Taa, Xosias yehtoponho tan wekatîmyas hara. 8 cimn̂ipu tî xakn̂e noro yewrutoponho kayaritomo me ecir̂ataw. 31 cimn̂ipu tî xakn̂e kayaritomo me. Xerusaren tî xakn̂e noro yewton. Xecita tî xakn̂e yîson yosotî. Ataias yemsîrî tî mîk xakn̂e, Boskace pono yemsîrî.

2 Kir̂wan̂he tî xakn̂e Xosias Kporin komo ya. Tporin pen yehtoponho yaw roro rma tî xakn̂e, Tapi pen yehtoponho yaw roro. Etowra ro makî tî xakn̂e, kari n̂ixan wara, poowa n̂ixan wara marha.

3 Ero yinhîrî takî tî, 18 cimn̂ipu exitaw tak kayaritomo me noro yehtoponho tmaywen n̂en̂epekn̂e Kporin komo mîn yaka. Sapan tî mîk n̂en̂epekn̂e, Asarias mumuru, Mesuraw parî. Kayaritomo karitan mewren̂e tî mîk xakn̂e Sapan.

4 On wara tî kekn̂e yîwya, Iwkias yaka etoko, Kaan yaka cewomsom yaka. On wara kasko yîwya, Puranta tak yukuknomakî Kporin komo mîn yaka ehxapu. Metata yenîn̂e komo nahsîyaxe Kporin komo mîn yaka mohxapu komo nîmîtho, ero yukuknomakî.

5 Yukuknomache n̂examro tak nîmcowpe Kporin komo mîn yakir̂waman̂e yenîn̂e komo ya cetapickaxmu komo yepemacho, akir̂waman̂e komo yepemacho ha.

6 Sahsamaxapu pokono komo n̂epemacowpe, toopu yenporin̂e komo marha, ahce warai na ciin̂e komo marha. Ero pona marha tak sahsamaxapu nahsîcowpe, weewe, toopu marha.

7 Ciisom yahsîche yîwya so, Ero wicakî men wepema ciisom yepetho, kahra rma n̂ehcowpe. Esemîknon komo mîkyam, ero ke tanme ro mak nahsîcowpe, kasko Iwkias ya, kekn̂e tî Sapan ya.

8 Ero ke ero wa kaxi takî tî cekn̂e Sapan Iwkias yaka. Ero poko tîmtapowataw on wara marha tî kekn̂e Iwkias Sapan ya, Kaan Karitan ween̂e Kporin komo mîn yaw, kpanatanmetopo kom ha. On ha, kekn̂e tî yîwya. Sapan ya takî tî nîmyakn̂e yîn̂enîrî. Ero ke takî tî n̂een̂akn̂e Sapan.

9 Ero yinhîrî takî tî kayaritomo yaka n̂etîramekn̂e hara Sapan, kayaritomo karitan mewren̂e ha. On wara tî kekn̂e yîwya, Apa, puranta takî tî nukuknomace Kporin komo mîn yawnonho. Ero yakir̂aman̂e komo ya tî nîmce, akir̂waman̂e komo yenîn̂e komo ya marha, kekn̂e tî.

10 Ero yinhîrî takî tî on wara kekn̂e hara Sapan, Apa, on nîîm Iwkias owya karita, kekn̂e tî. Ero ke takî tî nîmtapotarekn̂e kayaritomo n̂entarî me.

11 Kpanatanmetopo tî mîn xakn̂e karita yaw mewrexapu. Ero yipu yencetaw tpononthîrî takî tî nahxaikekn̂e Xosias ceserepokarî ke.

12-13 Ero ke iitono komo tak n̂en̂epekn̂e Kporin komo mtapotarî yentachome. On warai komo tî n̂en̂epekn̂e, Iwkias, Kporin komo ya cewomsom mîkî, Aikaw, Sapan mumuru mîk ha, Akbo, Mikaias mumuru mîk ha, Sapan, kayaritomo karitan mewren̂e mîk ha, Asaias, kayaritomo yanton mîk ha. N̂examro tî n̂en̂epekn̂e Kaanî mtapotarî yekatîmn̂e yaka. On wara kacoko yîwya, kekn̂e yîwya so, On wara kesî kayaritomo awya, Ahce wa na kiir̂atu kopi Kporin komo? Ahce wa na Xuta komo n̂iir̂a miyan komo rma? Nîrwona xa tak ha na Noro kpoko so kopi. On karita yawno yewetîra xatken̂e kîîm pen komo. Ero wa men ehcoko, kachonho yewetîra xatken̂e, on yawno ha, kacoko yîwya, kekn̂e tî kayaritomo yîwya so.

14 Ero ke Urta yaka tî cetken̂e, kweronoman̂e yaka. Wooxam tî mîk xakn̂e Uwta, Sarun pic ha. Cikpa mumuru tî mîk xakn̂e Sarun, Aras parî ha. Kayaritomo ponon yatpon̂e mîk xakn̂e Aras. Xerusaren pono tî mîk xakn̂e Uwta, ewto raconho pono, mehxan pono. Noro ya tî n̂ekatîmyatken̂e kayaritomo mtapotachonho.

15-16 Ero ke on wara tî n̂eyukyakn̂e Uwta, On wara kacoko awen̂epen̂enhîrî komo ya, on wara tî nîîke Kporin komo awya, On ewto pono komo men wemetanmekyas amn̂e. Karita yaw n̂een̂akn̂e kayaritomo, ero wa kacho yaw roro men wemetanmekyasî.

17 On wara exirî ke so mak ero wa n̂examro pen wiir̂asî, oyahsîpînketken̂e okwe. Anarî ro komo yereporen̂e me kotoporem nakn̂iyatken̂e, ponaro cehtopo komo yereporen̂e me okwe. Ero wara tî xatken̂e orwonmekn̂e me. Ero ke kîr̂wonasî xa tak amn̂e on pono komo poko. Etîrwoxinkan me ro mak tak kîrwonasî, nîîke awya, kacoko yîwya.

18-19 On wara tko kacoko hara Xuta komo kayaritomon ya, Kporin komo mtapotarî entatko, kan̂enho ya, On wara nîîke Kporin komo awya, ponaro Ixaw Yana komo yehtopo, Omtapotarî mentai on pono komo yemetanmetopo pokono. Tantononhîrî komo tak n̂exponkexe okwe amn̂e. N̂etwîrîmexe ro mak okwe waipîn komo rma, kacho mentai. Ero ke on wara mîîkekn̂e, Yaaro, kicicitho mak amna okwe, mîîkekn̂e. Meserepokai ro mak, apononthîrî mahxaikai, mîwratai marha owero ro. Ero wa awexirî ke amtapotarî wentai.

20 Ero ke kaar̂as amn̂e aporin pen komo yaka. Cerepore awexitaw rma mîwaiyasî. Tantono komo yemetametopo yenîhra mas amoro reha. N̂examro pen wemetanmetîkesî ro mak okwe, wara rma ero yipu enîhra reha tko mas amoro, kacoko yîwya, kekn̂e. Ero wa tî kekn̂e Uwta kayaritomo n̂en̂epetho komo ya. Ero ke yîmtapotarî yekatîmso tî cetken̂e hara kayaritomo yaka. Ero wa tî cetken̂e.