Taa, on wara tî xakn̂e Manases, 12 cimn̂ipu makî tî xakn̂e noro yewrutoponho kayaritomo me ecir̂ataw. Pahkî tî xakn̂e kayaritomo me, 55 cimn̂ipu. Xerusaren tî xakn̂e noro yewton. Epsiba tî xakn̂e noro nocwan yosotî.

2 Kicicme ro makî tî Manases yehtopo n̂een̂akn̂e Kporin komo okwe. Pahxa tî mîk hak rowon pono komo xatken̂e Kanan po. N̂examro pen tî waihkapekn̂e Kporin komo Ixaw Yana komo ya, n̂examro pen wara rma tî xakn̂e Manases pen okwe.

3 Tîmsom yakn̂itopo takî tî n̂iir̂akn̂e hara îh pona so. Tîîmînhîrî pen n̂ixkatho tî mîn n̂iir̂akn̂e xa hara kica. Baaw ya tîmsom yapon marha tî n̂iir̂akn̂e yaake. Axera kuknon me marha tî n̂irpekn̂e weewe mko. Akabe pen tî xakn̂e kicicitho poko Ixaw Yana komo kayaritomonho pen ero wara rma tî xakn̂e Manases hara kica. Oporin xa amoro, kekn̂e tî kah yawno mko poko kica. Ero yipu mko ya tîmsom marha tî nîmyakn̂e.

4 Mîk hak ya tîmsom yapon marha tî n̂iir̂akn̂e Kporin komo mîn yaka rma kica. On wara tî kekn̂e Kporin komo, Xerusaren wiir̂asî oyosotî yekenî ro me, kekn̂e tî. Iina rma tî n̂iir̂akn̂e Manases mîk hak ya tîmsom yapon.

5 Kah yawno mko ya tîmsom yapon tî n̂irpekn̂e Kporin komo mîn roron po rma kica, asakno rorono pona rma. Yaake tî n̂irpekn̂e.

6 Tumumuthîrî cik marha tî nakn̂iyakn̂e okwe ponaro cehtopo ya tîmsom me. Erem poko tî xakn̂e, yaskomo komo mtapotarî marha tî n̂encekn̂e. Miyan poko rma tî xakn̂e kicicitho poko, kicicitho me ro makî tî xakn̂e Manases Kporin komo ya. Ero wa takî tî Noro nîrwonmekyakn̂e okwe.

7 Kporin komo mîn yaka rma tî n̂iir̂akn̂e mmik hak warai me ciixaputho okwe. Pahxa on wara tî kekn̂e Kporin komo ero poko, tîmîn poko, Oyosotî yeken me on wiir̂asî omîn. Xerusaren men̂ekekn̂e oyewtonî ro me. Anarî men̂ekara wîxakn̂e Ixaw Yana komo yewton, anarî tribun yewton men̂ekara. Ero ke on ewto xa wiir̂asî oyosotî yekenî ro me eroromero.

8 Ixaw Yana komo cirihra tak wasî twaimamsom me on roowo poi, n̂examro porin pen komo ya wîmyakn̂e, on poi ha. Ero wa wasî n̂examro poko owya panatanmetopo komo yewetîn̂e me exitaw so mak ha tko. Panatanmetopo komo Moises pen n̂ekatîmyakn̂e yîwya so, Ero yewetîtîketaw mak yîwya so tantono ro me tak ciino wiir̂asî, kekn̂e tî Kporin komo yîwya so pahxa.

9 Ero wa kachonho ponarora ro makî tko tî xatken̂e okwe. Manases yanme kicicme xa takî tî n̂ehtîketken̂e Xuta komo kica. Kanan pono pen komo waihkapekn̂e Kporin komo Ixaw Yana komo ya, n̂examro yopo tî xatken̂e kicicitho me xa okwe.

10-11 Ero ke Kporin komo takî tî nîmtapowakn̂e Xuta komo yemetanmetopo poko. Tpoko weronomano rin̂e komo mtari tî nîmtapowakn̂e. On wara tî kekn̂e yîwya so, Kicicme ro mak nasî Manases okwe, Xuta komo kayaritomon. Pahxa tan xatken̂e Amohew komo. Kicicme rma re xatken̂e. N̂examro yopo ro makî tko nasî Manases, kicicme xa tak. Mîk hak warai me ciixaputho komo poko tahwotaxmu me Xuta komo panatanmekyasî kica.

12 Ero ke on wara kesî Kporin komo, ponaro Ixaw Yana komo yehtopo, Xerusaren pono komo wemetanmetîkesî ro mak tak amn̂e. Ahnoro Xuta komo yemetanmetopo nai amn̂e okwe oyanme rma. Ero yipu yentan̂e komo panarî tak nîyorwasî ceserepokarî ke so.

13 Pahxa Samaria pono komo yehtopo wukuknomekn̂e, ehyatkawnon yukuknomacho warai ke. Akabe pen yepamtho komo yehtopo marha wukuknomekn̂e tmackape exirî yukuknomacho warai ke. Ero yipu ke rma tak Xerusaren tak wukuknomes hara. Iitono mko wakuhr̂apetîkesî, ewto pona ciixaputho mko ha. Tmemehse cehso ro mak tak n̂ehtîkesî. Sekeseke tîtkesî paayu yackoroketaw, eronhîrî takî cewnapesî, ero wa xa marha Xerusaren wiir̂asî.

14 Oyanan komo rma natu ero yimaw, etîmtoxapu komo ciki mak, n̂examro pen meero wahsîpînkesî. Wahsîpesî yiixatî pîn komo ya. Tîîxatî pîn komo n̂emetanmekrî me mak naxe okwe.

15 Ero wa wiir̂asî kicicme ro mak ehtopo komo yenîrî ke owya. Orwonmekn̂e me ro mak xatken̂e kica mehxa ro rma. Ero wara xatken̂e porin pen komo. Ero wara xa marha naxe epamthîrî kom hara, kekn̂e tî tîmtapotarî yekatîmn̂e komo mtari. Ero wa tî kekn̂e Kporin komo.

16 On wara marha tî xakn̂e Manases okwe, kicicme exihnî pen komo tî waihkekn̂e mer̂pora ro mak okwe. Kamxukuthîrî komo ke yukmaxapu wara tî xakn̂e Xerusaren miya roro, xiya roro marha. Xuta komo panatanmekyakn̂e kicicitho poko, Kporin komo n̂enîrî mexan pîn poko ha. Ero wa kicicme cehtoponhîrî yîhreman̂e me tî xakn̂e hara, kir̂wan komo waihkarî ke okwe.

17 Taa, miya rma nai Manases yehtoponho, ahce wa na ciino ritoponho, kicicme ehtoponhîrî, ahnoro nasî tmewreso karita yaw, Xuta Kayaritomon Komo Yehtoponho, kacho yaw.

18 Ero yinhîrî takî tî nîwînîkyakn̂e Manases pen tporin pen komo yakro. Okoputhîrî tî nahruyatken̂e Usa natîrî cheka, yîmîn mîtkoso rma. Ero yinhîrî takî tî yumumuthîrî xakn̂e kayaritomo me tîîmînhîrî pen retawno me hara. Amon tî xakn̂e yumumuthîrî yosotî.

19 Taa, 22 cimn̂ipu tî xakn̂e Amon yewrutoponho kayaritomo me ecir̂ataw. Asakî cimn̂ipu makî tî xakn̂e kayaritomo me. Xerusaren tî xakn̂e noro yewton. Mesuremece tî xakn̂e yînocwan Arus yemsîrî, Xocba pono yemsîrî.

20 Kicicme tî Amon xakn̂e Kporin komo ya. Tîîmînhîrî pen wara rma tî xakn̂e kica Manases pen wara rma.

21 Tîîmînhîrî pen yehtoponho yaw roro rma tî xakn̂e kica. Mîk hak warai me ciixaputho ya tîmsom nakn̂iyakn̂e yîîmînhîrî pen, noro yipu komo ya tîmsom xa marha tî nakn̂iyakn̂e yumumuthîrî hara. Oporin amoro, kekn̂e marha tî noro yipu komo ya kica.

22 Kporin komo tî nahsîpînkekn̂e, ponaro tporin pen komo yehtopo ha. Kporin komo yehtopo yaw roro exihra xakn̂e okwe.

23 On wara takî tî xakn̂e noro, Amon, noro maywen komo rma takî tî n̂esencetken̂e waihkacho poko. Ero ke yîmîn yaw rma tî waihketken̂e okwe.

24 Ero yinhîrî kayaritomo pen wapatho komo takî tî waihketken̂e hara Xuta rowon pono komo. Ero yinhîrî yumumuthîrî takî tî n̂iir̂atken̂e kayaritomo me yîîmînhîrî pen retawno me hara. Xosias tî xakn̂e yumumuthîrî yosotî.

25 Taa, miya rma nai Amon pen yehtoponho. Tmewreso nasî karita yaw, Xuta Kayaritomon Komo Yehtoponho, kacho yaw.

26 Noro pen waipuche okoputhîrî takî tî nahruyatken̂e noro yokoputho yahrutopo ro yaka, Usa natîrî chewno yaka. Ero yinhîrî yumumuthîrî takî tî xakn̂e kayaritomo me noro pen retawno me hara. Xosias tî xakn̂e noro yosotî. Ero wa tî xakn̂e.