Taa, on wara tî xakn̂e Esekias Habsake mtapotachonho yentache, tponon takî tî nahxaikekn̂e. Kumixitho makî tî namruyakn̂e. Kporin komo mîn yaka tî cekn̂e.

2 Ero yinhîrî takî tî tmaywen komo tî n̂en̂epekn̂e Isaias yaka hara. Kweronoman̂e tî mîk xakn̂e Isaias, Amos mumuru ha. On warai komo tî n̂en̂epekn̂e kayaritomo yîhyaka, Eriakin, kayaritomo mîn yenîn̂e mîkî, Sebna, karita mewren̂e ro mîkî, tîmsom pokono komo marha poritomo komo mak. N̂examro tî n̂en̂epekn̂e Isaias yaka. Kumixitho yaw so tî cetken̂e yîhyaka.

3 On wara tî ketken̂e Isaias ya, Ai apa, on wara tî nîîke Esekias, Kemetanmetopo me tak n̂enmapu ham okwe oroto, keitopo me marha, kicicitho yentacho me Kporin komo poko, ero warai me n̂enmapu ham oroto okwe. Wooxam wara xa taxe oroto tarkem wara. Takîhso nai rikomo anarimaw, ewrura tko nai yîson kar̂pera cexirî ke okwe. Ero wara rma taxe kîwyam oroto.

4 Habsake tî n̂en̂epekn̂e Asiria pono komo kayaritomon Kaan yîwîrîyakachome kica, karitî yîwîrîyakachome ha. Yîmtapotachonhîrî rma na n̂ence Kporin komo, ponaro awehtopo. Ero yanme na Asiria pono komo kayaritomon na panare kicicme yîmtapotachonhîrî poyero. Ero rma n̂enta Kaan, ponaro awehtopo. Ero ke Noro yakro men amtapotakî amoro amna poko, asak makno me etîmtoxapu poko, kacoko Isaias ya, kekn̂e tî Esekias.

5 Ero ke ero wa kaxi tî Esekias maywen komo cetken̂e Isaias yaka.

6 Yîmtapotarî komo yentache on wara tî kekn̂e Isaias yîwya so, On wara kacoko akayaritomon komo ya, On wara kesî Kporin komo awya, Erasîra esko yîmtapotarî komo pona, Asiria pono komo kayaritomon maywen komo mtapotarî pona. Kicicitho me nîmtapotacow opoko, ero wa kacho pona erasîra ehcoko.

7 On wara men noro wiir̂asî, ekatî wiir̂asî yîropotaka anarî ro. Tapota marha tak n̂encesî ceserepokacho. Ceken pona tak n̂etîrames hara. Iito rma tak noro pen waihkapesî kacipara imo ke, kekn̂e tî Isaias yîwya so.

8 Ero yinhîrî takî tî cekn̂e hara Habsake. Ribna pona tî cekn̂e Asiria pono komo kayaritomon yaka. Iitono komo yakro makîrha takî tî n̂etar̂mekn̂e kayaritomo ero yimaw. Noro yekaci tî n̂encekn̂e Habsake, Ribna pona tak toi hara kayaritomo, kacho tî n̂encekn̂e. Ero ke tî iina cekn̂e yîhyaka.

9 Ero yinhîrî takî tî Eciopia pono komo kayaritomon yekaci n̂encekn̂e Asiria pono komo kayaritomon. Ciraka tî xakn̂e Eciopia pono komo kayaritomon yosotî. Noro men mokya awaparî me, kacho tî n̂encekn̂e. Ero ke tîmtapotarî yekatîmn̂e komo tî n̂en̂epekn̂e xa hara Senakeribe Esekias yaka.

10 On wara tî kekn̂e ekatîmn̂e komo ya, On wara kacoko Esekias ya, Xuta komo kayaritomon ya, Tohnaw men nîîke Kaan, ponaro awehtopo, Xerusaren pono komo yar̂mara ro mak nasî Asiria pono komo kayaritomon, nîîke tohnaw ro mak okwe.

11 Mentace rma na Asiria pono kayaritomon komo yehtoponho. Mîn hak pono komo waihkatîkan̂enho mîkyam. Ero ke waipîra ma re matu amyamro hara?

12 Oporin pen komo waihketken̂e Kosan pononho pen komo, Aran pononho pen komo, Hesepe pononho pen komo, Eten pononho pen komo, Terasa po xatken̂e n̂examro pen. N̂examro pen yukurunpera xatken̂e ponaro ehtopo kom ha.

13 Ahto tak natu Amace pononho pen komo kayaritomon, Ahpace pononho pen komo kayaritomon, Sepahpain pononho pen komo kayaritomon, Ena pononho pen komo kayaritomon, Ipa pononho pen komo kayaritomon? Exihra tak naxe okwe, kacoko Esekias ya, kekn̂e tî yîwya so. Ero wa kacho tî mewrekn̂e karita yaka.

14 Ero ke takî tî Asiria pono komo kayaritomon karitan tî nahsîyakn̂e Esekias, mohxapu komo n̂ekîtho. N̂een̂akn̂e takî tî. Ero yinhîrî Kporin komo mîn yaka takî tî cekn̂e. Iito tî karita namomhokekn̂e Kporin komo yeepatai rma.

15 Kporin komo yakro tî nîmtapowakn̂e. On wara tî kekn̂e yîwya, Apa kah yawno, ponaro Ixaw Yana komo yehtopo xa Amoro. Kerubin yotawno Amoro. Amoro mak Amoro Kaan ha. Ahnoro roowo poko hakno komo kayaritomon Amoro, kayaritomo komo kayaritomon ha. Kaapu yakîhton̂enho Amoro, roowo yakîhton̂enho marha.

16 Senakeribe mtapotachonho cma re mences Apa, noro karitan marha cma re meen̂asî. Kaan Amoro apa, awîrîyakacho rma on noro karitan, karitî yîwîrîyakacho xa.

17 Yaaro rma re mîk hak rowon pono pen komo waihketken̂e Asiria pono kayaritomon komo. Ewtonthîrî komo marha nakn̂iyatken̂e.

18 Ponaro n̂examro pen yehtoponho kuknontho marha nakn̂iyatken̂e, nakuhr̂apetken̂e anarimaw. Kaan pînî ro mak mînî mko xakn̂e okwe, tooto n̂iritho mak mîn xakn̂e, weewe, toopu, ero yipu enporixapu mak mîn xakn̂e. Ero ke kr̂a nakuhr̂apetken̂e.

19 Ero ke on wara xa wîîkes awya Apa. Kaan Amoro, oporin xa. Amna cma re mukurunpesî amna waihkara ehtome. Ero wa amna yukurunpeko aponaro ehtome so kayaritomo komo, roowo poko hakno komo rma. On wara tak kexe n̂examro ero yimaw, Noro mak ham Kaan, anarî exihra ro mak nasî, kexe apoko. Ero wa kachome amna cma re mukurunpes Apa, kekn̂e tî. Ero wa tî kekn̂e Esekias Kporin komo ya.

20 Ero yinhîrî takî tî Kaanî mtapotarî n̂ekatîmyakn̂e Isaias Esekias ya. On wara kacho tî n̂ekatîmyakn̂e yîwya, On wara kesî Kporin komo, ponaro Ixaw Yana komo yehtopo, Amtapotarî wenta, Senakeribe poko mîîka, Asiria pono komo kayaritomon poko, ero, kesî awya.

21 On wara kesî Kporin komo Noro poko, Emasî wara rma naxe Xerusaren pono komo, Siaw yemsîrî wara. On wara nasî Siaw yemsîrî apoko, awîrîyakesî. Apoko mak n̂ewresî. Awemaciyataw n̂epanamesî mak apoko awîrîyakacho me.

22 Onoke xa mîwîrîyaka? Onoke poko xa kicicitho me mîmtapota kica? Onok poko xa kar̂pe xa mîmtapota ha? Onoke wece xa menwo cehcoyoponkaxmu wara? Owî rma mîwîrîyaka, Kir̂wanî ro xa, ponaro Ixaw Yana komo yehtopo.

23 Amaywen komo ya Aporin komo mîwîrîyakapo kica. On wara mîîka, Mer̂pora ro mak exirî ke otararan îîpî mko wawnukye meretkoso xa. Ribanu pono xa wawnukye. Kaw rma re nasî setru iitono. Kir̂wan̂he nasî siprexte yepu iitono. Ero yipu rma tko war̂mesî. Ribanu mapitaka roro kîwcesî comota pona roro kir̂wanî ro pona.

24 Otunarî marha wahcekn̂e anarî yana komo yeken po. Iitono tak weer̂akn̂e. Ohtarî ke rma aporî mko wuturpamnoyakn̂e Exitu pono mko pen ha, mîîka kica. Ero wa mîîka kica.

25 Entara na mehxe oyehtoponho? Pahxa rma awehtopo wukuknomekn̂e. Wîhtînoyakn̂e rma pahxa rma. Oroto tak awehtopo wenpesî. Ewto mko yakuhr̂apon̂e me kiir̂akn̂e, twacayem yakuhr̂apon̂e me rma. Yukpurukpuruntho warai me ciin̂e me kiir̂akn̂e ha.

26 Ero ke ewto pono komo xatken̂e kar̂pera. Ero ke nahwoketken̂e, n̂ehn̂etken̂e marha okwe. Cuupu wara mak xatken̂e woskara pono wara. Peen wara marha xatken̂e taakem wara. Cuupu wara rma xatken̂e mîîmo poci me ciixapu wara. Payanwa anarî hara cuupu kir̂wan̂he atîhtara. Ero wa xa marha xatken̂e anwaikathîrî pen komo.

27 Awekenî rma tko wa ween̂as Ow. Ahna na awtotopo ween̂asî, amohtopo marha ween̂as hara. Opoko arwonîmtopo ponaro marha wasî.

28 Wara ro mak mîmtapowasî kica opoko, rîîwo me ro mak. Ero warai rma wencesî, kicicitho me amtopotarî. Ero ke okiwin wiir̂asî awewnarî yaka. Kawaru yewkor̂macho warai marha wiir̂as amtaka. Ero yipu ke tak kewyaknamesî. Awesamathîrî yaw xa marha ken̂epes hara, kesî Kporin komo awya, kekn̂e Isaias yîwya so, Esekias maywen komo ya.

29 On wara marha tî kekn̂e Isaias yîwya Esekias ya xa tak, Taa, on warai wenpes awya Esekias, kakro so rma nai Kaan ham kachome awya. On cimn̂ipu po tanme ro mak atîhtaxapu yeperîrî ka mahyaxe. Ponan po tak ero yipu xa marha ka mahyaxe, tanme ro mak atîhtaxapu yeperîrî ha. Mîk ha mehxan po tak anatîrî komo tak ciicoko. Ero yeperîrî marha enmecoko. Uupa yatî marha ciicoko ero yeperîrî yahtome awya so.

30 Asak makno amyamro Xuta yepamtho komo, etîmtoxapu komo mak ha. Wara rma yuhnaka cimicintaxmu wara tak maxe hara amn̂e. Cepetaxmu wara marha maxe.

31 Xerusaren poi tak cexe amn̂e asak makno komo, etîmtoxapu kom ha. Waapa nwaihkatho pîn komo mîkyam cexe Siaw Yîpîn poi. Ero wa awir̂axe so Kporin komo aaxe ro mak cexirî ke, kesî Kporin komo awya.

32 Taa, on wara kesî Kporin komo Asiria pono komo kayaritomon poko xa hara, On ewto pona epatakara ro mak nasî. Waiwî marha ar̂mara nas on wece. On panaka mokuhra nasî cecen̂an ke cemyarke. Tantono marha enmekîra nasî roowo cecen̂an me.

33 Esama yaw mokyakn̂e, ero yaw xa marha n̂etîrames hara. On ewto pona epatakara nasî, kesî Kporin komo awya.

34 On ewto wukurunpesî yixkara ro mak ehtome so. Oyewton me exirî ke wukurunpesî, Tapi yewtontho me exirî ke marha. Oyanton me xakn̂e noro, ero ke noro yewtontho wukurunpesî, kes awya, kekn̂e tî. Ero wa kacho tî n̂ekatîmyakn̂e Isaias Esekias ya.

35 Ero yinhîrî takî tî ero po rma kosope Kporin komo yancun takî tî cekn̂e Asiriu sowtatun komo chere. Asiriu pen komo tî waihkekn̂e mer̂pono pînî ro mak, 185.000 okyo. Enmapuche tak waipîn komo cik pakache okoputhîrî pen makî tî n̂een̂atken̂e kopi.

36 Ero ke ceken pona takî tî n̂etîramekn̂e hara Senakeribe, Asiria pono komo kayaritomon. Iito mak takî tî xakn̂e N̂in̂epe po.

37 Ero yinhîrî takî tî anarî kaamo po ponaro cehtopo mîn yaka tî cekn̂e Senakeribe noro poko ahwotaxi. N̂isiroke tî xakn̂e ponaro noro yehtopo yosotî. Iito exitaw yumumuru komo marha tî xatken̂e asakî. Atîramereke tî xakn̂e anarî yosotî, Sarese tî xakn̂e anarî yosot hara. Tîîmînhîrî pen tî paraxketken̂e kacipara imo ke. Noro pen waihkache n̂emahciyatken̂e miya Ararace rowon pona. Ero yinhîrî anarî takî tî xakn̂e kayaritomo me yîhretawno me hara. Yumumuthîrî rma mîk xakn̂e, Esa-Aton tî xakn̂e noro yosotî. Ero wa tî xakn̂e.