî tî mîk xakn̂e, Ribna pono yemsîrî.

32 Kicicme tko tî Xoakas xakn̂e Kporin komo ya. Tporin pen komo wara rma tî xakn̂e kica.

33 Ero yinhîrî takî tî noro pen naar̂akn̂e Paraw N̂eko Hibra pona, Amace rowon pona. Iina tî nahruyakn̂e kahrutopo yaka kayaritomo mera tak ehtome Xerusaren po. Ero yimaw marha tî on wara kekn̂e Paraw N̂eko Xuta komo ya, Ow men epemacoko prata, 100 tarentu wicakî. Ooru marha tîmcoko owya 1 tarentu wicakî, kekn̂e tî.

34 Xerusaren pona takî tî mokyakn̂e Paraw N̂eko. Anarî takî tî n̂iir̂akn̂e Xuta komo kayaritomon me. Eriakin tî, Xosias pen mumutho. Anarme tî noro nosohcekn̂e, Xeoiakin me ha tî. Ero yinhîrî Exitu pona tî cekn̂e hara Paraw N̂eko. Xoakas tî naar̂akn̂e iina. Iito rma tî waihyakn̂e noro pen okwe. Ero wa tî xakn̂e Xoakas pen.

35 Ero yinhîrî takî tî Xeoiakin nîmyakn̂e prata Paraw ya, ooru marha tî nîmyakn̂e, yîn̂etacithîrî wicakî. Ero ke Xuta komo ya takî tî nîmpekn̂e Xeoiakin ooru, prata marha. Tupurantayem komo ya tî nîmpekn̂e mer̂pora n̂he, yupurantamnî komo ya wahra n̂he makî tî nîmpekn̂e. Ero wa tî puranta nahsîyakn̂e Xeoiakin Paraw ya tîmtome.

36 25 cimn̂ipu tî xakn̂e Xeoiakin yewrutoponho kayaritomo me ecir̂ataw. 11 cimn̂ipu tî xakn̂e kayaritomo me. Xerusaren tî xakn̂e noro yewton. Sebita tî xakn̂e yînocwan yosotî. Petaias yemsîrî tî mîk xakn̂e Huma pono yemsîrî.

37 Kicicme tko tî Xeoiakin xakn̂e Kporin komo ya okwe. Tporin pen komo wara rma tî xakn̂e kica. Ero wa tî xakn̂e.