Ero yinhîrî takî tî on wara xakn̂e Esekias, okohme tî xakn̂e. Waiporo tî xakn̂e okwe. Ero ke yîhyaka tî cekn̂e Isaias, Amos mumutho. Kweronoman̂e tî mîk xakn̂e Isaias. On wara tî kekn̂e yîwya, Ai, oyakno Esekias, on wara tî nîîke Kporin komo awya, awemyawno yenîn̂e tak etacko, noro antomakî ero poko. Ero wa men esko. Mîwaiya tî, ecpîra tî nai awerekrî okwe, kekn̂e tî yîwya.

2-3 Ero yipu yentache on wara tî xakn̂e Esekias, mîîmo wacan wece makî tî n̂etaknamekn̂e. Kporin komo yakro tî nîmtapowakn̂e. On wara tî kekn̂e yîwya, Apa kah yawno, on wara cma re wîîkes awya, kir̂wan̂he oyehtoponho yîhcamnopîra cma re masî. Yaarono me xa apoko wîîxakn̂e apa, aponaro mak wîîxakn̂e roro. Anarî pona oyetow xera ro mak wîxakn̂e. An̂enîrî mexan me roro wîxakn̂e, kekn̂e tî. Ero wa tî kekn̂e Esekias. Nîwracekn̂e takî tî ahwora ro mak cexirî ke okwe.

4-5 Ero yimaw tî Isaias xakn̂e kayaritomo roron po rma ka. Iito rma ka exitaw noro yakro tî nîmtapowakn̂e xa hara Kporin komo. On wara tî kekn̂e yîwya, Ai Isaias, etoko xa hara Esekias yaka, oyanan komo yenîn̂e yaka. On wara kasko yîwya, On wara tî nîîke hara awya Kporin komo, ponaro aporin pen yehtopo, Tapi pen yehtopo ha, Amtapotarî wenta, awewyokrî marha wenwo. Ero ke kîkarices hara. Waipîra rma masî. Osorwaw ro enmapuche tak mîîcesî Aporin komo mîn yaka.

6 Waipîra rma ka masî. On wara tak awaitopo wukuknomesî, 15 cimn̂ipu xa hara nasî waipîra awehtopo. Kukurunpesî rma, Asiriu komo kayaritomon nar̂marî mera kiir̂asî. Xerusaren pono komo ahnoro wukurunpesî. Oyehtopo yesenpotome rma moxam wukurunpesî. Oyanton pen yanme marha wukurunpesî, Tapi pen yanme, nîîke Kaan awya, kasko yîwya, kekn̂e tî Isaias ya.

7 Ero ke ero wara rma tî kekn̂e Isaias Esekias ya. On wara marha tî kekn̂e yîwya, Piiku yeperîrî cirko awerekrî pona, kekn̂e tî. Ero ke piiku yepu yeperîrî tî n̂ekyatken̂e yîhyaka. Erekrî pona tî n̂iir̂atken̂e. Ero yinhîrî takî tî kir̂wan̂he xakn̂e hara. Ero wa tî xakn̂e.

8 On wara tko tî ka kekn̂e Esekias Isaias ya, Ahce warai na n̂enpe Kaan owya, Kir̂wan̂he wai hara mî amn̂e, kacho kuknon, Kporin komo mîn yaka kiwce hara mî osorwaw ro enmapuche, kacho kuknon ha. Ahce warai n̂enpe owya? kekn̂e tî yîwya.

9 On wara tî n̂eyukyakn̂e Isaias, On wara tî nai Kporin komo, kaamo tî n̂iir̂a anarme. Ero wa ti n̂iir̂a, Yaaro xa tan wîîkesî, omtapotachonho yaw roro rma kiiras amn̂e, kacho kuknon me. Mînto nai kaamo kuknon. Ahce wa ekantopo yekatî ciri xe mai yîwya an̂enîrî, kokon̂an wece tîtosom me ciri xe mai 10 kraw wicakî, pahxaxarono wece katî nîramanîya hara 10 kraw wicakî? kekn̂e tî yîwya.

10 On wara tî n̂eyukyakn̂e Esekias, Apehceme nasî kokon̂an wece totopo 10 kraw wicakî. Pahxaxarono wece xa tompe 10 kraw wicakî, yaw xa marha hara, kekn̂e tî.

11 Ero ke Kporin komo yakro takî tî nîmtapowakn̂e Isaias ero poko. Ero ke yaw xa marha takî tî cekn̂e ekantopo yekatî okyo, 10 kraw wicakî tî n̂etîramekn̂e. Ero wa tî n̂etîramekn̂e kokon̂an wece toxapunhîrî. Pahxaxarono wece tî n̂etîr̂amekn̂e. Ero wa tî kaamo n̂iir̂akn̂e Kporin komo.

12 Taa, ero yinhîrî takî tî on wara xakn̂e Babiron̂a pono komo kayaritomon. Berotake-Baratan tî mîk xakn̂e noro yosotî. Baratan pen mumutho tî mîk xakn̂e. Noro tî karita n̂ekpekn̂e Esekias yaka. Yîwya tîmsom marha tî n̂ekpekn̂e yîhyaka. Ero warai mko tî n̂ekpekn̂e yîhyaka, Okohme tî nai Esekias, kacho yentarî ke.

13 Tawake tî xakn̂e Esekias n̂examro poko. Tupurantan mîn tî n̂enpekn̂e yîwya so. Prata, ooru, knahrî poxun, katî cepethîkem, yukurunu mko, ahnoro makî tî cemyawno n̂enpekn̂e yîwya so. Enpon yîmtora ro makî tî xakn̂e tîmîn yawno. Miyanî rma tî n̂enpetîkekn̂e yîwya so cemyawno, tîrowon poko hakno mko ha. Ero wa tî n̂enpekn̂e yîwya so.

14 Ero yinhîrî takî tî Esekias yaka cekn̂e xa hara Isaias. On wara tî kekn̂e yîwya, Ai oyakno, Ahce wa ketken̂e pawana komo awya? Ahtono komo mîkyam mokyatken̂e awenso? kekn̂e tî yîwya. Meyeno komo mîkyam Babiron̂a pono kom ha, kekn̂e tî Esekias yîwya.

15 On wara tî kekn̂e hara Isaias, Ahce mko n̂een̂atken̂e amîn yawno ha? kekn̂e tî yîwya. On wara tî n̂eyukyakn̂e Esekias, Ahnoro n̂entîketken̂e oyemyawno, omîn yawno. Oyemyawno wenpetîkekn̂e yîwya so watohnî me ro mak, kekn̂e tî.

16-17 On wara tî kekn̂e Isaias Esekias ya, On wara nîîke Kporin komo awya, omtapotarî ka entakî, pahxaro tak ahnoro awemyawnonhîrî tak naar̂axe waapa komo Babiron̂a pona. Aporin pen komo n̂enmekîtho meero naar̂axe iina, an̂enmekîthîrî marha. Yîmton me ro mak naar̂axe, kesî Kporin komo awya.

18 Awepamthîrî komo meero tî naar̂axe kîrkomo, etpoi so mak. Ewnuku me tak natu Babiron̂a pono komo kayaritomon mîn yaw, kekn̂e tî yîwya.

19 On wara tî n̂eyukyakn̂e Esekias, Taa, ero wa ham. Kir̂wan̂he wencesî Kporin komo mtapotarî. Mokuhra nai ham kwaparî komo waipîra ka oyexitaw. Yaarono ponaro rma nat ham omaywen komo waipîra ka oyexitaw, kekn̂e tî. Ero wa kekn̂e Esekias.

20 Taa, miya rma nai Esekias yehtoponho, kar̂pe ehtoponhîrî. N̂ikitho n̂iir̂akn̂e, ero kwawno mohtopo n̂iir̂akn̂e marha, ewto pona mohtopo. Ero wa n̂iir̂akn̂e. Ahnoro noro yehtoponho nai tmewreso karita yaw, Xuta Yepamtho Kayaritomon Komo Yehtoponho, kacho yaw.

21 Ero yinhîrî nîwînîkyakn̂e takî tî Esekias pen tporin pen komo yakro. Ero yinhîrî takî tî yumumuthîrî xakn̂e kayaritomo me tîîmînhîrî pen retawno me hara. Manases tî xakn̂e noro yosotî. Ero xakn̂e.